Gima Kohorona matamatadia oi duahia neganai oi moalelaidia, a? Henunai idia noho henanadai mani oi haerelaidia:

Ane abia dalana hanamoa totona, dahaka gaudia foa ita karaia diba?

Iseda ane buka ita dogoatao bona ita gini maoromaoro. Ita hahodi namonamo. Iseda uduna ita kehoa badabada bona ita ane neganai, ita ane badabada diba.​—⁠w17.11, rau. 5.

Israela ai, heau mauri hanuana ena noho gabuna bona unai hanua lao henia dalana amo dahaka ita dibaia?

Israela ai, heau mauri hanuadia siks idia abia hidi, bona edia dala be idia namo. Unai amo ia heau tauna be unai heau mauri hanuadia dekenai ia lao haraga diba.​—⁠w17.11, rau. 13.

Dahaka dainai Dirava ese ita dekenai Iesu ena mauri davalaia boubouna ia henia be harihari gauna hereadaena?

Unai amo mauri hanaihanai ita abia diba, bona kara dika bona mase amo ita ia ruhaia. Dirava ese ita, Adamu ena natudia unai, ia lalokau henia dainai ita be do kara dika taudia neganai Iesu ia siaia.​—⁠wp17.2, rau. 5-6.

Edena dala ai Salamo 118:22 ese ia hahedinaraia Iesu be do ia toreisi lou?

Iesu be Mesia dainai, taunimanima ese idia dadaraia bona hamasea. Bona “kona nadi badana” ai ia lao totona, ia toreisi lou be namo.​—⁠w17.12, rau. 9-10.

Vara guna ahuna idia abia taudia amo Mesia ia vara, a?

Nega haida Iesu be vara guna natuna ena bese amo ia mai, to nega momo lasi. Iese ena natuna Davida be vara guna natuna lasi; to Mesia be Davida ena bese amo ia mai.​—⁠w17.12, rau. 14-15.

Baibel ai edena medikol heduru hereva haida ita davaria diba?

Mose ena taravatu henunai, gorere haida idia abia taudia be sibona idia noho be namo. Taunimanima be mase tauanina idia dogoatao murinai, idia digu be namo. Taravatu ese kukuri negea dalana maorona ia herevalaia danu. Beibi ta ia vara bona dina namba 8 murinai Circumcision eiava kopina idia utua be namo, badina unai nega ai ena tauanina ai rara be ia heau namonamo.​—⁠wp18.1, rau. 7.

Dahaka dainai Keristani taudia be sibona idia lalokau henia be kerere lasi?

Iseda dekena taudia ita lalokau henia be namo, ita sibona ita lalokau henia hegeregerena. (Mar. 12:31) Tatau ese “edia hahine do idia lalokau henidia be namo, sibodia edia tauanina idia lalokau henia hegeregerena.” (Efe. 5:28) Oibe, sibona idia lalokau henia taudia be idia moale diba lasi.​—⁠w18.01, rau. 23.

Dahaka ita karaia diba Lo Keristani tauna ai ita lao totona?

Namona be Dirava ena Hereva stadilaia, laloa dobu bona ita dibaia gaudia ita badinaia. Bona ita noho hegaegae lauma helaga ena hakaua dalana ita badinaia bona ma haida edia heduru ita abia dae totona.​—⁠w18.02, rau. 26.

Vaira neganai dibaia totona, dahaka dainai hisiu stadilaia taudia bona vaira negana gwauraia babalau taudia edia heduru ita tahua lasi?

Badina be momo, to badina badana be Baibel ese unai kara rua ia taravatua.​—⁠wp18.2, rau. 4-5.

Ma haida ese aniani hebou totona ita idia boiria karana be edena bamona do ita laloa be namo?

Bema ta ese iena ruma dekenai ita ia boiria, namona be iseda hereva ita badinaia. (Sal. 15:4) Iseda palani ita haidaua lasi. Reana ita ia abia dae tauna be ia hekwarahi aniani ia hegaegaelaia totona.​—⁠w18.03, rau. 18.

Elda bona hesiai taudia be Timoteo amo dahaka idia dibaia?

Timoteo be taunimanima ia lalodia bada bona haroro gaukara ia laloa bada. Ena hesiai gaukara helagana lalonai ia gaukara goada bona ia dibaia gaudia ia badinaia. Hanaihanai sibona ia treinia bona Iehova ena lauma helaga ena heduru dekenai ia tabekau. Elda taudia bona ma haida ese ena haheitalai idia tohotohoa diba.​—⁠w18.04, rau. 13-14.