UNAI buka lau kehodia neganai, laulau idauidau ese egu lalona ia veria. Unai dainai, lau maragi neganai, lau ura unai buka namodia ai idia noho Baibel ena hereva lau dibaia.

India ai, Tanobada Tuarina Iharuana ia matamaia neganai, egu mauri ia idau. Egu tama sina idia parara bena gabeai idia divos. Lau lalokau henia taudia rua idia parara ena badina lau lalopararalaia lasi. Lau lalometau bona lau mamia lau be sibona lau noho. Lau be sibona lau vara, bona ia auka egu tama sina amo hahegoada bona heduru lau abia totona.

Lau bona egu sinana be Karachi taoni dekenai ai noho. Dina ta, tau burukana ta ladana, Fred Hardaker, be emai iduara ai ia pidipidi. Ia be doketa bona Iehova ena Witnes tauna ta. Ia bona egu tama sina dekenai buka ia henia tauna edia abidadama be tamona. Egu sinana ia nanadaia bema ia ura Baibel ia stadilaia, to egu sinana ia ura lasi, ia hadibaia lau ia stadi henia diba. Vaira wiki ai, Tadikaka Hardaker ida lau stadi.

 Wiki haida murinai, Tadikaka Hardaker ena kliniki ai Keristani heboudia lau lao matamaia. Unuseniai, Witnes burukadia 12 bamona idia hebou. Edia natuna bamona, lau idia hagoadaia bona laloa bada. Lau laloatao egu badinai idia helai bona tura korikoridia bamona lau idia hereva henia, edia hereva ese hanaihanai lau ia hagoadaia.

Daudau lasi murinai, Tadikaka Hardakar ese lau ia boiria haroro gaukara ai ia lau bamoa totona. Ia ese rekodi masini gaukaralaia dalana ia hadibaia, unai amo Baibel tok kwadogidia ai gadaralaidia diba. Tok haida ese ruma taudia edia lalona ia hahisia, bona haida be idia ura lasi kamonai. To, haroro gaukara lau moalelaia. Baibel ena hereva momokani lau ura henia bada bona lau ura ma haida dekenai lau herevalaia.

Japan ena ami be India tanona ai idia vareai neganai, Britain ena siahu taudia ese Iehova ena Witnes taudia idia hametaua bada. Lagani 1943 July ai, unai hekwakwanai ese egu mauri ia haidaua. Egu sikuli ena hedmasta, ia be Anglikan dubu ena tau badana ta, ese sikuli amo lau ia kokia. Egu sinana ia hamaoroa, lau be haheitalai dikana egu sikuli turadia dekenai, badina lau be Iehova ena Witnes merona. Egu sinana ia hoa bona lau ia koua Witnes taudia lau bamoa lasi totona. Gabeai, egu tamana dekenai lau ia siaia, ia be Peshawa ena not kahanai ia noho. Ena daudau be kilomita 1,370 bamona. Hebou momo lau reaia bona tadikaka taihu lau bamodia lasi, unai ese egu hetura karana Iehova ida ia hamanokaia.

Lagani 1947 ai, moni gaukara tahua totona Karachi dekenai lau giroa lou. Unuseniai, doketa Hardaker lau vadivadi henia. Ai hedavari neganai, ia moale bada.

Ia henanadai: “Dahaka gorere oi abia?” Ia laloa lau be muramura abia totona lau lao.

Lau gwau: “Lau be lau gorere lasi. To lauma dalanai lau manoka. Lau ura Baibel amo lau oi stadi henia.”

Ia henanadai, “oi ura edena negai ita hamatamaia?”

Lau haere, lau gwau “bema hegeregere, hari sibona.”

Unai adorahi ai, Baibel ai stadilaia. Lau mamia lau goada lou, badina Iehova ena taunimanima ida lau hebamo. Egu sinana ia ura lau ia koua Iehova ena Witnes taudia ida lau hebamo lasi totona, to egu lalona lau hadaia Iehova do lau hesiai henia. Iehova dekenai egu mauri lau gwauhamatalaia bona lagani 1947, August 31 ai, ranu lalonai bapatiso lau abia. Bena egu mauri lagani be 17 neganai, regula painia gaukara lau hamatamaia.

Egu asainmen ginigunana be Quetta ai. Guna, Britain ami edia kamepa gabuna. Lagani 1947 ai, Quetta tanona idia hapararaia bona hari idia gwauraia India bona Pakistan. * Unai ese tomadiho idauidau lalonai dagedage bada ia havaraia, bona taunimanima milioni momo be edia tano idia rakatania bona tano ma ta dekenai idia lao. Refiuji taudia 14 milioni bamona be edia noho gabudia idia haidaua. India ai idia noho Muslim taudia be Pakistan dekenai idia lao, bona Pakistan ai idia noho Hindu bona Sikh taudia be India dekenai idia lao. Herevana unai hekwakwanai ia vara, to Karachi amo trein lau guia bona Quetta dekenai lau lao.

Quetta ai, mauri lagani 20 spesel painia ta, George Singh ida lau hedavari. George ese lau dekenai basikele ta ia henia, unai amo ororo gabudia idia noho teritori lau lao diba. Nega momo lau sibona lau haroro. Hua siks lalonai, Baibel stadi 17 lau karaia bona idia haida be hereva momokani lalonai idia vareai. Egu stiuden, ami ofesa tauna, Sadiq Masih ese lau bona George ia durua Urdu gado ai, Baibel buka haida ai hahanaia totona. Unai be Pakistan taudia edia gado badana. Unai nega amo, Sadiq be sivarai namona harorolaia goadagoada tauna ai ia lao.

Gabeai, Karachi dekenai lau giroa lou bona tadikaka Henry Finch bona Harry Forrest ida lau gaukara, idia be Gilead Sikuli amo idia mai misinari taudia. Idia ese tiokratik dalanai lau idia hadibaia namonamo! Nega ta, haroro totona Tadikaka Finch lau bamoa bona Pakistan ena not kahana ai lao. Unai gabu ena ororo hanuadia ai, Urdu gado ai idia hereva taudia momo ai davaria, idia be Baibel ena hereva  momokani totona idia ranu mase. Lagani rua murinai, Gilead sikuli lau lao; unai murinai Pakistan dekenai lau giroa bona sekit naria tauna lau durua. Lau bona misinari tadikaka toi be Lahore misinari rumana dekenai ai noho.

Lagani 1954 ai, Lahore misinari rumana ai, misinari taudia huanai hepapahuahu ia vara. Unai dainai brens ofesi tadikakadia ese emai asainmen idia haidaua. Lau lalomaoromaoro lasi dainai, hepapahuahu lalonai lau vareai, unai dainai sisiba aukana lau abia. Lau lalohisihisi bona lau mamia egu asainmen lau hagugurua diba lasi. Karachi dekenai lau giroa lou bona unuseni amo London, England dekenai lau lao, lau laloa reana unuseni egu hesiai gaukara lau goadalaia lou diba.

London ai, lau noho kongrigeisen be Betele ai idia gaukara tadikaka taihu momo idia noho. Guna, brens ofesi ia naria tadikakana, Pryce Hughes be mai lalokau ida lau ia durua. Nega ta, lau dekenai ia gwau, ia danu be tadikaka Joseph F. Rutherford ese sisiba aukana ia henia. Unai nega ai, tadikaka Rutherford be tanobada hegegemadai haroro gaukarana ia naria. Tadikaka Hughes be ekskius ia karaia neganai, Tadikaka Rutherford ese maoromaoro ia gwau-henia. Lau hoa badina lau itaia Tadikaka Hughes be mai kiri ida unai sivarai ia gwauraia. Matamanai unai ia lalohisihisilaia. To gabeai, unai sisiba ia abia ena badina ia lalopararalaia, badina unai be Iehova ena lalokau karana. (Heb. 12:6) Iena sivarai ese lau ia hagoadaia bona durua mai moale ida egu hesiai gaukara lau karaia noho totona.

Unai lagani tamona ai, egu sinana be London dekenai ia mai, bona tadikaka John E. Barr amo Baibel stadi ia abia dae. Tadikaka John be gabeai Hakaua Oreana ena memba ta ai ia lao. Egu sinana be ia goada ia lao bona lagani 1957 ai ia bapatiso. Gabeai lau kamonai, egu tamana ia do mase lasi neganai, Iehova ena Witnes taudia ida ia stadi.

Lagani 1958 ai, London ai ia noho Denmark taihu ta, Lene lau adavaia. Lagani ta murinai, emai natuna kekeni, Jane ia vara. Ia murinai kekeni rua bona memero rua ma idia vara. Danu, Fulham Kongrigeisen ai maduna idauidau lau abia. To gabeai, Lene ena gorere dainai, siahu gabuna ta dekenai ai noho be namo. Unai dainai lagani 1967 ai, Adelaide, Australia dekenai ai lao.

Adelaide ai, emai kongrigeisen lalonai horoa tadikaka taihu burukadia 12 idia noho. Bona haroro gaukara idia goadalaia. Daudau lasi Iehova tomadiho henia karadia ai goadalaia.

Lagani 1979 ai, lau bona Lene ai moale bada, badina emai natuna mero namba faiv, Daniel ia vara.  Ia be Down syndrome * gorerena ia abia bona idia gwau do ia mauri daudau lasi. Ia auka, ai dekenai ia vara hekwakwanai lau gwauraia totona. Ai gaukara goada ia ai naria namonamo totona, to emai natudia foa danu ai laloa bada. Daniel ena kudouna ai matu rua idia noho dainai, nega haida ena tauanina ena kala be ia blu badina laga ia veria namonamo lasi. Unai ia vara neganai, karaharaga hospital dekenai ai abia lao. Herevana ena gorere be bada, to ai herevalaia gaudia ia lalopararalaia, bona ia moale. Danu Iehova ia lalokau henia bada. Aniani totona ai guriguri neganai, ena imana maragidia do ia rosia, ena kwarana do ia hamarerea, bena do ia gwau, “Amen!” Unai murinai do ia aniani.

Daniel ena mauri lagani be foa neganai, gorere badana (acute leukemia) ia abia. Lau bona Lene emai tauanina bona lalona ia manoka momokani. Lau mamia egu hemami bona laloa dalana ia gaukara namonamo lasi. Nega ta, ai lalomanoka momokani, bona emai sekit naria tauna tadikaka Neville Bromwich be emai iduara ai ia pidipidi. Unai hanuaboi ai, mai mata ranu ida ai ia rosia. Ai ibounai ai tai. Mai lalokau bona hebogahisi ida ai ia hagoadaia. Daba 1 o’klok bamona ai, ena ruma dekenai ia giroa lou. Unai dina ai Daniel ia mase. Emai mauri lalonai unai be hekwakwanai badana. To, ai haheauka, ai diba momokani, gau ta​—⁠herevana mase​—⁠ese Iehova ena lalokau Daniel dekenai do ia koua lasi. (Roma 8:38, 39) Dirava ena tanobada matamatana ai ia toreisi lou neganai, ai ura ia do ai hedavari henia!​—⁠Ioa. 5:28, 29.

Guna, strouk gorere lau abia. To hari, kongrigeisen ai elda gaukara lau karaia noho. Egu ekspiriens ese lau ia durua hekwakwanai idia davaria taudia edia mauri lau lalopararalaia bona lau hebogahisi henidia totona. Lau ura lasi idia lau hahemaoro henia. Unai dainai sibona lau nanadaia: ‘Edia mauri ai idia davaria hekwakwanai ese edena dala ai edia hemami bona lalona ia hagoadaia? Edena dala ai do lau hahedinaraia idia lau laloa bada? Edena dala ai idia do lau hagoadaia Iehova ena dala idia badinaia totona?’ Kongrigeisen ai, mamoe vadivadi gaukarana lau moalelaia! Momokani, Baibel amo ma haida lau hagoadaia bona durua neganai, lau mamia lau be sibona lau hagoadaia noho.

Egu hemami be Salamo torea tauna bamona, ia gwau: ‘Egu lalona ia hekwarahi momo neganai, [Iehova] ese lau ia hagoadaia, bona egu lauma ia hamoalea noho.’ (Sal. 94:19) Ruma bese ena hekwakwanai, tomadiho dainai lau idia dagedage henia, sisiba lau abia bona lau lalomanoka neganai, Iehova ese lau ia hagoadaia. Momokani, Iehova be egu Tamana korikorina!