1-2. Salamo 25:14 hegeregerena, Iehova ena tura namona ai ita lao totona, dahaka ita karaia be namo?

 BEMA oi ura ta be emu turana namona ai ia lao, oi ura edena kara ia hahedinaraia be namo? Reana do oi gwau, tura namodia be ta ta idia lalokau henia bona durua. Hetura karana namona ia noho totona, reana do oi laloa gari karana hahedinaraia be anina lasi. To, inai atikol ena siri ia gwau, Iehova idia “gari henia” taudia be iena turana namodia.​—Salamo 25:14 duahia.

² Herevana lagani momo ai, Iehova ita hesiai henia, to namona be ia ita gari henia. To Dirava ita gari henia ena anina be dahaka? Edena dala ai Iehova do ita gari henia? Hesiai tauna Obadaia, Hahelaga Tauna Badana Iehoiada bona King Iehoasa edia haheitalai amo dahaka ita dibaia?

3. Edena dala ai gari karana ese ita ia gimaia diba?

³ Do ita gari bema ita diba ita dekenai gau dikana ta do ia vara. Unai bamona gari karana be namo, badina unai ese ita do ia durua abia hidi maorodia ita karaia totona. Ita ura lasi do ita moru dainai, ororo (eiava cliff) dekenai ita raka kahirakahira lasi. Ita ura lasi bero ita abia dainai, hekwakwanai do idia havaraia gabudia ita lao lasi. Ita ura lasi ma ta ida iseda hetura karana ita hadikaia dainai, unai tauna dekenai iseda hereva o kara ita naria namonamo.

4. Satani ia ura edena bamona gari karana ita hahedinaraia?

⁴ Satani ia ura taunimanima ese dala kererena ai Iehova idia gari henia. Satani ena lalohadai be Elipasa ena lalohadai hegeregerena. Ia gwau Iehova be badu Diravana bona ia auka taunimanima ese ia idia hamoalea totona. (Iobu 4:18, 19) Satani ia ura Iehova do ita gari henia bona Iehova hesiai henia karana do ita hadokoa. Unai tarapu ita dadaraia totona, Iehova ita gari  henia lasi, to, namona be Ia ita matauraia bona ena lalona hahisia karadia ita dadaraia.

5. Dirava gari henia karana ena anina be dahaka?

⁵ Dirava gari henia karana ena anina be, ta be Dirava ia lalokau henia bona ia ura lasi ena hetura karana Dirava ida do ia hadikaia. Iesu danu be unai bamona ‘Dirava gari henia’ karana ia hahedinaraia. (Heb. 5:7) Iesu be Iehova dekenai ia gari lasi. (Isa. 11:2, 3) To, Iesu be Iehova ia lalokau henia bada bona ia ura Ia ia badinaia. (Ioa. 14:21, 31) Iesu hegeregerena, Iehova ita lalokau henia bada bona Ia ita matauraia badina ia be lalokau, aonega, hahemaoro goeva bona siahu bada Diravana. Danu, ita diba Iehova be ita ia lalokau henia bada bona iena hakaua daladia ita badinaia neganai, ia moale. Bema Iehova ita gwau-edeede henia, do ia lalohisihisi, to bema Ia ita kamonai henia, do ia moale.​—Sal. 78:41; Aon. 27:11.

6. Dirava gari henia dalana ta be dahaka? (Salamo 34:11)

⁶ Ita vara neganai, Iehova gari henia karana be ita dekenai ia noho lasi; to namona be ita hahedinaraia. (Salamo 34:11 duahia.) Unai ita hahedinaraia dalana ta be havaraia gaudia ita stadilaia. Iehova ese ena “havaraia gaudia” amo ena aonega, siahu bona lalokau ia hahedinaraia. Unai ita laloa dobu neganai, ia do ita matauraia bada bona lalokau henia. (Roma 1:20) Taihu ta ladana Adrienne ia gwau: “Iehova ena aonega be ia havaraia gaudia amo lau itaia neganai, lau hoa bona unai ese lau ia durua lau laloparara Iehova ia diba dahaka be namo ita totona.” Unai taihu be ia laloa dobu murinai, inai bamona ia gwau: “Lau ura lasi lau bona egu havaraia tauna, Iehova, emai hetura karana ia hadikaia gauna ta lau karaia.” Inai wiki lalonai nega oi atoa Iehova ese ia havaraia gauna ta oi laloa dobu totona. Unai ese oi do ia durua Iehova do oi matauraia bona lalokau henia bada.​—Sal. 111:2, 3.

7. Edena dala ai guriguri ese ita ia durua Iehova gari henia karana ita hagoadaia totona?

⁷ Iehova gari henia dalana ma ta be, hanaihanai ita guriguri. Hanaihanai Iehova ita guriguri henia neganai, ia do ita dibaia namonamo. Hekwakwanai negadiai, goada abia totona Iehova ita noia karana ese ia hahedinaraia, iena siahu be bada. Iena Natuna ese ia henia boubou karana dainai ia ita tanikiu henia neganai, ita hahedinaraia Iehova ena lalokau karana ita laloatao. Bona hekwakwanai ta ia vara bona heduru totona Iehova ita noia, ita hahedinaraia Iena aonega be bada. Unai bamona guriguri karana ese ita ia durua Iehova ita matauraia bada. Bona unai ese ita ia hagoadaia iseda hetura karana Iehova ida ia hadikaia karadia ita dadaraia diba.

8. Dirava ita gari henia noho totona, dahaka ita karaia be namo?

⁸ Baibel ita stadilaia neganai, iseda tahua gauna be ia lalonai idia noho haheitalai namodia bona dikadia amo diba ita abia, unai ita karaia neganai, Dirava gari henia karana ita hahedinaraia noho. Mani Iehova ena abidadama hesiai taudia rua edia haheitalai ita herevalaia, unai be King Ahaba ena ruma ia naria tauna, Obadaia bona Hahelaga Tauna Badana Iehoiada. Bena Iuda ena King Iehoasa ena haheitalai amo ita dibaia gauna do ita herevalaia. Matamanai Iehova ia hesiai henia, to gabeai Iehova hesiai henia karana ia rakatania.

9. Edena dala ai Dirava gari henia karana ese Obadaia ia durua? (1 King Taudia 18:3, 12)

⁹ Baibel ese Obadaia b be inai bamona ia herevalaia: “Obadaia be Iehova ia gari henia  momokani tauna.” (1 King Taudia 18:3, 12 duahia.) Edena dala ai Dirava gari henia karana ese Obadaia ia durua? Unai ese ia durua mai momokani ida ia kara bona ma haida ese ia dekenai idia tabekau. Unai dainai king ese ia abia hidi ena ruma ai ia gaukara totona. (Nehemia 7:2 hahegeregerea.) Danu unai ese Obadaia ia durua gari lasi karana ia hahedinaraia totona—ia dekenai unai kara be mai anina bada. Obadaia be King dikana Ahaba ena lohia negana ai ia noho, unai king be “Iehova ena vairanai ia kara dika noho, bona ena kara dika ese guna idia lohia taudia edia ia hereaia.” (1 Ki. 16:30) Danu, Ahaba ena adavana Iesebele, ia be Bala ia tomadiho henia hahine, be Iehova ia inai henia momokani, unai dainai ia ura not kahana ena basileia ai tomadiho momokani ia kokia. Ia ese Dirava ena peroveta taudia momo ia hamasea. (1 Ki. 18:4) To, unai nega aukana lalonai Obadaia be Iehova ia tomadiho henia.

10. Edena dala ai Obadaia ese gari lasi karana ia hahedinaraia?

¹⁰ Edena dala ai Obadaia ese gari lasi karana ia hahedinaraia? Iesebele be Dirava ena peroveta taudia hamasea totona ia tahudia neganai, Obadaia ese peroveta taudia 100 amo ‘50 50 be kohua ta ta ai ia hunidia, bona idia dekenai paraoa bona ranu ia henia.’ (1 Ki. 18:13, 14) Bema Iesebele ia kamonai Obadaia be unai bamona ia karaia, Obadaia do ia hamasea. Momokani, reana Obadaia be ia gari bona ia ura lasi ia mase. To, Obadaia be Iehova bona Ia idia hesiai henia taudia ia lalokau henia, to sibona ena mauri ia laloa bada lasi.

11. Edena dala ai Iehova ena hesiai taudia be Obadaia bamona? (Laulau itaia danu.)

¹¹ Hari, Iehova ena hesiai taudia momo be iseda gaukara idia taravatua tanodia dekenai idia noho. Obadaia hegeregerena, unai tadikaka taihu be gavamani taudia idia matauraia, to Iehova tomadiho henia karana idia rakatania lasi. (Mat. 22:21) Dirava idia kamonai henia karana amo idia hahedinaraia ia idia gari henia, to taunimanima lasi. (Kara 5:29) Hunia dalana ai sivarai namona idia harorolaia bona idia hebou karana amo, unai idia hahedinaraia. (Mat. 10:16, 28) Idia ura edia tadikaka taihu be Dirava amo lauma aniani idia abia. Henri mani ita laloa. Ia be Africa dekenai  ia noho, unai gabu ai nega sisina lalonai iseda gaukara idia taravatua. Unai nega lalonai, Henri be tadikaka taihu dekenai Baibel buka bona magasin ia abia lao. Ia gwau: “Lau be hemarai tauna. To, Iehova lau matauraia bada dainai, unai ese lau ia durua lau gari lasi totona.” Henri hegeregerena oi danu be gari lasi karana oi hahedinaraia, a? Unai oi karaia diba bema Iehova oi gari henia.

12. Edena dala ai Hahelaga Tauna Badana Iehoiada bona ena hahine ese Iehova badinaia karana idia hahedinaraia?

¹² Hahelaga Tauna Badana be Iehova gari henia karana ia hahedinaraia bona unai ese ia durua ma haida ia hagoadaia Iehova idia tomadiho henia totona. Iesebele ena natuna Atalaia ese Iuda ai kwini dagi ia ura abia neganai, unai ia hahedinaraia. Badina namona dainai taunimanima be Atalaia idia gari henia. Ia be ia mataganigani bona ia ura kwini dagi ia abia dainai, king ena bese amo idia mai taudia ibounai ia hamasea—ena tubudia memero danu! (2 Siv. 22:10, 11) King ena natuna ta—Iehoasa—be ia mase lasi badina, Iehosebata, ese ia hamauria. Ia bona ena tau ese unai natuna mero idia hunia bona naria. Unai dala amo Iehoiada bona ena hahine Iehosebata ese Davida ena bese amo ia mai king idia gimaia. Iehoiada be Iehova badinaia karana ia hahedinaraia dainai, Atalaia dekenai ia gari lasi.​—Aon. 29:25.

13. Iehoasa ena mauri lagani be 7 neganai, edena dala ai Iehoiada ese Iehova badinaia karana ia hahedinaraia lou?

¹³ Iehoasa ena mauri lagani be 7 neganai, Iehoiada ese Iehova badinaia karana ia hahedinaraia lou. Palani ta ia karaia. Bema unai palani ia guguru, Iehoasa be king ai do ia lao, badina ia be Davida ena bese amo ia mai bona ia be mai ena maoro. To bema unai palani ia guguru lasi, Iehoiada be ena mauri ia haboioa diba. Iehova ese unai palani ia hanamoa dainai ia guguru. Tuari oreadia edia gunalaia taudia bona Levi taudia ese Iehoiada idia durua dainai, Iehoasa be king ai idia halaoa bona Atalaia idia hamasea. (2 Siv. 23:1-5, 11, 12, 15; 24:1) Iehoiada ese “Iehova bona king bona taunimanima ida gwaubou ta ia karaia, unai amo idia be Iehova ena taunimanima do idia gwauraia noho.” (2 Ki. 11:17) Iehoiada be “Iehova ena ruma ena geiti ta ta ai geiti naria taudia ia atoa, unai amo goeva lasi tauna ta do ia vareai lasi.”​—2 Siv. 23:19.

14. Iehoiada be Iehova ia matauraia dainai edena dala ai ia idia matauraia?

¹⁴ Matamanai Iehova ia gwau: “Lau idia matauraia taudia do lau matauraia.” Oibe, Iehova ese Iehoiada ia hanamoa. (1 Sam. 2:30) Hegeregere, hahelaga tauna badana ena sivarai be Iehova ese Baibel ai ia atoa, unai amo diba do ita abia. (Roma 15:4) Bona Iehoiada idia matauraia bada dainai ia mase neganai, “Davida Ena Siti dekenai idia guria, king taudia idia guria gabuna ai, badina Israela ai Dirava momokanina bona Iena ruma totona gau namodia ia karaia.”​—2 Siv. 24:15, 16.

15. Iehoiada ena sivarai amo dahaka ita dibaia? (Laulau itaia danu.)

¹⁵ Iehoiada ena sivarai ese ita do ia durua Iehova gari henia karana ita hahedinaraia totona. Elda taudia ese Iehoiada ena kara idia tohotohoa diba bona dala idauidau ai kongrigeisen taudia idia gimaia. (Kara 20:28) Bema buruka taudia be Iehoiada bamona Iehova idia gari henia bona badinaia, idia do ia gaukaralaia ena ura idia hagugurua totona. Buruka taudia ia dadaraia lasi. Matamata taudia ese Iehova ese Iehoiada ia kara namo henia karana idia badinaia diba. Hegeregere, lagani daudau lalonai Iehova idia hesiai henia buruka taudia  idia laloa bada bona matauraia be namo. (Aon. 16:31) Danu, tuari oreadia edia gunalaia taudia bona Levi taudia ese Iehoiada idia durua karana amo diba ita abia diba. Namona be ita “idia hakaua taudia” ita kamonai henia.​—Heb. 13:17.

16. Dahaka ese King Iehoasa ia hamanokaia?

¹⁶ Iehoiada ese King Iehoasa ia durua tau namona ai ia lao totona. (2 Ki. 12:2) King Iehoasa ia matamata neganai, ia ura Iehova ia hamoalea. To Iehoiada ia mase murinai, Iehoasa be aposteit lohia taudia ia kamonai henia. Unai dainai dahaka ia vara? Ia bona ia lohiaia taudia ese “au helagadia bona kaivakuku idia tomadiho henia matamaia.” (2 Siv. 24:4, 17, 18) Ena be Iehova ia lalohisihisi, to “idia dekenai peroveta taudia ia siaia bona idia hadibadia loulou, to idia ura lasi kamonai.” Danu, Iehoiada ena natuna Sekaraia idia kamonai henia lasi, ia be Iehova ena peroveta tauna sibona lasi, to ia be hahelaga tauna bona Iehoasa ena kasin. Danu, Iehoasa be Sekaraia ia hamasea, ena be Sekaraia ena famili ese ia idia durua bada.​—2 Siv. 22:11; 24:19-22.

17. Iehoasa dekenai dahaka ia vara?

¹⁷ Iehoasa be Iehova gari henia karana ia hahedinaraia lasi dainai, hekwakwanai ia davaria. Iehova ia gwau: “Lau idia dadaraia taudia be do lau matauraidia lasi.” (1 Sam. 2:30) Gabeai, ena be Suria tuari taudia be momo lasi, to Iehoasa ena “tuari taudia momo herea” idia halusia bona Iehoasa be “bero badana ia davaria.” Suria taudia idia giroa lou murinai, Iehoasa ena hesiai taudia ese ia idia hamasea badina  ia ese Sekaraia ia alaia. Unai king dikana be taunimanima ese idia laloa bada lasi dainai, ia mase neganai “king taudia edia guria gabudia” dekenai idia guria lasi.​—2 Siv. 24:23-25; Mataio 23:35. c

18. Ieremia 17:7, 8 hegeregerena, edena dala ai Iehoasa ena kara ita tohotohoa lasi?

¹⁸ Iehoasa ena haheitalai amo dahaka ita dibaia? Ia be au ta bamona. Unai au ena ramuna be ia goada lasi dainai au ma ta dekenai ia tabekau. Unai au, Iehoiada, ia mase murinai, Iehoasa be aposteit taudia edia hereva ia kamonai bona Iehova ia badinaia lasi. Unai haheitalai ese ia hahedinaraia, namo lasi iseda famili bona kongrigeisen ai idia noho taudia haida edia haheitalai namona ita itaia dainai, Dirava ita ura badinaia. Lauma dalanai ita goada noho totona, namona be Dirava badinaia karadia ita goadalaia, hegeregere, hanaihanai Baibel ita stadilaia, laloa dobu bona guriguri.​—Ieremia 17:7, 8 duahia; Kol. 2:6, 7.

19. Iehova ia ura dahaka ita karaia?

¹⁹ Iehova be ita ia noia lasi gau momo ita karaia totona. Ia ura ita karaia gauna be Hadibaia Tauna 12:13 dekenai ia noho, ia gwau: “Dirava momokanina do oi gari henia bona ena oda herevadia do oi badinaia, badina taunimanima edia mauri lalonai unai be mai anina bada.” Dirava ita gari henia neganai, vaira nega ai hahetoho ita haheaukalaia diba bona Obadaia bona Iehoiada hegeregerena, do ita gari lasi. Gau ta ese Iehova ida iseda hetura karana do ia hadikaia lasi.