ISRAELA taudia be Ioridane Sinavai do idia hanaia bona Dirava ese ia gwauhamatalaia tanona dekenai do idia lao, unai negai taunimanima haida ese idia vadivadi henidia. Unai vadivadi taudia be idau bese hahinedia bona idia ura Israela tatau idia boiria edia aria ta dekenai idia lao totona. Reana Israela tatau do idia laloa unai be nega namona, tura matamadia idia davaria, idia ida idia mavaru bona idia aniani hebou totona. To, herevana unai idau bese hahine edia kastom bona edia kara be Dirava ena Taravatu hegeregerena lasi, Israela tatau haida be inai bamona idia gwau: ‘Ai diba dahaka be maoro bona dahaka be kerere.’

 To dahaka ia vara? Baibel ese ia hahedinaraia, Israela tatau be Moaba hahine ida matabodaga karadia idia karaia. Momokani, unai Moaba hahinedia idia ura Israela tatau ese dirava koikoidia do idia tomadiho henia. Bona unai bamona idia karaia! Unai kara dainai “[Iehova] ese ia badu henidia.”​—Num. 25:1-3.

Unai Israela taudia be dala rua ai Dirava ena Taravatu idia utua: Kaivakuku idia tomadiho henia bona Moaba hahinedia ida matabodaga karadia idia karaia. Edia gwau-edeede karana dainai taunimanima tausen momo idia mase. (Eso. 20: 4, 5, 14; Deu. 13:6-9) Dahaka dainai unai bamona ia vara? Bema unai tatau ese unai nega ai Dirava ena taravatu idia utua lasi, Israela taudia tausen momo be Ioridane Sinavaina do idia hanaia bona Gwauhamata Tanona dekenai do idia lao.​—⁠Num. 25:5, 9.

Unai dainai, aposetolo Paulo be ia gwau: “Unai gaudia be idia dekenai idia vara bona idia be haheitalai bamona, bona unai gaudia idia torea, inai nega oromana ena dokona ai ita noho taudia idia hadibaia totona.” (1 Kor. 10:7-11) Ita diba Satani be unai ia moalelaia badina Israela taudia haida be kara dika badana idia karaia, bona unai dainai Gwauhamata Tanona dekenai idia vareai lasi. Namona be Paulo ena sisiba ita laloa bada, badina Satani ia ura lasi Dirava ena tanobada matamata lalonai ita vareai!

Satani ia ura Keristani taudia ia tarapua, unai dainai ia diba momo tarapu ia gaukaralaia taunimanima ia koia totona. Israela taudia edia nega ai Satani ese idia ia tarapua totona, ia ese sex kara bodagadia ia gaukaralaia. Hari iseda negai danu, kara bodagadia be tarapu dikana momokani. Satani ese ita ia tarapua diba dalana ta be ponografi laulau itaia karana.

Hari inai negai, ta be hunia dalanai ponografi laulau ia itaia, bona taunimanima be unai idia diba lasi. Guna, ta be ponografi laulau ia itaia totona, ia be muvi theater ta dekenai do ia lao. Bona unuseniai matabodaga laulau idia hahedinaraia muvi do ia itaia. Eiava ponografi laulau idia hahedinaraia buka idia hoihoilaia sitoa dekenai do ia lao bona unai buka do ia hoia. To hari taunimanima be unai bamona gabudia dekenai idia lao lasi, badina momo ese do idia itadia dainai idia hemarai. Hari inai negai, ta be intanet amo ena gaukara gabunai ponografi laulau ia itaia eiava sibona ena motuka lalonai unai laulau dikadia ia itaia diba. Bona tano momo ai, ta be sibona ena ruma lalonai ponografi laulau ia itaia diba.

Danu hari taunimanima be mai edia mobael fon dainai ponografi laulau idia itaia haraga diba. Herevana dala dekenai idia raka eiava basi lalonai idia noho, to edia mobael fon eiava tablet amo matabodaga laulau idia itaia diba.

Taunimanima be hunia dalanai ponografi laulau idia itaia dainai, hari inai negai unai kara bodagana ese edia mauri ia hadikaia. Ponografi laulau idia itaia taudia momo be edia headava ia dika, sibona edia tauanina idia matauraia lasi, bona edia lalomamina ia dika. Bona unai ese edia hetura karana Dirava ida ia hadikaia. Unai dainai ita gwau diba ponografi laulau itaia karana ese ta ia hadikaia diba. Nega momo, unai bamona kara idia karaia taudia edia lalomamina be ia miro. Bona do idia hekwarahi unai kara idia rakatania totona.

Namona be ita diba, Satani ena tarapu amo Iehova ese ita do ia gimaia. Bema ita ura Iehova ese ita ia gimaia, namona be idaunegai Israela tatau ese idia karaia lasi karana ita karaia​—⁠iena “hereva do ita kamonai henia.” (Eso. 19:5) Namona be ita diba Dirava be ponografi laulau itaia karana ia inai henia momokani. Dahaka dainai unai bamona ita gwau?

Mani inai oi laloa: Dirava ese Israela besena dekenai ia henia taravatu be bese ma haida edia taravatu amo ia idau. Unai taravatu be haba bamona, Israela taudia ia gimaia unai amo bese ma haida edia kara mirodia lalonai do idia vareai lasi. (Deu. 4:6-8) Unai taravatu ese mai anina  bada gauna ta ia hahedinaraia: Iehova be sex kara bodagadia ia inai henia momokani.

Iehova be idau bese taudia ese idia karaia dika idauidau ia gwauraia neganai, Israela taudia ia hadibaia ia gwau: “Aigupito tano dekenai umui noho, to Aigupito taudia edia kara bamona do umui karaia lasi. . . . Edia kara ese edia tano idia hamiroa. Unai dainai dika davana be unai tano dekenai lau henia.” Israela ena Dirava helagana ena matanai, Kanana taudia ese idia noholaia tanona be ia miro eiava kara bodagadia amo ia honu.​—⁠Lev. 18:3, 25.

Herevana Iehova ese Kanana taudia ia panisia, to edia huanai haida be sex kara bodagadia idia do karaia noho. Lagani 1,500 murinai, Paulo ese unai idau bese taudia ia herevalaia ia gwau, ‘idia be hemarai lasi momokani’ taudia. Idia be, “gwau-edeede hemarai karadia lalonai idia vareai momokani, mai mataganigani ida kara mirodia idauidau ibounai idia karaia.” (Efe. 4:17-19) Hari inai negai, taunimanima momo be gwau-edeede hemarai karadia idia karaia. Namona be tomadiho momokani taudia ese unai kara bodagadia idia itaia lasi.

Ponografi laulau itaia karana be Dirava matauraia lasi karana. Badina Iehova ese taunimanima be iena toana hegeregerena ia karaia unai dainai dahaka be maoro bona dahaka be kerere edia idau ita diba. Bona Dirava ese mahuta hebou karana ena taravatu be ita dekenai ia henia danu. Unai taravatu be headava taudia sibona ese mai hemataurai ida unai kara idia moalelaia diba. (Gen. 1:26-28; Aon. 5:18, 19) To ponografi laulau idia hahedinaraia bona itaia taudia be unai taravatu idia badinaia, a? Lasi. Badina idia ese Dirava ena taravatu maorodia idia dadaraia. Momokani, ponografi laulau idia hahedinaraia noho taudia be Iehova idia matauraia lasi. Dirava ese iena taravatu idia dadaraia taudia ibounai do ia hahemaoro henia.​—⁠Roma 1:24-27.

To mai ura ida ponografi laulau idia hahedinaraia bukadia idia duahia bona idia itaia taudia be edena bamona? Haida idia laloa unai ese idia do ia hadikaia lasi. To, idia danu be Iehova ena taravatu idia dadaraia noho. Matamanai do idia laloa ponografi laulau itaia karana ese Dirava ena taravatu do ia utua lasi. To Baibel ese ia hahedinaraia goevagoeva, Dirava momokanina idia tomadiho henia taudia ese ponografi laulau  itaia karana idia inai henia momokani be namo. Baibel ia gwau: “Kara dika do umui ura henia lasi momokani, kara namo do umui ura henia.”​—⁠Amo. 5:15.

Ponografi laulau itaia karana idia dadaraia taudia dekenai nega haida ia auka unai hereva idia badinaia totona. Ita be goevadae lasi taudia, bona nega haida do ita hekwarahi sex kara bodagadia ita dadaraia totona. Danu, ita be goevadae lasi taudia dainai nega haida do ita laloa ponografi laulau itaia karana be kerere lasi. (Ier. 17:9) To Keristani taudia ai idia lao taudia momo be unai kara bodagadia idia dadaraia. Unai oi diba dainai, unai ese oi do ia durua ura dikadia oi dadaraia totona. Dirava ena hereva ese oi do ia durua diba Satani ena tarapu ponografi laulau itaia karana oi dadaraia totona.

Ataiai ita herevalaia bamona, Israela taudia momo be matabodaga karadia idia lalohadailaia dainai kara dikadia idia karaia. Hari inai negai unai bamona ia vara diba. Iesu ena tadikaka Iamesi ese unai dika ia herevalaia, ia gwau: “Ta be sibona ena . . . ura ese ena lalona ia veria bona ia koia. Bona unai ura ia rogorogo bamona neganai kara dika ia havaraia.” (Iam. 1:14, 15) Bema ta be ena lalona dekenai lalohadai dikadia ia laloa loulou, unai tauna be kara dika ia karaia diba. Unai dainai namona be ita hekwarahi matabodaga lalohadaidia ita kokia totona, ita lalohadailaia lasi be namo.

Bema ta be matabodaga lalohadai ia abia matamaia, kara ta ia karaia haraga be namo. Iesu ia gwau: “Bema emu imana eiava aena ese oi ia hahekwakwanaia noho, oi utua oho bona oi negea. . . . Danu, bema emu matana ese oi ia hahekwakwanaia noho, oi kokia bona oi negea.” (Mat. 18:8, 9) Iesu ia gwau lasi iseda imana, aena eiava matana ita utua oho. To ena hereva ena anina be, namona be karaharaga ita idia hahekwakwanaia gaudia ita kokia. Unai sisiba hegeregerena, edena dala ai ponografi laulau itaia karana do ita dadaraia?

Ponografi laulau idia hedinarai neganai, namo lasi oi laloa, lau dekenai gau ta do ia vara lasi. Karaharaga gabu ta oi raraia bona TV, kompiuta eiava mobael fon oi koua haraga. Goeva gaudia oi raraia. Bema unai bamona oi karaia unai ese oi do ia durua oi laloa maoromaoro totona.

Bema mai momokani ida ponografi laulau itaia karana oi hadokoa, to nega ta ta ai unai lalohadai oi abia be edena bamona? Ta be nega daudau lalonai ponografi laulau eiava lalohadai ia laloatao diba. Bona nega idauidau ai unai lalohadai dikadia idia giroa mai diba. Bema unai ia vara, unai ese ta ia doria diba kara mirona ta ia karaia totona, hegeregere ta be sibona ena kopina (usina o kiona) do ia gadaralaia matamaia. Unai dainai oi noho hegaegae bema unai bamona lalohadai oi abia matamaia, karaharaga oi dadaraia be namo.

Namona be emu lalona oi hadaia Dirava ese ia ura henia lalohadai oi abia bona kara ta oi karaia totona. Paulo ia karaia bamona badina ia danu be ‘ena tauanina ia botaia bona igui hesiai tauna bamona ia hakaua.’ (1 Kor. 9:27) Namo lasi lalohadai eiava ura dikadia ese oi idia biagua. Baibel ia gwau: “Emui lalona do umui hamatamataia karana amo emui kara do umui haidaua noho. Vadaeni umui sibona dekenai do umui hamomokania Dirava ena ura be ia namo, ia ese ia abia dae bona ia goevadae.” (Roma 12:2) Laloatao: Dirava ese ia moalelaia gaudia oi laloa bona oi karaia neganai do oi moale, to bema matabodaga karadia idia hahedinaraia gaudia oi karaia noho do oi lalohisihisi.

Namona be Baibel ena siri haida oi laloatao. Bema lalohadai kereredia oi abia matamaia, unai siri ta ta oi laloatao be namo. Hegeregere Salamo 119:37; Isaia 52:11; Mataio 5:28; Efeso 5:3; Kolose 3:5; bona 1 Tesalonika 4:4-8 ese oi do ia durua Iehova ena lalohadai oi badinaia totona unai amo ponografi laulau itaia karana do oi dadaraia.

Bema nega haida matabodaga laulau itaia karana bona matabodaga lalohadaidia oi biagua totona be auka, vadaeni dahaka do oi karaia? Namona be Iesu ena haheitalai oi tohotohoa. (1 Pet. 2:21) Iesu be ia bapatiso murinai, Satani ese hanaihanai ia dibagania. To Iesu be dahaka ia karaia? Ia ese Satani ena hedibagani ia dadaraia totona Baibel ena siri ta ta ia gaukaralaia. Ia gwau: “Satani, oi siri!” bona Satani ese ia rakatania. Iesu ese Diabolo ena hedibagani ia dadaraia hegeregerena, oi danu be unai bamona oi karaia diba. (Mat. 4:1-11) Satani bona ena tanobada ese matabodaga lalohadai do idia hahedinaraia noho emu lalohadai idia hadikaia totona, to namona be oi hesiku lasi bona oi gini goada. Iehova ese oi do ia durua Satani ena tarapu, ponografi laulau itaia karana oi dadaraia totona.

Hanaihanai Iehova oi guriguri henia. Paulo ia gwau: “Dirava dekenai emui noinoi herevadia do umui gwauraia hedinarai. Bona Dirava ena maino, laloparara ibounai ia hereaia gauna, ese emui kudouna bona lalona do ia gimaia, Keriso Iesu amo.” (Fili. 4:6, 7) Dirava ese oi dekenai lalomaino do ia henia bona oi do ia durua lalohadai kereredia oi dadaraia totona. Bema Iehova kahirakahira oi lao, ‘ia be oi kahirakahira do ia mai.’​—⁠Iam. 4:8.

Bema Siahu Ibounai Diravana ida iseda hetura karana ita hagoadaia, unai ese Satani ena tarapu amo ita do ia gimaia. Iesu ia gwau: “Tanobada ena lohia tauna [Satani] be ia mai noho. Bona ia be siahu lasi lau dekenai.” (Ioa. 14:30) Dahaka dainai Iesu be unai ia gwauraia? Badina ia gwau: “Lau ia siaia tauna be lau ida, ia ese lau ia rakatania lasi, badina hanaihanai ia hamoalea gaudia lau karaia.” (Ioa. 8:29) Bema Dirava ese ia moalelaia gaudia oi karaia, ia ese oi do ia rakatania lasi. Bona bema ponografi laulau itaia karana ena tarapu oi dadaraia, oi dekenai Satani be siahu lasi.