Momokani, hari ta ese Paulo ena toana ia gwauraia maoromaoro diba lasi. Iseda pablikeisen ai idia noho Paulo ena toana be laulau sibona, idia be akioleji taudia ese idia hamomokania laulaudia lasi.

To, Paulo ena toana ia hamomokania gaudia haida idia noho. Hegeregere, lagani 1902, March 1 ena Zion’s Watch Tower be hamomokania gauna ta ia gwauraia: “Paulo ena toana: . . . ‘Acts of Paul and Thecla,’ . . . lagani 150 A. D. bamona lalonai idia torea bukana ai, Paulo ena toana bona iena hanua mauri sisina ia herevalaia. Inai buka ai Paulo be inai bamona ia herevalaia, ia be ‘tau kwadogina, kwara kebere, aena gageva, goada tauna, iena matana ena ibuni be idia kahirakahira bona reana iena udu baubau be lata.’”

The Oxford Dictionary of the Christian Church (1997 gauna) be inai bamona ia gwau: “‘Acts’ bukana ese idaunegai idia vara momokani gaudia haida ia herevalaia danu.” Keristani taudia ginigunadia ese Acts of Paul and Thecla bukana idia laloa bada, badina ena Greek toretoredia 80 be idia do noho, bona gado ma haida ai danu. Unai dainai, idaunegai aposetolo Paulo ena toana idia gwauraia gaudia be hari idia atoa laulaudia ida idia hegeregere sisina.

To laloatao, Paulo ena toana be gau badana lasi. Ena be Paulo ese iena haroro gaukara ia karaia, to haida idia gwau “iena toana be manoka bona ena hereva be mamina lasi.” (2 Kor. 10:10) Namona be ita laloatao Iesu ena heduru dainai ia be Keristani tauna ta ai ia lao. Danu, ita be Paulo ese ia hagugurua gaukarana ita laloa diba, ia be Keriso ese ia “abia hidi vadaeni hodu ta bamona, bese idauidau, . . . dekenai [Iesu ena] ladana do ia laohaia.” (Kara 9:3-5, 15; 22:6-8) Bona Iehova ese ena lauma amo Paulo ia hasiahua bona ia torea Baibel bukadia ese ita idia durua dalana ita laloa diba.

Paulo be Keristani tauna ai ia do lao lasi neganai, ia hagugurua gaudia dainai ia hekokoroku lasi eiava iena toana ia herevalaia lasi. (Kara 26:4, 5; Fili. 3:4-6) To ia gwau: “Aposetolo taudia ibounai huanai lau be maragi herea, bona lau be hegeregere lasi do idia gwauraia aposetolo tauna.” (1 Kor. 15:9) Bona gabeai ma ia gwau: “Helaga taudia ibounai huanai ia maragi momokani tauna amo lau be maragi herea, to unai hebogahisi hereadaena be lau dekenai ia henia, vadaeni idau bese taudia dekenai Keriso ena dava bada gaudia edia sivarai namona lau gwauraia be namo, unai gaudia ibounai ita lalopararalaia diba lasi.” (Efe. 3:8) Unai sivarai be mai anina bada, to Paulo ena toana be gau badana lasi.