1. (a) Dirava gari henia karana ena anina be dahaka? (b) Dahaka dainai Iehova idia lalokau henia taudia ese unai idia hahedinaraia be gau badana?

KERISTANI taudia ese Dirava idia lalokau henia bona idia gari henia danu. Inai atikol ai dahaka dainai Dirava gari henia karana be mai anina bada do ita herevalaia. To Dirava ita gari henia ena anina be dahaka? Dirava idia gari henia taudia be ia idia matauraia bada. Idia ura lasi edia guba Tamana ena lalona idia hahisia bona idia ura lasi edia hetura karana ia ida idia hadikaia.​—Sal. 111:10; Aon. 8:13.

2. Salamo 86:11 ena hereva bamona, dahaka gau rua do ita herevalaia?

² Salamo 86:11 duahia. Unai siri ena hereva oi laloa neganai, do oi itaia King Davida ia laloparara Dirava gari henia karana be mai anina bada. Mani ita itaia edena dala ai Davida ena guriguri herevadia ita badinaia diba. Ginigunana be, Dirava ena ladana ita matauraia ena badina haida do ita tahua. Iharuana be, iseda mauri dinadia ta ta ai edena dala ai ita hahedinaraia Dirava ena ladana ita matauraia do ita herevalaia.

3. Dahaka ese Mose ia durua Dirava ena ladana ia matauraia totona?

³ Mani Mose ena hemami oi laloa, ia be nadi matuna lalonai ia noho bona Iehova ena hairai ia hanaia ia itaia. Iesu be tanobada ai ia do mai lasi lalonai, unai be tau ta dekenai ia vara hoa karana ta! Mose be aneru ta amo inai hereva ia kamonai: “Lau be [Iehova]. Lau [Iehova] be bogahisihisi bona hariharibada Diravana. Lau be badu dekenai lau haraga lasi, to bogahisihisi  bona lalokau dekenai lau be haraga. Taunimanima momo herea dekenai lau bogahisihisi henia noho, bona kara dika, bona kara kerere idauidau lau gwauatao noho.” (Eso. 33:17-23; 34:5-7) Mose be Iehova ena ladana ia gwauraia negadiai ia vara gauna ia laloatao. Unai dainai Mose ese gabeai Israela taudia ia hadibaia ‘Dirava ena ladana mai hairaina, bona mai garina idia matauraia’ totona.​—Deu. 28:58.

4. Edena kara namodia laloa dobu karana ese ita idia durua Iehova ita matauraia totona?

⁴ Inai ladana Iehova ita laloa neganai, unai ladana ia abia tauna ena kara badadia ita laloa be namo. Hegeregere, iena siahu, iena aonega, iena hahemaoro goevana, bona iena lalokau ita laloa lou. Unai kara bona kara namodia ma haida ita laloa dobu neganai, ita do idia durua Dirava ita matauraia totona.​—Sal. 77:11-15.

5-6. (a) Dirava ena ladana ena anina be dahaka? (b) Esodo 3:13, 14 bona Isaia 64:8 edia hereva bamona, Iehova be edena dala ai ena ura ia hagugurua?

⁵ Dirava ena ladana ena anina ita diba, a? Diba bada taudia momo idia gwau inai ladana Iehova ena anina be “Ia ese Ia Halaoa.” Unai ladana ena anina amo ita diba, gau ta ese Iehova ena ura ia koua diba lasi, bona ena ura do ia hagugurua. Edena dala ai?

⁶ Iehova be gau idauidau ai sibona ia halaoa, unai amo ena ura ia hagugurua diba. (Esodo 3:13, 14 duahia.) * Iseda pablikeisen ai, nega momo ita idia hadibaia unai kara namona ita laloa dobu totona. Iehova ese ena goevadae lasi hesiai taudia be gau idauidau ai ia halaoa diba, iena hesiai gaukara idia karaia bona iena ura idia hagugurua totona. (Isaia 64:8 duahia.) Unai dala idauidau amo Iehova ese ena ura ia hagugurua. Gau ta ese ia koua diba lasi ena ura ia hagugurua totona.​—Isa. 46:10, 11.

7. Edena dala ai iseda guba Tamana matauraia karana ita habadaia diba?

⁷ Dirava ese ia hagugurua gaudia bona iena heduru amo ita hagugurua gaudia ita  laloa dobu neganai, iseda guba Tamana do ita tanikiu henia. Hegeregere, ia havaraia gaudia ibounai ita laloa dobu neganai, Iehova ita matauraia badina hoa dalanai unai gaudia ia karaia. (Sal. 8:3, 4) Bona Iehova ena ura hagugurua totona gau idauidau ai ita ia halaoa karana ita laloa dobu neganai, ia ita matauraia. Inai ladana Iehova be idau momokani! Unai ladana ese iseda Tamana ena kara namodia, ia karaia vadaeni gaudia, bona do ia karaia gaudia ibounai ia hahedinaraia.​—Sal. 89:7, 8.

8. Deuteronomi 32:2, 3 ena hereva bamona, Iehova ia ura ena hesiai taudia ese ena ladana be edena bamona do idia laloa?

⁸ Israela taudia be Gwauhamata Tanona idia do abia lasi neganai, Iehova ese Mose dekenai ane ta ia hadibaia. (Deu. 31:19) Unai murinai Mose ese taunimanima dekenai unai ane ma ia hadibaia. (Deuteronomi 32:2, 3 duahia.) Siri 2 bona 3 ita laloa dobu neganai, ia hahedinaraia goevagoeva Iehova ia ura lasi ena ladana ita hunia, eiava ita laloa ena ladana be helaga momokani dainai ita gwauraia lasi. Ia ura aneru bona taunimanima ibounai ese ena ladana idia diba! Israela taudia idia moale badina Mose ese Iehova bona Iena ladana hairaina be idia dekenai ia hadibaia! Medu ese tubutubu gaudia ia durua bona idia tubu namonamo hegeregerena, Mose ese idia dekenai ia hadibaia gaudia ese idia ia durua bona edia abidadama ia hagoadaia. Edena dala ai ita hahedinaraia iseda hahediba dalana be unai bamona?

9. Edena dala ai Iehova ena ladana ita hahelagaia diba?

⁹ Ruma-ta-ruma-ta haroro eiava pablik gabudia ai ita haroro neganai, namona be iseda Baibel ita gaukaralaia taunimanima dekenai Dirava ena ladana, Iehova, ita hadibaia totona. Idia dekenai pablikeisen idauidau, vidio bona iseda websait amo Iehova idia hanamoa gaudia momo ita hariharilaia diba. Gaukara gabuna, sikuli eiava loaloa gabudia ai, dala ia kehoa neganai ma haida dekenai iseda lalokau Diravana bona ena kara ita herevalaia diba. Ita davaria taudia dekenai Iehova ena ura taunimanima bona tanobada totona ita herevalaia neganai, reana unai be nega ginigunana do idia laloparara Iehova ese idia ia lalokau henia bada. Ma haida dekenai iseda lalokau Tamana ena hereva momokani ita herevalaia neganai, ita ese Dirava ena ladana ita hahelagaia unai. Taunimanima ita durua Iehova idia gwauraia koikoi herevadia bona ena ladana idia hadikaia herevadia idia dadaraia totona. Baibel amo taunimanima ita durua neganai idia moale.​—Isa. 65:13, 14.

10. Dahaka dainai Baibel stiuden dekenai Dirava ena taravatu ita hadibaia sibona be hegeregere lasi?

¹⁰ Iseda stiuden ida Baibel ita stadilaia neganai, ita ura idia ita durua Iehova ena ladana idia dibaia bona idia gaukaralaia totona. Danu, ita ura idia ita durua Iehova ena ladana ena anina idia diba totona. Unai do ita hagugurua diba bema idia dekenai Dirava ena hakaua herevadia bona taravatu sibona ita hadibaia, a? Stiuden namona ese Dirava ena taravatu do ia dibaia bona do ia ura henia. To, stiuden be Iehova ia lalokau henia dainai do ia kamonai henia, a? Laloatao, Heva be Dirava ena taravatu ia diba, to ia ese unai Taravatu ia Henia Tauna ia lalokau henia momokani lasi; Adamu danu be unai bamona. (Gen. 3:1-6) Unai dainai ma haida dekenai Dirava ena kara maoromaoro taravatudia ita hadibaia sibona be hegeregere lasi.

11. Stiuden dekenai Dirava ena taravatu ita hadibaia neganai, edena dala ai ita durua Taravatu ia Henia Tauna ia lalokau henia totona?

¹¹ Iehova ena taravatu be mai edia namo  bona ita idia durua. (Sal. 119:97, 111, 112) To, stiuden tauna be unai do ia abia dae lasi bema ia laloparara lasi Iehova ese lalokau dainai unai taravatu ia atoa. Unai dainai reana iseda stiuden do ita nanadaidia: “Dahaka dainai oi laloa Dirava ese ena hesiai taudia ia noia unai bamona idia karaia eiava inai bamona idia karaia lasi? Unai kara amo Dirava dekenai dahaka ita dibaia?” Bema iseda stiuden ita durua Iehova idia laloa bona iena ladana idia lalokau henia totona, edia kudouna ai unai do idia abia dae. Iseda stiuden ese Dirava ena taravatu do idia lalokau henia sibona lasi, to Taravatu ia Henia Tauna do idia lalokau henia danu. (Sal. 119:68) Edia abidadama do ia goada bona hahetoho idauidau do idia haheaukalaia diba.​—1 Kor. 3:12-15.

12. Edena dala ai Davida ena lalona be ia rua, bona unai dainai dahaka ia vara?

¹² Salamo 86:11 ai, inai mai anina bada herevana ia noho, “lauegu lalona do oi hatamonaia momokani.” King Davida be Dirava ena siahu amo unai hereva ia torea, badina iena mauri lalonai ia itaia, bema iseda lalona be ia tamona lasi, hahetoho lalonai ita moru diba. Nega ta, ia be ena ruma ataiai ia noho lalonai, tau ta ena adavana ia itaia ia digu noho. Unai negai, Davida ena lalona be ia tamona eiava rua? Iehova ena taravatu ia diba: ‘Taunimanima ta ena adavana do oi ura henia lasi.’ (Eso. 20:17) To, Davida be unai hahine ia raraia noho. Iena lalona be ia rua: Bataseba ia ura henia bona danu ia ura Iehova ia hamoalea. Ena be Davida be lagani momo lalonai Iehova ia lalokau henia bona ia gari henia, to ena mataganigani urana ia badinaia. Unai nega ai, Davida be kara dika badana ia karaia. Davida ese Iehova ena ladana ia hadikaia. Bona kerere lasi taudia dekenai dika ia havaraia, ena ruma bese taudia danu.​—2 Sam. 11:1-5, 14-17; 12:7-12.

13. Edena dala ai ita diba Davida ena lalona be ia tamona lou?

¹³ Iehova ese Davida ia matahakani henia bona ena hetura karana Iehova ida ia hagoadaia lou. (2 Sam. 12:13; Sal. 51:2-4, 17) Davida ena lalona ia tamona lasi dainai idia vara hekwakwanai idauidau ia laloatao. Iena hereva Salamo 86:11 ai ia gwau: “Lauegu lalona do oi hatamonaia momokani.” Iehova ese Davida ia durua ena lalona ia hatamonaia totona, a? Oibe, badina Baibel ia gwau Davida be “Dirava, ia badinaia momokani.”​—1 Kin. 11:4; 15:3.

14. Edena henanadai do ita laloa, bona dahaka dainai?

¹⁴ Davida ena sivarai ese ita ia hadibaia bona hagoadaia. Hari, Dirava ena hesiai taudia be  Davida ena kerere badana amo gau haida idia dibaia. Herevana ita be vanegai sibona eiava lagani momo lalonai Iehova ita hesiai henia, namona be sibona ita nanadaia, ‘Satani ese ia havaraia lalona veria hedibagani lau dadaraia noho, a?’

15. Edena dala ai Dirava gari henia karana ese matabodaga laulau eiava muvi amo ita ia gimaia?

¹⁵ Hegeregere, matabodaga urana idia havaraia diba gaudia be TV eiava intanet websait ai oi itaia neganai, dahaka oi karaia? Reana do oi laloa unai laulau eiava muvi be ponografi gauna lasi. To, unai be Satani ese ia gaukaralaia emu lalona ia veria totona, a? (2 Kor. 2:11) Unai laulau be ira ta amo au badana ta siria karana ida ita hahegeregerea diba. Nega ginigunana ira amo au idia siria neganai, maoromaoro ia parara lasi. To, nega momo ira amo idia siria neganai, au ia parara diba. Unai hegeregerena, ta be matabodaga laulau ia itaia neganai, maoromaoro do ia kara dika lasi. To, metairametaira ia hakaua kerere kara dika ia karaia totona, bena iena lalona ia rua bona ena Dirava badinaia karana ia hadikaia. Unai dainai matabodaga laulau eiava muvi do ita dadaraia! Iseda lalona ia tamona bona Iehova ita gari henia!

16. Hahetoho ita davaria neganai, edena henanadai ita lalodia be namo?

¹⁶ Satani be matabodaga laulau eiava muvi sibona amo ita ia tohoa lasi, to gau momo ia gaukaralaia danu. Dahaka do ita karaia? Reana ita laloa diba unai gaudia be dika momokani lasi. Hegeregere, reana do ita laloa: ‘Inai lau karaia neganai orea amo lau do idia atoa siri lasi, unai dainai reana ia be kerere badana lasi.’ Unai lalohadai be kerere momokani. Namona be sibona ita nanadaia: ‘Satani be inai hahetoho ia gaukaralaia egu lalona ia veria totona, a? Bema lau be ura dikadia lau badinaia, Iehova ena ladana do lau hadikaia, a? Inai kara dainai Dirava kahirakahira do lau lao  diba, eiava ia amo do lau daudau?’ Namona be unai bamona henanadai oi lalodia dobu. Aonega totona Iehova oi noia, unai amo mai momokani ida unai henanadai oi haerelaidia diba. (Iam. 1:5) Unai ese oi ia gimaia bona ia durua hahetoho oi dadaraia totona Iesu bamona, ia gwau: “Satani, oi siri!”​—Mat. 4:10.

17. Dahaka dainai iseda lalona ia rua lasi be namo? Haheitalai gwauraia.

¹⁷ Iseda lalona ia rua be namo lasi. Mani oi laloa, spot tim taudia be idia gaukara hebou namonamo lasi. Haida idia ura sibona edia ladana idia abia isi, haida idia ura lasi gadara ena taravatu idia badinaia, bona ma haida be edia hadibaia tauna idia matauraia lasi. Unai bamona spot tim be gadara ta ai do idia kwalimu lasi. To, idia lalotamona spot tim be idia kwalimu diba. Bema Iehova hesiai henia karana ai emu lalohadai, ura, bona hemami be idia tamona, oi be unai lalotamona spot tim bamona ai oi lao diba. Laloatao, Satani ia ura emu lalona do ia rua. Ia ura emu lalohadai, ura, bona hemami be idia tamona lasi bona Iehova ena taravatu ida idia hegeregere lasi. To, emu lalona ia tamona be namo, unai amo Iehova oi hesiai henia diba. (Mat. 22:36-38) Namo lasi Satani ese emu lalona ia tamona karana ia hadikaia!

18. Mika 4:5 ena hereva bamona, emu lalona oi hadaia dahaka do oi karaia?

¹⁸ Davida oi tohotohoa, ia be Iehova ia guriguri henia, ia gwau: “Lauegu lalona do oi hatamonaia momokani.” Namona be oi gaukara goada emu mauri ai unai oi badinaia totona. Dina ta ta ai, namona be oi karaia abia hidi badana eiava maragina amo oi hahedinaraia Iehova ena ladana oi matauraia. Oi be Iehova ena Witnes ta dainai unai bamona oi karaia neganai Iehova do oi hamoalea. (Aon. 27:11) Bona ita ibounai be peroveta tauna Mika danu do ita gwau: “Ita ese [Iehova], iseda Dirava do ita tomadiho henia, bona kamonai henia, ela bona hanaihanai.”​—Mika 4:5.