1. Baibel ese matahakani karana be edena bamona ia herevalaia?

INAI hereva “matahakani” oi kamonai neganai, dahaka oi laloa? Reana maoromaoro panisi aukana oi laloa, to ia be gau momo ia herevalaia. Baibel ese ia hahedinaraia matahakani be mai ena namo ita totona bona nega haida diba, aonega, lalokau bona mauri danu ia hahegeregerea. (Aon. 1:2-7; 4:11-13) Anina be Dirava ena matahakani ese iena lalokau ita totona ia hahedinaraia bona ia ura mauri hanaihanai ita abia. (Heb. 12:6) Reana nega haida iena matahakani ese ita ia hahisia, to ia kara auka o dagedage diba lasi. Momokani, matahakani ena anina korikori be ta hadibaia karana, hegeregere natuna lalokauna ta oi naria bona hadibaia bamona.

2, 3. Edena dala ai matahakani karana be hadibaia bona panisi karana ida ia hegeregere? (Laulau ginigunana herevalaia.)

² Mani inai oi laloa: Mero maragina ta ladana Johnny be ruma lalonai bolo ia gadaralaia. Bona ena sinana ia gwau: “Johnny, oi diba ruma lalonai bolo oi gadaralaia be taravatu! Gau ta oi hamakohia garina.” To ena sinana ena hereva ia kamonai lasi, bona ia gadara noho lalonai flaoa pot ia makohia. Edena bamona ena sinana ese ia do ia matahakani henia? Reana do ia hadibaia namonamo bona ia panisia danu. Bona ia hadibaia lalonai, reana Johnny do ia hamaoroa dahaka dainai ia karaia karana be kerere. Badina ia  ura ia dekenai ia hahedinaraia ena tama sina kamonai henia be aonega karana, bona idia atoa taravatu be mai anina bada bona namo do ia mailaia. Bona ena hereva ia haorea murinai reana panisi maorona ia henia diba. Hegeregere, Johnny amo bolo do ia abia bona dogoatao nega sisina lalonai. Unai amo ia laloparara diba gwau-edeede karana be mai ena dika.

³ Ita be Keristani kongrigeisen lalonai ita noho dainai, ita be Dirava ena ruma bese ta bamona. (1 Tim. 3:15) Unai dainai Iehova ese ia atoa taravatu bona mai lalokau ida ia henia matahakani ita matauraia be namo. To, bema iseda kara amo Dirava ia ura lasi karadia ita karaia, iena matahakani ese ita do ia hadibaia iseda guba Tamana ita kamonai henia karana be mai anina bada. (Gal. 6:7) Dirava be ita ia laloa bada bona ia ura lasi ita lalohisihisi.​—⁠1 Pet. 5:6, 7.

4. (a) Iehova be edena bamona treinini daladia ia hanamoa? (b) Inai stadi ai edena mai anina bada henanadai toi do ita herevalaia?

⁴ Baibel ena matahakani amo, iseda natuna o Baibel stiuden ta ita durua diba ena tahua gauna Keriso ena murinai ia raka totona ia hagugurua. Dirava ena Hereva, Baibel, iseda treinini tulu namona unai, ese ita ia durua “kara maoromaoro ai matahakani [ita] henia totona.” Unai amo iseda natuna o Baibel stiuden ita durua diba idia laloparara totona bona ‘Iesu ia hamaoroa gaudia ibounai be do idia badinaia.’ (2 Tim. 3:16; Mat. 28:19, 20) Iehova ese unai bamona treinini daladia ia hanamoa, unai ese stiuden taudia ia hegaegaelaia unai amo ma haida idia durua Keriso ena hahediba taudia ai idia lao totona. (Tito 2:11-14 duahia.) Mani inai mai anina bada henanadai toi edia haere ita herevalaia: (1) Edena dala ai Dirava ena matahakani ese ita dekenai iena lalokau karana ia hahedinaraia? (2) Idaunegai Dirava ese ia matahakani henia taudia edia sivarai amo dahaka ita dibaia? (3) Matahakani ita henia neganai, edena bamona Iehova bona ena natuna ita tohotohodia diba?

5. Edena dala ai Iehova amo ia mai matahakani ese ena lalokau ita dekenai ia hahedinaraia?

⁵ Lalokau dainai Iehova ese ita ia hamaoromaoroa, ia hadibaia, bona ia treinia unai amo lalokau ai do ita noho bona mauri ena dala ai do ita raka. (1 Ioa. 4:16) Bona ita ia laloa maragi lasi o gwauraia dika lasi, bona ia ura lasi ita laloa ita be anina lasi. (Aon. 12:18) Danu, Iehova be iseda kara namodia ia laloa bada bona iseda ura kwalimu ita gaukaralaia dalana ia matauraia. Oi danu be Baibel amo, Baibel pablikeisen, Keristani tama sina, eiava kongrigeisen elda taudia amo Dirava ena sisiba oi abia karana oi laloa bada, a? Oibe, ita be “dala kererena” ita badinaia neganai elda taudia ese manau bona lalokau dalanai ita idia hamaoromaoroa toho neganai, reana unai ese Iehova ena lalokau ita totona ia hahedinaraia.​—⁠Gal. 6:1.

6. Bema ta be matahakani ia abia bona hahenamo haida ia haboioa, edena dala ai unai ese Iehova ena lalokau ia hahedinaraia?

⁶ Nega haida, reana matahakani be sisiba henia karana sibona lasi. To bema ta be kara dika badana ta ia karaia, kongrigeisen lalonai hahenamo haida ia haboioa diba. Ena be unai ia vara, unai bamona matahakani ese Iehova ena lalokau karana ita totona ia hahedinaraia. Hahenamo haboioa karana, ese ta ia durua diba bona do ia laloparara sibona ena Baibel stadilaia karana, laloa dobu, bona guriguri karana be mai anina bada. Unai ese iena hetura karana Iehova ida ia hagoadaia diba. (Sal. 19:7) Gabeai, reana ia haboioa hahenamodia do ia abia lou. Danu kongrigeisen amo ta idia atoa siri karana ese Iehova ena lalokau ia hahedinaraia, unai ese kongrigeisen be hebamo dikadia amo ia gimaia. (1 Kor. 5:6, 7, 11) Bona Dirava ena matahakani be maoromaoro dainai, kongrigeisen amo  atoa siri karana ese kara dika tauna ia durua diba ena kara dika ia lalopararalaia bona ia helalo-kerehai totona.​—⁠Kara 3:19.

7. Sebina be daika, bona dahaka kara kererena ia karaia matamaia?

⁷ Matahakani ena anina lalopararalaia totona, mani Iehova ese ia matahakani henia taudia rua ita herevalaia: Sebina, ia be King Hesekaia ena negai ia noho, bona ta be tadikaka Graham, iseda negai ia noho. Sebina be “ruma ia naria tauna,” reana King Hesekaia ena ruma, bona ia be gaukara momo ia naria. (Isa. 22:15) To ia hekokoroku, bona sibona ena namo ia tahua matamaia. Danu sibona ena dava bada guri gabuna ta ia karaia, bona “kariota namodia” dekenai ia guia loaloa!​—⁠Isa. 22:16-18.

8. Edena dala ai Iehova be Sebina ia matahakani henia, bona dahaka ia vara?

⁸ Sebina be sibona ena namo ia tahua dainai, Dirava ese ‘ena gaukara gabuna dekena amo ia hadokoa’ bona iena gabu ai Eliakimi ia atoa. (Isa. 22:19-21) Asuria ena King, Senakeriba be Ierusalema tuari henia totona palani ia karaia negana ai, unai senisi ia vara. Gabeai, unai king ese dagi bada taudia, mai edia tuari oreana be Ierusalema dekenai ia siaidia lao, Iuda taudia do idia hagaria bona Hesekaia ese edia hereva do ia abia dae totona. (2 Kin. 18:17-25) Eliakimi idia siaia dagi bada taudia ia hereva henidia totona, to ia sibona ia lao lasi. Tatau rua ese ia idia bamoa, ta be Sebina, hari ia be seketere gaukara ia karaia. Unai kara dainai Sebina be ia badu lasi to mai manau ida unai senisi ia abia dae, a? Bema oibe, unai sivarai amo dahaka ita dibaia? Mani dala toi ita herevalaia.

9-11. (a) Sebina ena sivarai amo dahaka mai anina bada gauna ita dibaia? (b) Edena dala ai Iehova ese Sebina ia matahakani henia karana ese oi ia hagoadaia?

⁹ Ginigunana be, Sebina ese ena dagi ia haboioa. Iena sivarai amo ita diba, “hekokoroku be hadikaia gabuna dekenai ia lao noho, bona sibona ia gwauraia bada tauna, be do ia moru momokani.” (Aon. 16:18) Bema kongrigeisen lalonai mai emu maduna haida, reana maduna badana ta, do oi gaukara goada sibona oi hamanaua totona, a? Oi abia hahenamodia eiava oi karaia gaukara namodia dainai Iehova do oi hanamoa, a? (1 Kor. 4:7) Aposetolo Paulo ia gwau: “Umui huanai idia noho taudia ta ta lau hamaoroa, namo lasi sibona do ia laloa bada, to ena laloa dalana amo do ia hahedinaraia ia laloa maoromaoro.”​—⁠Roma 12:3.

¹⁰ Iharuana be, Iehova ese Sebina ia sisiba auka henia neganai, reana Ia hahedinaraia Sebina be do ia goada lou. (Aon. 3:11, 12) Hari, Dirava ena kongrigeisen lalonai maduna idauidau idia haboioa taudia dekenai ia be haheitalai namona! Namo lasi idia badu, to Dirava idia hesiai henia goadagoada noho  herevana dahaka ia vara, bona namona be idia laloparara unai matahakani ese Iehova ena lalokau karana ia hahedinaraia. Laloatao, iseda Tamana be ita do ia hanamoa bema ita sibona ita hamanaua. (1 Pet. 5:6, 7 duahia.) Iehova ese mai lalokau ida ia henia matahakani ese ita ia hamaoromaoroa diba, bema ita manau bona raro manokana bamona ita noho.

¹¹ Ihatoina be, Iehova ese Sebina ia sisiba henia karana be mai anina bada mai edia maoro sisiba idia henia taudia dekenai, hegeregere tama sina bona elda taudia. Dahaka dainai? Iehova ena matahakani amo ia hahedinaraia kara dika ia inai henia, danu ia hahedinaraia unai kara dika tauna ia laloa bada. Bema oi be tama o sina eiava elda ta, matahakani oi henia neganai Iehova do oi tohotohoa, kara dika do oi inai henia bona emu natuna o emu tadikaka ta ena namo do oi tahua, a?​—⁠Iuda 22, 23.

12-14. (a) Haida ese Dirava ena matahakani be edena bamona idia laloa? (b) Dirava ena hereva ese edena dala ai tadikaka ta ia durua ena kara ia haidaua totona, bona dahaka hahenamo ia abia?

¹² Madi, haida be matahakani idia abia murinai, unai hisihisi ena badina idia lalopararalaia lasi dainai, Dirava bona ena taunimanima amo idia raka siri. (Heb. 3:12, 13) Anina be unai bamona taudia be heduru do idia abia diba lasi, a? Graham ena sivarai mani ita laloa, ia be kongrigeisen amo idia atoa siri, gabeai ia vareai lou, to haroro gaukara bona hebou ia lao lasi. Lagani haida murinai, ia ia tura henia namonamo elda ta ia noia, ia ida Baibel do ia stadilaia totona.

¹³ Unai elda tauna ia gwau: “Graham ena kerere be ia hekokoroku. Bona orea amo ia idia atoa siri elda taudia dekenai ia badu. Unai dainai emai stadi ma haida lalonai, ai ese hekokoroku karana bona ena dika ia herevalaia Baibel siridia ai kikilaia. Bena Graham be Dirava ena Hereva amo hevarivari bamona sibona ena kara bona kerere haida ia sekea matamaia, bona ia itaia gaudia ia ura henia lasi! Ia karaia senisi be hoa gauna! Bona ia laloparara hekokoroku be “au badana” ta bamona ena matana ia hakepulua bona ia abia dae ia vara gauna be iena kerere, unai dainai kara haraga ena mauri ia haidaua. Bena hanaihanai Keristani heboudia dekenai ia lao matamaia, Dirava ena hereva ia stadilaia namonamo, bona dina ta ta ai guriguri karana ia goadalaia. Danu ena Keristani ruma bese kwarana ena maduna idauidau ia huaia, unai ese ena hahine bona ena natuna kekeni toi ia hamoalea.”​—⁠Luka 6:41, 42; Iam. 1:23-25.

¹⁴ Unai elda ma ia gwau: “Nega ta, Graham ese lau ia hamaoroa gauna ese egu kudouna ia hamarerea. Ia gwau, ‘Hereva momokani be lagani momo lau diba, bona painia gaukara lau karaia danu. To mai momokani ida lau gwau diba, hari sibona Iehova lau lalokau henia.’ Daudau lasi murinai, ia idia noia Kingdom Hall ai maikrofon abia loaloa gaukarana ia karaia totona​—⁠unai hahenamo ia moalelaia bada. Iena haheitalai amo lau dibaia gauna be, bema ta be sibona ia hamanaua bona Dirava ena matahakani ia abia dae, hahenamo momo do ia abia!”

15. Bema ita ura matahakani henia tauna namona ai ita lao, dahaka ita karaia be namo?

¹⁵ Hadibaia tauna namona ai ita lao totona, stiuden namona ai ita lao guna be namo. (1 Tim. 4:15, 16) Unai hegeregerena, Dirava amo siahu idia abia taudia ese matahakani idia henia totona, mai ura bada ida Iehova ena hakaua herevadia idia badinaia noho be namo. Unai bamona manau karana dainai do idia matauraidia bona ma haida idia treinia o hamaoromaoroa neganai, mai gari lasi ida idia hereva diba. Mani Iesu ena haheitalai ita herevalaia.

16. Iesu ese matahakani ia henia bona ena hadibaia namonamo karana amo dahaka ita dibaia?

¹⁶ Iesu be hanaihanai iena Tamana ia kamonai henia namonamo, ena be nega haida  ia auka. (Mat. 26:39) Bona iena hadibaia daladia bona aonega dainai iena Tamana ia hanamoa. (Ioa. 5:19, 30) Iesu ena manau bona kamonai karana ese kudou maoro taudia ia veria mai ia kahirakahira, bona unai ese ia ia durua hebogahisi bona hadibaia tauna namona ai ia lao. (Luka 4:22 duahia.) Iena hereva ese lalomanoka taudia, siriho manokana o lamepa ena wiki ia maragi ia lao bamona taudia ia hagoadaia. (Mat. 12:20) Iesu ese ena aposetolo taudia be hebogahisi bona lalokau dalanai ia hamaoromaorodia, ena be idia ia badu henia diba badina idia huanai daika be bada idia hepapahuahulaia.​—⁠Mar. 9:33-37; Luka 22:24-27.

17. Dahaka kara namodia ese elda taudia ia durua Dirava ena mamoe naria taudia namodia ai idia lau totona?

¹⁷ Mai edia maoro Baibel amo matahakani idia henia taudia ibounai be do idia aonega bema Keriso ena haheitalai idia tohotohoa. Oibe, unai ese ia hahedinaraia idia ura Dirava bona ena Natuna ese idia do idia hamaoromaoroa. Aposetolo Petero ia gwau: “Dirava ena mamoe oreana, emui henari henunai idia noho be do umui naria. Ta ese umui ia doria dainai lasi, to sibona emui ura dainai do umui karaia. Koikoi dalanai kohu abia totona do umui karaia lasi, to mai emui ura bada ida umui karaia. Bona Dirava ese umui dekenai ia henia taudia do umui biagua auka lasi, to mamoe oreana dekenai haheitalai namona do umui hahedinaraia.” (1 Pet. 5:2-4) Momokani, mai moale ida Dirava bona Keriso, kongrigeisen ena kwarana, idia badinaia elda taudia, be idia sibona bona edia henari henunai idia noho taudia be namo do idia davaria.​—⁠Isa. 32:1, 2, 17, 18.

18. (a) Iehova ia ura tama sina be dahaka do idia karaia? (b) Edena dala ai Dirava ese tama sina ia durua edia maduna idia hagugurua totona?

¹⁸ Ruma bese lalonai unai hakaua herevadia idia badinaia be namo. Iehova ese ruma bese kwaradia ia hamaoroa, ia gwau: “Emui natudia do umui habadua lasi, to idia tubu noho lalonai, Iehova ena matahakani bona sisiba amo idia umui hadibaia be namo.” (Efe. 6:4) Dahaka dainai ia be mai anina bada? Aonega Herevadia 19:18 [NWT] ia gwau: “Natuna be ia kamonai bona ena kara ia haidaua diba negana ai oi matahakani henia, badina namo lasi emu natuna ena mase dainai oi dekenai kerere do ia noho.” Oibe, bema tama sina ese edia natudia idia matahakani henia lasi, Iehova vairanai tama sina be mai edia kerere. (1 Sam. 3:12-14) To, Iehova be tama sina dekenai aonega bona goada ia henia diba, bema mai manau ida guriguri amo ia idia noia, bona iena Hereva idia tahua bona iena lauma helaga ena hakaua dalana idia badinaia.​—⁠Iamesi 1:5 duahia.

19, 20. (a) Dirava ena matahakani badinaia karana ena hahenamo haida be dahaka? (b) Stadi gabena ai dahaka do ita herevalaia?

¹⁹ Bema Iehova ena matahakani ita abia dae bona Iehova bona Iesu ita tohotohoa matahakani henia karana dekenai, hahenamo momo do ita davaria. Danu, ruma bese bona kongrigeisen lalonai maino do ia vara. Ibounai ese lalokau do idia mamia, do idia mamia ta ese idia ia laloa bada, bona do idia gari lasi​—⁠unai be nega vairai do ita abia hahenamo haida. (Sal. 72:7) Oibe, ita hamomokania diba Iehova ena matahakani ese ita dekenai maino bona moale ai ita noho hanaihanai dalana ia hadibaia​—⁠ruma bese be tama ta ena henari henunai idia noho bamona. (Isaia 11:9 duahia.) Bema Dirava ena matahakani ita lalopararalaia, iena matahakani do ita abia dae: unai be Dirava ena lalokau hereadaena ita totona, gau ta ida oi hahegeregerea diba lasi.

²⁰ Stadi gabena ai, ita ese famili bona kongrigeisen lalonai matahakani henia ena dala haida do ita herevalaia. Danu sibona biagua karana bona matahakani dadaraia karana ese ia havaraia hisihisi do ita herevalaia.