1, 2. (a) Edena hadibaia hereva dainai taunimanima momo edia mauri idia haboioa lasi? (Laulau ginigunana itaia.) (b) Dirava ena taunimanima ese edena hadibaia hereva idia abia dainai idia mauri diba?

“STOPU, ITAIA, KAMONAI.” Unai hereva dainai momo ese edia mauri idia haboioa lasi. Lagani 100 mai kahana gunanai, North America dekenai unai hereva idia torea saini badadia be trein idia heau gabuna amo idia hanaia motuka ena dala badinai idia atoa. Dahaka dainai? Unai amo motuka be nega kererena ai idia hanaia lasi bena ia heau haraga trein ese ia botaia. Oibe, unai idia badinaia neganai taunimanima momo idia mauri.

² Iehova be unai bamona saini ia haginidia lasi, to unai ia hereaia gauna ta ia karaia. Ia be hegeregere, ena taunimanima edia vairanai ia gini, bona mauri hanaihanai ia lao henia dalana ia hadibaia unai amo dika idia davaria lasi. To ia be unai sibona ia karaia lasi, lalokau mamoe naria tauna ta bamona, iena mamoe dekenai dala maorona bona hadibaia hereva ia henia unai amo mase ia lao henia dalana do idia dadaraia.—Isaia 30:21 duahia.

3. Edena dala ai taunimanima ibounai be mase dalana ai idia noho?

³ Baibel ese ia hahedinaraia, Iehova ese hahegani eiava hadibaia herevadia be taunimanima dekenai ia henia. Hegeregere, Eden umana dekenai, Iehova ese taunimanima be mai moale ida mauri hanaihanai idia abia totona hahegani haida ia henia. (Gen. 2:15-17) Bema Adamu bona Heva ese iena dala idia badinaia, dika bada—hisihisi, mase, bona helaro lasi maurina—do idia davaria lasi. To Heva be taunimanima ese idia laloa bada lasi animal ta ena hereva ia kamonai. Bena Adamu ese ena adavana, ia mase diba hahinena, ena hereva ia kamonai. Idia ruaosi ese edia lalokau Tamana ena hakaua dalana idia dadaraia. Unai dainai, taunimanima ibounai be mase dalana ai idia noho.

4. (a) Dahaka dainai Abata murinai Dirava ese taravatu ma haida ia henia? (b) Edena dala ai mauri dalana ia idau karana ese Dirava ena lalohadai ia hahedinaraia?

⁴ Noa bona ena ruma bese be Dirava ena hahegani dainai idia mauri. Abata murinai, Iehova ese rara totona taravatu ia henia. Dahaka dainai unai bamona ia karaia? Badina edia mauri dalana ia idau. Iehova ese vamu be taunimanima dekenai ia henia idia ania totona. Unai dainai taravatu matamatadia idia abia: “Vamu mai rarana danu be mai taravatu, badina be rara be mauri ena badina.” (Gen. 9:1-4) Unai ese Dirava ena lalohadai ia hahedinaraia goevagoeva, mauri be ia ena. Ia be Havaraia Tauna bona Mauri Henia Tauna dainai, ia be mai ena maoro ita dekenai taravatu ia henia. Hegeregere, ia gwau taunimanima ese edia tadikaka idia alaia lasi. Dirava dekenai mauri bona rara be helaga, bona ia ese mauri eiava rara ia matauraia lasi tauna ena davana do ia henia.—Gen. 9:5, 6.

5. Dahaka do ita herevalaia, bona dahaka dainai?

⁵ Mani lagani handred momo lalonai Dirava be taravatu ia henia karana ena haheitalai haida ita itaia. Unai ese ita do ia durua bena eda lalona do ita hadaia Dirava ese tanobada matamatana dekenai ita ia hakaua lao dalana ita badinaia totona.

6. Dahaka dainai Israela taudia be Mose amo taravatu idia abia, bona dahaka idia karaia be namo?

⁶ Mose ena negai, kara namodia bona tomadiho dalana ai Dirava amo taravatu maorodia idia abia be namo. Dahaka dainai? Badina edia mauri dalana be ma ia idau. Lagani 200 mai kahana lalonai, Iakobo ena bese be Aigupito edia lohia henunai idia noho, bona unai gabu be mase taudia bona kaivakuku tomadiho henia karadia, bona Dirava matauraia lasi tomadiho karadia amo ia honu. Dirava ena taunimanima be Aigupito edia lohia dikana amo idia roho mauri neganai, Dirava amo hakaua dala matamatadia idia abia be namo. Dirava ena taunimanima be igui hesiai taudia bamona do idia noho lasi, to Iehova ena Taravatu henunai ura kwalimu taudia bamona do idia noho. Buka haida lalonai Heberu herevana ta idia hahanaia “taravatu” ena anina haida be “gunalaia, hakaua, bona hadibaia karana.” Mose ena Taravatu be magu goadana ta bamona Israela taudia be unai nega ai idia noho besedia edia matabodaga bona tomadiho koikoi karadia amo ia gimaia. Israela taudia ese Dirava idia kamonai henia neganai, hahenamo idia abia. Ia idia kamonai henia lasi neganai, hekwakwanai badadia idia davaria.—Deuteronomi 28: 1, 2, 15 duahia.

7. (a) Dahaka dainai Iehova ese taravatu be ena taunimanima dekenai ia henia? (b) Edena dala ai Israela taudia dekenai Taravatu be naria tauna ta bamona?

⁷ Badina ma ta dainai Dirava ese hakaua dala matamatadia ia henia. Taravatu ese mai anina bada gauna ta, Dirava ena ura dekenai  ia hahedinaraia. Unai be Mesia eiava Iesu Keriso ena mai. Taravatu ese ia hahedinaraia goevagoeva Israela taudia be kara dika taudia. Danu idia ia hadibaia mauri davana, kara dika ia koua diba boubou gauna goevana idia abia be namo. (Gal. 3:19; Heb. 10:1-10) Bona Taravatu ese Mesia do ia vara besena ia gimaia bona Mesia ia vara neganai do ia hahedinaraia. Oibe, taravatu be hadibaia tauna, o “hakaua tauna” ta bamona, Israela taudia be Keriso dekenai ia hakaua lao.—Gal. 3:23, 24.

8. Dahaka dainai Mose ena Taravatu ena hakaua herevadia ita badinaia be namo?

⁸ Ita be Keristani taudia dainai, Israela taudia dekenai ia henia Taravatuna amo namo ita abia diba. Edena dala ai? Ita ese Taravatu ena hakaua herevadia ita laloa dobu neganai. Ena be unai taravatu henunai ita noho lasi, to ia be mai ena heduru iseda dina ta ta mauri lalonai bona ita ia hakaua iseda helaga Diravana, Iehova, ita tomadiho henia totona. Ia ese Baibel lalonai unai taravatu ia atoa, unai amo diba ita abia, ena hakaua herevadia ese ita do ia hakaua, bona Keristani taudia ese idia badinaia kara namodia ita laloa bada totona. Iesu ia gwau: “Umui kamonai vadaeni idaunegai idia gwau: ‘Oi heudahanai lasi.’ To umui lau hamaoroa, bema tau ta be hahine ta ia raraia ela bona ia ura henia dikadika, unai tauna be iena kudouna dekenai ia heudahanai vadaeni.” Unai dainai, heudahanai karana ita dadaraia sibona lasi, to matabodaga uradia ita dadaraia danu.—Mat. 5:27, 28.

9. Dahaka ia idau dainai Dirava ese ena hakaua dalana ia haidaua?

⁹ Iesu be Mesia ai ia lao neganai, Iehova ese ena hakaua dalana ia haidaua bona ena ura ma haida ia hahedinaraia. Unai ia vara badina mauri dalana be ma ia idau. Lagani 33 C.E. ai, Iehova ese Israela taudia korikori ia dadaraia bona Keristani kongrigeisen ia abia dae.

10. Dahaka dainai taravatu matamata be Keristani kongrigeisen dekenai ia henia, bona edena dala ai ia be Israela taudia dekenai ia henia taravatu amo ia idau?

¹⁰ Keristani ginigunadia edia negai, Dirava ena taunimanima be Keristani kongrigeisen ai idia vareai neganai, edia tomadiho bona kara dekenai hadibaia hereva matamata idia abia. Unai mai abidadama danu Dirava idia hesiai henia taudia be taravatu matamata ena kontraka henunai idia noho. Mose ena Taravatu be bese tamona, Israela bese korikorina, dekenai ia henia. To, lauma Israela dekenai tano idauidau bona mauri dala idauidau taudia idia noho. Momokani, “Dirava be taunimanima edia toana ia laloa lasi, to bese ibounai lalonai ia idia gari henia bona kara maoromaoro idia karaia taudia be ia ese ia abia dae.” (Kara 10:34, 35) Mose ena Taravatu, nadi ai idia torea gauna, be Gwauhamata Tanona ai Israela taudia korikori ia naria. To, lauma Israela taudia dekenai, “Keriso ena taravatu” ena hakaua herevadia be edia kudouna ai ia noho. “Keriso ena taravatu” be Keristani taudia ese edia noho gabudia ai idia badinaia bona idia ia durua diba.—Gal. 6:2.

11. Keristani taudia ese “Keriso ena taravatu” be edena dala rua ai do idia badinaia be namo?

¹¹ Dirava ese ena Natuna amo Lauma Israela taudia do ia naria dainai, hahenamo do idia abia. Taravatu ena kontraka matamata ia do karaia lasi neganai, Iesu ese hahegani badadia rua ia henia. Ta be haroro gaukara ia herevalaia. Bona ma ta be Iesu ena murinai idia raka taudia edia kara bona edia tadikaka idia kara henia karana ia herevalaia. Unai hahegani be Keristani taudia ibounai totona; unai dainai hari inai negai tomadiho momokani idia badinaia taudia ibounai, herevana edia helaro be guba ai eiava tanobada ai, ese idia badinaia be namo.

12. Haroro gaukara dekenai edena dala matamatana idia badinaia?

 ¹² Iesu murinai idia raka taudia ese do idia karaia haroro gaukarana mani oi laloa. Idaunegai, bese idauidau taudia be Iehova hesiai henia totona Israela dekenai idia mai neganai, idia abidia dae. (1 Kin. 8:41-43) Unai be Iesu ese Mataio 28:19, 20 (duahia) ai ia noho hahegani ia do henia lasi neganai ia vara. Iesu ena hahediba taudia ia hamaoroa taunimanima ibounai dekenai do idia “lao.” Pentekoste 33 C.E. ai, Iehova ese ena dala ia haidaua karana ia hedinarai, unai be tanobada hegegemadai evanelia gaukarana. Iena lauma helaga ese kongrigeisen matamata ena memba taudia 120 ia hasiahua dainai hoa dalanai gado idauidau ai Iuda taudia bona Keristani tomadiho idia abia dae idau bese taudia idia haroro henia. (Kara 2:4-11) Gabeai, Samaria dekenai idia haroro. Bena, lagani 36 C.E. ai, kopina idia utua lasi Idau Bese taudia idia noho tanodia dekenai idia haroro. Haroro gaukara be Iuda taudia dekenai idia hamatamaia ela bona tanobada ena kahana momo.

13, 14. (a) Iesu ena “taravatu matamata” ena anina be dahaka? (b) Iesu ena haheitalai amo dahaka ita dibaia?

¹³ Hari, iseda tadikaka taihu ita kara henia dalana ita herevalaia. Iesu ese “taravatu matamata” ia henia. (Ioane 13:34, 35 duahia.) Unai taravatu ena anina be dina ta ta ai ta ta dekenai lalokau ita hahedinaraia sibona lasi, to mai iseda ura ida iseda tadikaka taihu totona eda mauri ita henia. Unai be Mose ena Taravatu ai ia noho lasi.—Mat. 22:39; 1 Ioa. 3:16.

¹⁴ Iesu be haheitalai namona. Ia be sibona ena ura ia dadaraia ena hahediba taudia dekenai lalokau ia hahedinaraia totona. Unai lalokau dainai Iesu be ena lalona ia hadaia idia totona ia mase. Bona ia ura ena hahediba taudia bona ita danu ese unai do ita karaia. Iseda Keristani tadikaka totona, hisihisi ita haheaukalaia eiava ita mase diba.—1 Tes. 2:8.

15, 16. Hari Dirava ena taunimanima edia noho dalana be edena bamona bona edena dala ai Ia ese idia ia gimaia?

¹⁵ Iesu ese “igui hesiai tauna mai ena kamonai bona mai ena kara maoromaoro” ia abia hidi neganai, ena taunimanima be nega korikori ai Baibel ena hereva amo ia ubua. (Mat. 24:45-47) Unai hereva lalonai mai anina bada hakaua daladia idia noho edia noho dalana matamatana hegeregerena.

¹⁶ Ita be Baibel ese ia gwauraia “dina gabediai” ita noho, bona iseda vairana ai guna ia do vara lasi hisihisi be ia mai noho. (2 Tim. 3:1; Mar. 13:19) Satani bona ena demoni be guba amo idia negea diho bona hari tanobada ai idia noho, unai dainai tanobada taudia ese dika bada idia davaria. (Apok. 12:9, 12) Danu Iesu ese ita ia hagania do ita karaia haroro gaukara be guna idia karaia bamona lasi, ita be bese idauidau bona gado idauidau taudia ita haroro henia!

17, 18. Hakaua herevadia ita abia neganai, dahaka ita karaia be namo?

¹⁷ Dirava ena orea ese ia halasia tulu matamatadia ita gaukaralaia be namo. Unai tulu matamatadia oi ura henia, a? Iseda hebou ai unai tulu gaukaralaia daladia bona do ita gaukaralaia namonamo daladia idia herevalaia neganai, oi abia dae, a? Oi abia dae ia be Dirava ena hakaua dalana, a?

¹⁸ Oibe, hanaihanai Dirava amo hahenamo ita abia totona, namona be Keristani kongrigeisen amo idia mai hakaua daladia ibounai ita badinaia. Bema hari badinaia karana ita hahedinaraia, unai ese ita do ia durua “hisihisi badana,” Satani ena tanobada oromana dikana ibounai hadikaia ore negana ai idia henia hakaua herevadia ita badinaia diba. (Mat. 24:21) Unai murinai, Satani  ese ia biagua lasi tanobada matamata dekenai hakaua hereva matamatadia do ita abia.

19, 20. Edena lokua toretoredia do idia kehoa, bona unai dainai dahaka do ia vara?

¹⁹ Mose ena hakaua henunai Israela taudia idia noho neganai bona gabeai Keristani kongrigeisen be “Keriso ena taravatu” henunai idia noho neganai, Dirava ese idia dekenai taravatu matamata ia henia. Unai hegeregerena, Baibel ese ita ia hadibaia lokua toretoredia haida do idia kehoa bona tanobada matamatana ai ita noho totona ita dekenai dala do idia hadibaia. (Apokalupo 20:12 duahia.) Unai lokua toretoredia ai Iehova ena taravatu, unai negai do idia noho taudia ese do idia badinaia taravatudia idia noho. Unai taravatu idia stadilaia neganai, taunimanima ibounai, toreisi lou taudia danu, ese Dirava ena ura idia ibounai totona do idia dibaia. Unai lokua toretoredia ese ita dekenai Iehova ena lalohadai do ia hahedinaraia. Baibel ese ia hahedinaraia dibana bona lokua toretoredia amo do idia mai diba matamata dainai tanobada Paradaisona ai do idia noho taudia ese edia tadikaka do idia lalokau henia, matauraia, bona laloa bada. (Isa. 26:9) King Iesu Keriso henunai do idia karaia hadibaia gaukarana mani oi laloa!

²⁰ “Mauri bukana lalonai idia torea gaudia” idia badinaia taudia ese mauri hanaihanai do idia abia. Hahetoho ginigabena ai Dirava do idia badinaia noho taudia edia ladana be “mauri bukana” lalonai Iehova ese do ia torea. Unai hahenamo ita abia diba! Unai dainai, bema hari Dirava ena Hereva ita duahia, lalopararalaia, bona Dirava ena hakaua daladia ita badinaia, hisihisi badana amo ita roho mauri diba, bona iseda lalokau bona aonega bada Diravana, Iehova be hanaihanai do ita dibaia.—Had. 3:11; Roma 11:33.