1. Dahaka dainai Iesu ena hagoadaia herevana ita laloa bada be namo?

IESU be dina ginigabedia ia herevalaia neganai, inai bamona ia gwau: “Do umui naria namonamo . . . mauri ena lalohekwarahi amo emui lalohadai maorona umui hadikaia garina.” (Luka 21:34) Unai hagoadaia herevana ita laloa bada be namo. Dahaka dainai? Hari ita davaria hekwakwanai be taunimanima momo ese idia davaria noho hekwakwanai hegeregerena.

2. Iseda tadikaka bona taihu be edena bamona hekwakwanai idia davaria?

² Hari inai negai, hekwakwanai momo be nega tamona lalonai ita davaria. Mani haheitalai haida ita herevalaia. Witnes tauna ta ladana John, * be multiple sclerosis gorerena ia abia, bona ia lalometau bada badina ena adavana ese ia rakatania, ena be lagani 19 lalonai idia headava. Bona ena natuna kekeni rua be Iehova hesiai henia gaukarana idia rakatania. Danu, headava tau Bob bona ena hahine Linda edia hekwakwanai be ma ia idau. Idia ruaosi be edia moni gaukara idia haboioa dainai idia noholaia ruma idia rakatania. To unai sibona lasi, doketa ese Linda ia hamaoroa ia be kudou gorere ta ia abia dainai ia mase diba bona danu gorere badana ma ta ese ena tauanina eiava immune system ia hadikaia matamaia.

3. Filipi 4:6, 7 ena hereva bamona, dahaka ita diba momokani?

³ Ita lalohekwarahi neganai, ita diba momokani iseda Havaraia Tauna bona lalokau guba Tamana, Iehova be iseda hemami ia lalopararalaia. Bona ia ura ita ia durua ita davaria hekwakwanai ita haheaukalaia totona. (Filipi 4:6, 7 duahia.) Dirava ena hesiai taudia ese hekwakwanai idia haheaukalaia daladia edia sivarai momo be Baibel ai idia noho. Danu, edena dala ai Iehova ese idia ia durua edia hekwakwanai badadia idia haheaukalaia totona. Mani unai haheitalai haida ita herevalaia.

4. Elia be dahaka hekwakwanai ia davaria, bona edena dala ai Iehova ese ia durua?

⁴ Elia be nega aukadia ai Iehova ia hesiai henia bona hekwakwanai momo ia davaria. King Ahaba, Israela ena king dikana ta ese Iesebele, Bala tomadiho henia hahinena ia adavaia. Idia ruaosi ese Israela ai Bala tomadiho henia karana idia hamatamaia bona Iehova ena peroveta taudia momo idia hamasedia. To Elia be ia heau mauri, unai negai hitolo bada ia vara to Iehova ese ia durua. (1 Kin. 17:2-4, 14-16) Danu Elia be Iehova ena heduru dainai Bala idia tomadiho henia peroveta taudia ia sisiba henidia. Ia ese Israela taudia ia hagania Iehova idia hesiai henia totona. (1 Kin. 18:21-24, 36-38) Hamomokania gaudia momo ese idia hahedinaraia herevana Elia be hekwakwanai momo ia davaria, to Iehova ese nega ibounai ia durua bona hagoadaia.

5-6. King Taudia Ginigunana 19:1-4 ena hereva bamona, Elia ena hemami be edena bamona bona Iehova be edena dala ai ia hahedinaraia ia lalokau henia noho?

⁵ King Taudia Ginigunana 19:1-4 duahia. Elia be ia gari badina Kwini Iesebele be ia ura ia do ia hamasea. Unai dainai Elia be Bere-Sieba dekenai ia lao. Ia lalometau bada dainai “ia noinoi” ia ura ia mase. Dahaka dainai unai bamona lalohadai ia abia? Elia be goevadae lasi tauna, bona ia be “mai ena hemami ita hegeregerena.” (Iam. 5:17) Reana ia lalohekwarahi bona ena tauanina ia hesiku bada. Reana Elia ia laloa ia hekwarahi taunimanima ia durua Iehova idia tomadiho henia totona be anina lasi. To, Israela ai taunimanima be ena  hereva idia kamonai lasi, bona idia ibounai huanai ia sibona be Iehova ia hesiai henia noho. (1 Kin. 18:3, 4, 13; 19:10, 14) Reana do ita laloa dahaka dainai unai abidadama peroveta tauna be unai bamona ia mamia. To Iehova ese Elia ena hemami ia lalopararalaia.

⁶ Elia be ena lalohekwarahi ia gwauraia hedinarai neganai, Iehova ese ia gwau henia lasi, to Elia ia hagoadaia. (1 Kin. 19:5-7) Unai murinai Iehova ese ena siahu amo Elia ia durua ena lalohadai ia hamaoromaoroa totona. Iehova ese Elia ia hamaoroa, Israela dekenai Bala idia tomadiho henia lasi taudia 7,000 idia noho. (1 Kin. 19:11-18) Iehova ese dala idauidau amo ia hahedinaraia ia be Elia ia lalokau henia.

7. Iehova ese Elia ia durua dalana amo dahaka ita dibaia?

⁷ Oi be hekwakwanai ta oi haheaukalaia noho, a? Iehova ese Elia ena hemami ia lalopararalaia karana ese iseda abidadama ia hagoadaia bada, ani? Danu, unai ese ita ia hagoadaia badina ita diba Iehova ese iseda hemami ia lalopararalaia. Bona ia diba iseda goada be mai ena hetoana, bona iseda lalohadai bona hemami ia diba namonamo. (Sal. 103:14; 139:3, 4) Elia hegeregerena, bema Iehova amo heduru ita abia ia ese ita do ia durua lalohekwarahi idia havaraia hekwakwanai ita haheaukalaia totona.​—⁠Sal. 55:22.

8. Edena dala ai Iehova ese oi do ia durua emu lalohekwarahi oi haheaukalaia totona?

⁸ Oi lalohekwarahi neganai unai ese emu laloa maoromaoro karana do ia hadikaia bona do oi lalomanoka diba. Bema emu hemami be unai bamona, namona be oi laloatao Iehova ese oi do ia durua emu hekwakwanai oi haheaukalaia totona. Edena dala ai oi do ia durua? Ia ura oi lalohekwarahilaia gaudia be ia dekenai oi gwauraia hedinarai. Bona ia ese emu noinoi do ia haerelaia. (Sal. 5:3; 1 Pet. 5:7) Unai dainai hanaihanai Iehova dekenai emu lalohekwarahi gaudia oi gwauraia hedinarai. Elia hegeregerena oi dekenai hoa karana ta do ia vara lasi, to Dirava ese Baibel bona ena orea amo oi do ia durua. Baibel ai idia noho sivaraidia oi duahia neganai, goada do oi abia bona oi dekenai helaro do ia henia. Danu, emu tadikaka bona taihu ese oi idia hagoadaia diba.​—⁠Roma 15:4; Heb. 10:24, 25.

9. Edena dala ai emu tura korikorina ese oi ia durua diba?

⁹ Iehova ese Elia ia hamaoroa ena gaukara haida be Elisaia dekenai do ia henia. Iehova ese Elia dekenai tura namona ta ia henia unai amo ia do ia durua ia lalohekwarahilaia gaudia ia haheaukalaia totona. Unai hegeregerena, bema tura korikorina ta dekenai iseda hekwakwanai ita gwauraia, ia ese ita do ia durua iseda hekwakwanai ita haheaukalaia totona. (2 Kin. 2:2; Aon. 17:17) Bema ia auka ta oi hereva henia totona, vadaeni namona be Iehova oi guriguri henia unai amo ia ese tadikaka o taihu ta do ia gaukaralaia oi ia durua totona.

10. Edena dala ai Elia ena haheitalai ese ita ia hagoadaia, bona Isaia 40:28, 29 ese edena dala ai ita ia durua?

¹⁰ Iehova ese Elia ia durua dainai ena hekwakwanai ia haheaukalaia bona lagani momo lalonai Ia ia hesiai henia. Elia ena haheitalai ese ita ia hagoadaia. Nega haida iseda mauri ai idia vara gaudia dainai ita lalohekwarahi bada bona unai ese ita ia hamanokaia diba. To Iehova amo heduru ita abia neganai ita do ia durua Ia ita hesiai henia noho totona.​—Isaia 40:28, 29 duahia.

11-13. Idaunegai Dirava idia hesiai taudia toi be dahaka dainai idia lalohekwarahi bada?

¹¹ Baibel ese ia gwauraia taudia haida be hekwakwanai idia davaria neganai idia lalohekwarahi  danu. Hegeregere, Hana be natuna lasi dainai ia hemarai bada bona Penina, Elikana ena adavana iharuana ese ia kirikirilaia. (1 Sam. 1:2, 6) Hana ia lalohekwarahi bada dainai ia taitai bona aniani ia ania lasi.​—⁠1 Sam. 1:7, 10.

¹² Nega haida King Davida danu be ia lalohekwarahi bada. Ia davaria hekwakwanai idauidau mani oi laloa. Kara dika momo ia karaia dainai ia lalometau bada. (Sal. 40:12) Iena natuna Abesaloma ese ia gwau-edeede henia, bona unai sibona lasi badina Abesaloma idia hamasea danu. (2 Sam. 15:13, 14; 18:33) Bona iena tura namona ta ese ia koia danu. (2 Sam. 16:23–17:2; Sal. 55:12-14) Davida ese salamo bukana ai ia torea revareva momo ese ena lalometau ia herevalaia bona Iehova ia abidadama henia karana ia hahedinaraia.​—⁠Sal. 38:5-10; 94:17-19.

¹³ Salamo torea tauna ma ta be kara dika taudia edia noho dalana ia itaia neganai, ia mama. Reana ia be Levi tauna Asapa ena bese amo bona ia be “Dirava ena Dubu Helaga dekenai” ia gaukara. Unai salamo torea tauna be ia lalohekwarahi dainai ia moale lasi. Danu, Dirava hesiai henia karana amo ia abia hahenamo ia daradaralaia.​—⁠Sal. 73:2-5, 7, 12-14, 16, 17, 21.

14-15. Hana, Davida bona Asapa be Iehova amo heduru idia abia karana amo dahaka ita dibaia?

¹⁴ Iehova idia hesiai henia taudia toi be Ia amo heduru idia abia. Dirava dekenai edia lalohekwarahi bona ena badina be guriguri amo idia gwauraia. Bona hanaihanai Iehova tomadiho henia rumana dekenai idia lao.​—⁠1 Sam. 1:9, 10; Sal. 55:22; 73:17; 122:1.

¹⁵ Iehova be mai hebogahisi ida edia noinoi ia haerelaia. Hana ia durua dainai lalomaino ia abia. (1 Sam. 1:18) Davida ia gwau: “Kara  maoromaoro tauna ena hisihisi be momo, to Lohiabada ese unai tau do ia durua, vadaeni unai hisihisi do ia ore.” (Sal. 34:19) Salamo torea tauna ia mamia Iehova be ena “imana [“idibana,” NWT] ia dogoatao noho” bona ia hakaua. Ia gwau: “To lau be Dirava badibadinai lau noho. Inai be namo herea momokani. Siahu Ibounai Lohiabada e, oi be lauegu magu momokani.” (Sal. 73:23, 24, 28) Unai haheitalai amo dahaka ita dibaia? Nega haida hekwakwanai momo ita davaria neganai ita lalohekwarahi bada. Bema Iehova ese ma haida ia durua daladia ita laloa dobu, guriguri amo ia ita noia bona ia ura henia karadia ita karaia, do ita haheauka.​—Sal. 143:1, 4-8.

16-17. (a) Dahaka dainai ita sibona ita noho lasi be namo? (b) Edena dala ai goada ita abia diba?

¹⁶ Unai haheitalai toi ese ita dekenai mai anina bada gauna ta ia hadibaia. Namo lasi Iehova bona ena taunimanima amo ita daudau bona ita sibona ita noho. (Aon. 18:1) Nancy be ia lalometau bada badina ena adavana ese ia rakatania. Ia gwau: “Nega momo lau ura lasi ta lau itaia eiava hereva henia. To lau be sibona lau noho neganai egu lalometau ia ore diba lasi.” To, Nancy be dala ia tahua unai amo ma haida ia durua idia davaria hekwakwanai idia haheaukalaia totona.  Ia gwau: “Edia lalohekwarahi be lau dekenai idia gwauraia neganai, lau kamonai. Lau mamia idia bona edia hekwakwanai lau laloa neganai, lau sibona egu hekwakwanai lau laloa bada lasi.”

¹⁷ Kongrigeisen heboudia lao henia karana ese ita ia hagoadaia diba. Unuseniai ita noho neganai Iehova be ita ia durua bona hagoadaia diba. (Sal. 86:17) Bona ena lauma helaga, iena Hereva bona ena taunimanima amo ita ia hagoadaia. Hebou ibounai ese ita ia durua unai amo ta ta ita “hagoadaia heheni” diba. (Roma 1:11, 12) Taihu ta ladana Sophia ia gwau: “Iehova bona iseda tadikaka taihu ese lau idia durua lau haheauka totona. Iseda kongrigeisen heboudia ese lau idia durua bada. Hanaihanai lau mamia, haroro gaukara lau karaia bona kongrigeisen tadikaka taihu ida lau gaukara hebou neganai egu lalohekwarahi lau haheaukalaia diba.”

18. Bema ita lalomanoka Iehova be ita totona dahaka do ia karaia?

¹⁸ Ita lalomanoka neganai, namona be ita laloatao Iehova ia gwauhamata vaira nega ai lalohekwarahi do ia haorea momokani. To unai sibona lasi, badina hari ita ia durua ita davaria hekwakwanai idauidau ita haheaukalaia totona. Ia ese iseda “ura ia hagoadaia” eiava ita ia durua unai amo lalomanoka bona lalohekwarahi ena hemami ita hanaia diba.​—Fili. 2:13.

19. Edena dala ai Roma 8:37-39 ena gwauhamata herevana ese ita ia hagoadaia?

¹⁹ Roma 8:37-39 duahia. Aposetolo Paulo ese ita ia hadibaia gau ta ese ita be Dirava ena lalokau amo do ia koua lasi. Edena dala ai iseda tadikaka bona taihu do ita durua idia davaria lalohekwarahi idia haheaukalaia totona? Stadi atikol 26 ese ita do ia durua Iehova ita tohotohoa totona, unai amo ma haida ita hebogahisi henia bona iseda tadikaka taihu ita durua daladia do ia herevalaia.