LAU BE Austria ena siti badana Graz ai lau tubu daekau. Egu mauri lagani be 7 neganai, tomadiho dalana idia hadibaia sikuli ta dekenai lau lao. To, lau kamonai pris bona nan taudia be heudahanai karadia idia karaia. Unai dainai, lagani ta ia do ore lasi neganai egu sinana ia ura sikuli do lau rakatania.

Gabeai, bodin sikuli ta dekenai lau lao. Hanuaboi ta ai, Graz be idia bomua dainai, egu Tamana be lau ia abia totona ia mai. Ai heau mauri totona Schladming taoni dekenai ai lao. Unai taoni dekenai ai ginidae bona nese ai hanaia murinai idia bomua. Nega ma ta ai, lau bona egu tubuna hahine be murimuri dekenai ai noho neganai, henunai idia roho peleini amo ai idia pidia matamaia. Tuari ia ore murinai, lau mamia tomadiho bona gavamani taudia be ai idia durua lasi.

Lagani 1950 ai, Iehova ena Witnes tauna ta be egu sinana dekenai Baibel ena sivarai ia harorolaia matamaia. Nega haida edia herevahereva do lau kamonai bona kongrigeisen heboudia dekenai egu Sinana lau bamoa. Ia abia dae Iehova ena Witnes taudia be hereva momokani idia harorolaia dainai lagani 1952 ai bapatiso ia abia.

Unai nega ai, lau dekenai unai kongrigeisen be hahine buruka idia hebou gabuna bamona. To gabeai, kongrigeisen ma ta ai vadivadi henia neganai matamata taudia momo idia noho​—⁠buruka hahinedia edia hebou gabuna lasi! Graz dekenai ai giroa lou neganai, hebou ibounai lau lao matamaia, bona lau abia dae lau dibaia gaudia be hereva momokani. Lau laloparara Iehova be Dirava momokani bona hanaihanai iena hesiai taudia ia durua. Unai ia karaia diba ena be ita davaria hahetoho ita hanaia be auka.​—⁠Sal. 3:5, 6.

Lau ura ma haida dekenai hereva momokani do lau harorolaia. Egu vara hebou taudia dekenai lau matamaia. Egu taihuna badadia 4 be tisa gaukara totona ruma idia rakatania. To  idia noho hanuadia ta ta ai idia lau vadivadi henidia bona lau hagoadadia Baibel idia stadilaia totona. Gabeai, egu taihuna mero ta bona taihudia kekeni 5 be Iehova ena Witnes taudia ai idia lao.

Wiki iharuana ai egu ruma-ta-ruma-ta haroro gaukara ai, mauri lagani 30 hahinena ta lau davaria bona Baibel stadi lau hamatamaia. Unai hahine be bapatiso ia abia, bena gabeai iena adavana bona natuna memero rua danu idia bapatiso. Unai stadi ese egu abidadama ia hagoadaia danu. Dahaka dainai? Badina guna lau dekenai ta be unai bamona Baibel stadi ia karaia lasi. Unai dainai leseni ta ta totona lau hegaegae namonamo. Unai be hegeregere, lau sibona lau hadibaia guna bona gabeai egu stiuden lau hadibaia! Danu egu laloparara hereva momokani dekenai ia habadaia. Bona April, 1954 ai, Iehova dekenai egu mauri lau gwauhamatalaia ranu bapatiso amo.

Lagani 1955 ai, Germany, France, bona England dekenai, intanesinol hebouheboudia totona lau lao. London ai lau noho neganai, Albert Schroeder lau hedavari henia. Ia be Gilead Sikuli ena hadibaia tauna ta, bona gabeai Hakaua Oreana ena memba ta ai ia lao. Nega ta British Miusiam lau vadivadi neganai, Tadikaka Schroeder be ai dekenai Baibel maniuskrip haida ia hahedinaraia. Unai maniuskrip lalonai Dirava ena ladana ia noho Heberu toretoredia ai, bona edia namo ia herevalaia danu. Unai ese egu lalokau Iehova bona hereva momokani dekenai ia habadaia, egu lalona lau hadaia Dirava ena Hereva momokani lau gwauraia goadagoada totona.

January 1, 1956 ai, ful-taim painia gaukara lau karaia matamaia. Hua 4 murinai, lau idia boiria Austria ai spesel painia gaukara do lau karaia totona. Unai nega ai, Mistelbach ai Witnes taudia be lasi, bona unuseniai egu hesiai gaukara do lau karaia. To hahetoho ta lau davaria. Lau bona egu painia turana emai noho daladia be idau, badina egu mauri lagani be kahirakahira 19 bona siti ai lau bada, ia be 25 bona ia be hanua kekenina. Lau be dabai ibounai lau toreisi leiti, to ia be ia noga haraga. Bona hanuaboi ai lau ura lasi mahuta haraga, to ia be ia mahuta guna. To, Baibel ena sisiba ai badinaia dainai, emai noho daladia ai haidaua, bona mai moale ida tura namodia bamona emai painia gaukara ai karaia.

Momokani, ita be hekwakwanai badadia haida ita davaria. Bona haida ese ita idia hahisia danu, to “Dirava ese [ita] ia rakatania lasi.” (2 Kor. 4:7-9) Nega ta, hanua ta dekenai ai haroro noho lalonai, taunimanima ese edia sisia be varo amo idia kokia. Daudau lasi lau bona egu turana be sisia badadia mai boiboi danu ai idia hagegea bona edia isena danu idia hedinarai. Imana ai dogoatao bona lau guriguri, “Iehova, plis, bema ai idia koria, ai mase haraga be namo!” Bena sisia be ai kahirakahira idia mai neganai, idia gini, iuna idia davea bona idia raka siri. Ai mamia Iehova ese ai ia gimaia. Unai murinai, hanua ibounai lalonai ai haroro, bona ai moale bada badina taunimanima be idia kamonai namonamo. Reana idia hoa badina sisia be ai idia hahisia lasi o unai kara dainai ai gari lasi to mai haheauka ida ai haroro. Danu idia haida be Witnes taudia ai idia lao.

 Ai dekenai gari gauna mata ia vara. Nega ta ruma biaguna ia kekero bona ia mai, ia ura ai ia alaia bona ia gwau ai be emai neiba taudia ai matauraia lasi. Iena hahine ia ura ia koua toho to ia hegeregere lasi. Emai daiutu be ataiai dainai unai ibounai ai kamonai. Bena karaharaga emai iduara ena vairanai sea ai atodia bona kohu be sutkeisi lalonai ai udaia matamaia. Iduara ai kehoa neganai, ruma biaguna be ruma ena vadavada atai kahana ai ia gini, bona kaia badana ia dogoatao noho. Unai dainai murina iduara amo ai heau mauri bona uma gabu ena dala dekenai ai raka emai kohu ibounai danu, bona ai giroa lou lasi.

Hotel ta dekenai ai lao bona daiutu ta totona ai henanadai. Bona kahirakahira lagani ta bamona unuseni ai noho, unai ese emai hesiai gaukara ia hanamoa. Edena dala ai? Badina hotel be taoni ena huanai ia noho, bona emai Baibel stadi taudia haida idia ura unuseni do ai stadi. Daudau lasi buka stadi bona wiki ta ta ena Gima Kohorona Stadi be hotel ai ai karaia, idia mai taudia be 15 bamona.

Mistelbach ai lagani ta mai kahana ai noho. Unai murinai Feldbach, Graz ena sautist kahana dekenai lau idia siaia. Painia taihu ma ta ida lau gaukara, to kongrigeisen be lasi. Unuseni au amo idia karaia ruma ta ena henunai daiutu maragina ta dekenai ai noho. Lai ena regena be au edia huanai idia noho matu amo ia vareai dainai, niuspepa amo ai koudia. Danu ranu guri dekenai ranu ai abia. To hahenamo ai abia. Hua haida murinai, grup ta ia matamaia. Gabeai, ai stadi henia taudia 30 bamona be hereva momokani lalonai idia vareai!

Unai bamona ekspiriens ese lau idia hagoadaia Iehova lau hanamoa totona, badina hanaihanai iena Basileia idia atoa guna taudia ia durua. Danu taunimanima edia heduru be mai ena hetoana, to Iehova be hanaihanai ita ia durua noho.​—⁠Sal. 121:1-3.

Lagani 1958 ai, New York City, ena Yankee Stadium bona Polo Grounds ai intanesinol hebouhebou ta idia abia. Unai hebouhebou lau lao totona revareva lau torea, bona Austria brens be lau idia noia bema lau ura Gilead Sikuli namba 32 lalonai lau vareai totona. Edena bamona unai hahenamo do lau dadaraia? Maoromaoro lau haere, “Oibe!”

Gilead klas lalonai, lau be Martin Poetzinger ena badinai lau helai. Ia be Nazi dibura kamepa ai hahetoho badadia momo ia davaria. Ia danu be gabeai Hakaua Oreana ena memba ta ai ia lao. Sikuli lalonai, Martin be nega  haida do ia hereva maragimaragi, “Erika, German gado ai unai ena anina be dahaka?”

Sikuli ena dokona kahanai, Nathan Knorr ese emai asainmen ia gwauraia. Egu asainmen be Paraguay dekenai. Lau matamata dainai, unai tano lau lao totona, egu tamana amo gwaumaoro lau abia be namo. Gwaumaoro lau abia murinai, March 1959 ai, Paraguay dekenai lau lao. Lau idia abia hidi Asunción ai misinari ruma ta dekenai lau noho totona, painia taihu ma ta ida.

Daudau lasi murinai, Walter Bright lau hedavari henia, ia be misinari ta bona Gilead ena klas namba 30 amo ia gradueit. Gabeai, ai headava bona nega tamona mauri ena hekwakwanai ai haheaukalaidia. Danu ai ia tohoa hekwakwanai ta ai davaria neganai, Iehova ena gwauhamata Isaia 41:10 ai ai duahia, ia gwau: “Do umui gari lasi, lau be umui dekenai lau noho! Lau be umui emui Dirava, gau ta ese umui do ia hagaria lasi. Lau ese umui do lau hagoadaia.” Unai ese ai ia hagoadaia bema ai hekwarahi Dirava ai abidadama henia noho bona iena Basileia ai atoa guna, Ia be hanaihanai ai do ia durua.

Gabeai, Brazil ena tano kahirakahira ia noho gabu ta dekenai ai idia siaia. Dubu gunalaia taudia ese matamata taudia idia hamaoroa ai noho misinari rumana dekenai nadi do idia negea totona, unai ruma ena kahana momo be idia dika vadaeni. Bena Walter be pulisi edia tau badana ida Baibel stadi ia hamatamaia. Unai pulisi tauna be dala ia karaia wiki ta lalonai ai idia gimaia emai inai taudia ese ai idia hagaria lou lasi totona. Daudau lasi murinai, Brazil ena tano kahirakahira ai idia noho gabu namona ta dekenai ai lao. Ia be hahenamo ta badina Paraguay bona Brazil gado ai, hebou ai karaia diba. Unai asainmen ai do rakatania lasi neganai, kongrigeisen maragidia rua idia noho.

Lagani 1962 ai lau rogorogo neganai ai hoa, badina egu doketa be lau idia hamaoroa natuna lau havaraia diba lasi! Gabeai Hollywood, Florida dekenai Walter ena famili kahirakahira ai noho. Lagani momo lalonai, lau bona Walter be ai hegeregere lasi painia gaukara ai karaia totona, badina emai ruma bese ai naria. To, Basileia gaudia tahua guna karana ai hadokoa lasi.​—⁠Mat. 6:33.

November 1962 ai, Florida dekenai ai ginidae neganai, ai hoa badina ai itaia unuseni idia noho taudia edia kara dainai, kopi korema bona kopi kurokuro tadikaka be gabu tamona ai idia hebou lasi, bona edia haroro gabudia idia hapararaia. To Iehova be kopina kala idauidau taudia ia hapararaia lasi, unai dainai gabeai kongrigeisen ai kopi kala idauidau taudia be mai lalotamona ida idia gaukara hebou. Iehova ena heduru sibona amo unai ia vara, bona hari unai gabu ai kongrigeisen momo idia noho.

To madi, lagani 2015 ai Walter be kensa gorere amo ia mase. Lagani 55 lalonai ia be adavana namona, Iehova ia lalokau henia bona tadikaka momo ia durudia. Gorere lasi tauanina ai do ia toreisi lou bona do ai hedavari negana lau naria noho.​—⁠Kara 24:15.

Lagani 40 mai kahana egu ful-taim hesiai gaukara lalonai lau abia hahenamo idauidau dainai, lau moale. Hegeregere, lau bona Walter ese emai Baibel stiuden taudia 136 edia bapatiso ai itaia. Unai negai, hekwakwanai haida idia vara danu. To unai gaudia ese ai idia koua lasi abidadama Diravana ai hesiai henia totona. To, Dirava kahirakahira ai lao, bona ai abia dae momokani ia ese ena nega bona dala hegeregerena ai unai hekwakwanai do ia hamaoromaoroa. Bona unai bamona ia karaia!​—⁠2 Tim. 4:16, 17.

Walter lau reaia momokani, to painia gaukara ese lau ia durua lau haheauka totona. Ma haida hadibaia karana bona idia dekenai toreisi lou helarona herevalaia karana ese lau ia durua bada. Momokani, Iehova ese dala idauidau ai lau ia durua. Iena gwauhamata ia momokani, ia ese lau ia durua, hagoadaia, naria, bona hamauria.​—⁠Isa. 41:10.