1-2. Lota bamona, hari inai negai Keristani taudia ese dahaka hahetoho idia davaria?

 HARI taunimanima ese idia hahedinaraia taravatu utua karadia ita itaia neganai, Lota ia abia hemami do ita lalopararalaia. Ia diba iseda guba Tamana be kara dikadia ia inai henia, unai dainai “taravatu utua taudia edia gwau-edeede hemarai karadia dainai ia lalometau bada.” (2 Pet. 2:7, 8) Dirava gari henia bona lalokau henia karana ese Lota ia durua dainai, taunimanima edia kara dikadia ia dadaraia. Ita danu be, Iehova ena taravatu idia matauraia lasi taudia huanai ita noho. To Dirava ita lalokau henia bona gari henia neganai, iena kara maoromaoro taravatudia do ita badinaia.​—Aon. 14:2.

² Unai ita karaia totona, Iehova ese mai lalokau ida aonega herevadia bukana amo ita ia hagoadaia. Keristani taudia ibounai, tatau bona hahine, matamata bona buruka be inai aonega sisibana amo heduru namona do idia abia.

3. Aonega Herevadia 17:3 hegeregerena, dahaka badina ta dainai iseda kudouna ita gimaia be namo? (Laulau itaia danu.)

³ Iseda kudouna ita gimaia ena badina ta be Iehova ese iseda kudouna ia tahua. Unai ena anina be, Iehova sibona ese iseda kudouna ia itaia, bona ia diba ita be edena bamona taudia. (Aonega Herevadia 17:3 duahia.) Bema iseda lalohadai be iena aonega herevadia amo ita hahonua, ita do ia durua ita noho daudau totona. (Ioa. 4:14) Unai amo Satani bona ena  taunimanima ese idia hahedinaraia hereva koikoidia bona kara dikadia ese ita do ia hadikaia lasi. (1 Ioa. 5:18, 19) Iehova kahirakahira ita lao noho lalonai, ia lalokau henia bona matauraia karana be do ia bada ia lao. Ita ura lasi iseda Tamana ita hahisia dainai, kara dika do ita inai henia. Kara dika ena hahetoho ita davaria neganai, sibona ita nanadaia, ‘Dahaka dainai lau ia lalokau henia bada Tauna lau ura hahisia?’​—1 Ioa. 4:9, 10.

4. Edena dala ai Iehova gari henia karana ese taihu ta ia gimaia?

⁴ Croatia ai Taihu ta ladana Marta be matabodaga karana ena hahetoho ia davaria, ia gwau: “Lau laloa maoromaoro bona ura dikadia lau dadaraia totona be auka. To Iehova gari henia karana ese lau ia gimaia.” b Dirava gari henia karana ese edena dala ai lau ia durua? Marta ia gwau do ia karaia abia hidi kererena ese do ia havaraia dika ia laloa dobu. Ita danu unai bamona ita karaia be namo. Do ia havaraia dika badana be, Iehova ena lalona do ita hahisia bona ia tomadiho henia hanaihanai karana do ia dika.​—Gen. 6:5, 6.

5. Leo ena ekspiriens amo dahaka ita dibaia?

⁵ Iehova ita gari henia neganai, kerere idia karaia taudia do ita tura henia lasi. Congo ai ia noho tadikaka Leo, be ia bapatiso bona lagani foa murinai, tura dikadia ia bamoa. Idia karaia kara dikadia lalonai ia vareai lasi dainai, ia laloa Iehova vairanai ia kerere lasi. To daudau lasi, hebamo dikadia dainai ia inuinu kekero bona matabodaga karana ia karaia. Bena, ena Keristani tama sina ese idia hadibaia gaudia bona ia haboioa moalena ia lalohadailaia. Dahaka ia vara? Lalohadai maorona ia abia lou. Elda taudia edia heduru amo Iehova dekenai ia giroa lou. Hari, mai moale ida elda bona spesel painia gaukarana ia karaia.

6. Edena hahine rua edia haheitalai be hari do ita herevalaia?

 ⁶ Aonega Herevadia karoa 9 do ita herevalaia. Unai siri ai, aonega bona kavakava hahine edia haheitalai do ita duahia. (Roma 5:14; Galatia 4:24 hahegeregerea.) Namona be ita laloatao Satani ena tanobada be matabodaga bona ponografi be bada herea. (Efe. 4:19) Unai dainai Dirava gari henia karana ita hahedinaraia noho bona kara dika amo ita siri be gau badana. (Aon. 16:6) Inai karoa ese ita ibounai, ena be tau o hahine, do ia durua bada. Baibel ese ia herevalaia hahine rua ese laloa namonamo lasi tauna eiava “kavakava tauna” idia boiria noho. Idia gwau: ‘Oi mai, egu ruma lalonai bona oi aniani.’ (Aon. 9:1, 5, 6, 13, 16, 17) To unai boiboi herevana idia abia dae taudia dekenai ia vara gaudia be idau.

7. Aonega Herevadia 9:13-18 hegeregerena, kavakava hahine ena boiboi hereva idia abia dae taudia dekenai dahaka ia vara? (Laulau itaia danu.)

⁷ “Kavakava hahine” ena boiboi herevana ita herevalaia. (Aonega Herevadia 9:13-18 duahia.) Laloa namonamo lasi taudia dekenai mai gari lasi ida ia boiboi, “iniseni umui mai” bona ita aniani. To, dahaka ia vara? “Iena ruma ai mase taudia idia noho.” Reana oi laloatao unai bamona laulau herevana be Aonega Herevadia ena siri haida ai ita duahia vadaeni. “Dika karaia hahine” bona “matabodaga hahine” totona ita dekenai hadibaia herevana ia gwauaraia. Ia gwau, unai “hahine ena ruma dekenai oi lao be mase dalana ai oi ia hakaua bamona.” (Aon. 2:11-19) Aonega Herevadia 5:3-10 ai hadibaia hereva ia noho “dika karaia hahine” ma ta, “iena aena be mase ia lao henia.”

8. Dahaka abia hidi do ita karaia?

⁸ “Kavakava hahine” idia kamonai taudia ese abia hidi do idia karaia: Unai hahine ena boiboi herevana idia do abia dae eiava do idia dadaraia? Ita danu be unai bamona abia hidi do ita karaia. Matabodaga bona ponografi laulau be media bona intanet ai idia hedinarai neganai, dahaka abia hidi do ita karaia?

9-10. Dahaka badina haida dainai matabodaga karadia ita dadaraia be namo?

⁹ Badina namodia dainai ita ese matabodaga karadia ita dadaraia be namo. “Kavakava hahine” ia gwau “idia henaoa ranu edia mamina be namo herea.” “Idia henaoa ranu” be dahaka? Baibel ese headava tau bona hahine edia mahuta hebou karana be ranu namona ida ia hahegeregerea. (Aon. 5:15-18) Taravatu hegeregerena idia headava tau bona hahine be mahuta hebou karana maorona idia moalelaia diba. To, “idia henaoa ranu” be ia idau. Unai  be taravatu utua mahuta hebou karana ia herevalaia. Unai karadia be nega momo hehuni ai idia karaia, henaohenao tauna ese hehuni ai gaudia ia henaoa bamona. Toana be unai taudia dekenai “henaoa ranu” edia mamina be namo herea, bema idia laloa edia kara dika be ta ese do ia dibaia lasi. To, madi sibona idia koia! Iehova be gau ibounai ia itaia. Unai dainai, Iehova ena lalonamo haboioa karana ena mamina be dika momokani. (1 Kor. 6:9, 10) To unai sibona lasi.

¹⁰ Matabodaga karana ese hemarai, anina lasi lalohadaina ia havaraia, rogorogo kava, bona ruma bese ia hapararaia. Unai dainai aonega karana be kavakava hahine ena “ruma” ita dadaraia bona ia ida ita aniani lasi. Danu, edia hetura karana Iehova ida idia hadikaia, bona idia momo be matabodaga karadia dainai idia gorere bona mase. (Aon. 7:23, 26) Karoa 9, siri 18 ena dokona ai, ia gwau: “Ena vadivadi taudia be Mase Gurina ena dobu momokani gabuna ai idia noho.” Unai boiboi hereva koikoina ese idia dekenai dika ia havaraia, to dahaka dainai momo ese unai idia abia dae?​—Aon. 9:13-18.

11. Dahaka dainai ponografi itaia karana ese dika bada ia havaraia?

¹¹ Ponografi be tarapu badana ta. Haida idia laloa ponografi itaia karana ese dika do ia havaraia lasi. To, unai be momokani lasi. Ponografi ese taunimanima ia hadikaia, idia sibona bona ma haida do idia matauraia lasi karana ia havaraia, bona unai kara idia hadokoa totona be auka. Taunimanima ese matabodaga laulaudia idia itaia neganai, edia lalohadai dekenai do ia noho bona kokia totona be do ia auka. Danu, ponografi ese ura dikadia ia kokia lasi; to ia habadaia. (Kol. 3:5; Iam. 1:14, 15) Oibe, ponografi idia itaia taudia ese matabodaga karadia idia karaia.

12. Edena dala ai mahuta hebou urana ia havaraia laulaudia dainai ita naria namonamo?

¹² Ita Keristani taudia ese dahaka ita karaia be namo, bema ponografi laulau be iseda elektronik divais ai ia hedinarai? Karaharaga unai laulau ita dadaraia. Unai ita karaia diba bema iseda hetura karana Iehova ida ita laloa bada. Momokani, ena be ita laloa laulau ese ponografi ia hahedinaraia lasi, to mahuta hebou urana ia havaraia diba. Dahaka dainai ita dadaraia? Badina ita ura lasi iseda kudouna ai matabodaga karana ta ita havaraia. (Mat. 5:28, 29) Thailand ai, elda ta ladana David be sibona ia henanadai, ia gwau: ‘Ena be inai laulau be ponografi lasi to, Iehova do ia moale bema lau itaia noho, a?’ Unai bamona lalohadai ese lau ia durua mai aonega ida lau kara.”

13. Dahaka ese ita ia durua mai aonega ida ita kara?

¹³ Iehova gari henia karana ese ita ia durua mai aonega ida ita kara totona. Unai amo Iehova ita hahisia lasi. Dirava gari henia karana be “aonega ena matamana.” (Aon. 9:10) Aonega Herevadia karoa 9 ena laulau herevana ese unai ia hahedinaraia namonamo, unai siri ai ita duahia hahine ma ta ese laulau dalanai “aonega korikori” ena idau ia hahedinaraia.

14. Aonega Herevadia 9:1-6 ai ia noho boiboi herevana ena idau be dahaka?

¹⁴ Aonega Herevadia 9:1-6 duahia. Iniseniai ita ese Iehova ena boiboi herevana ita duahia. Ia be iseda havaraia Tauna bona aonega ibounai ena badina. (Aon. 2:6; Roma 16:27) Unai siri ai idia herevalaia laulau herevana be ruma badana ta mai ena du seven. Unai ese Iehova ena harihari bada karana bona iena aonega hereva idia ura badinaia taudia ia welkam henia karana ia laulaulaia.

15. Dirava ese ita ia boiria dahaka karaia totona?

¹⁵ Iehova be harihari bada bona gau ibounai  ia henia Diravana. Aonega Herevadia karoa 9 ai, “aonega korikori” hahinena ena laulau herevana ese Iehova ena kara namodia ia laulaulaia. Unai sivarai ese ia hahedinaraia unai hahine ese ena vamu hegaegaelaia namonamo, wain ia mikisia, bona teibolo danu ia atoa hegaegae vadaeni. (Aon. 9:2) Danu, siri 4 bona 5 hegeregerena: “Aonega be kavakava tauna dekenai ia gwau: ‘Oi mai, paraoa oi ania.’” Dahaka dainai aonega korikori ena ruma dekenai ita mai bona ia henia aniani ita ania be namo? Iehova ia ura iena natudia idia aonega bona mauri idia abia. Ia ura lasi kerere ita karaia bena gabeai ita lalohisihisi. Unai dainai “Dirava ese kara maoromaoro tauna totona aonega ia haboua noho.” (Aon. 2:7) Iehova gari henia karana ita hahedinaraia neganai, do ita ura ia ita hamoalea. Iena aonega sisiba ita kamonai bona ita moale ita badinaia totona.​—Iam. 1:25.

16. Edena dala ai Dirava gari henia karana ese Alain ia durua, bona dahaka namo ia havaraia?

¹⁶ Dirava gari henia karana ese Alain ia durua mai aonega ida abia hidi ia karaia dalana do ita itaia. Inai Keristani elda bona sikuli tisa ia gwau, “Lau ida idia gaukara taudia idia laloa ponografi muvi be edukeisen ta bamona.” To Alain ia diba inai be koikoi. Ia gwau “Dirava gari henia karana dainai, lau ura lasi inai muvi lau itaia. Danu, gaukara turadia dekenai unai ena badina lau herevalaia.” Ia ese “aonega korikori” ena sisiba ia badinaia bona ‘laloparara ena dala ai ia raka lao noho.’ (Aon. 9:6) Alain ena gini goada karana dainai, ia ida idia gaukara tisa haida be hari Baibel stadi idia abia dae bona Keristani heboudia dekenai idia lao.   

17-18. “Aonega korikori” ena boiboi herevana idia abia dae taudia ese dahaka hahenamo idia moalelaia? Dahaka hahenamo ma haida idia naria noho? (Laulau itaia danu.)

¹⁷ Hahine rua edia haheitalai amo Iehova ese vaira negana ai do ita moalelaia hahenamo ia hahedinaraia. To, “kavakava hahine” ena boiboi hereva idia abia dae taudia idia ura moale totona, hehuni ai matabodaga karana idia karaia. To, vaira nega ai idia dekenai do ia vara gauna be idia lalopararalaia lasi. Idia be “Mase Gurina ena dobu” momokani gabuna ai idia noho.​—Aon. 9:13, 17, 18.

¹⁸ “Aonega korikori” ena boiboi herevana idia abia dae taudia dekenai unai be idau momokani! Idia moale badina idia durua gaudia ibounai idia noho Iehova kahirakahira idia lao totona. (Isa. 65:13) Peroveta tauna Isaia amo, Iehova ia gwau: “Lau umui kamonai henia namonamo, bona aniani namodia umui ania, bona aniani namodia do umui moalelaia  bada.” (Isa. 55:1, 2) Iehova ia ura henia bona ia inai henia gaudia dekenai diba ita abia noho. (Sal. 97:10) Bona ita moale badina ma haida ita boiria diba, “aonega korikori” amo diba idia abia totona. Unai be hegeregere, “siti ena ororo amo [ita] boiboi: ‘Diba bada lasi taudia e, iniseni umui mai.’” Ita bona unai boiboi herevana idia abia dae taudia ese do ita moalelaia hahenamo be hari sibona lasi, to do idia noho hanaihanai. Bona ‘laloparara ena dala ai ita raka lao noho’ unai amo “mauri” hanaihanai do ita abia.​—Aon. 9:3, 4, 6.

19. Hadibaia Tauna 12:13, 14 hegeregerena, dahaka abia hidi ita karaia be namo? (Maua ladana “ Dirava Gari Henia Karana ese Ita Dekenai Namo Ia Havaraia” itaia danu.)

¹⁹ Hadibaia Tauna 12:13, 14 duahia. Inai dina gabedia lalonai, Iehova matauraia bada karana ese ita do ia gimaia bona ita ia durua tauanina dalanai ita goeva bona ia kahirakahira do ita noho. Mai iseda kudouna ibounai ida Iehova ita lalokau henia dainai, momo ita boiria noho “aonega korikori” idia tahua bona diba idia abia totona.