1. 1 Petero 5:2 hegeregerena, elda taudia be dahaka hahenamo idia moalelaia?

 IEHOVA ese elda taudia dekenai gaukara ia henia iena mamoe idia naria namonamo totona. Inai abidadama tatau be edia hahenamo idia laloa bada, bona edia tadikaka taihu idia durua bona idia gaukara goada ‘mamoe naria taudia ese mamoe do idia naria namo herea’ taudia ai do idia lao. (Ier. 23:4; 1 Petero 5:2 duahia.) Ita moale badina iseda kongrigeisen ai inai bamona tatau idia noho.

2. Elda taudia haida be dahaka hahetoho do idia davaria?

² Elda taudia be edia gaukara idia naria neganai, hekwakwanai momo do idia davaria. Gau ta be, namona be elda taudia idia gaukara goada kongrigeisen idia naria totona. United States ai, elda ta ladana Tony be gaukara momo ia abia totona, ia manau be namo. Ia gwau: “COVID-19 gorerena ia matamaia neganai, gaukara momo lau karaia hegeregere, hebou bona haroro gaukara lau hakaua. Herevana unai lau karaia, to hanaihanai gaukara momo herea idia noho. Bena metairametaira lau be nega lasi egu Baibel duahiduahi, sibona egu stadi bona guriguri lau karaia totona.” Kosovo ai, elda ta ladana Ilir be hekwakwanai idauna ta ia davaria. Tuari gabuna ai ia noho neganai, ia davaria ia auka orea ena hakaua herevadia ia badinaia totona. Ia gwau: “Brens ofesi ese lau dekenai gaukara ta idia henia tadikaka bona taihu lau durua neganai, unai ese egu gari lasi karana idia tohoa. Lau gari bona lau laloa unai hakaua herevana badinaia totona be maoro lasi.” Asia ai, misinari ta ladana Tim ia mamia ia hegeregere lasi dina ta ta ai gaukara ibounai ia karaia totona. Ia gwau: “Nega haida lau mamia tadikaka bona taihu lau naria totona, egu goada ia ore.” Dahaka ese unai bamona hekwakwanai idia davaria elda taudia ia durua diba?

3. Edena dala ai ita ibounai ese Gideona ena haheitalai amo namo ita abia diba?

 ³ Elda taudia ese hahemaoro tauna Gideona ena haheitalai amo diba idia abia diba. (Heb. 6:12; 11:32) Ia be Dirava ena taunimanima ia gimaia bona ia naria. (Hah. 2:16; 1 Siv. 17:6) Gideona bamona, Dirava ese elda taudia ia abia hidi inai nega aukadia lalonai iena taunimanima idia naria totona. (Kara 20:28; 2 Tim. 3:1) Gideona ena manau bona badinaia karana dekenai diba ita abia. Ena gaukara ia karaia neganai ena haheauka karana dekenai hahetoho ia davaria. Ena be ita be elda taudia eiava lasi, to edia gaukara namona dainai idia ita tanikiu henia. Ita ese kongrigeisen lalonai idia gaukara goada tadikakadia ita durua diba.​—Heb. 13:17.   

4. Edena dala ai Gideona be manau karana ia hahedinaraia?

⁴ Gideona be manau tauna. b Aneru ese Gideona ia hamaoroa, Iehova ese ia abia hidi Israela taudia be Midiana taudia amo do ia hamauria neganai, Gideona be mai manau ida ia gwau: “Manase iduhu lalonai egu bese be ladana maragi besena, bona egu tamana ena bese lalonai lau be ladana maragi tauna.” (Hah. 6:15) Gideona ia mamia ena diba be bada lasi unai gaukara ia karaia totona, to Iehova ia diba unai ia karaia diba. Iehova ena heduru dainai, Gideona ese ena gaukara ia hagugurua.

5. Edena bamona negana ai ia auka elda tauna be ia manau totona?

⁵ Elda taudia idia gaukara goada gau ibounai lalonai manau karana idia hahedinaraia totona. (Mika 6:8; Kara 20:18, 19) Edia diba eiava idia hagugurua gaukara dainai do idia heagi lasi, bona kerere haida idia karaia dainai namo lasi idia laloa idia be anina lasi. To nega haida, ia auka elda tauna be manau karana ia hahedinaraia totona. Hegeregere, reana gaukara momo ia do abia dae, to do ia auka ibounai ia hagugurua totona. Eiava gaukara ta ia karaia namonamo lasi dainai, idia gwauraia dika o gaukara ta ia karaia namonamo dainai, idia hanamoa. Unai bamona negadia ai, Gideona ena haheitalai ese edena dala ai elda taudia ia durua?

6. Elda taudia be Gideona ena manau karana amo dahaka idia dibaia? (Laulau itaia danu.)

⁶ Heduru totona oi noia. Manau tauna ia diba gaukara haida do ia karaia lasi. Gideona ia manau dainai heduru totona ma haida ia noia.  (Hah. 6:27, 35; 7:24) Mai edia laloparara elda taudia be unai bamona idia karaia. Matamanai ita herevalaia tadikaka Tony ia gwau: “Lau maragi nega amo gaukara momo abia dae karana lau manada, to gaukara lau hagugurua lasi. Unai dainai emai ruma bese tomadihona ai, manau karana ena topik lau abia hidi, bona egu adavana ena lalohadai lau abia. Danu, jw.org ai vidio ladana Iesu Bamona—Ma Haida Treinia, Abidadama, Bona Maduna Henia lau itaia.” Bena, Tony be ma haida ia noia ia durua totona. Dahaka namo ia vara? Tony ia gwau: “Ma haida be kongrigeisen ena gaukara idia naria dainai, lau be ma ena nega egu hetura karana Iehova ida lau hagoadaia.”

7. Edena dala ai elda taudia ese Gideona idia tohotohoa diba, bema haida ese idia gwauraia dika? (Iamesi 3:13)

⁷ Mai manau ida oi harere bema oi idia gwauraia dika. Elda taudia ia tohoa gauna ma ta be, bema ta ese idia ia gwauraia dika. Gideona ena haheitalai ese idia ia durua diba. Gideona ia diba ia be goevadae lasi, unai dainai Eparaima taudia ese ia idia gwauraia dika neganai, ia manau sibona. (Hah. 8:1-3) Gideona be mai badu ida ia haere henidia lasi. Idia maumauraia gauna ia kamonai namonamo bona mai manau ida idia ia haere henidia bona edia lalona ia namo. Mai edia laloparara elda taudia be Gideona idia tohotohoa totona, namona be haida ese idia gwauraia dika neganai idia badu lasi, to edia hereva idia kamonai namonamo bona mai manau ida idia haere henia. (Iamesi 3:13 duahia.) Unai ese kongrigeisen lalonai maino do ia havaraia.

8. Bema haida ese elda taudia idia hanamoa, dahaka idia karaia be namo? Haheitalai gwauraia.

⁸ Iehova dekenai hanamoa ibounai oi henia. Gideona be Midiana taudia ia halusia bona haida ese idia hanamoa neganai, hanamoa ibounai be Iehova dekenai ia henia. (Hah. 8:22, 23) Edena dala ai elda taudia ese Gideona idia tohotohoa diba? Idia hagugurua gaukarana dainai Iehova idia hanamoa diba. (1 Kor. 4:6, 7) Hegeregere, elda tauna ta be ena hadibaia dalana dainai idia hanamoa neganai, namona be ia hahedinaraia unai hadibaia dalana be Dirava ena Hereva bona ita ibounai be iena orea amo diba ita abia noho. Namona be elda taudia idia itaia bema edia hadibaia dalana ese Iehova ia hanamoa, eiava idia ura taunimanima idia hamoalea sibona. Mani elda ta ladana Timothy ena ekspiriens ita laloa. Timothy be elda maduna ia abia matamaia neganai, pablik tok henia karana ia moalelaia bada. Ia gwau: “Egu tok ai hamatamaia hereva namodia bona haheitalai lau gaukaralaia. Unai dainai haida ese lau idia hanamoa. To, Baibel eiava Iehova idia laloa bada lasi.” Gabeai, Timothy ia laloparara namona be ena hadibaia dalana do ia haidaua, unai amo ma haida ese Iehova do idia hanamoa, to ia lasi. (Aon. 27:21) Dahaka namo ia vara? Ia gwau: “Tadikaka taihu idauidau ese lau idia hamaoroa, egu tok ese idia ia durua hekwakwanai ta eiava hahetoho ta idia haheaukalaia, eiava edia hetura karana Iehova ida idia hagoadaia. Edia hereva lau kamonai neganai lau moale bada, guna bamona lasi.”

9. Edena dala ai Gideona ena badinaia bona gari lasi karana idia tohoa? (Rau 1 ena laulau itaia.)

⁹ Gideona be hahemaoro tauna ai ia lao murinai, ena badinaia bona gari lasi karana idia tohoa. Iehova be ia dekenai gaukara aukana ia henia, ena tamana ena Bala boubou patana ia hadikaia totona. (Hah. 6:25, 26) Gabeai, tuari taudia ia haboua murinai, Iehova ese nega rua ia hamaoroa ena tuari taudia edia namba do ia hamaragia. (Hah. 7:2-7) Bena, Iehova ese ia hamaoroa hanuaboi ai, ena inai taudia edia tuari kamepa kahirakahira do ia lao idia ia tuari henia totona.​—Hah. 7:9-11.

10. Edena dala ai elda ta ena badinaia karana do idia tohoa?

 ¹⁰ Namona be elda taudia ese ‘hereva idia badinaia haraga.’ (Iam. 3:17) Hereva ia badinaia haraga elda tauna ese Baibel bona Dirava ena orea amo ia mai hakaua herevana ia badinaia. Bona haida dekenai haheitalai namona ia hahedinaraia. To, nega haida ena badinaia karana idia tohoa diba. Reana do ia mamia, ia abia hakaua herevana ia badinaia totona be auka. Nega haida, reana do ia laloa inai hakaua herevana badinaia totona be maoro eiava aonega karana. Eiava ia dekenai idia henia gaukara ta dainai pulisi ese do idia arest. Unai bamona negadia ai, edena dala ai elda taudia ese Gideona ena badinaia karana idia tohotohoa diba?

11. Dahaka ese elda taudia ia durua badinaia karana idia hahedinaraia totona?

¹¹ Hakaua herevana oi kamonai namonamo bona badinaia. Dirava ese Gideona dekenai ena tamana ena boubou patana hadikaia dalana, edeseni ai Iehova ena boubou patana matamatana do ia haginia, bona edena animal do ia bouboulaia karana ia hadibaia. Gideona be inai hakaua herevana ia gwauraia dika lasi, to ia badinaia sibona. Hari, elda taudia be Iehova ena orea amo hakaua herevadia idia abia, hegeregere revareva amo, hadibaia herevadia bona hakaua hereva ma haida amo, ita idia durua ita noho namonamo bona Iehova kahirakahira ita lao. Iseda elda taudia ita lalokau henia badina idia ese tiokratik ena hakaua dalana idia badinaia, unai amo kongrigeisen be ia namo.​—Sal. 119:112.

12. Bema Iehova ena orea ai senisi ta ia vara, edena dala ai elda taudia ese Heberu 13:17 idia badinaia diba?

¹² Mai ura ida idia vara senisi oi badinaia. Laloatao, Iehova ese Gideona ia hamaoroa ena tuari taudia momo be ruma dekenai do ia siaidia lao. (Hah. 7:8) Reana ia laloa, inai senisi be namo, a? Gau namona ta do ia vara, a? Herevana dahaka, to Gideona be hereva ia badinaia. Hari, orea ese elda taudia dekenai hakaua dalana idauna idia henia neganai, namona be Gideona ena haheitalai idia tohotohoa. (Heberu 13:17 duahia.) Hegeregere haheitalai ta be, lagani 2014 ai, Hakaua Oreana ese Kingdom Hall bona Assembly Hall ena haginia gaukarana ena kontribiusen henia dalana ia haidaua. (2 Kor. 8:12-14) Kongrigeisen be henia torehai do idia karaia lou lasi. Badina guna, tanobada hegegemadai ena kongrigeisen ibounai ese Kingdom Hall bona Assembly Hall idia haginia totona, orea amo moni idia henia torehai, ena be unai kongrigeisen ena kontribiusen be bada lasi. José be unai senisi ia kamonai neganai, ia daradara bada, bona ia laloa: ‘Kingdom Hall ta do idia haginia lasi. Inai tanobada ai gaukara be inai bamona idia karaia lasi.’ Dahaka ese José ia durua unai hakaua herevana ia badinaia totona? Ia gwau: “Aonega Herevadia 3:5, 6 ena hereva ese lau ia hadibaia Iehova lau abidadama henia totona. Bona gau namodia idia vara! Hgeregere, Kingdom Hall momo sibona ai haginia lasi, to dala idauidau ai kontribiusen ai henia dalana ai dibaia, unai amo gau ibounai idia hegeregere.”   

13. (a) Gideona be dahaka ia abia dae? (b) Edena dala ai elda taudia ese ena haheitalai idia tohotohoa diba? (Laulau itaia danu.)

 ¹³ Mai gari lasi ida Iehova ena ura oi badinaia. Ena be Gideona ia gari bona ia abia gaukarana ai ena mauri ia haboioa diba, to Iehova ia badinaia sibona. (Hah. 9:17) Gideona be Iehova amo hagoadaia herevana ia abia murinai, ia abia dae momokani Dirava ese ia do ia durua Dirava ena taunimanima ia gimaia totona. Iseda gaukara idia taravatua tanodia ai idia noho elda taudia ese Gideona ena haheitalai idia tohotohoa diba. Ena be idia hagaridia do idia arest, henanadai momo do idia henia, moni gaukara do idia haboioa eiava dagedage do idia davaria, to mai gari lasi ida hebou bona haroro gaukara idia hakaua. c Hisihisi badana lalonai, elda taudia ese mai gari lasi ida do idia abia hakaua herevadia do idia badinaia be namo, ena be ia auka idia badinaia totona. Hegeregere, reana do idia abia hakaua herevadia be hahemaoro herevadia harorolaia dalana bona Magoga Tauna Goga ena tuari ai do ita roho mauri dalana.​—Ese. 38:18; Apok. 16:21.

14. Edena dala ai Gideona ena haheauka karana idia tohoa?

¹⁴ Gideona be hahemaoro tauna dainai, ia gaukara goada be namo. Hanuaboi ai Midiana taudia be tuari amo idia heau neganai, Gideona be idia murinai idia ia lulua lao Ieserele ena koura amo ela bona Ioridane Sinavai. (Hah. 7:22) Gideona be Ioridane dekenai ia stopu, a? Lasi! Ena be idia hesiku, to ia bona ena tatau 300 be Ioridane idia hanaia bona Midiana taudia idia lulua noho. Bena dokonai, Midiana taudia idia dogoatao bona halusidia.​—Hah. 8:4-12.

15. Dahaka dainai nega haida ia auka elda tauna ia haheauka totona?

¹⁵ Reana nega haida elda tauna be kongrigeisen bona ena famili ia naria dainai, tauanina dalana ai, lalohadai o hemami dalanai ia hesiku diba. Unai bamona negadia ai, edena dala ai elda taudia ese Gideona idia tohotohoa diba?   

16-17. Dahaka ese Gideona ia durua ia haheauka totona, bona elda taudia be dahaka idia abia dae be namo? (Isaia 40:28-31) (Laulau itaia danu.)

 ¹⁶ Oi abia dae Iehova ese oi do ia hagoadaia. Gideona ia abia dae Iehova ese ia do ia hagoadaia, unai dainai ia lalohisihisi lasi. (Hah. 6:14, 34) Gideona bona ena tatau be kamelo amo idia guia Midiana edia king rua idia lulua noho. (Hah. 8:12, 21) To, Dirava ese idia ia durua dainai, unai Midiana taudia idia dogoatao, bona tuari dekenai idia kwalimu. Unai hegeregerena, elda taudia ese “ia hesiku diba lasi eiava ia manoka diba lasi” Diravana, Iehova dekenai idia tabekau diba. Idia dekenai goada do ia henia.​—Isaia 40:28-31 duahia.

¹⁷ Mani Hospital Liaison Committee ena tadikaka ta Matthew ena ekspiriens ita laloa. Dahaka ese ia durua ia haheauka totona? Matthew ia gwau: “Filipi 4:13 ena hereva ese lau ia hagoadaia. Nega momo lau hesiku bada bona egu goada ia ore neganai, Dirava dekenai lau guriguri goadagoada lau dekenai goada ia henia unai amo egu tadikaka lau durua diba. Unai negadiai lau mamia Iehova ena lauma helaga ese lau dekenai goada ia henia lau haheauka totona.” Gideona bamona, iseda elda taudia idia gaukara goada Iehova ena taunimanima idia naria totona, ena be koua gaudia idia vara. Momokani, idia manau be namo bona idia laloatao edia goada be mai ena hetoana. Namona be Iehova idia abidadama henia badina edia noinoi do ia kamonai henia bona idia do ia hagoadaia idia haheauka totona.​—Sal. 116:1; Fili. 2:13.

18. Inai stadi ai, edena dala ai elda taudia ese Gideona idia tohotohoa diba?

¹⁸ Elda taudia ese Gideona amo gau momo idia dibaia. Elda taudia ese edia goada hegeregerena gaukara idia karaia bona haida ese idia gwauraia dika eiava idia hanamoa neganai, idia manau be namo. Inai nega oromana ena dokona ia kahirakahira noho lalonai, namona be badinaia bona gari lasi karana idia hahedinaraia. Bona namona be idia abia dae, ena be dahaka koua gaudia idia vara, Dirava ese idia do ia hagoadaia. Oibe, unai bamona gaukara goada mamoe naria taudia ita tanikiu henia, bona “unai bamona tadikaka do [ita] lalodia bada noho.”​—Fili. 2:29.