Duahia Taudia Edia Henanadai
Salamo 12:7 ai, inai hereva “oi ese idia do oi gimaia” be “idia hahisia taudia” (siri 5) eiava “Iehova ena hereva” (siri 6) ia herevalaia, a?
Unai siri ai ia noho hereva be taunimanima ia herevalaia.
Salamo 12:1-4 ia gwau, “taunimanima huanai abidadama tauna ta ia noho lasi.” Bena Salamo 12:5-7 ai, ia gwau:
“Iehova ia gwau: ‘Haida ese idia hahisia taudia
Bona idia taitai noho ogogami taudia dainai,
Lau ese kara ta do lau karaia.
Lau ese ogogami taudia be dagedage taudia amo do lau hamauria.’
Iehova ena hereva be goeva momokani,
Iena hereva be siliva bamona, lahi ia araia noho gabuna lalonai nega 7 idia hagoevaia siliva unai.
Iehova e, oi ese idia do oi gimaia,
Oi ese inai uru taudia amo idia ta ta do oi gimaia ela bona hanaihanai.”
Siri 5 be Dirava ese “idia hisihisi taudia” dekenai do ia karaia gauna ia herevalaia. Ia ese idia do ia hamauria.
Danu siri 6 ia gwau, “Iehova ena hereva be goeva momokani,” ‘idia hagoevaia siliva bamona.’ Abidadama Keristani taudia ese unai hereva idia abia dae momokani.—Sal. 18:30; 119:140.
Mani inai siri Salamo 12:7 ita laloa, ia gwau: “Iehova e, oi ese idia do oi gimaia, oi ese inai uru taudia amo idia ta ta do oi gimaia ela bona hanaihanai.” Inai hereva “idia” be dahaka ia herevalaia?
Siri 7 ese siri 6 ena hereva ia badinaia, unai be “Iehova ena hereva” ia herevalaia. Unai dainai, reana haida do idia laloa inai hereva “idia” be Dirava ena hereva ia gwauraia. Bona ita diba Dirava ese Baibel ia gimaia, ena be dagedage taudia ese dala idauidau ai, idia ura unai buka idia taravatua bona hadikaia.—Isa. 40:8; 1 Pet. 1:25.
To, siri 5 ese ia herevalaia taudia be Dirava ese ia gimaia danu. Iehova ese idaunegai bona hari danu, idia “hisihisi taudia” bona “dagedage idia davaria” taudia ia durua bona hamauria.—Iobu 36:15; Sal. 6:4; 31:1, 2; 54:7; 145:20.
Unai dainai siri 7 ai inai hereva, “idia” be dahaka ia herevalaia?
Unai salamo ai, inai hereva “idia,” be taunimanima ia herevalaia.
Salamo 12 ena hamatamaia herevadia ai, Davida ese Iehova ena abidadama taudia ia herevalaia, reana kara dika taudia ese idia totona koikoi herevadia idia gwauraia. Danu, Iehova ese gau dikadia idia gwauraia taudia dekenai kara ta do ia karaia. Unai salamo ese ita ia hagoadaia, ita abia dae diba Dirava be ena taunimanima totona kara ta do ia karaia, badina ena hereva be goeva momokani.
Unai dainai siri 7 ia gwau, Iehova ese “idia” do ia gimaia, unai be kara dika taudia ese idia hahisia taudia.
Inai hereva “idia” be inai siri ai Heberu Toretoredia edia kopi haida dekenai idia gaukaralaia. Greek Septuagint ese inai hereva “ita” be siri 7 ai, nega rua ia gaukaralaia, bona unai ese idia hisihisi bona dagedage idia davaria abidadama taudia ia herevalaia. Dokonai, siri 7 ia gwau “idia ta ta” eiava abidadama taudia be “inai uru taudia,” eiava koikoi bona kara dika idia abia dae taudia amo do ia gimaia. (Sal. 12:7, 8) Aramia gado ai idia hahanaia Heberu Toretoredia dekenai, siri 7 ena hamatamaia herevadia ese inai hereva “idia” ia gaukaralaia danu. Ia gwau: “Oi, LOHIABADA E, oi ese kara maoromaoro taudia do oi gimaia, oi ese inai kara dika taudia edia uru amo idia do oi gimaia ela bona hanaihanai.” Unai hereva ese idia hamomokania Salamo 12:7 be Dirava ena hereva ia herevalaia lasi.
Unai badina dainai, inai siri ese ‘abidadama taudia’ dekenai helaro ia henia, idia diba Dirava be kara ta do ia karaia.
