1, 2. (a) Keristani tama sina haida be dahaka idia laloa bema edia natuna ia ura bapatiso ia abia? (b) Dahaka dainai do idia bapatiso taudia idia nanadaia bema Iehova dekenai edia mauri idia gwauhamatalaia vadaeni? (Laulau ginigunana herevalaia.)

KEKENI matamata ta ladana Maria, ena Keristani tama sina idia itaia noho lalonai, ia be bapatiso do idia abia taudia ma haida ida ia gini toreisi. Mai gado bada ida, tok henia tauna ese ia henia henanadai rua ia haerelaia. Unai murinai bapatiso ia abia.

² Maria ena tama sina be idia moale badina edia natuna kekeni be abia hidi ia karaia Iehova dekenai ena mauri ia gwauhamatalaia bona bapatiso do ia abia. To, unai ia do vara lasi neganai, ena sinana be ia laloa momo. Bona sibona ia nanadaia: ‘Maria be kekeni maragina dainai, ia hegeregere bapatiso do ia abia, a? Do ia karaia gwauhamatana ena badina ia lalopararalaia, a? Reana ia naria daudau sisina bona gabeai bapatiso ia abia diba, a?’ Lalokau tama sina momo be inai bamona henanadai idia laloa bema natuna ta ia ura bapatiso ia abia. (Had. 5:5) To, ta be Keristani tauna ai ia lao totona, Dirava dekenai ena mauri ia gwauhamatalaia  bona bapatiso ia abia be mai anina bada.​—⁠Maua ladana “Iehova Dekenai Emu Mauri Oi Gwauhamatalaia Vadaeni, A?” itaia.

3, 4. (a) Edena dala ai aposetolo Petero be haheitalai amo ia hahedinaraia bapatiso be mai anina bada? (b) Dahaka dainai bapatiso karana be Noa ena negai lagatoi ia karaia karana ida ia hahegeregerea? (Laulau ginigunana herevalaia.)

³ Aposetolo Petero be bapatiso karana ia herevalaia neganai, Noa ese lagatoi ia karaia karana ida ia hahegeregerea. Ia gwau: “Unai ranu be bapatiso ena toana bamona, bona bapatiso ese harihari umui ia hamauria noho.” (1 Petero 3:20, 21 duahia.) Noa ese lagatoi ia karaia karana amo ia hahedinaraia ia ura bada Dirava ena ura ia karaia. Noa be mai abidadama ida Iehova ese ia henia gaukarana ia hagugurua. Oibe, iena abidadama dainai, Dirava ese Noa bona ena ruma bese be abata dekena amo ia hamauria. Petero ena haheitalai ena anina be dahaka?

⁴ Taunimanima be lagatoi idia itaia neganai, idia diba Noa be Dirava ia abidadama henia. Unai hegeregerena, taunimanima be bapatiso do ia abia tauna idia itaia neganai, idia hamomokania ia be Iehova dekenai ena mauri ia gwauhamatalaia bona ia toreisi lou vadaeni tauna Keriso, ia abidadama henia. Noa hegeregerena, edia mauri idia gwauhamatalaia hahediba taudia be Dirava ese ia henia gaukarana idia karaia mai kamonai ida. Noa be abata dekena amo ia roho mauri hegeregerena, Dirava be inai tanobada dikana ia hadikaia ore neganai, ia idia badinaia bapatiso taudia do ia hamauridia. (Mar. 13:10; Apok. 7:9, 10) Unai dainai gwauhamata bona bapatiso be mai anina bada. Bema ta be ia ura lasi ia bapatiso haraga, iena mauri hanaihanai abia dalana ia haboioa diba.

5. Inai stadi ai dahaka do ita herevalaia?

⁵ Bapatiso be mai anina bada dainai, inai henanadai toi do ita herevalaia. Baibel be dahaka ia gwau bapatiso karana dekenai? Ta ia do bapatiso lasi neganai, dahaka ia karaia be  namo? Dahaka dainai Keristani hahediba tauna be ena natuna o Baibel stiuden ia hadibaia neganai, bapatiso abia karana ena badina ia laloa be namo?

6, 7. (a) Ioane ese ia karaia bapatiso ena anina be dahaka? (b) Edena dala ai Ioane ese ia karaia bapatisona be idau?

⁶ Ioane Bapatiso ese ia karaia bapatisona be sivarai ginigunana Baibel ai ita duahia. (Mat. 3:1-6) Ioane dekenai bapatiso abia totona idia lao taudia be idia hahedinaraia Mose ena taravatu idia utua karana amo idia helalo-kerehai. To Ioane ese ia karaia mai anina bada bapatisona be kara dika amo helalo-kerehai totona lasi. Ioane ese Iesu, Dirava ena Natuna goevadaena, ia bapatiso henia be hahenamo badana. (Mat. 3:13-17) Iesu be kara dika ta ia karaia lasi, unai dainai ia helalo-kerehai be anina lasi. (1 Pet. 2:22) Iena bapatiso karana ese ia hahedinaraia sibona ia henia Dirava ena ura do ia karaia.​—⁠Heb. 10:7.

⁷ Iesu be tanobada ai ena haroro gaukara ia karaia neganai, iena hahediba taudia ese taunimanima idia bapatiso henia danu (Ioa. 3:22; 4:1, 2) Ioane ese ia karaia bapatiso, ese ia hahedinaraia idia abia bapatisona be Mose ena taravatu utua karana amo idia helalo-kerehai. To Iesu ia mase bona ia toreisi lou murinai, ia murinai idia ura raka taudia be badina ma ta dainai bapatiso do idia abia.

8. (a) Iesu ia toreisi lou murinai, dahaka hahegani ia henia ena hahediba taudia dekenai? (b) Keristani taudia idia bapatiso ena badina mani oi herevalaia.

⁸ Lagani 33 C.E. ai, Iesu be ia toreisi lou murinai taunimanima 500 bamona​—⁠tatau, hahine, bona natu​—⁠dekenai ia hedinarai. Reana unai nega ai, Iesu ia gwau: “Unai dainai umui lao, bese ibounai taudia be hahediba taudia ai umui halaoa, bona Tamana, Natuna, bona lauma helaga ladanai idia do umui bapatisoa, bona idia umui hadibaia, umui lau hamaoroa gaudia ibounai be do idia badinaia.” (Mat. 28:19, 20; 1 Kor. 15:6) Oibe, Iesu ese hahediba taudia halaoa ena hahegani ia henia neganai, ena hahediba taudia handred momo danu be idia noho. Iesu ese ia hahedinaraia bema ta ia ura Keristani hahediba tauna ena maduna ia huaia, bapatiso ia abia be namo. (Mat. 11:29, 30) Bema ta ia ura Dirava ia hesiai henia, namona be ia abia dae Iehova be Iesu ia gaukaralaia noho ena ura hagugurua totona. Unai ia karaia murinai bapatiso ia abia diba. Dirava ese unai bamona ranu bapatiso sibona ia abia dae. Baibel ai, hamomokania gaudia momo ese idia hahedinaraia aposetolo edia nega ai, Keriso ena hahediba taudia idia laloparara bapatiso karana be mai anina bada. Bona idia naria lasi bapatiso idia abia totona.​—⁠Kara 2:41; 9:18; 16:14, 15, 32, 33.

9, 10. Bapatiso karana dekenai, Etiopia tauna bona aposetolo Paulo amo dahaka ita dibaia?

⁹ Kara 8:35, 36 duahia. Iuda tomadiho ia abia dae Etiopia tauna ta ena haheitalai oi laloa. Tomadiho totona Ierusalema dekenai ia lao bona ruma dekenai ia giroa lou lalonai, Filipo be Iehova ena aneru ese ia siaia, unai Etiopia tauna do ia hereva henia bona ia dekenai “Iesu ena sivarai namona ia gwauraia.” Unai Etiopia tauna be dahaka ia karaia? Ia karaia karana ese ia hamomokania ia dibaia hereva momokani ia ura henia. Ia ura Iehova ena dala ia badinaia dainai, ia naria lasi bapatiso abia totona.

¹⁰ Haheitalai ma ta be Keristani taudia ia dagedage henia Iuda tauna ta. Ia be Dirava ida gwauhamata ia karaia besena amo ia vara. To, Iuda taudia idia kamonai lasi dainai Iehova ese idia ia dadaraia. Unai tau be Iuda taudia edia sene karadia ia abia dae, to gabeai dala maorona ia dibaia. Iesu Keriso, ia toreisi lou bona hairai ia abia tauna, ese  ia durua. Unai tau be dahaka ia karaia? Ia ese Keristani hahediba tauna Anania ena heduru ia abia dae. Baibel ese unai tau be inai bamona ia herevalaia, ia gwau: “Ia toreisi bona bapatiso ia abia.” (Kara 9:17, 18; Gal. 1:14) Unai Iuda tauna be gabeai idia gwauraia aposetolo Paulo. To mani oi laloa, Paulo be hereva momokani ia dibaia bona Iehova ese Iesu ia gaukaralaia ena ura ia hagugurua dalana ia dibaia neganai, ia naria lasi to bapatiso ia abia.​—⁠Kara 22:12-16 duahia.

11. (a) Hari inai negai, dahaka ese Baibel stiuden taudia ia durua diba bapatiso idia abia totona? (b) Ta ia bapatiso neganai, iseda hemami be edena bamona?

¹¹ Hari inai negai Baibel stiuden taudia, ena be idia matamata o buruka, idia dekenai danu unai ia vara. Baibel idia abidadama henia bona laloa bada taudia be mai edia ura ida edia mauri idia gwauhamatalaia bona bapatiso idia abia. Hebouhebou badadia bona maragidia dekenai idia henia bapatiso tok be mai anina bada unai bamona taudia dekenai. Iehova ena witnes taudia idia moale bada bema Baibel stiuden ta be hereva momokani ia abia dae bona ia goada ela bona ranu bapatiso ia abia. Keristani tama sina momo be idia moale bema edia natudia danu be bapatiso idia abia, ani? Lagani 2017 ena hesiai laganina ai, “kudou-maoro” taudia 284,000 bamona be ranu bapatiso amo edia gwauhamata Iehova dekenai idia hamomokania. (Kara 13:48) Ia hahedinaraia goevagoeva, unai hahediba taudia matamatadia idia laloparara Keristani taudia ibounai idia bapatiso be namo. Bapatiso idia do abia lasi neganai, dahaka do idia karaia guna?

12. Baibel stiuden ta be bapatiso ia do abia lasi neganai, dahaka ia karaia guna be namo?

¹² Baibel stiuden ta ia do bapatiso lasi neganai, namona be Dirava dekenai diba maoromaoro ia abia, Dirava ena ura, bona Dirava ese ita ia hamauria dalana ia dibaia guna. (1 Tim. 2:3-6) Unai ese Baibel stiuden ena abidadama do ia hagoadaia unai amo Dirava ese ia inai henia karadia do ia dadaraia diba bona Iehova ena kara maoromaoro taravatudia do ia badinaia. (Kara 3:19) Bema ta be Dirava ese ia inai henia karadia ia karaia noho, ena gwauhamata do ia abia dae diba lasi. (1 Kor. 6:9, 10) To Iehova ena kara maoromaoro taravatudia ita badinaia sibona lasi, gau ma haida ita karaia danu be namo. Kara maoromaoro dalana idia badinaia taudia be kongrigeisen heboudia idia lao bona haroro gaukara bona hahediba taudia halaoa gaukarana idia karaia. Iesu be ia gwau iena hahediba taudia momokanidia ese unai gaukara do idia karaia. (Kara 1:8) Hahediba taudia matamatadia be unai idia karaia murinai, guriguri amo Iehova dekenai edia mauri idia gwauhamatalaia diba bona unai idia hamomokania totona taunimanima vairanai bapatiso idia abia.

13. Dahaka dainai haida ita hadibadia neganai, namona be ita laloatao idia bapatiso be namo?

¹³ Eda natudia bona Baibel stiuden haida ita durudia mai anina bada gaudia idia karaia neganai, namona be ita laloatao hahediba taudia halaoa gaukarana idia ura karaia taudia idia bapatiso be namo. Bema unai ita laloatao, eda stiuden taudia ida do ita herevahereva namonamo diba. Namona be nega maorona ai idia ida gwauhamata bona bapatiso idia laloa bada karana ita herevalaia. Oibe, ita ura eda natudia bona Baibel stiuden taudia idia goada ela bona bapatiso idia abia!

14. Dahaka dainai ta ita doria lasi bapatiso ia abia totona?

¹⁴ To, namo lasi tama sina, stadi ia hakaua tauna, eiava kongrigeisen taudia ese ta idia doria ia bapatiso totona. Unai be Iehova ena dala lasi. (1 Ioa. 4:8) To ita hadibadia neganai, namona be idia dekenai ita hahedinaraia edia hetura karana Iehova ida ia  goada be mai anina bada. Baibel stiuden tauna be mai ena kudouna ibounai ida hereva momokani ia ura henia, bona Hahediba taudia halaoa gaukarana ena maduna ia ura karaia karana ese do ia hagoadaia bapatiso ia abia totona.​—⁠2 Kor. 5:14, 15.

15, 16. (a) Ta ia bapatiso totona, mauri lagani ena maka idia atoa, a? (b) Dahaka dainai Baibel stiuden ta be Iehova ena Witnes ta ai ia lao totona bapatiso ia abia be namo, ena be guna tomadiho ma ta dekenai bapatiso ia abia?

¹⁵ Ta be edena mauri lagani ai bapatiso do ia abia be idia makaia lasi. Stiuden ta ta edia goada lauma dalanai be idauidau. Momo be edia matamata negana ai idia bapatiso bona Iehova idia hesiai henia noho. Ma haida be edia buruka negana ai Baibel ena hereva momokani idia dibaia bona idia bapatiso​—⁠haida edia mauri lagani be 100 ia hanaia danu!

¹⁶ Ia buruka vadaeni Baibel stiuden ta be ena stadi hahinena ia nanadaia bema ia bapatiso lou diba eiava lasi, badina lagani haida gunanai ia be ena tomadiho gunana dekenai bapatiso ia abia. Stadi hahinena ese Baibel siridia amo ena henanadai ia haerelaia. Unai stiuden ia laloparara Baibel ena hahegani ia totona be dahaka bona kara haraga bapatiso ia abia. Ena be ena mauri lagani be kahirakahira 80, ia laloa bapatiso ia abia be namo. Oibe, Iehova ese iseda bapatiso do ia abia dae bema iena ura ita diba. Unai dainai, ena be ta be ena tomadiho gunana dekenai ia bapatiso, to namona be bapatiso ia abia bona Iehova ena Witnes ta ai ia lao.​—⁠Kara 19:3-5 duahia.

17. Ta ena bapatiso dinana ai dahaka ia laloa be namo?

¹⁷ Bapatiso dinana be moale bada negana. Danu unai be nega namona ta ese ena gwauhamata bona bapatiso ena anina ia laloa totona. Ta be ena gwauhamata ia hagugurua totona be mai ena hekwarahi. Unai dainai Iesu ese hahediba taudia halaoa gaukarana be maduna ta ida ia hahegeregerea. Iesu ena hahediba taudia be “sibona totona do idia mauri lasi, to idia dainai ia mase bona ia toreisi lou tauna totona do idia mauri.”​—⁠2 Kor. 5:15; Mat. 16:24.

18. Stadi gabena ai edena henanadai do ita herevalaidia?

¹⁸ Maria ena sinana be unai lalohadai ia abia dainai, matamanai ita herevalaia henanadaidia ia gwauraia. Bema oi be tama o sina ta, reana sibona oi nanadaia: ‘Egu natuna be ia hegeregere ia bapatiso totona, a? Iehova dekenai ena mauri ia gwauhamatalaia totona, hereva momokani ia diba namonamo, a? Eiava edukeisen bona moni gaukara namona ia abia murinai ia bapatiso diba, a? Bapatiso ia abia murinai, kara dika badana ta ia karaia be edena bamona?’ Stadi gabena ai ita ese unai gaudia bona edena dala ai Keristani tama sina ese bapatiso karana dekenai lalohadai maorona idia abia daladia do ita herevalaia.