“HELO! Oi namo?”

Oi be nega momo unai bamona hanamoa herevana ta oi gaukaralaia, ani? Reana ta oi hedavari henia neganai imana umui udeudea eiava oi rosia danu. Gabu ta ta edia kastom bona idia gaukaralaia herevadia be idauidau, to edia hanamoa herevadia be idia hegeregere. Momokani, hanamoa hereva ta oi gwauraia o haloua lasi be lalokau eiava hemataurai lasi karana.

To taunimanima momo be ma haida hanamoa karana idia manadalaia lasi. Haida idia ura lasi ta idia hanamoa badina idia hemarai eiava idia mamia idia be anina lasi. Haida dekenai ia auka bese idau taudia, edia kastom dainai, eiava ladana bada taudia idia hanamoa totona. To, hanamoa hereva kwadogina ese namo ia havaraia diba.

Sibona oi nanadaia: ‘Hanamoa hereva ena namo be dahaka? Baibel amo ma haida hanamoa karana dekenai dahaka lau dibaia?’

Aposetolo Petero ese idau bese tauna ginigunana Korenelio, be Keristani kongrigeisen ai ia welkam henia neganai, ia gwau: “Dirava be taunimanima edia toana ia laloa lasi.” (Kara 10:34) Gabeai, Petero ia gwau, Dirava “ia ura taunimanima ibounai idia helalo-kerehai.” (2 Pet. 3:9) Reana unai herevadia be hereva momokani ia dibaia noho tauna dekenai ita gwauraia diba. To Petero ese Keristani taudia ia hagoadaia: “Taunimanima idauidau ibounai umui matauraia, tadikaka oreana ibounai umui lalokau henia.” (1 Pet. 2:17) Herevana haida edia bese, kastom, bona mauri be idau to idia oi hanamoa, a? Unai dala amo oi be idia dekenai hemataurai bona lalokau oi hahedinaraia.

Aposetolo Paulo ese kongrigeisen taudia ia hagoadaia: “umui ese ta ta do umui abia dae, Keriso ese ita ia abia dae hegeregerena.” (Roma 15:7) Paulo be ia idia “hagoadaia bada” tadikaka edia kara ia herevalaia. Tadikaka bona taihu hagoadaia karana ita goadalaia be namo, badina hari Satani be Dirava ena taunimanima dekenai ia badu dikadika.​—⁠Kol. 4:11; Apok. 12:12, 17.

Baibel sivaraidia ese ia hahedinaraia hanamoa herevadia ese dala momo ai haida edia hemami ia hanamoa diba.

Dirava ese ena natuna be Maria ena bogana ai do ia atoa negana ia ginidae neganai, Iehova be aneru ta ia siaia Maria ia hereva henia totona. Aneru ia gwau “Dirava ese ia lalonamo henia kekenina e, namo, Iehova be oi ida ia noho.” Maria ia “laloa momo,” badina ia diba lasi dahaka dainai aneru be ia ia hereva henia. Aneru be unai ia itaia dainai, ia gwau: “Maria e, oi gari lasi, badina Dirava ese oi ia lalonamo henia.” Maria ia hadibaia Dirava ia ura ia ese Mesia do ia havaraia. Maria ia lalohisihisi lasi, to mai kamonai ida ia haere: “Lau be Iehova ena igui hesiai kekenina! Namona be emu hereva hegeregerena lau dekenai do ia vara.”​—⁠Luka 1:26-38.

Aneru ese Iehova ena hereva ia gwauraia be hahenamo ta; to, ia hahedinaraia lasi sibona ena siahu amo goevadae lasi tauna ia hereva henia. Hanamoa herevana ta amo ena hereva ia hamatamaia. Unai sivarai amo dahaka ita dibaia? Namona be ita noho hegaegae haida dekenai hanamoa herevadia ita gwauraia bona hagoadaia totona. Hereva haida sibona amo haida ita durua bona hagoadaia idia be Iehova ena taunimanima.

Paulo be Asia Minor bona Europe ena kahana ibounai ai idia noho kongrigeisen taudia momo ia dibaia. Bona ena revareva lalodiai hanamoa hereva momo idia noho. Roma karoa 16 ai unai ita itaia. Paulo be ena Keristani tadikaka momo dekenai hanamoa herevadia ia siaia. Ia ese Fibi ia gwauraia, “iseda taihuna” bona tadikaka ia hadibadia “Lohiabada ia badinaia tauna  umui abia dae hegeregerena ia do umui abia dae, helaga taudia dekenai umui karaia bamona, bona ia ura karaia gaudia dekenai ia do umui durua.” Paulo ese Prisikila bona Akwila dekenai hanamoa herevana ia gwauraia, “lau sibona lasi to idau bese taudia edia kongrigeisen ibounai danu ese edia tanikiu hereva idia siaia.” Ita diba lasi taudia haida dekenai hanamoa herevadia ia gwauraia​—⁠“lauegu lalokau tauna, Epaineto” danu “Trupena bona Truposa dekenai hanamoa hereva umui henia, idia be Lohiabada totona idia gaukara goadagoada hahinedia.” Oibe, Paulo be mai ura ida ena tadikaka bona taihu dekenai hanamoa herevadia ia gwauraia.​—⁠Roma 16:1-16.

Paulo be idia ia laloa bada dainai, idia abia moalena mani oi laloa. Unai ese edia lalokau Paulo bona idia ta ta dekenai ia hagoadaia! Bona unai hanamoa herevadia ese Keristani taudia haida ia hagoadaia, bona idia ia durua edia abidadama idia dogoatao auka totona. Oibe, mai momokani ida oi gwauraia hanamoa herevadia ese hetura karana ia hagoadaia bona Dirava ena abidadama hesiai taudia ia hatamonaia.

Paulo be Puteoli ena bouti vareai gabunai ia ginidae bona Roma dekenai ia daekau neganai, Keristani taudia be saut kahana amo idia mai ia idia hedavari henia totona. Paulo be daudau amo idia ia itaia neganai, “Dirava ia tanikiu henia bona goada ia abia.” (Kara 28:13-15) Nega haida, reana kiri toana eiava imana ita davea diba ta ita hanamoa totona. Unai ese lalohisihisi tauna ena lalona ia hamoalea diba.

Aposetolo Iamesi ese sisiba aukana ia henia be namo. Keristani taudia haida be tanobada idia tura henia dainai lauma dalanai idia be heudahanai taudia bamona. (Iam. 4:4) To Iamesi ia torea revareva ena hamatamaia kahana mani oi laloa:

“Lau Iamesi be Dirava bona Lohiabada Iesu Keriso edia igui hesiai tauna. Lau ese umui, gabu idauidau dekenai umui lao iduhu 12 taudia dekenai, egu hanamoa hereva lau siaia inai.” (Iam. 1:1) Ena revareva idia duahia taudia idia davaria ena sisiba idia abia dae be auka lasi, badina ena hanamoa herevadia amo idia itaia Dirava ena vairanai idia ibounai be hegeregere. Oibe, mai manau ida hanamoa herevadia oi gwauraia ese dala ia kehoa diba hekwakwanai badadia umui herevalaia totona.

Mai momokani ida oi gwauraia hanamoa hereva ta, ena be kwadogi, to namona be kudouna amo bona lalokau korikorina ia hahedinaraia. Ena be haida ese idia itaia lasi. (Mat. 22:39) Ireland ai ia noho taihu ta, be nega ta hebou ia matamaia gwauraia neganai Kingdom Hall ai ia ginidae. Ia raka vareai lalonai, tadikaka ta be ia dekenai kiri toana ia hahedinaraia bona ia gwau: “Namo. Lau moale oi lau itaia.” Taihu be ia hereva lasi, to ia lao bona ia helai.

Wiki haida murinai, tadikaka ia hereva henia bona nega daudau lalonai ena ruma ai ia haheaukalaia hekwakwanai ia gwauraia hedinarai. Ia gwau: “Unai adorahi ai lau lalohisihisi dainai, kahirakahira Kingdom Hall dekenai lau mai lasi. Hebou ai idia gwauraia gaudia momo lau laloatao diba lasi, to emu hanamoa herevana lau laloatao. Unai ese egu hemami ia hanamoa. Tanikiu.”

Unai tadikaka ia diba lasi ena hanamoa hereva kwadogina ese anina namona ia havaraia. Ia gwau: “Taihu be lau dekenai unai hanamoa hereva kwadogina ese ia durua dalana ia gwauraia neganai, lau moale ia lau durua dainai. Unai ese lau ia hamoalea danu.”

Solomona ia gwau: “Oiemu aniani [“paraoa,” NWT] be davara ena kopina dekenai do oi negea lao, badina be dina momo murinai do oi davaria lou.” (Had. 11:1) Iseda Keristani tadikakadia dekenai hanamoa hereva gwauraia ena namo ita laloa bada neganai, ma haida do ita hamoalea bona ita danu do ita moale. Unai dainai hanamoa herevana gwauraia karana be mai ena namo.