LAGANI momo lalonai, Israela taudia be tomadiho momokani durua totona moni idia henia. To Iesu ena negai Iuda taudia ese takisi idauidau davana idia henia dainai edia mauri ia auka.

Palai Dubuna bona Dubu Helaga durua totona Iuda tatau ibounai ese drekma koini rua idia henia. Iesu ena negai unai takisi moni idia gaukaralaia, Heroda ese ia haginia dubu helaga idia naria bona boubou gaudia edia davana idia karaia totona. Iuda taudia haida ese Petero idia nanadaia bema Iesu be takisi ia henia danu, bona Iesu ia gwau takisi henia karana be kerere lasi. Oibe, ia ese Petero ia hamaoroa koini ta ia abia takisi davana ia karaia totona.​—Mat. 17:24-27, futnout.

Dirava ena taunimanima ese idia henia takisi ma ta be, edia uma aniani bona moni ena kahana 10 amo kahana ta be tomadiho durua totona idia henia. (Lev. 27:30-32; Num. 18:26-28) Dubu gunalaia taudia idia gwau, edia uma aniani ibounai bona danu “minti, dili bona kamin” edia kahana 10 amo kahana ta do idia henia. Iesu ese unai takisi henia karana ia gwauraia dika lasi, to ia ese taravatu hadibaia taudia bona Farisea taudia edia koikoi karadia ia hahedinaraia.​—Mat. 23:23.

Unai nega ai, Iuda taudia be Roma gavamani ena siahu henunai idia noho dainai, takisi momo edia davana idia karaia. Hegeregere, mai edia tano taudia ese takisi davana be moni eiava uma aniani amo idia henia diba. Bema tau ta be ena uma aniani amo puse 4 ia hahonua, puse tamona be takisi davana karaia totona Roma gavamani do ia henia. Iuda taudia ta ta be Roma gavamani henunai idia noho dainai, takisi moni idia henia danu. Farisea taudia be unai takisi moni dainai Iesu idia nanadaia neganai, ia ese lalohadai maorona ia hahedinaraia, ia gwau: “Kaisara ena gaudia be Kaisara dekenai umui henia, to Dirava ena gaudia be Dirava dekenai umui henia.”​—Mat. 22:15-22.

Bisinesi totona idia abia vareai kohu bona gabu ma ta dekenai idia siaia kohu ena takisi davana idia henia danu. Sisima idia vareai gabudia, brij, dala badadia, eiava taoni bona maketi edia vareai gabudia dekenai unai takisi idia gogoa.

Taunimanima ese Roma gavamani henunai takisi moni idia henia karana be mai ena metau. Roma ena histori ia torea tauna, Tacitus, ia hahedinaraia, Pavapava Tiberio ia lohia bona Iesu be tanobada ai ia noho neganai, “Suria bona Iudea taudia idia noinoi takisi davana hadihoa totona, badina idia dekenai unai be metau bada herea.”

Takisi idia gogoa dalana ese taunimanima edia mauri ia hametaua danu. Moni momo ia henia tauna dekenai takisi gogoa gaukarana idia henia. Ia ese ma haida ia abia hidi takisi idia gogoa totona, bona idia ibounai idia ura profit idia karaia. Toana be Sakaio ena bisinesi dekenai unai bamona taudia idia gaukara. (Luka 19:1, 2) Unai dainai, taunimanima be unai kara dekenai idia moale lasi bona takisi gogoa taudia idia inai henidia.