1. Iehova ena dina ai ita roho mauri totona dahaka ita karaia be namo?

 BAIBEL ese “Iehova ena dina” ia herevalaia neganai, ia be Iehova ese ena inai taudia do ia hahemaoro henia bona ena taunimanima do ia hamauria negana ia herevalaia. Idaunegai, nega haida Iehova ese taunimanima ia hahemaoro henidia. (Isa. 13:1, 6; Ese. 13:5; Sef. 1:8) Iseda nega ai, “Iehova ena dina” be do ia matamaia negana be, politikol oreadia ese Babulonia Badana do idia tuari henia, bona Aramagedono tuarina ai do ia ore. Unai “dina” ai ita roho mauri totona, hari ita hegaegae be namo. Iesu ese ita ia hadibaia unai “hisihisi badana” totona ita naria sibona lasi, to danu ita “noho hegaegae” be namo.​—Mat. 24:21; Luka 12:40.

2. Dahaka dainai 1 Tesalonika ena hereva ese ita ia durua diba?

² Aposetolo Paulo ese Tesalonika taudia dekenai ia torea revareva ginigunana lalonai, haheitalai haida ia gaukaralaia Keristani taudia ia durua Iehova ena hahemaoro dinana totona do idia hegaegae. Paulo ia diba Iehova ena dina be unai nega ai do ia ginidae lasi. (2 Tes. 2:1-3) To, unai dina do ia ginidae haraga dainai, iena tadikaka ia hagoadaia do idia hegaegae be namo, bona ita danu be unai sisiba ita badinaia diba. Mani ia gwauraia gaudia toi ita herevalaia: (1) Iehova ena dina be edena bamona do ia ginidae, (2) daidia be unai dina ai do idia roho mauri lasi, bona (3) ita roho mauri totona edena dala ai do ita hegaegae.

3. Edena dala ai Iehova ena dina be henaohenao tauna be hanuaboi ai ia mai bamona? (Laulau itaia danu.)

³ “Henaohenao tauna be hanuaboi ai ia mai bamona.” (1 Tes. 5:2) Inai be Iehova ena dina do ia ginidae dalana ia hahedinaraia  ena haheitalai ginigunana. Nega momo henaohenao taudia be hanuaboi ai, taunimanima idia mahuta lalonai idia mai. Iehova ena dina danu be do ia ginidae haraga neganai, taunimanima momo be do idia hoa. Keristani taudia danu be do idia itaia gaudia be idia vara haraga neganai, do idia hoa. To ita be kara dika taudia bamona lasi, dika do ita davaraia lasi.   

4. Edena dala ai Iehova ena dina be rogorogo hahine ese mara ena hisihisi ia abia bamona?

⁴ “Rogorogo hahinena ese mara ena hisihisi ia abia bamona.” (1 Tes. 5:3) Rogorogo hahine ia diba namonamo lasi edena nega korikorina ai beibi do ia vara. To ia diba mara ena hisihisi do ia abia. Unai ia vara neganai, do ia haraga, badina ena hisihisi be bada herea bona koua dalana be lasi. Unai hegeregerena, ita diba lasi dina bona hora ai Iehova ena dina do ia matamaia. To ita diba momokani, Dirava ese kara dika taudia do ia hahemaoro henia dinana be do ia ginidae haraga bona do idia heau mauri diba lasi.

5. Edena dala ai hisihisi badana be daba ia rere bamona?

⁵ Daba ia rere bamona. Paulo ena haheitalai ihatoina ai, henaohenao taudia edia henaohenao karana ia herevalaia lou. To Paulo ese unai hereva ia gwauraia neganai, ia ese Iehova ena dina be daba ia rere karana ida ia hahegeregerea. (1 Tes. 5:4) Hanuaboi ai idia henaohenao taudia be gau momo idia laloa dainai, nega idia itaia lasi. Dina ena diari ia hedinarai bona edia kara ia hahedinaraia. Unai hegeregerena, hisihisi badana ai Dirava ia moalelaia lasi karadia idia karaia noho taudia edia kara dika do ia hahedinaraia. Ita be idia bamona lasi, to ita noho hegaegae Iehova ese ia moalelaia lasi karadia ita dadaraia, bona “namo gaudia idauidau bona kara maoromaoro bona hereva momokani ia havaraia” karadia ita tahua  noho. (Efe. 5:8-12) Paulo ese do ia gaukaralaia haheitalai rua be do idia roho mauri lasi taudia ia herevalaia.

6. Edena dala ai ita gwau diba taunimanima momo be idia mahuta noho bamona? (1 Tesalonika 5:6, 7)

⁶ “Mahuta taudia.” (1 Tesalonika 5:6, 7 duahia.) Paulo ese Iehova ena dina ai do idia roho mauri lasi taudia be idia mahuta taudia ida ia hahegeregerea. Edia badinai dahaka gaudia idia vara noho o nega ia hanaia be idia diba lasi. Unai dainai, mai anina bada gaudia idia vara neganai, do idia diba lasi bona kara ta do idia karaia lasi. Hari inai negai, taunimanima momo be idia mahuta taudia bamona. (Roma 11:8) Idia vara toa idauidau ese ia hahedinaraia ita be “dina gabedia ai” ita noho, bona hisihisi badana be kahirakahira do ia mai idia abia dae lasi. Tanobada ai senisi badadia idia vara neganai, haida do idia ura Basileia ena sivarai idia kamonai, to Dirava tura henia karana do idia laloa bada lasi. To, momo do idia gima lasi, idia giroa lou bona mahuta. Reana haida be hahemaoro dinana idia abia dae, to idia laloa unai dina be daudau. (2 Pet. 3:3, 4) To, Paulo ena sisiba ita lalopararalaia, dina ta ta lalonai ita noga noho be mai anina bada.

7. Edena dala ai Dirava ena badu do idia davaria taudia be inuinu kekero taudia bamona?

⁷ “Inuinu kekero taudia.” Aposetolo Paulo ese Dirava ena badu do idia davaria taudia be inuinu kekero taudia ida ia hahegeregerea. Inuinu kekero taudia be idia badinai idia vara gaudia dekenai kara ta do idia karaia haraga lasi, bona abia hidi namodia idia karaia lasi. Unai hegeregerena, kara dika taudia be Dirava ena hadibaia hereva dekenai kara ta idia karaia lasi. Idia abia hidi mauri dalana ese idia do ia hadikaia. To namona be Keristani taudia idia laloa maoromaoro noho. (1 Tes. 5:6) Diba bada tauna ta ese laloa maoromaoro karana ia herevalaia neganai, ia gwau, unai be “ta ia laloa namonamo bona ia gari lasi, unai amo abia hidi maorodia ia karaia diba.” Dahaka dainai ita laloa maoromaoro bona ita daradara lasi be namo? Unai amo hari politikol bona komiuniti lalonai idia vara hekwakwanai lalonai do ita vareai lasi. Iehova ena dina ia kahirakahira neganai, unai bamona hekwakwanai be do idia bada ia lao. To edena bamona unai do ita hanaia ita lalohekwarahilaia lasi. Dirava ena lauma helaga ese ita ia durua diba mai laloa maoromaoro ida abia hidi maorodia do ita karaia.​—Luka 12:11, 12.

8. Edena dala ai 1 Tesalonika 5:8 ena haheitalai herevana ese ita ia durua ita gima bona laloa maoromaoro totona? (Laulau itaia danu.)

⁸ “Kemena ena auri dabua . . . bona . . . kwara gauna . . . ita atoa.” Paulo ese ita be tuari totona ia gima noho bona tuari dabua ia karaia tauna ida ia hahegeregerea. (1 Tesalonika 5:8 duahia.) Tuari tauna be nega ibounai tuari totona ia noho hegaegae. Ita danu be unai bamona. Ita noho hegaegae Iehova ena dina totona, namona be abidadama bona lalokau be iseda kemena ena auri dabua bona iseda helaro be kwara gauna bamona ita atoa. Unai ita karaia neganai, ita do ia durua bada.

9. Edena dala ai iseda abidadama ese ita ia gimaia?

⁹ Kemena ena auri dabua ese tuari tauna ena kudouna ia gimaia. Abidadama bona lalokau ese iseda kudouna ia gimaia. Unai karadia ese ita do ia durua Dirava ita hesiai henia noho bona Iesu ita badinaia totona. Ita abidadama, mai kudouna ibounai ida Iehova ita tahua dainai, ita dekenai davana namona do ia henia. (Heb. 11:6) Unai ese ita do ia hagoadaia ena be hekwakwanai ita davaria, to iseda Gunalaia Tauna, Iesu, ita badinaia noho. Hari, dagedage  bona moni ena hekwakwanai idia davaria taudia edia haheitalai amo, ita dibaia gaudia ese iseda abidadama ia hagoadaia bona mauri ena hekwakwanai ita haheaukalaia totona. Basileia idia atoa guna bona edia noho dalana idia haidaua taudia edia haheitalai ita tohotohoa karana ese ita do ia durua kohu momo tahua karana ita dadaraia totona. b

10. Edena dala ai Dirava bona iseda neiba taudia lalokau henia karana ese ita ia durua ita haheauka totona?

¹⁰ Lalokau danu be mai anina bada, unai ese ita ia durua ita gima noho bona laloa maoromaoro totona. (Mat. 22:37-39) Ena be dagedage do ita davaria, to Dirava lalokau henia kara ese ita do ia durua mai haheauka ida do ita haroro noho. (2 Tim. 1:7, 8) Iehova idia hesiai henia lasi taudia ita lalokau henia dainai, iseda teritori ai haroro gaukara ita karaia noho, ena be fon eiava leta amo. Ita hesiku lasi badina ita diba nega ta taunimanima be edia kara do idia haidaua bona kara maorona do idia karaia.​—Ese. 18:27, 28.

11. Edena dala ai iseda tadikaka taihu lalokau henia karana ese ita ia durua? (1 Tesalonika 5:11)

¹¹ Iseda tadikaka taihu be iseda neiba taudia danu. Idia dekenai lalokau ita hahedinaraia dalana be, ‘ta ta do ita durua bona ta ta do ita hagoadaia noho.’ (1 Tesalonika 5:11 duahia.) Tuari taudia be ta ta idia durua hegeregrena, ita ese ta ta ita hagoadaia be namo. Momokani, nega haida tuari lalonai solida ta ese ena turana ia haberoa diba, to ia laloa lasi unai do ia vara. Unai hegeregerena, ita ura lasi iseda tadikaka taihu ita hahisia kava eiava edia dika davana ita haloua. (1 Tes. 5:13, 15) Danu, kongrigeisen idia naria tadikaka dekenai lalokau ita hahedinaraia bona ita matauraia. (1 Tes. 5:12) Paulo ese inai revareva ia torea neganai, Tesalonika kongrigeisen be matamata sibona. Unai kongrigeisen ai idia abia hidi tadikaka, edia diba be bada lasi bona reana kerere haida idia karaia danu. To, idia matauraia be namo. Hisihisi badana ia kahirakahira noho lalonai, iseda elda taudia amo hakaua herevadia momo do ita abia. Unai dainai, bema hedikwota bona brens  ofesi amo hakaua hereva abia dalana idia koua, namona be iseda elda taudia ita lalokau henia bona matauraia be gau badana. Herevana dahaka ia vara, namona be ita laloa maoromaoro noho, namo lasi edia kerere ita laloa, to Iehova ese Keriso amo inai abidadama tadikakadia ia hakaua karana ita laloa bada be namo.

12. Edena dala ai iseda helaro ese iseda laloa dalana ia gimaia?

¹² Kwara gauna ese tuari tauna ena kwarana ia gimaia hegeregerena, iseda hahemauri helarona ese iseda laloa dalana ia gimaia. Iseda helaro ia goada neganai, do ita laloparara inai tanobada ia henia gaudia be anina lasi. (Fili. 3:8) Iseda helaro dainai, do ita gari lasi bona do ita gini goada. Africa ai, Wallace bona Laurinda be unai idia hamomokania. Wiki toi lalonai, ta be ena sinana ia mase bona ma ta be ena tamana ia mase. COVID-19 gorerena dainai, idia hegeregere lasi edia famili idia itaia totona. Wallace ia gwau: “Toreisi lou ena helaro ese lau ia durua tanobada matamata ai do idia toreisi lou dina ginigunana ai edia toana do lau itaia lau laloa, to edia mauri dokona inai tanobada ai idia noho neganai lau laloa lasi. Mase dainai lau lalohisihisi neganai, unai helaro ese lau dekenai lalomaino ia henia.”

13. Dahaka ita karaia diba lauma helaga ita abia totona?

¹³ “Lauma helaga ena lahi umui habodoa lasi.” (1 Tes. 5:19) Paulo ese lauma helaga be lahi ida ia hahegeregerea. Dirava ena lauma helaga ita abia neganai, ita dekenai ura bona goada do ia henia kara maorona ita karaia totona bona Iehova totona mai goada ida do ita gaukara. (Roma 12:11) Dahaka ita karaia diba lauma helaga ita abia totona? Ita guriguri, Dirava ena Hereva ita stadilaia, bona ena lauma helaga amo ia hakaua oreana ita bamoa. Unai ita ia karaia neganai, “lauma helaga ena huahua” do ita hahedinaraia.​—Gal. 5:22, 23.

14. Dahaka gaudia ita dadaraia be namo Dirava ena lauma helaga ita abia noho totona? (Laulau itaia danu.)

¹⁴ Dirava ese ita dekenai lauma helaga ia henia murinai, namona be ita naria namonamo, ‘lauma helaga ena lahi ita habodoa lasi.’ Dirava ese ena lauma helaga be edia lalohadai bona  kara ia goeva noho taudia dekenai ia henia. To, ita dekenai lauma helaga do ia henia lasi bema iseda lalohadai bona kara be goeva lasi. (1 Tes. 4:7, 8) Danu, lauma helaga ita abia noho totona, namo lasi ita laloa “peroveta herevadia be anina lasi.” (1 Tes. 5:20) Inai siri ai, “peroveta herevadia” ena anina be Dirava ena lauma helaga ese ia havaraia herevadia, bona idia be Iehova ena dina laloa bada karana bona nega dokona be ia kahirakahira ia herevalaia danu. Namo lasi unai dina ita laloaboio, bona ita gwau Aramagedono be iseda nega ai do ia vara lasi. To, ita diba kahirakahira unai dina do ia ginidae dina unai dainai namona be ‘Dirava badinaia karadia ita hahedinaraia’ noho.​—2 Pet. 3:11, 12.

15. Edena dala ai infomeisen koikoidia bona demoni edia hereva ita dadaraia diba? (1 Tesalonika 5:21)

¹⁵ Daudau lasi, Dirava ena inai taudia ese “Maino bona noho namo!” hereva do idia gwauraia. (1 Tes. 5:3) Demoni edia hereva ese tanobada ibounai do ia hahonua bona momo do ia hakaua kerere. (Apok. 16:13, 14) To ita be edena bamona? Bema ‘gau ibounai ita tahua namonamo,’ ita do ia hakaua kerere lasi. (1 Tesalonika 5:21 duahia.) Grik herevana “tahua namonamo” be taunimanima ese golo eiava siliva idia sekea karana ia herevalaia. Unai dainai ita danu be ita kamonai o duahia gaudia ita sekea namonamo. Tesalonika taudia dekenai tahua namonamo karana be mai anina bada, bona hisihisi badana ia kahirakahira lalonai ita dekenai danu, unai be mai anina bada. Namo lasi haida ese idia gwauraia gaudia ita abiadae kava, to ita duahia eiava kamonai gaudia be Baibel bona Iehova ena orea ese idia gwauraia gaudia ida ita hahegeregerea namonamo. Unai bamona ita karaia neganai, demoni ena koikoi herevadia ese ita do ia hakaua kerere diba lasi.​—Aon. 14:15; 1 Tim. 4:1.

16. Iseda helaro be dahaka bona dahaka ita ura karaia?

¹⁶ Ita diba Dirava ena hesiai taudia be hisihisi badana ai do idia roho mauri. To ita ta ta be ita diba lasi kerukeru ita dekenai dahaka do ia vara. (Iam. 4:14) Ena be hisihisi badana ita hanaia o inai nega ai ita mase, to bema abidadama ai ita gini goada noho, ahuna namona do ita abia. Horoa taudia be guba ai Keriso ida do idia noho. Mamoe ma haida be tanobada paradaisona ai do idia noho. Namona be iseda helaro namona ita laloa noho bona Iehova ena dina totona ita hegaegae noho!