Uro Karaia Tauna Badana ese Oi Ia Hamaoromaoroa Noho, a?
“Umui be lauegu imana dekenai umui noho, raro be uro karaia tauna ena imana dekenai ia noho hegeregerena.”—IER. 18:6.
ANE: 60 [23], 22
1, 2. Dahaka dainai Dirava ese Daniela ia “lalokau henia bada,” bona edena dala ai Daniela ita tohotohoa diba?
IUDA taudia be Babulonia dekenai idia ginidae neganai, idia itaia unai taoni ai kaivakuku be momo bona unuseni idia noho taudia be lauma dikadia ese ia guidia. To, abidadama Iuda taudia, hegeregere Daniela bona ena bamodia toi, be idia ura lasi Babulonia taudia edia kara idia tohotohoa. (Dan. 1:6, 8, 12; 3:16-18) Daniela bona ena bamodia ese edia lalona idia hadaia Iehova sibona, Uro Karaia Tauna unai, do idia tomadiho henia. Bona idia kwalimu! Ena be kahirakahira Daniela ena mauri ibounai lalonai Babulonia dekenai ia noho, to Dirava ena aneru ia gwau, Dirava be Daniela ia “lalokau henia bada.”—Dan. 10:11, 19.
2 Baibel negadiai, uro karaia tauna ese raro do ia hamaoromaoroa ela bona ena ura gauna ai ia halaoa. Tomadiho momokani taudia idia abia dae Iehova be Guba bona Tanobada edia Lohia Badana, bona ia be mai ena siahu bese ibounai taudia ia hamaoromaoroa totona. (Ieremia 18:6 duahia.) Danu, Dirava be mai ena siahu ita ta ta ia hamaoromaoroa totona. To, ia diba ita be mai iseda ura kwalimu bona ia ura ita sibona ese abia hidi ita karaia ia ita badinaia totona. Edena dala ai Dirava ena imana ai ita be raro manokana bamona? Mani inai gaudia toi ita herevalaia: (1) Edena dala ai kudouna ia ha-aukaia karadia ita dadaraia unai amo Dirava ena sisiba ita abia dae diba? (2) Edena dala ai kara namodia ita hahedinaraia, unai amo mai manau ida Dirava ita badinaia noho? (3) Keristani tama sina be edia natudia idia hamaoromaoroa neganai, edena dala ai Dirava idia badinaia diba?
KUDOUNA IA HA-AUKAIA KARADIA DADARAIA
3. Edena bamona karadia ese iseda kudouna idia ha-aukaia diba? Haheitalai gwauraia.
3 Aonega Herevadia 4:23 ia gwau: “Gau badana momokani, oiemu kudouna, oiemu laloa ia havaraia gauna, do oi naria namonamo, badina be oiemu laloa dekena amo, oiemu mauri be ia heau noho.” Edena bamona karadia ese iseda kudouna idia ha-aukaia diba? Idia be hekokoroku, kara dikadia, bona abidadama lasi karana. Unai karadia dainai ita gwau-edeede diba. (Dan. 5:1, 20; Heb. 3:13, 18, 19) Iuda ena king Usaia be ia hekokoroku. (2 Sivarai 26:3-5, 16-21 duahia.) Matamanai, Usaia be “Lohiabada ena vairanai ia kara maoromaoro,” bona “Lohiabada ia tahua.” To “ia goada neganai, iena hekokoroku ia vara,” ena be Dirava amo ena siahu ia abia! Danu, dubu helaga lalonai ia vareai bona bonana namona muramura ia gabua toho—Arona ena iduhu taudia sibona ese idia karaia karana unai. Bena, hahelaga taudia ese ia idia hereva henia neganai, ia hekokoroku dainai ia badu! Dahaka ia vara? Dirava ese lepera gorerena amo ia panisia ela bona ia mase.—Aon. 16:18.
4, 5. Bema ita naria namonamo lasi bona ita hekokoroku, dahaka ia vara diba? Haheitalai gwauraia.
4 Bema ita naria namonamo lasi, ita danu be “sibona do [ita] laloa bada” matamaia, bena Baibel ena sisiba do ita dadaraia. (Roma 12:3; Aon. 29:1) Keristani elda tauna Jim ena haheitalai mani ita laloa. Ia be elda taudia ma haida ida kongrigeisen ena gaudia haida dekenai ia lalotamona lasi. Jim ia gwau: “Tadikaka lau hamaorodia idia be lalokau idia hahedinaraia lasi, bona unai hebou lau rakatania.” Hua 6 bamona murinai, kongrigeisen ma ta dekenai ia hanaia lao, to unuseniai ia be elda tauna ai idia halaoa lasi. Ia gwau: “Lau lalohisihisi bada. Sibona laloa bada karana dainai hereva momokani lau rakatania.” Jim be lagani 10 lalonai hebou dekenai ia lao lasi. Ia gwau: “Egu hekokoroku karana dainai lau badu, bona lau dekenai unai ia vara dainai, Iehova dekenai lau badu. Lagani momo lalonai, tadikaka be lau idia vadivadi henia, bona lau idia durua toho, to edia heduru lau dadaraia.”
5 Jim ena ekspiriens ese ia hahedinaraia, hekokoroku dainai ta do ia laloa ia be maoro, bona ena kudouna do ia ha-aukaia. (Ier. 17:9) Jim ia gwau: “Egu lalohadai dekenai lau laloa elda taudia be kerere bona unai lau laloaboio diba lasi.” Emu tadikaka o taihu ta ena kara dainai o hahenamo haida oi haboioa dainai emu lalona ia hisihisi, a? Bema oibe, dahaka oi karaia? Hekokoroku lalohadaina ia daekau, a? Eiava oi ura bada emu tadikaka taihu ida maino oi karaia bona Iehova oi badinaia noho, a?—Salamo 119:165; Kolose 3:13 duahia.
6. Bema kara dika ita karaia noho, dahaka ia vara diba?
6 Bema ta be kara dika ia karaia noho, bona reana hehuni dalanai unai ia karaia, ia ese Baibel ena sisiba do ia dadaraia diba. Ia dekenai do ia auka lasi ia kara dika noho totona. Tadikaka ta dekenai unai ia vara, bona unai ia laloa bada lasi. (Had. 8:11) Tadikaka ma ta be ponografi laulaudia ia itaia, bona gabeai ia gwau: “Unai lau karaia dainai elda taudia lau gwauraidia dika matamaia.” To unai ese metairametaira ena hetura karana Iehova ida ia hadikaia. Daudau lasi, ia karaia kara dikana be ia hedinarai, bona heduru ia abia. Momokani, ita ibounai be goevadae lasi. To, bema ma haida ita gwauraia dika o ita gwau ita karaia karana be maoro bona Dirava ita noia lasi ita ia gwauatao bona durua, reana iseda kudouna be ia auka vadaeni.
7, 8. (a) Edena dala ai Israela taudia ese abidadama lasi karana idia hahedinaraia? (b) Unai amo dahaka ita dibaia?
7 Abidadama lasi karana ese ta ena kudouna ia ha-aukaia diba. Haheitalai be Israela taudia, Iehova ese Aigupito amo ia ruhaia taudia unai. Unai bese be Dirava ese ia karaia hoa karadia momo idia itaia! To, Gwauhamata Tanona kahirakahira idia mai neganai, abidadama lasi karana idia hahedinaraia. Iehova dekenai idia abidadama lasi, to idia gari bona Mose dekenai idia maumau. Bona idia ura Aigupito dekenai idia giroa lou, ena be unuseniai idia be igui hesiai gaukarana idia karaia! Iehova ia lalohisihisi bada. Ia gwau: “Inai taunimanima be lau dekenai do idia kamonai henia lasi ela bona edena negai?” (Num. 14:1-4, 11; Sal. 78:40, 41) Edia kudouna ia auka bona edia abidadama lasi karana dainai, tano gagaena ai idia momo idia mase ore.
8 Hari, tanobada matamata ia kahirakahira dainai, iseda abidadama be gau momo ese idia tohoa. Unai dainai iseda abidadama ita sekea be namo. Hegeregere, iseda lalohadai Iesu ena hereva Mataio 6:33 dekenai ita tahua. Sibona ita nanadaia: ‘Lau laloa bada gaudia bona karaia abia hidi ese idia hahedinaraia lau be Iesu ena hereva lau abidadama henia, a? Hebou o haroro gaukara do lau reaia, badina lau ura egu moni gaukara lau habadaia, a? Bema moni gaukara ena presa ia bada, dahaka do lau karaia? Lau ese tanobada ena lalohadai do lau abia dae, bona hereva momokani do lau rakatania, a?’
9. Dahaka dainai ita “tahua noho” bema eda abidadama ita dogoatao noho eiava lasi bona edena dala ai ita karaia?
9 Mani Iehova ena hesiai tauna ta oi laloa, ia be Baibel ena taravatu, reana atoa siri taudia bamoa karana, hebamo karadia o moale karadia dekenai ia badinaia lasi. Sibona oi nanadaia, ‘Lau be unai bamona lau karaia, a?’ Bema ita be unai bamona ita karaia noho, namona be iseda abidadama ita sekea haraga! Baibel ese ita ia sisiba henia: “Do umui tahua noho bema umui be emui abidadama umui dogoatao noho eiava lasi, bona do umui hamomokania noho umui be edena bamona taudia.” (2 Kor. 13:5) Namona be nega ibounai mai momokani ida Dirava ena Hereva amo sibona ita tahua.
EMU KUDOUNA HA-AUKAIA LASI
10. Dahaka ese ita do ia durua, unai amo Iehova ese ita ia hamaoromaoroa diba?
10 Raro manokana bamona ita noho totona, Dirava ese ita dekenai iena Hereva, Keristani kongrigeisen, bona haroro gaukara ia henia. Ranu ese raro ia hamanokaia bamona, dina ta ta ai Baibel ita duahia bona laloa dobu karana ese ita do ia durua, unai amo Iehova ese ita ia hamaoromaoroa diba. Iehova ia ura Israela taudia edia king ibounai ese idia sibodia totona Dirava ena Taravatu do idia torea bona dina ta ta ai do idia duahia. (Deu. 17:18, 19) Aposetolo taudia idia diba edia haroro gaukara ia durua totona, Toretore helagadia idia duahia bona laloa dobu be mai anina bada. Edia toretore ai, nega momo Heberu Toretoredia idia duahia bona herevalaia, bona idia haroro henia taudia idia hagoadaia unai do idia karaia danu. (Kara 17:11) Hari, dina ta ta ai Dirava ena Hereva ita duahia bona mai guriguri ida ita laloa dobu be mai anina bada. (1 Tim. 4:15) Unai bamona ita karaia neganai, Iehova vairanai do ita manau bona do ia auka lasi ia ese ita ia hamaoromaoroa totona.
Dirava ese ia henia gaudia gaukaralaia unai amo do ia auka lasi ia ese ita ia hamaoromaoroa totona (Paragraf 10-13 itaia)
11, 12. Iehova ese edena dala ai Keristani kongrigeisen ia gaukaralaia ita ta ta ia hamaoromaoroa totona? Haheitalai gwauraia.
11 Keristani kongrigeisen amo, Iehova be ita ta ta ia hamaoromaoroa diba, eda manoka gauna hegeregerena. Matamanai ita herevalaia tadikakana Jim be elda ta ese ia durua dainai, ena kara ia haidaua matamaia.
Jim ia gwau: “Inai tadikaka be lau dekenai idia vara gaudia dainai lau ia bleim lasi. To, hereva namodia sibona ia gwauraia bona ia hahedinaraia ia ura lau ia durua.” Hua toi bamona murinai, unai elda ese Keristani hebouna dekenai Jim ia boiria. Jim ia gwau: “Tadikaka taihu ese mai moale ida lau idia welkam henia. Bona edia lalokau karana ese egu mauri ia haidaua matamaia. Lau laloparara egu lalohadai be gau badana lasi. Tadikaka taihu bona egu lalokau adavana edia heduru dainai, egu hetura karana Iehova ida lau hagoadaia matamaia. Danu, November 15, 1992 Gima Kohorona, ena atikol ladana ‘Iehova Dekenai Kerere Ita Atoa Lasi’ bona ‘Iehova Ena Ura Badinaia’ ese lau idia hagoadaia bada.”12 Daudau lasi, Jim be elda tauna ai ia lao lou. Unai nega amo, ia ese tadikaka ma haida ia durua guna ia abia hahetoho idia hanaia bona edia abidadama idia hagoadaia totona. Ia gwau: “Lau laloa egu hetura karana Iehova ida be ia goada, to lasi! Lau lalohisihisi badina hekokoroku dainai mai anina bada gaudia lau laloa lasi, to ma haida edia kerere sibona lau laloa bada.”—1 Kor. 10:12.
13. Haroro gaukara ese ita ia durua edena bamona kara ita hahedinaraia totona, bona dahaka namo ita abia?
13 Edena dala ai haroro gaukara ese iseda namo totona ita ia hamaoromaoroa diba? Ma haida ida ita haroro neganai, unai ese ita durua ita manau bona Dirava ena lauma helaga ena huahua idauidau ita hahedinaraia totona. (Gal. 5:22, 23) Haroro gaukara ai oi hahedinaraia kara namodia mani oi laloa. Danu, Keristani kara namodia ita hahedinaraia neganai, ita ese ita harorolaia sivaraina ita hanamoa, bona unai ese kamonai taudia edia lalona ia veria diba. Hegeregere, Australia ai, taihu rua be mai hemataurai ida idia ia hereva auka henia tauna ena hereva idia kamonai. To gabeai, unai ruma hahinena ia sori bona brens ofesi dekenai revareva ta ia siaia. Unai revareva ena kahana ta ia gwau: “Idia haheauka bona manau taudia rua dekenai, lau ura sori herevana lau gwauraia, badina lau be sibona lau laloa bona lau kara maoro lasi. Lau kerere bada badina Dirava ena Hereva idia loalaia taudia rua vairanai lau gini bona idia lau lulua toho.” Bema unai pablisa rua idia badu, oi laloa unai ruma tauna ese unai revareva do ia torea, a? Reana lasi. Oibe, iseda haroro gaukara ese ita bona ma haida dekenai namo bada ia havaraia diba!
EMU NATUDIA OI HAMAOROMAOROA NEGANAI DIRAVA TOHOTOHOA
14. Tama sina be edia natudia idia hamaoromaoroa neganai dahaka idia karaia be namo?
14 Natudia maragidia momo be idia ura diba idia abia, bona idia manau. (Mat. 18:1-4) Unai dainai, namona be aonega tama sina idia hekwarahi edia natudia edia lalona bona kudouna ai hereva momokani idia atoa. (2 Tim. 3:14, 15) Idia kwalimu totona, namona be tama sina ese hereva momokani be sibodia edia kudouna ai idia atoa guna, bona edia mauri ai idia badinaia. Tama sina be unai idia karaia neganai, edia natudia ese hereva momokani do idia kamonai sibona lasi, to do idia badinaia. Danu, do idia abia dae edia tama sina ese idia lalokau henidia dainai idia sisiba henidia, bona unai ese Iehova ena lalokau ia hahedinaraia.
15, 16. Edena dala ai tama sina ese idia hahedinaraia idia be Dirava idia abidadama henia, bema edia natuna be orea amo idia atoa siri?
15 Ena be natudia haida be Keristani ruma bese lalonai idia tubu, to gabeai hereva momokani idia rakatania o orea amo idia atoa siri, bona famili idia lalohisihisi. South Africa ai ia noho taihu ta ia gwau: “Egu kakana idia atoa siri neganai, unai be hegeregere ia mase. Bona lau lalohisihisi bada!” Ia bona ena tama sina be dahaka idia karaia? Idia ese Dirava ena Hereva ai ia noho hakaua herevana idia badinaia. (1 Korinto 5:11, 13 duahia.) Edia tama sina idia gwau: “Lalona ai hadaia Baibel ena hereva ai badinaia totona. Ai diba bema Dirava ena dala ai badinaia, namo ia vara diba. Ai abia dae ta idia atoa siri karana be Dirava ena matahakani mai lalokauna ena toana bona ia be maoro. Unai dainai, ruma bese lalonai mai anina bada gaudia sibona ai ura herevalaia neganai, emai natuna ida ai hereva diba.”
16 Edia natuna be edena bamona ia mamia? Gabeai ia gwau: “Lau diba egu famili be lau idia inai henia lasi, to idia be Iehova bona ena orea idia badinaia.” Ma ia gwau: “Iehova oi noia goadagoada oi do ia durua bona emu dika do ia gwauatao neganai, iena heduru do oi mamia momokani.” Edia natuna mero idia abia lou neganai, idia moale bada! Oibe, bema iseda mauri ibounai lalonai Dirava ita badinaia, namo bada do ita davaria.—Aon. 3:5, 6; 28:26.
17. Dahaka dainai iseda mauri ibounai lalonai Iehova ita badinaia be namo, bona dahaka namo do ita abia?
17 Peroveta tauna Isaia ese Iuda taudia be Babulonia idia rakatania negana ia herevalaia. Unai nega ai idia helalo-kerehai taudia do idia gwau: “To Lohiabada e, oi be aiemai Tamana. Ai be raro bamona, bona oi be raro gaukaralaia tauna bamona. Oi ese ai oi karaia vadaeni.” Bena do idia noinoi: “Aiemai kara dika mani do oi laloa noho lasi ela bona hanaihanai. Ai be oiemu bese, mani ai dekenai do oi bogahisihisi.” (Isa. 64:8, 9) Bema mai manau ida Iehova ita badinaia, iseda mauri ibounai lalonai, ia ese ita do ia lalokau henia bada, peroveta tauna Daniela bamona. Ma danu, Iehova ese iena Hereva, lauma, bona orea amo ita do ia hamaoromaoroa noho, unai amo dina ta ita be “Dirava ena natudia” goevadaedia bamona iena vairanai do ita gini.—Roma 8:21.