1. Dahaka dainai Iehova ese sinana ta ida sibona ia hahegeregerea?

“HAHINE ta ese iena natuna maragina ia laloaboio diba, a?” Iehova ese peroveta tauna Isaia ena nega ai unai henanadai ia gwauraia. Dirava ese ena taunimanima ia hamaorodia; “Sinana ta ese iena natuna maragina ia laloaboio diba, to lau ese umui do lau laloaboio lasi momokani.” (Isa. 49:15) Iehova be nega momo sinana ta ida sibona ia hahegeregerea lasi. To, unai nega ai unai bamona ia karaia. Iehova ese sinana ta bona ena natuna huanai ia noho lalokauna ia gaukaralaia iena hesiai taudia ia lalokau henia karana ia hahedinaraia totona. Sina momo be taihu Jasmin ena hereva idia abia dae, ia gwau: “Emu natuna be rata amo oi ubua negana ai, noho hanaihanai hetura karana oi hamatamaia unai.”

2. Iehova ena natuna ta be ia amo ia hure oho neganai, Iehova ena hemami be edena bamona?

² Bema Iehova ena natuna ta be Keristani kongrigeisen ia rakatania bona haroro gaukara ia karaia lasi, Iehova be unai ia diba. Unai dainai, lagani ta ta ai ia itaia iena hesiai taudia tausen momo be idia manoka * neganai, Iehova be ia lalohisihisi bada.

3. Iehova be dahaka ia ura?

³ Idia manoka pablisa momo be kongrigeisen dekenai idia giroa lou, bona idia ita welkam henia be namo! Iehova ia ura do idia giroa lou, bona unai ita ura danu. (1 Pet. 2:25) Edena dala ai ita durudia diba? Unai henanadai ita do haerelaia lasi lalonai, namona be ita tahua dahaka dainai haida be edia hebou  mai karana bona haroro gaukara idia hadokoa.

4. Moni gaukara dainai haida dekenai dahaka ia vara?

⁴ Haida be edia moni gaukara dekenai idia bisi bada herea. Asia dekenai ia noho tadikaka ta ladana, Hung * ia gwau, “Egu nega bona goada bada be moni gaukara dekenai lau haorea. Lau laloa bema mai egu moni momo, do lau hegeregere Iehova lau hesiai henia totona. Unai dainai hora momo lau gaukara. Hebou momo lau reaia ela bona kongrigeisen bamoa karana lau hadokoa. Satani ese tanobada ia gaukaralaia taunimanima edia lalona ia veria totona, unai amo metairametaira Dirava hesiai henia karana idia hadokoa.”

5. Taihu ta be dahaka hekwakwanai idauidau ia davaria?

⁵ Tadikaka bona taihu haida edia hekwakwanai be momo. Britain dekenai, sina ta ladana Anne be mai ena natudia faiv. Anne ia gwau: “Egu natuna ta ia vara neganai, ena tauanina ena kahana haida idia dika (disable). Gabeai, egu natuna kekeni ta be kongrigeisen amo idia atoa siri, bona egu natuna merona ta be kwarana ia dika gorerena ia abia. Lau lalohisihisi bada bena hebou lao karana bona haroro gaukara lau hadokoa. Unai murinai, lau manoka.” Anne, ena ruma bese bona unai bamona hekwakwanai idia davaria taudia ma haida ita lalodia bada!

6. Bema ta be Kolose 3:13 ena hereva ia badinaia lasi, edena dala ai Iehova ena orea amo ia hure oho diba?

⁶ Kolose 3:13 duahia. Iehova ena hesiai taudia haida be tadikaka eiava taihu ta ena kara dainai idia lalohisihisi. Aposetolo Paulo ia laloparara nega haida reana iseda tadikaka eiava taihu ta dekenai ‘badina ta dainai ita maumau.’ Reana ta ese ita ia kara namo henia lasi. Bema ita naria namonamo lasi, nega daudau lalonai ita badu noho diba. Ta be nega daudau ia badu noho neganai, Iehova ena orea amo ia hure oho diba. Mani South America ai, tadikaka Pablo ena sivarai ita laloa. Ta ia sivarai koikoi, ia gwau Pablo be kara dika ta ia karaia, unai dainai kongrigeisen ai ena maduna amo idia kokia. Pablo be dahaka ia karaia? Pablo ia gwau: “Lau badu bona metairametaira kongrigeisen amo lau hure oho.”

7. Ena lalomamina ese ia hahisia tauna dekenai dahaka ia vara diba?

⁷ Guna Dirava ena taravatu ia utua tauna be ena lalomamina ese ia hahisia noho diba, bona do ia mamia Dirava ese ia lalokau henia lasi. Ena be ia helalo-kerehai bona Dirava ese ena dika ia gwauatao vadaeni, to reana ia mamia ia be hegeregere lasi Iehova ena Witnes ta bamona ia noho totona. Tadikaka ta ladana Francisco ena hemami be unai bamona. Ia gwau: “Matabodaga karana lau karaia dainai lau idia sisiba henia. Ena be matamanai hebou lau lao noho, to gabeai lau lalohisihisi bada bona lau mamia lau be hegeregere lasi Iehova ena taunimanima huanai lau noho totona. Egu lalomamina ese lau ia kota henia, bona lau mamia Iehova ese egu dika ia gwauatao lasi. Gabeai, haroro bona hebou lao karana lau hadokoa.” Unai bamona hekwakwanai idia davaria tadikaka bona taihu be edena bamona oi lalodia? Edia hemami oi laloa, a? Bona mai anina bada gauna be, Iehova ese idia be edena bamona ia laloa?

8. Iehova ese guna ia idia hesiai henia taudia ia laloaboio, a?

⁸ Iehova ese guna ia idia hesiai henia taudia ia laloaboio lasi, ena be nega sisina lalonai ena orea idia rakatania. Danu, ena hesiai  gaukara lalonai idia karaia gaukara ia laloaboio diba lasi. (Heb. 6:10) Peroveta tauna Isaia ese haheitalai namona ta amo Iehova ese ena taunimanima ia laloa bada karana ia hahedinaraia. Isaia ia gwau: “Iena mamoe do ia ubua, mamoe naria tauna ia ubua noho bamona. Ia ese mamoe edia natudia do ia haboua, bona iena imana dekenai idia do ia rosia, idia do ia huaia lao.” (Isa. 40:11) Mamoe Naria Tauna Badana ena mamoe ta be mamoe serina amo ia raka oho neganai, ena hemami be edena bamona? Iesu ese Iehova ena hemami ia hahedinaraia ena hahediba taudia dekenai, inai henanadai ia henia neganai: “Dahaka umui laloa? Bema tau ta ena mamoe be 100 bona ta ia boio, ia ese ororo dekenai unai 99 do ia rakatania bona do ia lao ia boio mamoena ia tahua totona, ani? Bema ia davaria, umui lau hamaoroa momokani, do ia moale bada, to idia boio lasi mamoe 99 dekenai ena moale be do ia maragi.”​—Mat. 18:12, 13.

9. Idaunegai mamoe naria taudia namodia ese edena dala ai edia mamoe idia naria? (Rau 1 ena laulau itaia.)

⁹ Dahaka dainai ita gwau diba Iehova be mamoe naria tauna bamona? Badina Baibel negadiai, mamoe naria tauna namona be ena mamoe ia lalodia bada. Hegeregere, Davida be ena mamoe ia gimaia totona, laiona bona bea ta ia heatu henia. (1 Sam. 17:34, 35) Mamoe naria tauna namona be do ia diba bema ena mamoe ta be ia boio. (Ioa. 10:3, 14) Unai bamona mamoe naria tauna ena mamoe 99 be magu lalonai eiava mamoe naria tauna ma ta dekenai do ia rakatania, bena ia lao boio mamoe ia tahua totona. Iesu ese unai boio mamoe ena sivarai ia gwauraia, ita dekenai inai mai anina bada hereva momokani ta ia hadibaia totona: “Egu Tamana guba dekenai be ia ura lasi inai ladana maragi tauna ta ia boio.”​—Mat. 18:14.

10. Esekiela 34:11-16 ena hereva bamona, Iehova ia gwauhamata iena boio mamoe totona dahaka do ia karaia?

¹⁰ Iehova be ita ta ta bona iena magu amo idia raka oho “ladana maragi” taudia ia lalokau henia. Peroveta tauna Esekiela amo Dirava  ia gwauhamata, ena boio mamoe do ia tahudia bona do ia durudia edia hetura karana ia ida idia hagoadaia lou totona. Ia ese idia do ia durua daladia ia herevalaia, bona unai dala be Israela mamoe naria taudia ese idia gaukaralaia bema edia mamoe ta ia boio. (Esekiela 34:11-16 duahia.) Gau ginigunana be mamoe naria tauna ese mamoe do ia tahua, anina be do ia hekwarahi bona nega bada do ia gaukaralaia. Boio mamoe ia davaria neganai, mamoe serina dekenai do ia abia giroa lou. Danu, bema mamoe be mai ena bero eiava ia hitolo, mamoe naria tauna ese mai lalokau ida ia goada lasi mamoe do ia durua, ena bero ia kumia, ia huaia bona ia ubua. Elda taudia, “Dirava ena mamoe oreana” idia naria taudia unai, be kongrigeisen amo idia raka oho taudia dekenai unai bamona idia karaia be namo. (1 Pet. 5:2, 3) Elda taudia ese unai taudia do idia tahua, idia durudia kongrigeisen dekenai do idia giroa lou, bona Iehova ena turana ai idia lao totona. *

11. Mamoe naria tauna namona be dahaka ia lalopararalaia?

¹¹ Mamoe naria tauna namona ia laloparara mamoe be idia boio diba. Bona bema mamoe ta be mamoe serina amo ia raka oho, mamoe naria tauna ese do ia panisia lasi. Dirava ena hesiai taudia haida be nega sisina lalonai ia amo idia raka oho neganai, ia kara henidia dalana mani ita herevalaia.

12. Iehova ese Iona be edena bamona ia kara henia?

¹² Peroveta tauna Iona be ena asainmen amo ia heau. To, Iehova ese Iona ia dadaraia lasi. Mamoe naria tauna namona bamona, Iehova ese Iona ia durua bona ia hagoadaia ena asainmen ia hagugurua totona. (Iona 2:7; 3:1, 2) Gabeai, Dirava ese tubutubu gauna ta ia gaukaralaia bona Iona ia durua unai amo ia laloparara taunimanima ta ta edia mauri be mai anina bada. (Iona 4:10, 11) Unai amo dahaka ita dibaia? Elda taudia be manoka taudia dekenai idia hesiku lasi be namo. To, elda taudia ese mamoe idia raka oho ena badina idia lalopararalaia be namo. Bona unai mamoe be Iehova dekenai ia giroa lou neganai, elda taudia  ese idia lalokau henia bona idia laloa bada noho be namo.

13. Iehova ese Salamo karoa 73 ia torea tauna ia kara henia dalana amo dahaka ita dibaia?

¹³ Salamo karoa 73 ia torea tauna ia itaia kara dika taudia be mauri namona idia moalelaia neganai ia lalohisihisi. Bona ia daradara bema Dirava ena ura ia karaia be mai ena hahenamo. (Sal. 73:12, 13, 16) Iehova be dahaka ia karaia? Ia ese unai tauna ia gwau henia lasi. To, unai tauna ena hereva be Baibel lalonai ia torea. Gabeai, salamo torea tauna ia laloparara Iehova tura henia karana ese gau ibounai ia hereaia. (Sal. 73:23, 24, 26, 28) Unai amo dahaka ita dibaia? Namo lasi elda taudia ese Iehova hesiai henia karana idia daradaralaia taudia idia hahemaoro henia. Elda taudia ese do idia gwau henidia lasi, to namona be idia tahua dahaka dainai unai bamona idia hereva eiava unai kara idia karaia. Unai dala amo elda taudia ese Baibel amo heduru maorona idia henia diba.

14. Dahaka dainai Elia be heduru ia ura, bona edena dala ai Iehova ese ia durua?

¹⁴ Peroveta tauna Elia be Kwini Iesebele amo ia heau. (1 Kin. 19:1-3) Ia laloa Iehova ena peroveta tauna ta ia noho lasi, bona ia mamia iena gaukara be anina lasi. Elia be ia lalohisihisi bada dainai ia ura do ia mase. (1 Kin. 19:4, 10) Iehova ese Elia ia gwau henia lasi, to ia hamaoroa ia be sibona ia noho lasi bona Dirava ena siahu dekenai ia tabekau diba, bona gaukara bada ia do noho ia karaia totona. Iehova be mai manau ida Elia ena lalohekwarahi gaudia ia kamonai bona asainmen matamata ia henia. (1 Kin. 19:11-16, 18) Unai amo  dahaka ita dibaia? Ita ibounai, elda taudia danu ese Iehova ena hesiai taudia ita kara namo henia be namo. Herevana ta be ia lalohisihisi eiava ia mamia Iehova ese ena dika ia gwauatao lasi, namona be elda taudia ese ena hereva idia kamonai. Bena unai boio mamoe idia durua unai amo do ia laloparara Iehova ese ia ia lalokau henia.

15. Ioane 6:39 ena hereva bamona, Iesu ese ena Tamana ena mamoe be edena bamona ia lalodia?

¹⁵ Iehova ia ura ena boio mamoe be edena bamona ita lalodia? Iesu ena haheitalai amo gau haida ita dibaia. Iesu ia diba Iehova ese ena mamoe ibounai ia laloa bada, unai dainai ia gaukara goada “Israela besena ena boio mamoe” ia durua Iehova dekenai idia giroa lou totona. (Mat. 15:24; Luka 19:9, 10) Iesu be mamoe naria tauna namona dainai ia gaukara goada Iehova ena mamoe ia gimaia totona, unai amo idia boio lasi.​—Ioane 6:39 duahia.

16-17. Elda taudia ese manoka taudia durua karana be edena bamona idia laloa be namo? (Maua itaia: “Ia Boio Mamoe Ena Hemami.”)

¹⁶ Aposetolo Paulo ese Efeso kongrigeisen ena elda taudia ia hagoadaia Iesu ena haheitalai idia tohotohoa totona. Ia gwau: “Manoka taudia umui durua. Bona Lohiabada Iesu ena hereva umui laloatao be namo, ia gwau, ‘Henia kara ena moale be bada, to abia kara ena moale be maragi.’” (Kara 20:17, 35) Unai siri ese ia hahedinaraia, elda taudia ese Iehova ena taunimanima idia naria be maduna badana. Salvador, Spain ena elda ta ia gwau: “Iehova ese ena boio mamoe ia naria karana lau laloa neganai, egu lalona lau hadaia mai egu goada ibounai ida idia lau durua totona. Lau be mamoe naria tauna dainai lau diba Iehova ia ura ena mamoe do lau naridia.”

¹⁷ Inai atikol ai ita herevalaia manoka taudia be heduru idia abia bona Iehova dekenai idia giroa lou vadaeni. Hari inai negai, idia manoka taudia momo be idia ura unai bamona idia karaia danu. Stadi atikol 26 ese manoka taudia ita durua Iehova dekenai idia giroa lou daladia ma haida do ia herevalaia.