Lau be May 19, 1940 ai Lebanon ena taoni, Amioûn dekenai lau vara. Lagani haida murinai, emai famili be Tripoli siti dekenai ai lao, unuseniai Iehova Dirava idia lalokau henia ruma besena lalonai lau tubu daekau. Ai ibounai be 5, kekeni toi bona memero rua, bona lau be ginigabena. Egu tama sina ese moni tahua karana idia laloa momo lasi. Ai laloa bada gaudia be, Baibel ai stadilaia, Keristani heboudia ai lao, bona ma haida ai durua Dirava idia dibaia.

Emai kongrigeisen ai horoa Keristani taudia haida idia noho. Idia ta be Michel Aboud, ia be emai buka stadi ia naria. Ia be New York ai hereva momokani ia abia, bona lagani 1920 ai Lebanon dekenai haroro gaukara ia matamaia. Lau laloatao ia be Gilead Sikuli amo idia gradueit taihu matamata rua, Anne bona Gwen Beavor, ia matauraidia bona durua bada. Idia be emai tura namodia ai idia lao. Lagani momo murinai, lau moale badina United States dekenai Anne lau itaia lou. Daudau lasi murinai, Gwen lau hedavari henia, ia be Wilfred Gooch ia adavaia, bona England ena Betele dekenai idia gaukara.

Lau matamata neganai Lebanon ai Witnes taudia be momo lasi. Ena be tomadiho gunalaia  taudia ese ai idia dagedage henia, to mai ura bada ida Baibel ena hereva be ma haida dekenai ai hadibaia. Ai dekenai idia vara gaudia haida lau laloatao.

Dina ta, lau bona egu taihuna Sana be ruma badana mai ena daiutu momo lalonai ai haroro. Ruma taudia ai haroro henia noho lalonai, pris tauna ia mai. Reana haida ese idia rini henia. Ia ese egu taihuna ia hereva dika henia. Mai dagedage ida pris ese Sana be vadavada dekenai ia doria diho, bona bero ia davaria. Tau ta ese pulisi ia rini henia, bona idia mai bona dala idia karaia ta ese Sana ia durua totona. Pulisi ese pris idia abia lao pulisi steiseni dekenai, bona idia davaria ia be mai ena ipidi. Pulisi edia tau badana ese ia nanadaia: “Oi be dahaka gaukara oi karaia? Taunimanima dekenai Dirava ena hereva oi hadibaia eiava dagedage karadia oi hadibaia?”

Nega ma ta ai, egu kongrigeisen ese basi ta idia haia bona gabu daudau ia noho taoni ta dekenai ai lao ai haroro totona. Mai moale ida ai haroro noho lalonai, pris ta be hutuma ida ia mai ai idia heatu henia totona. Ai idia gwau henia, bona nadi amo idia hodoa, bona egu tamana be bero ia abia. Lau laloatao, iena vairana be rara ia diho. Ia bona egu sinana be basi dekenai idia giroa lou, bona ai ibounai be edia murinai ai lao. Unai ia vara dainai, ai lalohekwarahi bada. To, egu sinana ena hereva lau laloatao, egu tamana ena vairana ia hagoevaia noho lalonai, ia gwau: “Iehova e, mani edia dika oi gwauatao. Idia diba lasi dahaka idia karaia noho.”

Nega ma ta ai, emai hanua dekenai ai lao, emai varavara ai vadivadi henia totona. Unuseniai, egu tubuna tau ena ruma dekenai, bisop ta ai davaria. Unai bisop ia diba egu tama sina be Iehova ena Witnes taudia. Ena be egu mauri lagani be 6 sibona, to ia ura lau ia hahemaraia dainai, ia gwau: “Dahaka dainai oi do bapatiso lasi?” Ia lau hamaoroa lau be mero maragi, bona bapatiso lau abia totona Baibel lau dibaia namonamo bona egu abidadama lau hagoadaia be namo. Egu haere ia ura henia lasi dainai, egu tubuna tau ia hamaoroa lau be ia lau matauraia lasi.

Unai be ekspiriens dikadia haida sibona. To, Lebanon taudia be taunimanima namodia bona heabidae taudia. Unai dainai, idia ida Baibel ai herevalaia bona Baibel stadi momo ai karaia.

Lau do sikuli noho lalonai, Venezuela amo tadikaka matamata ta be Lebanon dekenai ia vadivadi. Ia be emai kongrigeisen heboudia dekenai ia mai, bena egu taihuna, Wafa ia tura henia matamaia. Daudau lasi murinai, idia headava bona Venezuela dekenai idia lao. Wafa be ai dekenai revareva ia siaia negadia ai, egu tamana ia noia Venezuela dekenai do ai lao. Unai bamona ia hereva badina ai ia reaia bada. Dokonai, ia kwalimu badina ai ibounai be Venezuela dekenai ai lao!

 Lagani 1953 ai Venezuela dekenai ai ginidae bona Caracas dekenai ai noho, unai be presiden ena noho gabuna. Lau be mero maragi dainai, nega momo presiden be ena motuka namo hereana amo ia hanaia neganai, lau ura lau itaia. To, egu tama sina be unai tano, gado, kastom, aniani, bona weda dainai idia lalohekwarahi. Madi, idia be unai gaudia idia manadalaia noho lalonai, hekwakwanai badana ta ia vara.

Egu tamana ia gorere matamaia. Unai ai hamomokania lasi, badina ia be tau goadana. Bona nega ta gorere badana ta ia abia lasi. Gabeai idia davaria ia be mai ena kensa gorerena, bona opereisen ia abia. Madi, wiki ta murinai ia mase.

Unai ia vara dainai ai lalohisihisi bada. Unai neganai egu mauri lagani be 13. Ai laloa lasi emai tamana do ia mase, bona ai mamia do ai moale lou lasi. Nega daudau lalonai, egu sinana ia abia dae lasi ena adavana ia mase. To, ai laloparara unai ai abia dae be namo, bona Iehova ena heduru dainai ai haheauka diba. Egu mauri lagani be 16 neganai, Caracas ena hai sikuli dekenai lau gradueit, bona lau ura bada egu famili lau durua.

Daudau lasi murinai, egu taihuna Sana be Rubén Araujo ia adavaia, ia be Gilead Sikuli amo ia gradueit bona Venezuela dekenai ia giroa lou. Idia ruaosi be abia hidi idia karaia New York dekenai do idia noho. Egu famili idia ura lau be New York ena iunivesiti dekenai do lau sikuli, bona egu taihuna bona ena adavana ida do lau noho. Idia ida lau noho neganai, lau idia durua Iehova kahirakahira lau lao totona. Bona danu, egu kongrigeisen, Brooklyn Spanish kongrigeisen dekenai lo tadikaka momo idia noho. Lau moale inai tadikaka rua, Milton Henschel bona Frederick Franz lau diba, idia be Brooklyn Betele dekenai idia gaukara.

Iunivesiti ena lagani ginigunana be kahirakahira lau haorea neganai, lau daradara lau be dahaka lau karaia noho. Gima Kohorona ena atikol haida ai, lau ese Keristani taudia haida be Iehova idia hesiai henia totona tahua gaudia idia atoa ena sivarai lau duahia bona laloa dobu. Emai kongrigeisen ai lau ese painia taudia bona Betele taudia edia moale lau itaia neganai, lau ura idia bamona lau moale. To, unai nega ai lau do bapatiso lasi. Unai dainai, lau diba Iehova dekenai egu mauri lau gwauhamatalaia be namo. Bona March 30, 1957 ai lau bapatiso.

Lau bapatiso murinai, lau ura painia gaukara do lau karaia. To lau itaia, unai lau karaia totona be ia auka. Badina nega tamona iunivesiti ai do lau sikuli bona painia gaukara do lau karaia be hegeregere lasi. Egu sinana bona kakadia dekenai revareva lau torea negadia ai, idia lau hadibaia lau ura iunivesiti lau rakatania, bona Venezuela dekenai lau giroa, bona do lau painia.

June 1957 ai, Caracas dekenai lau giroa lou neganai, lau itaia egu famili edia mauri be ia  auka. Namona be ma ta ese moni gaukara ia karaia. Edena bamona idia lau durua diba? Banika ese lau dekenai gaukara ia henia, to lau ura bada do lau painia, badina lau be unai totona lau giroa lou. Vadaeni, egu lalona lau hadaia moni gaukara bona painia gaukara do lau karaia hebou. Lagani haida lalonai, unai bamona lau karaia. Oibe, lau bisi bada, to lau moale danu!

Danu lau moale badina German taihu ta, Sylvia, lau hedavari henia bona ai headava, ia be Iehova ia lalokau henia bada. Ia be ena tama sina ida Venezuela dekenai idia noho. Bena natudia rua ai havaraia, mero ladana be Michel (Mike) bona kekeni ladana be, Samira. Danu, egu sinana lau naria matamaia. Ena be famili ena maduna dainai painia gaukara lau hadokoa, to haroro gaukara lau karaia goadagoada. Holidei negadiai, lau bona Sylvia ai heduru painia.

Atikol ena matamanai lau herevalaia bamona, lau be moni gaukara namona lau abia, unai neganai natudia be idia do sikuli noho. Lau gwau diba mauri namona ai noholaia, bona banika gabunai gaukara taudia be lau idia matauraia. To, lau ura bada lau be Iehova ena hesiai tauna bamona idia laloa. Bena lau laloa dahaka do lau karaia unai bamona lau idia laloa totona. Unai dainai lau bona egu adavana be emai moni do ai gaukaralaia namonamo dalana ai herevalaia hebou. Bema banika amo lau doko, lau dekenai moni bada do idia henia. Ai be abitorehai lasi dainai, kohu momo lasi maurina ai noholaia diba, bona nega daudau lalonai unai moni ai gaukaralaia diba.

Unai disisen do lau karaia be auka, to egu adavana bona sinana ese lau idia durua. Unai dainai lau be painia gaukara do lau karaia lou, bona lau moale bada! To painia gaukara lau matamaia gwauraia neganai, sivarai ta ai kamonai.

Dina ta emai doketa ese ai ia hamaoroa Sylvia be ia rogorogo. Ai ruaosi ai hoa bada! Unai be moale sivaraina, to painia gaukara do lau karaia diba, a? Emai lalohadai ai haidaua bona ai hegaegae, emai natuna ma ta ai welkam henia totona. To egu painia urana lau do laloa noho.

Emai tahua gaudia ai herevalaia murinai, ai lalotamona lau be painia gaukara do lau karaia. Emai natuna Gabriel be April 1985 ai  ia vara. To, lau be banika amo lau doko bona June 1985 ai regula painia gaukara lau hamatamaia. Gabeai, lau be brens komiti ena memba ta ai lau lao. To brens ofesi be Caracas ai ia noho lasi dainai, lau be kilomita 80 bamona gaukara totona lau lao, bona wiki ta lalonai dina rua o toi unai bamona lau karaia.

Brens ofesi be La Victoria ena taoni ai ia noho, unai dainai emai famili be unuseni ai lao, Betele kahirakahira ai noho totona. Unai be senisi badana ta. Egu famili lau laloa bada bona idia lau tanikiu henia, badina idia ese lau idia durua bada. Egu taihuna Baha ia ura emai sinana do ia naria. Oibe, La Victoria dekenai do ai lao neganai, Caracas dekenai emai turadia do ai rakatania. Danu, Sylvia be unai taoni maragina ena mauri dalana do ia manadalaia. Bona ruma maragina dekenai do ai noho ai manadalaia be namo. Oibe, Caracas amo La Victoria dekenai ai lao totona, gau momo be do idia idau.

To, senisi haida idia vara lou. Gabriel ia headava, bona Samira be ruma ma ta dekenai sibona ia noho. Bena lagani 2007 ai, lau bona Sylvia be Betele dekenai idia boiria, bona unuseni ai gaukara noho ema bona hari. Emai natuna roboana Mike be elda ta, bona ia bona ena adavana Monica be idia painia danu. Gabriel danu be elda ta, bona ia bona ena adavana Ambra be Italy ai hesiai gaukara idia karaia noho. Danu Samira be ia painia, bona Betele ai volantia gaukara ia karaia.

Oibe, egu mauri ai disisen badadia lau karaia. To, lau lalohisihisi lasi. Lau karaia disisen lau moalelaia. Iehova totona lau karaia gaudia ibounai dainai, lau moale bada. Lagani momo lalonai, lau itaia Iehova ida emu hetura karana ia goada noho be mai anina bada. Ena be disisen badadia o maragidia ita karaia, to Ia ese “laloparara ibounai ia hereaia gauna,” maino, ia henia diba. (Fil. 4:6, 7) Lau bona Sylvia be Betele gaukara ai moalelaia, bona ai mamia Iehova ese emai disisen idauidau ia hanamoa, badina hanaihanai ia ai atoa guna.