1. Dahaka dainai ita gwau diba Iehova be ita ta ta ia lalokau henia bada?

IEHOVA ese ia dekenai ita ta ta ia veria lao. (Ioa. 6:44) Unai ena anina be dahaka? Iehova ese tanobada ai taunimanima bilioni momo ia stadilaia murinai, ia itaia oi be ia do oi lalokau henia bona unai ia laloa bada. (1 Siv. 28:9) Iehova be oi ia diba, emu kara ia lalopararalaia, bona oi ia lalokau henia. Unai ese ita ia hagoadaia!

2. Edena dala ai Iesu ia hahedinaraia Iehova be ena mamoe ta ta ia laloa bada?

² Iehova be oi bona emu Keristani tadikaka taihu ibounai ia laloa bada. Unai hahedinaraia totona, Iesu ese Iehova be mamoe naria tauna bamona ia herevalaia. Bema mamoe 100 amo ta ia boio, mamoe naria tauna be dahaka do ia karaia? Ia ese “ororo dekenai unai 99 do ia rakatania bona do ia lao ia boio mamoena ia tahua totona.” Ia davaria neganai do ia badu henia lasi, to do ia moale. Ita dibaia point be dahaka? Iehova be ena mamoe ta ta ia laloa bada. Iesu ia gwau: “Egu Tamana guba dekenai ia noho be ia ura lasi inai ladana maragi tauna ta ia boio.”​—Mat. 18:12-14.

3. Inai stadi ai dahaka do ita herevalaia?

³ Ita ura lasi ita ese iseda tadikaka eiava taihu ta ita hahekwakwanaia. Edena dala ai ma haida do ita hahekwakwanaia lasi? Bona dahaka do ita karaia bema ta ese ita ia hahisia? Inai stadi ai unai henanadai do ita haerelaia. To, Mataio karoa 18 ese ia gwauraia “ladana maragi” taudia mani ita herevalaia guna.

4. Unai “ladana maragi” taudia be daidia?

⁴ Unai “ladana maragi” taudia be Iesu ena hahediba taudia bona edia mauri lagani be idauidau. Idia be “natudia maragidia” bamona, badina idia ura Iesu ese idia ia hadibaia. (Mat. 18:3) Ena be edia noho dalana, kastom, lalohadai bona kara be idauidau, to Keriso idia abidadama henia. Bona ia ese idia ia lalokau henia bada.​—Mat. 18:6; Ioa 1:12.

5. Ta ese Iehova ena hesiai tauna ta ia hahekwakwanaia o hahisia neganai, iena hemami be edena bamona?

⁵ Iehova ese “ladana maragi” taudia ia laloa bada. Iena hemami ita lalopararalaia totona, ita ese natudia ita laloa dalana mani ita herevalaia. Ita ese natudia ita laloa bada bona ita ura idia ita gimaia, badina edia goada bona aonega be bada lasi. Bema ita itaia, tau ta ese ta ia kara dika henia, ita moale lasi, to tau ta ese natuna maragi ia kara dika henia neganai do ita badu. Iehova ena hemami danu be unai bamona, ia ura ita ia gimaia. Unai dainai, ta ese Iena hesiai tauna ta ia hahekwakwanaia o ia hahisia neganai, ia moale lasi bona ia badu!​—Isa. 63:9; Mar. 9:42.

6.  Korinto Ginigunana 1:26-29 hegeregerena, taunimanima ese Iesu ena hahediba taudia be edena bamona idia laloa?

⁶ Edena dala ma ta ai Iesu ena hahediba taudia be “ladana maragi” taudia bamona? Mani ita laloa, taunimanima be daidia idia laloa bada? Taga, ladana bada, bona siahu taudia. To, Iesu ena hahediba taudia be unai bamona lasi. Unai dainai, taunimanima idia laloa idia be “ladana maragi” taudia. (1 Korinto 1:26-29 duahia.) To, Iehova ese idia be unai bamona ia laloa lasi.

7. Iehova ia ura iseda tadikaka taihu be edena bamona ita laloa?

⁷ Herevana lagani momo eiava hari sibona Iehova ita hesiai henia, to Iehova ese ena hesiai taudia ibounai ia lalokau henia. Iehova ese iseda tadikaka taihu ia laloa bada, unai dainai idia ita laloa bada danu be namo. Ita ura haida sibona lasi, to ‘tadikaka oreana ibounai ita lalokau henia.’ (1 Pet. 2:17) Namona be idia ita lalokau henia bona ita ura lasi idia ita hahisia. Bema ita diba ita be ta ita hahisia, namo lasi ita laloa unai be gau badana lasi, bona ia ese iseda dika do ia gwauatao bona do ia laloaboio sibona. To, dahaka dainai haida idia badu? Haida be edia noho dalana dainai idia laloa idia be anina lasi. Haida be matamata orea lalonai bona dika gwauatao karana idia do dibaia lasi. Herevana ta ese ita ia hahisia eiava ita ese ia ita hahisia, to namona be ita hekwarahi maino ita karaia totona. Danu, bema ta be nega momo ma haida edia kara o hereva dainai ia badu, namona be ia hekwarahi unai kara ia haidaua totona. Unai amo maino ai do ia noho bona ma haida do ia tura henia namonamo.

8. Iesu ena hahediba taudia be daidia edia lalohadai kererena idia abia?

⁸ Dahaka dainai Iesu ese “ladana maragi” taudia ia herevalaia? Iena hahediba taudia ese idia nanadaia: “Guba Basileia lalonai daika be bada?” (Mat. 18:1) Unai nega ai, Iuda taudia momo idia laloa idia be ma haida idia hereaia. Diba bada tauna ta ia gwau: “Tatau momo idia ura ma haida ese edia ladana do idia abia isi bona hanamoa be gau badana.”

9. Iesu ena hahediba taudia be dahaka idia karaia be namo?

⁹ Iesu ia diba Iuda taudia momo idia laloa idia be ma haida idia hereaia. Unai dainai, ena hahediba taudia ia hamaoroa  namona be idia gaukara goada edia laloa dalana idia haidaua totona. Ia gwau: “Umui huanai ia bada tauna be do ia maragi bona umui ia gunalaia tauna be umui do ia hesiai henia.” (Luka 22:26) Namona be iseda kara bona hereva amo ita hahedinaraia ‘ma haida ese ita idia hereaia.’ (Fili. 2:3) Unai bamona ita karaia neganai ma haida do ita hahisia lasi.

10. Paulo be dahaka sisiba namona ia henia?

¹⁰ Dala idauidau ai, iseda tadikaka taihu be ita idia hereaia. Unai do ita lalopararalaia bema edia kara namodia sibona ita laloa. Aposetolo Paulo ese Korinto taudia dekenai ia henia sisiba ita laloa bada be namo. Ia gwau: “Dahaka dainai oi be ma ta oi hereaia? Momokani, oi abia gaudia ibounai be Dirava amo, ani? Bema unai gaudia be Dirava amo oi abia, dahaka dainai oi heagi, hegeregere oi sibona emu goada amo oi abia bamona?” (1 Kor. 4:7) Namo lasi ita ura taunimanima ese eda ladana idia abia isi, eiava ita laloa ita be ma haida ita hereaia. Bema tadikaka ta be tok namodia ia henia, eiava taihu ta be mai ena Baibel stadi momo, namona be ia gwau unai be Iehova ena heduru amo ia karaia.

11. Iesu ena parabole amo dahaka ita dibaia?

¹¹ Iesu ese ena murinai idia raka taudia ia hamaoroa ma haida do idia hahekwakwanaia lasi, bena king bona ena hesiai tauna ena parabole ia herevalaia. King ese ena hesiai tauna ena abitorehai badana ia gwauatao. Gabeai, unai hesiai tauna be ia ura lasi ena gaukara turana ena abitorehai maragina ia gwauatao. Dokonai, king ese unai hebogahisi lasi hesiai tauna be dibura ruma ai ia atoa. Unai amo dahaka ita dibaia? Iesu ia gwau: “Lauegu guba Tamana be umui dekenai unai bamona do ia karaia danu, bema umui ta ta emui kudouna amo emui tadikaka edia kerere umui gwauatao lasi.”​—Mat. 18:21-35.

12. Bema ita ura lasi ma haida edia dika ita gwauatao, dahaka do ia vara?

¹² Unai hesiai tauna be ia sibona lasi, to ma haida ia hahisia danu. Ginigunana be, ena gaukara turana ia kara auka henia bona “dibura rumana lalonai ia negea, ela bona ena abitorehai ena davana ibounai do ia karaia.” Iharuana be, “hesiai taudia ma haida be ia vara gauna idia itaia neganai, idia lalohisihisi bada.” Unai hegeregerena, iseda kara ese ma haida ia hahisia diba. Bema ta ese ita ia kara auka henia, bona ita ura lasi ena dika ita gwauatao, dahaka do ia vara? Ginigunana be, ia ita hahisia badina ena dika ita gwauatao lasi, ita lalokau henia lasi bona ita dadaraia. Iharuana be, kongrigeisen taudia idia itaia ita be maino ita karaia lasi neganai, do idia lalohisihisi diba.

13. Painia ta ena ekspiriens amo dahaka oi dibaia?

¹³ Iseda tadikaka bona taihu edia dika ita gwauatao neganai ita ibounai be maino ai do ita noho. Painia taihu ta ladana Kristol, ena ekspiriens mani ita laloa. Kongrigeisen ai taihu ta ese ia hahisia. Kristol ia gwau: “Nega haida unai taihu ena hereva ese lau ia hahisia, unai be hegeregere kaia ese lau ia utua bamona. Haroro gaukara ai lau ura lasi ia ida motuka tamona dekenai lau guia. Egu haroro gaukara lau moalelaia lasi.” Kristol ia laloa ia be mai ena maoro ia lalohisihisi totona. To, unai taihu dekenai ia badu lasi eiava sibona ena hemami ia laloa bada lasi. Dahaka dainai? Ia be mai manau ida Baibel ena hakaua herevadia ia laloa, bona October 15, 1999 ena Gima Kohorona ena atikol, “Emu Kudouna Dekenai Dika Do Oi Gwauatao” ena sisiba ia badinaia. Bona ia ese ena taihu ena dika ia  gwauatao. Kristol ia gwau: “Hari lau diba ita ibounai ita hekwarahi noho iseda kara ita haidaua totona, bona Iehova be nega ibounai ia noho hegaegae iseda dika do ia gwauatao. Hari lau moale lou.”

14. Mataio 18:21, 22 ai, aposetolo Petero be dahaka totona ia henanadai, bona Iesu ena haere amo dahaka ita dibaia?

¹⁴ Ita diba ta ena dika ita gwauatao be kara maorona. To unai ita karaia totona be reana ia auka. Nega haida aposetolo Petero be unai ia mamia. (Mataio 18:21, 22 duahia.) Dahaka ese ita do ia durua? Ginigunana be, Iehova ese nega ibounai iseda dika ia gwauatao karana ita laloa dobu. (Mat. 18:32, 33) Ena be ita be kara dika taudia, to ia be mai hebogahisi ida iseda dika ia gwauatao noho. (Sal. 103:8-10) Bona “ita danu be mai iseda maduna ta ta ita lalokau henia totona.” Unai dainai ta ta iseda dika ita gwauatao be gau badana. (1 Ioa. 4:11) Iharuana be, ta ita gwauatao dainai do idia vara gau namodia sibona ita laloa be namo. Ita ia hahisia tauna do ita durua, kongrigeisen lalonai lalotamona do ia noho, iseda hetura karana Iehova ida do ita gimaia, bona do ita moale. (2 Kor. 2:7; Kol. 3:14) Dokonai, ita ia hadibaia haida edia dika do ita gwauatao Diravana do ita guriguri henia. Satani ena dala oi kehoa lasi, emu hetura karana namona tadikaka taihu ida ia hadikaia totona. (Efe. 4:26, 27) Kongrigeisen lalonai maino ia noho totona, Iehova ena heduru ita tahua be namo.

15. Kolose 3:13 hegeregerena, bema tadikaka eiava taihu ta ese ita ia hahekwakwanaia, dahaka ita karaia be namo?

¹⁵ Bema emu tadikaka ta ese oi ia hahekwakwanaia, dahaka do oi karaia? Namona be dala oi tahua ia ida maino oi karaia totona. Iehova dekenai emu lalohekwarahi  oi gwauraia. Ia oi noia oi ia hahisia tadikaka ia durua bona ena kara namodia oi itaia​—Iehova ese ena kara namodia ia itaia hegeregerena. (Luka 6:28) Bema emu tadikaka ena kara oi laloaboio diba lasi, dala namona ta oi tahua ia oi hereva henia totona. Bona namona be oi laloa emu tadikaka be oi hahisia totona unai ia karaia lasi. (Mat. 5:23, 24; 1 Kor. 13:7) Oi hereva henia neganai, do oi laloa ia be mai lalohadai namona do ia hahedinaraia. To, bema ia ura lasi maino ia karaia, dahaka do oi karaia? Namona be ena kara oi “haheaukalaia noho.” (Kolose 3:13 duahia.) Gau badana be inai: Oi badu daudau lasi badina unai ese emu hetura karana Iehova ida ia hadikaia diba. Gau ta ese oi ia hahekwakwanaia lasi be namo. Unai bamona oi karaia neganai, oi hamomokania Iehova oi lalokau henia bada.​—Sal. 119:165.

16. Ita ta ta ese dahaka ita karaia be namo?

¹⁶ Ita be “mamoe orea tamona” bamona, “mamoe naria tauna tamona” henunai Iehova ita hesiai henia be hahenamo badana! (Ioa. 10:16) Organized to Do Jehovah’s Will bukana ena rau 165, ia gwau: “Ita be unai lalotamona karana ita moalelaia dainai, ita gaukara goada unai kara ita habadaia totona.” Unai dainai, namona be “sibona ita hadibaia Iehova ese iseda tadikaka taihu ia itaia hegeregerena idia ita itaia totona.” Iehova be ita ia laloa bada, iena “natudia maragidia” bamona. Emu tadikaka bona taihu be unai bamona oi laloa danu be namo. Idia oi durua totona oi karaia gaudia ibounai be Iehova ese ia itaia bona ia laloa bada.​—Mat. 10:42.

17. Iseda lalona ita hadaia dahaka do ita karaia?

¹⁷ Iseda tadikaka taihu ita lalokau henidia dainai, ‘iseda lalona ita hadaia, eda tadikaka ia hahekwakwanaia diba gauna ta ita karaia lasi totona.’ (Roma 14:13) Namona be ita laloa iseda tadikaka taihu be ita idia hereaia, bona ita ura eda kudouna amo edia dika ita gwauatao. Namona be ma haida edia kara o hereva dainai ita lalohisihisi lasi. To, “maino havaraia gaudia bona ma haida hagoadaia gaudia ita tahua noho.”​—Roma 14:19.