1. Salamo 18:46 ai, Davida ese Iehova be dahaka ida ia hahegeregerea?

 NEGA haida hekwakwanai badadia ita davaria neganai, unai ese iseda mauri ia ha-aukaia eiava ia haidaua momokani. Ita moale badina Iehova Dirava dekenai heduru ita abia diba! Atikol 25 amo ita diba Iehova be mauri Diravana bona ia noho hegaegae ita ia durua totona. Iena heduru ita abia neganai, ita abia dae momokani “Iehova be ia mauri noho!” (Salamo 18:46 duahia.) To, Davida be unai hereva ia gwauraia murinai, Dirava be mauri lasi gauna ta ida ia hahegeregerea. Davida ese Iehova ia gwauraia, “egu Nadi Badana.” Unai ena anina be dahaka?

2. Davida ese Iehova ia gwauraia “egu Nadi Badana,” unai amo dahaka ita dibaia?

² Inai atikol ai, ita ese Iehova idia gwauraia nadi badana bona unai hereva amo ia dekenai ita dibaia gauna do ita herevalaia. Danu ia be iseda nadi badana ai ita halaoa dalana do ita dibaia. Dokonai, Iehova ena kara ita tohotohoa dalana do ita herevalaia.

DAHAKA DAINAI IEHOVA BE NADI BADANA

3. Baibel ese nega momo, inai hereva “nadi badana” be edena bamona ia gaukaralaia? (Rau 1 itaia.)

³ Baibel ese Iehova be “nadi badana” ida ia hahegeregerea karana amo ita ia durua, ena kara badadia ita lalopararalaia totona. Nega momo Iehova ena hesiai taudia ese iena kara namodia dainai ia idia hanamoa neganai, Baibel ai ia idia gwauraia nadi badana. Deuteronomi 32:4 ese nega ginigunana Iehova ia gwauraia, “Nadi Badana.” Hana ena guriguri lalonai ia gwau, “edia dirava idauidau be iseda Dirava, Nadi Badana unai, bamona lasi.” (1 Sam. 2:2.) Habakuku ese Iehova ia gwauraia, “Egu Nadi.” (Hab. 1:12, ftn.) Bona Salamo 73 ia torea tauna ese Dirava ia gwauraia, “egu nadi badana.” (Sal. 73:26) Danu, Iehova be sibona ia gwauraia nadi badana. (Isa. 44:8) Iehova ese ia hahedinaraia  karadia toi bona ia be “iseda Nadi Badana” ai ita halaoa dalana do ita herevalaia.—Deu. 32:31.

4. Edena dala ai Iehova be heau mauri gabuna? (Salamo 94:22)

⁴ Iehova be iseda heau mauri gabuna. Lai gubana lalonai ta be kohua ta ese ia gimaia hegeregerena, nega aukadia lalonai Iehova ese ita ia gimaia. (Salamo 94:22 duahia.) Bona ita ia durua iseda hetura karana ia ida ita gimaia bona ita ia hadibaia hari ita davaria hisihisi be do idia noho hanaihanai lasi. Danu ia gwauhamata: Iseda maino bona noho namo idia hadikaia gaudia do ia haorea.—Ese. 34:25, 26.

5. Edena dala ai Iehova be iseda Heau Mauri Gabuna ai ia lao diba?

⁵ Iehova be iseda Heau Mauri Gabuna ai ita halaoa totona, dala ta be ia ita guriguri henia. Ita guriguri neganai, Iehova ese “Dirava ena maino” do ia henia, unai ese iseda kudouna bona lalona do ia gimaia. (Fili. 4:6, 7) Mani tadikaka Artem ena ekspiriens ita laloa, ia be ena abidadama dainai dibura ruma ai idia atoa. Dibura ruma ai ia noho lalonai, nega momo ofesa tauna ta ese ia nanadaia loulou, ia kara auka henia bona ia hagaria toho. Artem ia gwau, “Unai ofesa tauna ese lau ia nanadaia neganai, lau lalohekwarahi bada. . . . To hanaihanai Iehova lau guriguri henia. Ia lau noia lalomaino bona aonega ia henia totona. Unai dainai ena be ofesa tauna ese lau ia dagedage henia, to lau gari lasi. . . . Iehova ena heduru dainai, lau mamia lau be nadi amo idia karaia magu ena murinai lau gini bamona.”

6. Dahaka dainai Iehova dekenai ita tabekau diba? (Isaia 26:3, 4)

⁶ Iehova dekenai ita tabekau diba. Nadi badana be ia marere diba lasi hegeregerena, Iehova be ia noho hegaehegae ita ia durua totona. Iehova ita abidadama henia diba, badina ia be “noho hanaihanai Nadina.” (Isaia 26:3, 4 duahia.) Ia be ia mauri noho bona hanaihanai ena gwauhamata ia badinaia, iseda guriguri ia kamonai, bona ita do ia durua. Iehova dekenai ita tabekau diba, badina ia idia hesiai henia taudia ia rakatania diba lasi. (2 Sam. 22:26) Ita karaia gaudia do ia laloaboio lasi bona ita dekenai davana namona do ia henia.—Heb. 6:10; 11:6.

7. Iehova dekenai ita tabekau neganai, dahaka namo do ita davaria? (Laulau itaia danu.)

⁷ Iehova dekenai ita tabekau neganai, ia be iseda Nadi Badana ai ita halaoa. Ita abia dae nega aukadia lalonai ia ita badinaia neganai, namo do ita davaria. (Isa. 48:17, 18) Iehova ena heduru karana ita itaia neganai, ia dekenai iseda abidadama do ia goada. Bona do ita abia dae momokani ena be hahetoho badadia ita davaria, to Iehova ese ita do ia durua ita haheauka totona. Nega haida iseda hekwakwanai lalonai ta be ita ia durua lasi neganai, ita laloparara hanaihanai Iehova dekenai ita tabekau diba. Tadikaka Vladimir ia gwau, “Dibura ruma ai lau idia atoa neganai, egu hetura karana Iehova ida ia goada. Bona lau be sibona lau noho bona idia vara gaudia lau biagua diba lasi dainai, Iehova dekenai lau tabekau.”

8. (a) Dahaka dainai ita gwau diba Iehova ena kara be ia idau diba lasi? (b) Dirava be iseda Nadi Badana dainai, edena dala ai namo ita abia? (Salamo 62:6, 7)

 ⁸ Iehova ena kara ia haidaua diba lasi. Nadi badana eiava ororo be edia gabu ai idia noho hegeregerena, Iehova be ia idau diba lasi. Iena kara bona ena ura be idia idau diba lasi. (Mal. 3:6) Adamu bona Heva be Iehova idia gwau-edeede henia neganai, taunimanima totona ena ura ia haidaua lasi. Danu, aposetolo Paulo ia gwau Iehova be “sibona ena hereva ia hakoikoia diba lasi.” (2 Tim. 2:13) Unai ena anina be ena be dahaka ia vara eiava haida be dahaka idia karaia, to Iehova ena kara, ura, bona taravatu be do ia haidaua lasi. Iehova ena kara be ia idau diba lasi dainai, ita diba nega aukadia lalonai ita do ia durua bona ena gwauhamata vaira nega totona do ia hagugurua.—Salamo 62:6, 7 duahia.

9. Tatyana ena ekspiriens amo dahaka oi dibaia?

⁹ Bema Iehova ena ura taunimanima bona tanobada totona ita laloa dobu, unai ese ita do ia durua ia ita abidadama henia bona iseda Nadi Badana ai ita halaoa. Danu, unai ese ita do ia durua hahetoho negadiai ita gari lasi bona ia ita badinaia noho. (Sal. 16:8) Taihu ta ladana, Tatyana dekenai unai ia vara, iena abidadama dainai ena ruma ai idia hadiburaia. Ia gwau, “Lau be sibona lau noho. Matamanai unai be ia auka bona hanaihanai lau lalohisihisi.” Bena Iehova bona ena ura ia laloa dobu matamaia bona ia laloparara unai hekwakwanai ia haheaukalaia be mai anina bada. Unai ese ia hagoadaia ia gari lasi bona Iehova ia badinaia noho. Ma ia gwau: “Ia vara gauna lau lalopararalaia neganai, lau diba Iehova totona egu mauri dalana ia idau. Unai dainai sibona lau laloa momo lasi.”

10. Edena dala ai Iehova be iseda Nadi Badana ai ita halaoa diba?

¹⁰ Kahirakahira, nega aukadia do ita davaria bona unai nega lalonai namona be Iehova dekenai ita tabekau. Hari be nega namona Iehova dekenai iseda abidadama ita hagoadaia, bona ita abia dae ita do ia durua, ia ita badinaia totona. Edena dala ai unai ita karaia diba? Baibel sivaraidia bona Iehova ena Witnes taudia edia ekspiriens ita duahia. Danu Dirava ese ena hesiai taudia ia durua dalana oi itaia bona unai sivarai oi laloa dobu. Unai bamona oi karaia neganai, Iehova be emu Nadi Badana ai oi halaoa diba.

IEHOVA ENA KARA TOHOTOHOA

11. Dahaka dainai Iehova ena kara ita tohotohoa be namo? (Maua ladana “ Matamata Tadikaka Edia Tahua Gauna Ta” itaia danu.)

¹¹ Inai stadi ai ita itaia Iehova ia hamomokania ia be nadi badana bamona. Hari, ena kara namodia ita tohotohoa dalana do ita herevalaia. Bema ita gaukara goada bona Iehova ena kara ita tohotohoa, iseda tadikaka bona taihu ita hagoadaia diba. Hegeregere, Iesu ese Simona dekenai inai ladana Kepa ( eiava “Petero”) ia henia, ena anina be “Nadi Ta.” (Ioa. 1:42) Unai ese ia hahedinaraia Petero be kongrigeisen lalonai ma haida do ia hagoadaia. Baibel ese elda taudia ia herevalaia neganai, ia  gwau idia be “nadi badana ena ikerukeru bamona.” Unai ese ia hahedinaraia idia be kongrigeisen ai idia noho taudia idia gimaia. (Isa. 32:2) To ita ibounai be ta ta do ita hagoadaia, bema ita ese Iehova ena kara namodia ita tohotohoa.—Efe. 5:1.

12. Edena dala ai nega aukadia lalonai ma haida ita durua diba?

¹² Nega aukadia ai emu tadikaka taihu oi gimaia. Nega haida disasta, dagedage eiava tuari idia vara dainai, tadikaka taihu be edia noho gabuna amo idia heau neganai, idia ita boiria diba iseda ruma ai idia noho totona. “Dina gabedia ai” mauri ia auka ia lao noho dainai, dala momo do ia kehoa ta ta ita durua totona. (2 Tim. 3:1) Danu, idia ita hagoadaia bona idia dekenai lalokau ita hahedinaraia diba. Unai ita karaia dalana ta be Kingdom Hall dekenai idia mai neganai, idia ita welkam henia. Ita ura do idia mamia kongrigeisen lalonai lalokau ia noho bona ia be goada abia gabuna. Hari inai negai, taunimanima be ta ta idia kara namo henia lasi. Unai dainai iseda tadikaka taihu be hebou totona idia mai neganai, ita ura idia ita hagoadaia bona ita hahedinaraia idia ita lalokau henia.

13. Edena dala ai elda taudia be ma haida idia hagoadaia diba? (Laulau itaia danu.)

¹³ Elda taudia ese hekwakwanai idia davaria tadikaka bona taihu idia durua diba. Disasta eiava medikol heduru totona, elda taudia be karaharaga dala idia tahua heduru idia henia totona. Danu, Baibel amo hakaua herevadia idia henia bona idia hagoadaia. Tadikaka bona taihu be elda ta idia hereva henia diba, bema idia mamia idia do ia hereva henia namonamo, mai ura ida idia do ia kamonai henia bona edia hemami ia lalopararalaia. Unai bamona karadia ese ma haida ia durua bona idia mamia ma ta be idia ia laloa bada, unai dainai elda ta be Baibel amo hakaua herevadia ia  henia neganai, do ia auka lasi idia badinaia totona.—1 Tes. 2:7, 8, 11.

14. Edena dala ai ita hahedinaraia ma haida be ita dekenai idia tabekau diba?

¹⁴ Namona be oi hahedinaraia haida be oi dekenai idia tabekau diba. Inai nega aukadia ai ita ura ma haida idia diba idia do ita durua. (Aon. 17:17) Dahaka do oi karaia unai amo haida be oi dekenai idia tabekau diba? Ita gaukara goada nega ibounai Iehova ita tohotohoa totona, hegeregere ma haida dekenai iseda gwauhamata ita badinaia bona nega korikori ai gau ibounai ita karaia. (Mat. 5:37) Eiava bema ita diba ta be heduru ia ura, namona be ita durua. Danu, kongrigeisen ai asainmen ta ita abia neganai, namona be ia noho hakaua dalana ita badinaia bona iseda asainmen ita karaia.

15. Edena dala ai kongrigeisen taudia be namo do idia davaria, bema elda taudia dekenai idia tabekau?

¹⁵ Edena dala ai kongrigeisen taudia be namo do idia davaria, bema elda taudia dekenai idia tabekau? Bema tadikaka taihu idia diba heduru totona elda taudia idia rini henia diba, unai ese idia do ia durua idia lalohekwarahi lasi totona. Danu, tadikaka taihu do idia mamia elda taudia ese idia lalokau henia bema mai ura ida heduru idia henia. Bona elda taudia be Baibel bona iseda pablikeisen amo sisiba idia henia  bona sibona edia lalohadai idia gwauraia lasi neganai, tadikaka taihu be idia dekenai do idia tabekau. Danu, tadikaka taihu be elda taudia do idia trast bema edia hunia herevadia be ma haida dekenai idia gwauraia lasi bona edia gwauhamata idia badinaia.

16. Iehova ese ia gwauraia gaudia ita karaia neganai, edena dala ai unai ese ita bona haida do ia durua?

¹⁶ Hanaihanai Iehova ese ia ura henia gaudia oi karaia. Bema gau ibounai lalonai Iehova ita badinaia bona Baibel ena hakaua hereva hegeregerena abia hidi ita karaia, haida dekenai haheitalai namona do ita hahedinaraia. Dirava ena hereva ita stadilaia bona iseda abidadama ita hagoadaia neganai, Ia bona ena taravatu do ita badinaia. Danu hahediba hereva koikoidia bona tanobada ena lalohadai ese ita do ia hakaua kerere lasi. (Efe. 4:14; Iam. 1:6-8) Iehova bona ena gwauhamata ita abidadama henia dainai, ena be sivarai dikadia ita kamonai, to do ita gari lasi. (Sal. 112:7, 8) Danu, do ita hegeregere hekwakwanai idia davaria taudia ita durua totona.—1 Tes. 3:2, 3.

17. Dahaka ese elda taudia ia durua haheitalai namona idia hahedinaraia totona?

¹⁷ Namona be elda taudia ese edia kara idia biagua, idia laloa namonamo, dala maorona idia badinaia bona idia laloa maoromaoro. Inai tatau be ma haida idia durua Iehova dekenai edia abidadama idia hagoadaia bona kongrigeisen idia durua ‘hereva momokani idia dogoatao auka’ totona. (Tito 1:9; 1 Tim. 3:1-3) Elda taudia be edia haheitalai bona mamoe vadivadi karana amo pablisa idia durua, hanaihanai hebou idia lao, haroro gaukara, bona sibona edia stadi idia karaia. Tadikaka bona taihu be hekwakwanai idia davaria neganai, elda taudia ese idia hadibaia Iehova dekenai do idia tabekau bona ena gwauhamata namodia do idia laloa.

18. Dahaka dainai ita ura Iehova ita hanamoa bona ia kahirakahira ita noho? (Maua ladana “ Iehova Kahirakahira ita Lao Dalana” itaia danu.)

¹⁸ Iehova ena kara namodia ita herevalaia murinai, king Davida bamona do ita gwau: “Iehova, egu Nadi Badana lau hanamoa.” (Sal. 144:1) Hanaihanai Iehova dekenai ita tabekau diba. Ena be iseda mauri lagani be ia bada ia lao, to ita abia dae momokani Iehova be ita do ia durua, ia kahirakahira ita noho totona. Bona do ita gwau: “Ia be egu Nadi Badana.”—Sal. 92:14, 15.