1. Dahaka badina namodia haida dainai ita moale?

ITA moale badina ita itaia Iehova ena orea be ia tubu daekau noho! Vanegai lagani ai, ita karaia Baibel stadi ibounai be ten milioni mai kahana. Unai ese ia hamomokania Dirava ena hesiai taudia ese edia diari idia hahedinaraia noho. Bona kamonai taudia milioni momo be Memorial dekenai idia mai. Unai dainai, Dirava ese mauri davalaia boubouna amo ena lalokau ia hahedinaraia karana idia dibaia.​—⁠1 Ioa. 4:9.

2, 3. (a) Dahaka ese ita ia koua lasi dainai, ita be “diari bamona [ita] hedinarai” noho? (b) Iesu ena hereva Mataio 5:14-16 hegeregerena, dahaka do ita herevalaia?

² Tanobada ibounai, Iehova ena taunimanima be gado idauidau ai idia hereva. To, unai ese ita ia koua lasi badina ita ibounai be mai lalotamona ida eda Tamana, Iehova, ita hanamoa. (Apok. 7:9) Ena be iseda gado be idauidau o edeseni ita noho, “tanobada ai, [ita] be diari bamona [ita] hedinarai” diba.​—⁠Fili. 2:15.

³ Orea ia tubu daekau karana, ita lalotamona karana, bona ita gima noho karana amo Iehova ita hanamoa. Inai atikol ai, do ita  itaia edena dala ai Dirava ita hanamoa diba.​—⁠Mataio 5:14-16 duahia.

4, 5. (a) Haroro gaukara sibona lasi, to edena dala ma haida ai iseda diari ita hahedinaraia diba? (b) Iseda kara namodia ese dahaka namo ia havaraia diba? (Laulau ginigunana herevalaia.)

⁴ Atikol ladana “Light in the Darkness,” The Watch Tower, June 1, 1925 ia gwau: “Inai dina gabediai, taunimanima momo be Lohiabada do idia abidadama henia lasi o badinaia lasi . . . unai dainai, gau badana be ita sibona be dala ita tahua diari ita hahedinaraia totona.” Unai atikol ma ia gwau: “Dala ta be, taunimanima ibounai dekenai sivarai namona ita harorolaia, bona kara maoromaoro ita badinaia.” Oibe, iseda diari ita hahedinaraia dalana ta be, sivarai namona ita harorolaia bona hahediba taudia halaoa gaukarana ita karaia. (Mat. 28:19, 20) Danu, iseda Keristani kara namodia amo Iehova ita hanamoa diba. Ruma taudia bona idia raka hanai taudia be iseda kara idia itaia. Idia dekenai ita kiri eiava halou hereva ita gwauraia neganai, idia itaia ita be taunimanima namodia bona ita be Dirava namona ita tomadiho henia.

⁵ Iesu ese ena hahediba taudia ia hamaoroa: “Ruma dekenai umui vareai neganai, ruma taudia dekenai hanamoa hereva umui gwauraia.” (Mat. 10:12) Iesu bona ena aposetolo taudia idia haroro gabudia momo ai, taunimanima be edia ruma ai idau taudia idia abia dae. Hari, gabu momo ai unai bamona idia karaia lasi. To, mai hemataurai o moale ida emu vadivadi ena badina be ruma tauna dekenai oi gwauraia hedinarai neganai, ruma tauna ia gari lasi o badu lasi. Nega momo eda kiri toana ese dala ia kehoa ita haroro totona. Pablik gabudiai, troli ai buka bona magasin idia hariharilaia tadikaka taihu momo be unai bamona ekspiriens idia davaria. Bona unai bamona hesiai gaukara oi karaia neganai, namona be oi kiri bona hanamoa hereva oi gwauraia, unai amo taunimanima be oi kahirakahira do idia mai bona eda pablikeisen do idia abia. Emu kara namodia dainai, taunimanima oi haroro henia diba.

6. Edena dala ai buruka tadikaka ta bona ena adavana be edia haroro gaukara idia habadaia?

⁶ England ai, buruka tadikakana bona ena adavana be gorere dainai ruma-ta-ruma-ta gaukara idia karaia momo lasi. Unai dainai, idia ura edia ruma kahirakahira ai edia diari idia hahedinaraia. Idia ese teibolo ta latanai eda pablikeisen idauidau idia atoa, unai amo tama sina be edia natudia udaia totona sikuli idia mai neganai, unai buka idia itaia diba. Momo be Memero Kekeni Edia Henanadai bukana ena volium 1 bona 2, bona buklet haida idia abia. Edia kongrigeisen ena painia taihu ta be idia ia durua, unai haroro gaukara idia karaia totona. Unai buruka taudia bona taihu edia kara namodia dainai, tama ta be Baibel stadi ia abia dae.

7. Emu gabu ai idia noho refiuji taudia dekenai be dahaka heduru oi henia diba?

⁷ Vanegai laganidia lalodiai, refiuji taudia momo be edia tano idia rakatania bona tano ma haida ai idia noho. Edena dala ai idia oi durua Iehova bona iena ura idia diba totona? Namona be edia gado ai idia gwauraia halou hereva oi dibaia. JW Language app be oi do ia durua unai bamona oi karaia totona. Danu, edia lalona oi veria diba herevadia haida oi dibaia be namo. Unai amo reana idia dekenai jw.org oi hahedinaraia bona edia gado ai idia hahanaia vadaeni vidio bona pablikeisen idauidau idia itaia diba.​—⁠Deut. 10:19.

8, 9. (a) Iseda wiki ena hebou ai dahaka heduru namodia ita abia? (b) Edena dala ai tama bona sina ese edia natudia idia durua diba hebou ai haere idia henia totona?

⁸ Iehova be mai lalokau ida Iseda Haroro  Bona Mauri Dalana ena hebou ia henia, unai amo iseda haroro gaukara ita hanamoa diba. Unai hebou ai ita dibaia gaudia ese ita ia durua, lou henia bona Baibel stadi ita karaia namonamo totona.

⁹ Nega ginigunana eda hebou dekenai idia mai taudia momo be iseda natudia edia haere karana idia itaia. Tama bona sina e, emui natudia edia diari idia hahedinaraia, anina be idia umui durua sibona edia hereva dalana amo idia haere totona. Nega haida natudia edia haere namodia dainai, kamonai taudia matamatadia be hereva momokani idia abia dae.​—⁠1 Kor. 14:25.

10. Edena dala ai ruma bese ena tomadiho ese famili lalonai lalotamona ia havaraia diba?

¹⁰ Emu diari oi hahedinaraia dalana ma ta be, emu famili bona kongrigeisen ai lalotamona oi hagoadaia. Dala ta be, tama sina ese Ruma Bese ena Tomadiho idia karaia hanaihanai. Momo be hua ena JW Broadcasting idia itaia. Vidio umui itaia murinai, point namodia badinaia daladia haida umui herevalaia sisina. Namona be tama o sina idia laloatao, ruma bese stadi lalonai, natu maragidia hadibaia dalana be badadia edia amo ia idau. Unai dainai, stadi gaudia idia herevalaia namonamo, unai amo natudia ta ta idia durua diba.​—⁠Sal. 148:12, 13.

11-13. Edena dala ai ibounai ese kongrigeisen lalonai lalotamona idia hahedinaraia diba bona ma haida idia hagoadaia edia diari idia hahedinaraia totona?

¹¹ Edena dala ai matamata taudia be kongrigeisen lalonai lalotamona idia hahedinaraia diba bona ma haida idia hagoadaia edia diari idia hahedinaraia totona? Bema oi be Keristani mero eiava kekeni ta, namona be buruka taudia oi tura henia. Reana idia oi noia edia hesiai gaukara amo idia davaria ekspiriens ta idia herevalaia totona. Unai amo umui hagoadaia heheni bona do umui ura bada hereva momokani ena diari umui hahedinaraia noho totona. Bona ita ura Kingdom Hall dekenai idia mai taudia ita welkam henia. Unai ese lalotamona do ia havaraia sibona lasi, to vadivadi taudia do idia ura edia diari idia hahedinaraia totona. Reana mai kiri toana ida vadivadi taudia dekena halou hereva oi gwauraia eiava idia oi durua helai gabuna idia abia totona. Idia oi durua ma haida idia hedavari henidia totona, unai amo do idia gari lasi.

 ¹² Bema oi be haroro gaukara ena hebou ta oi hakaua, dala oi karaia burukadia idia haroro totona. Idia totona oi be haroro teritori maorona oi abia hidi, a? Nega haida, oi ese idia do ia bamoa matamata tauna ta oi abia hidi, burukana ia hakaua o durua totona. Danu, namona be oi laloparara idia haida be idia gorere bona edia noho dalana be idauidau. Oibe, herevana ta ia buruka o matamata eiava orea lalonai lagani hida idia noho, to emu kara namodia dainai, idia be haroro gaukara do idia goadalaia noho.​—⁠Lev. 19:32.

¹³ Salamo torea tauna ia gwau: “Bema Dirava ena taudia do idia noho hebou, mai edia laloa tamona neganai, unai kara be namo, bona mai ena moale danu.” (Salamo 133:1, 2 duahia.) Israela taudia be Iehova idia tomadiho henia taudia ida idia noho hebou dainai, kara namodia idia goadalaia. Unai be hegeregere, dehoro ena bonana namona ese moale ia havaraia. Namona be emu kara namodia ese tadikaka bona taihu huanai lalotamona ia havaraia. Bema unai oi karaia noho, unai be namo herea. Namona be ‘emu kudouna ai ia noho lalokauna oi habadaia,’ anina be tadikaka taihu oi bamoa momo.​—⁠2 Kor. 6:11-13.

14. Edena dala ai emu neiba dekenai hereva momokani ena diari oi hahedinaraia diba?

¹⁴ Emu neiba dekenai Baibel ena hereva momokani ena diari oi hahedinaraia noho, a? Emu hereva bona kara namodia ese emu neiba ena lalona do ia veria hereva momokani ia abia dae totona. Oi sibona oi nanadaia: ‘Egu neiba ese lau be edena bamona idia laloa? Egu gabu bona ruma lau hagoevaia hanaihanai, a? Ma haida lau durua, a?’ Witnes taudia ma haida ida oi herevahereva neganai, idia oi nanadaia edena dala ai edia hebogahisi bona kara namodia ese edia varavara, neiba, gaukara turadia, eiava sikuli turadia ia durua? Reana ekspiriens namodia do oi kamonai.​—⁠Efe. 5:9.

15. Dahaka dainai ita gima noho be mai anina bada?

¹⁵ Eda diari ita hahedinaraia noho totona, hari inai negai ita naria namonamo be namo. Iesu ese ena hahediba taudia ia hadibaia loulou, ia gwau: “Umui gima noho.” (Mat. 24:42; 25:13; 26:41) Bema ita laloa “hisihisi badana” be do daudau, eiava ita mase murinai do ia vara, vadaeni haroro gaukara do ita laloa maragi danu. (Mat. 24:21) Unai ena anina be eda komiuniti dekenai eda diari be do maragi ia lao ela bona do ia bodo vaitani.

16, 17. Oi gima noho totona, dahaka oi karaia noho be namo?

¹⁶ Inai nega ia dika noho lalonai, ita gima noho be gau badana. Ita abia dae momokani, Iehova ena dina be nega korikori ai do ia ginidae. (Mat. 24:42-44) To ita naria noho lalonai, ita gima noho be namo. Dina ta ta ai Baibel ita duahia, bona guriguri ita goadalaia. (1 Pet. 4:7) Tadikaka bona taihu edia haheitalai ita laloa badina idia moale, idia gima noho, bona edia diari idia hahedinaraia noho. Hegeregere, The Watchtower, April 15, 2012, rau 18-21 ena atikol ladana “Seventy Years of Holding On to the Skirt of a Jew” dekenai ekspiriens namona ta oi duahia diba.

¹⁷ Haroro gaukara dekenai oi bisi, bona tadikaka taihu oi bamoa momo. Unai amo do oi moale bada, bona do oi hoa badina nega be ia heau haraga. (Efe. 5:16) Lagani 100 gunanai, iseda tadikaka momo be idia bisi bona gaukara haida idia hagugurua. To hari inai negai, ita be ita bisi bada herea, bona Iehova be ita ia hakaua noho. Iseda diari ita hahedinaraia badabada, guna bamona lasi.

18, 19. Edena dala ai elda ese ita idia durua diba ita goada bona gima noho totona? Haheitalai gwauraia.

 ¹⁸ Ena be ita be goevadae lasi, to ita moale badina Iehova ia ura ia ita hesiai henia. Bona ita ia durua totona, Iehova be “harihari gaudia,” kongrigeisen elda taudia unai, ia henia. (Efeso 4:8, 11, 12 duahia.) Unai dainai, elda ta be oi ia vadivadi henia neganai, namona be ena aonega herevadia o sisiba oi kamonai.

¹⁹ England ai headava tau bona hahine ta be edia headava lalonai hekwakwanai haida idia vara dainai, elda rua edia heduru idia tahua. Taihu ia gwau ena tau be Dirava ia henia maduna ia huaia namonamo lasi. Tadikaka ia gwau ia be tisa namona lasi bona ruma bese ena tomadiho ia hakaua momo lasi. Elda taudia ese Iesu ena haheitalai idia gaukaralaia, tadikaka bona taihu durua totona. Iesu be ena hahediba taudia ia naria bona edia namo ia laloa bada. Elda ese tadikaka idia hagoadaia Iesu ia tohotohoa be namo. Bona idia ese taihu idia hagoadaia ia haheauka be namo. Danu, ruma bese ena tomadiho lalonai tadikaka bona taihu bona edia natudia ruaosi idia gaukara hebou dala namodia haida be elda ese idia gwauraia. (Efe. 5:21-29) Gabeai, elda taudia ese tadikaka idia tanikiu henia badina ia hekwarahi ena kwara dagina ia huaia namonamo totona. Bona idia ese tadikaka idia hagoadaia namona be ia hesiku lasi bona lauma helaga dekenai ia tabekau hanaihanai. Elda taudia edia lalokau bona heduru ese unai ruma bese ia durua edia diari idia hahedinaraia noho totona.

20. Emu diari oi hahedinaraia neganai, dahaka do ia vara?

²⁰ Salamo torea tauna ia gwau: “Lohiabada dekenai idia gari noho taudia ibounai be namo, badina iena dala dekenai idia raka noho.” (Sal. 128:1) Emu diari oi hahedinaraia​—⁠haida oi durua Dirava idia hesiai henia totona, emu kara amo lalotamona oi havaraia noho, bona oi gima noho​—⁠neganai, moale bada do oi davaria. Haida be emu kara namodia do idia itaia, bena momo be iseda Tamana do idia hanamoa.​—⁠Mat. 5:16.