Lau be December 22, 1929 ai Belgian Ardennes, Bastogne badinai ia noho hanua maragina, Noville ai, lau vara, unuseniai fam ibounai be 9 idia noho. Lau tubu daekau lalonai, egu tama sina ida fam dekenai gau momo ai moalelaia. Lau bona egu tadina Raymond, be dina ta ta ai, boromakau edia milika ai gigia bona aniani geia totona ai heduru. Emai hanua ai, ibounai idia gaukara hebou ta ta idia durua totona.

Egu tama sina, Emile bona Alice, be Katolik goadadia. Idia be Sunday ibounai dubu dekenai idia lao. To, lagani 1939 bamona ai, England amo painia haida be emai hanua dekenai idia mai bona dala idia karaia mail amo egu tamana dekenai Consolation magasin be hua ta ta ai do idia siaia (hari ita gwauraia Noga!). Egu tamana be magasin amo ia duahia gaudia dainai, karaharaga ia laloparara, unai be hereva momokani, bona unai ese ia hagoadaia Baibel ia duahia matamaia totona. Dubu lao karana ia hadokoa neganai, emai neiba, idia be emai turadia, be ai idia dagedage henia matamaia. Egu tamana idia doria Katolik tomadiho do ia rakatania lasi, bona nega momo unai idia herevalaia.

Lau itaia egu tamana ia lalohekwarahi neganai, lau lalohisihisi bada. Unai dainai inai sivarai ena matamanai lau gwau bamona, guriguri amo Dirava lau noia egu tamana ia durua totona. Lau moale badina metairametaira emai neiba ese egu tamana doria karana idia hadokoa. Unai amo lau abia dae Iehova be “guriguri kamonai Diravana.”

May 10, 1940 ai, Nazi Germany ese Belgium idia tuari henia, unai dainai taunimanima momo be unai tano idia rakatania. Emai famili be France ena saut kahana dekenai idia heau lao. Ai lao noho lalonai,  ai itaia German ena ami bona French ena ami be ta ta idia tuari henia.

Gabeai, emai fam dekenai ai giroa lou neganai, ai itaia emai kohu momo idia henaoa. Emai sisia ladana, Bobbie sibona ia noho, bona ai ia welkam henia. Idia vara gaudia dainai lau laloa, ‘Dahaka dainai tuari bona hisihisi idia vara?’

Unai nega lalonai, Tadikaka Emile Schrantz, a ia be painia bona elda ta, ena vadivadi karana ese ai ia hagoadaia bada. Ia ese Baibel amo hisihisi idia vara ena badina ia herevalaia bona egu daradara gaudia ma haida ia haerelaia. Iehova ida egu hetura karana lau hagoadaia bona lau abia dae ia be lalokau Diravana.

Ena be tuari ia do ore lasi, to emai famili be Witnes ma haida ida nega momo idia hedavari bona idia herevahereva. August 1943 ai, Tadikaka José-Nicolas Minet be emai fam dekenai ia vadivadi bona tok ta ia henia. Ia henanadai, “Daika ia ura bapatiso?” Lau bona egu tamana, be imana ai abia isi. Bona emai fam badinai ia noho sinavai maragina dekenai ai bapatiso.

December 1944 ai, German ena ami ese western Europe ai Tanobada Tuarina Iharuana ena tuari ginigabena idia hamatamaia bona ena ladana idia gwauraia Battle of the Bulge. Ai be tuari ia vara noho gabuna kahirakahira ai noho, bona hua ta bamona emai ruma henunai, daiutu ta lalonai ai noho. Nega ta animal ubua totona lau raka-lasi neganai, bomu ia pou bona fam ia hadikaia. Bona animal idia naria gabuna amo America ena ami ta be lau dekenai ia boiboi, “Hekure diho!” Lau heau bona ia badinai lau hekure, bona ena kwara gauna ia abia bona egu kwarana dekenai ia atoa, lau ia gimaia totona.

Tuari murinai, Liège ai ia noho kongrigeisen ta ena tadikaka taihu ida nega momo ai herevahereva, unai be not kahana amo ena daudau be kilomita 90 bamona. Gabeai, Bastogne ai stadi grup maragina ta ai hamatamaia. Bena lau be tax administration dekenai lau gaukara matamaia bona unai ese dala ia kehoa loea kosi lau karaia totona. Gabeai, unai tano ena gavamani ena ofesi ta dekenai lau gaukara. Lagani 1951 ai, Bastogne dekenai sekit hebouhebou maragina ta ai hegaegaelaia.  Bona taunimanima handred bamona idia mai, idia ta be painia taihu goadana ta ladana, Elly Reuter. Ia be unai hebou totona, basikele amo kilomita 50 bamona ia heau. Daudau lasi murinai ta ta ai lalokau henia dainai ai maoheni. Elly idia boiria United States dekenai Gilead Sikuli ia lao totona. To, hedikwota dekenai revareva ia torea, unai boiboi herevana ia dadaraia ena badina ia herevalaia totona. Tadikaka Knorr be unai negai Iehova ena taunimanima ia hakaua, bona mai hemataurai ida ena revareva ia haloua, ia gwau, reana nega ta Elly be ena adavana ida Gilead Sikuli dekenai do idia lao. February 1953, ai headava.

Unai lagani tamona ai, lau bona Elly be New York ena Yankee Stadium ai, New World Society Assembly totona ai lao. Unuseniai, tadikaka ta ida lau hedavari bona ia ura moni gaukara namona ta ia henia bona lau ia boiria United States dekenai do lau noho totona. Lau bona Elly be Iehova dekenai unai ai gurigurilaia murinai, abia hidi ai karaia unai noinoi do ai dadaraia. Bena Belgium dekenai ai giroa, Bastogne ena grup maragina ena pablisa 10 bamona ai durua totona. Unai vaira laganina ai, Elly ia rogorogo bona emai natuna mero ia havaraia, ena ladana be Serge, unai dainai ai moale bada. Madi, hua 7 murinai, Serge ia gorere bona ia mase. Iehova dekenai emai lalohisihisi ai gurigurilaia, bona toreisi lou helarona ese ai ia hagoadaia bada.

October 1961 ai, pat-taim moni gaukara lau davaria, unai amo painia gaukara lau karaia diba. To, unai dina tamona ai, Belgium brens ia naria tadikaka ese lau ia rini henia. Bona ia henanadai bema lau hegeregere, sekit gaukara do lau hamatamaia diba (hari ita gwauraia sekit naria gaukarana). Lau henanadai, “Painia gaukara do ai karaia guna bona unai noinoi do ai abia dae diba, a?” Bona tadikaka ia gwau unai bamona ai karaia diba. Bona hua 8 lalonai painia gaukara ai karaia murinai, September 1962 ai sekit gaukara ai hamatamaia.

Sekit gaukara ai karaia bona lagani rua murinai, ai idia boiria Brussels ena Betele dekenai ai gaukara totona. October 1964 ai, hesiai gaukara ai hamatamaia. Unai asainmen matamata lalonai, hahenamo momo ai davaria. Lagani 1965 ai, Tadikaka Knorr be emai Betele dekenai ia vadivadi, bona lau hoa badina lau idia abia hidi brens lau naria totona. Gabeai, lau bona Elly idia boiria Gilead Sikuli ena klas 41 dekenai ai lao totona. Lagani 13 gunanai, Tadikaka Knorr ese ia gwauraia herevadia be idia vara momokani! Ai gradueit murinai, Belgium Betele dekenai ai giroa lou.

Lau abia hahenamo ta be guna loea kosi amo lau dibaia gaudia lau gaukaralaia, Iehova ena taunimanima edia tomadiho ena maoro lau gimaia totona, unai be Europe bona tano ma haida dekenai danu. (Fili. 1:7) Unai dainai, iseda gaukara idia taravatua tanodia 55 mai kahana amo gavamani taudia ida lau herevahereva. Unai gavamani taudia dekenai lau gwau lasi lau be mai egu diba loea gaukara dekenai, to idia lau hamaoroa, lau be “Dirava  ena hesiai tauna ta.” Hanaihanai Iehova lau noia lau ia hakaua totona, badina lau diba “King ena [eiava diadi ena] lalona be ranu bamona Iehova ena imana ai. Dirava ese unai ranu be ia ura gabudia dekenai ia siaia lao.”—Aon. 21:1.

Europe ena gavamani tauna ta ida lau herevahereva negana lau laloatao. Lau noinoi loulou ia do lau hereva henia totona, dokonai egu noinoi ia abia dae. Ia gwau, “Oi dekenai miniti faiv lau henia, bona miniti ta do ia hanaia lasi.” Egu kwarana lau atoa diho bona lau guriguri matamaia. Unai tauna be mai gari ida ia henanadai dahaka lau karaia noho. Egu kwarana lau abia isi bona lau gwau, “Dirava lau tanikiu henia badina oi be iena hesiai tauna ta.” Ia henanadai, “Emu hereva ena anina be dahaka?” Ia dekenai Roma 13:4 lau hahedinaraia. Ia be Protestan ta, bona Baibel ia matauraia, unai dainai ia ura diba ma haida ia abia. Dahaka ia vara? Lau dekenai miniti 30 ia henia, bona emai herevahereva karana ai moalelaia. Danu, ia gwau ia be Iehova ena Witnes taudia edia gaukara ia matauraia.

Lagani momo lalonai, Europe dekenai Iehova ena taunimanima be edia maoro totona idia kota. Hegeregere, Keristani gini siri karana, daika ese natudia do ia abia, takisi davana henia karana, bona gau ma haida danu. Lau itaia Iehova ese unai negadia lalonai, ai ia durua dalana bona kota dekenai ai kwalimu karana be hahenamo badana. Iehova ena Witnes taudia ese European Court of Human Rights lalonai keis 140 mai kahana dekenai idia kwalimu!

Lagani 1990 lalodiai, hedikwota amo Tadikaka Philip Brumley, bona Italy amo Tadikaka Valter Farneti ida lau gaukara hebou, bona Cuba ai iseda gaukara idia taravatua dainai, iseda tadikaka taihu edia maoro totona heduru ai henia. Belgium ai Cuba ena embasi dekenai revareva lau torea, bena gavamani tauna ta ida ai hedavari bona emai noinoi ai herevalaia. Ai herevahereva ena nega ginigunana ai, iseda gaukara idia taravatua ena badina ai hamaoromaoroa lasi.

Iehova ena hakaua dalana totona ai guriguri murinai, ai noinoi, bona gwau-maoro ai abia Cuba dekenai Baibel 5,000 do ai siaia totona. Unai Baibel idia ginidae bona tadikaka taihu dekenai idia henia, unai dainai ai abia dae momokani Iehova be emai hekwarahi ia hanamoa. Bena ai noinoi lou Baibel ibounai 27,500 ai siaia totona. Gavamani ese emai noinoi idia abia dae. Cuba dekenai tadikaka taihu ai durua bona ta ta be Baibel ena kopi idia abia dainai, lau moale bada.

 Cuba dekenai nega momo lau lao iseda gaukara idia taravatua ena maoro ai durua totona. Unai negadiai, lau ese gavamani taudia momo lau dibaia.

Lagani 1994 ai Rwanda dekenai dagedage karana ia bada neganai, taunimanima 1,000,000 mai kahana idia hamasea. Madi, iseda tadikaka bona taihu haida idia hamasea danu. Karaharaga, tadikaka haida idia siaia, unuseniai idia noho tadikaka bona taihu idia hagoadaia bona heduru gaudia idia henia totona.

Siti badana, Kigali ai, tadikaka idia ginidae neganai, ai itaia trensleisen ofesi ena haba bona pablikeisen idia noho gabuna ai, bulet ena maka momo idia noho. Ai kamonai iseda tadikaka taihu haida be kaia amo idia hamasea. To danu ai kamonai iseda tadikaka taihu be ta ta dekenai lalokau idia hahedinaraia. Hegeregere, Tutsi tadikaka ta ai hedavari henia, ia be dina 28 lalonai tano ena matu ta lalonai ia hunia, bona Hutu Witnes ruma bese ta ese ia idia gimaia. Kigali ai, hebou ta lalonai tadikaka taihu 900 mai kahana ai hagoadaia.

Boda ai hanaia bona ai lao Zaire dekenai (hari idia gwauraia Democratic Republic of the Congo) unai amo Rwanda amo idia mai Witnes taudia momo ai tahua totona, idia be Goma ena siti badinai refiuji kamepa dekenai idia noho. Idia ai davaria diba lasi dainai, guriguri amo Iehova ai noia ai do ia hakaua idia ai davaria totona. Bena tau ta be ai dekenai ia raka mai, bona ai nanadaia bema Iehova ena Witnes ta ia diba. Ia gwau, “Oibe, lau be Witnes ta. Relief committee dekenai umui lau hakaua lao diba.” Unai komiti ida ai hebou murinai, refiuji taudia 1,600 bamona ida ai hedavari bona idia ai hagoadaia. Danu Hakaua Oreana ena revareva ta be idia dekenai ai duahia. Bona inai kahana ese tadikaka taihu ia hagoadaia bada: “Hanaihanai emai guriguri lalonai umui ai laloa. Ai diba Iehova ese umui do ia rakatania lasi.” Hakaua Oreana ese ia gwauraia herevadia be idia vara momokani. Hari, Rwanda dekenai Witnes taudia 30,000 mai kahana be mai moale ida Iehova idia hesiai henia noho!

Lau bona Elly emai headava laganidia be kahirakahira 58 neganai, 2011 ai egu adavana lalokauna ia mase. Guriguri amo Iehova dekenai egu lalohisihisi lau gwauraia neganai, lau ia hagoadaia. Danu, egu dekena taudia dekenai Basileia ena sivarai namona lau harorolaia karana amo goada lau abia.

Ena be egu mauri lagani be 90 mai kahana, to wiki ta ta ai haroro gaukara lau karaia. Danu lau moale badina Belgium brens ai Legal Department lau durua, unai amo lau dibaia gaudia be ma haida lau hadibaia, bona Betele dekenai matamata taudia lau durua.

Lagani 84 gunanai, Iehova dekenai egu guriguri ginigunana lau gwauraia. Unai nega amo egu mauri ai Iehova kahirakahira lao karana lau goadalaia noho. Lau moale bada, badina egu mauri lalonai Iehova ese egu guriguri ibounai ia haerelaia.—Sal. 66:19. b