1. Edena dala ai aonega ita abia, bona ena namo be dahaka?

IEHOVA be aonega ena Badina, bona mai harihari bada ida ena aonega ia henia. Iamesi 1:5 ena hereva hegeregerena: “Bema umui ta ena aonega be hegeregere lasi, namona be Dirava dekenai ia noinoi noho, bona Dirava ese ia dekenai do ia henia, badina ia be mai hariharibada ida taunimanima ibounai dekenai ia henia.” Dirava ena aonega ita abia dalana ta be iena matahakani ita abia dae. Bona unai aonega ese kara dikadia bona Dirava badinaia lasi karana amo ita ia gimaia diba. (Aon. 2:10-12) Unai dainai, “Dirava ena lalokau lalonai do [ita] noho. . . . mauri hanaihanai [ita] abia totona.”​—⁠Iuda 21.

2. Edena dala ai ita hahedinaraia diba Dirava ena matahakani ita laloa bada?

² To, eda karadika urana, eda famili maurina, bona gau ma haida dainai matahakani ita abia dae lasi o ena namo ita laloa lasi. Bema matahakani karana ese ia havaraia hahenamo ita laloa bada do ita moale, unai ese Dirava ena lalokau karana ita totona ia hahedinaraia. Aonega Herevadia 3:11, 12 ia gwau: “Egu natuna e, [Iehova] ena matakani oi dekenai, be do oi abia dae, . . . badina be [Iehova] ese ia lalokau henia taudia, be ia matakani henidia noho.” Oibe, namona be ita laloatao Iehova ese ita ia laloa bada. (Heberu 12:5-11 duahia.) Dirava be ita ia diba namonamo dainai, hanaihanai iena matahakani dalana be maoromaoro bona mai ena hetoana. Mani  inai matahakani henia daladia foa ita herevalaia: (1) sibona biagua karana, (2) tama sina idia henia matahakani, (3) Keristani kongrigeisen amo matahakani, bona (4) matahakani dadaraia karana ese ia havaraia hisihisi.

3. Edena dala ai natuna ese sibona biagua karana ia hahedinaraia diba? Haheitalai gwauraia.

³ Sibona biagua karana ena anina ma ta be iseda kara bona lalohadai biagua karana hanamoa totona. Sibona biagua hemamina ida ita vara lasi. Unai dainai sibona ita hadibaia be namo. Mani inai oi laloa: Bema natuna ta be nega ginigunana basikele taria ia dibaia, nega momo tamana ese basikele do ia dogoatao ia heau maoromaoro totona. To natuna be taria ia dibaia neganai, metairametaira tamana ese basikele do ia rakatania bona sibona do ia heau. Ela bona ia rakatania momokani bema natuna be basikele taria dalana ia diba namonamo. Unai hegeregerena, bema tama sina be nega ibounai mai haheauka ida “Iehova ena matahakani bona sisiba amo” edia natudia idia treinia, idia ese edia natudia idia durua sibona idia biagua bona idia aonega totona.​—⁠Efe. 6:4.

4, 5. (a) Dahaka dainai kara matamata atoa totona sibona biagua karana be mai anina bada? (b) Dahaka dainai ita hesiku lasi ena be ‘nega 7 do ita moru’?

⁴ Unai hakaua herevadia be Iehova idia dibaia tau bona hahine badadia dekenai ia herevalaia danu. Oibe, reana sibona biagua karana idia diba vadaeni. Danu bapatiso matamata Keristani tauna ta be natu maragina ta hegeregerena ia do goada lasi. To ia goada diba bema Keriso ena laloa dalana ia dibaia bona “kara matamata” ia atoa. (Efe. 4:23, 24) Unai ia vara totona sibona biagua karana be mai anina bada. Anina be, “Dirava ia ura lasi karadia bona tanobada ena ura idauidau do ita dadaraia bona inai nega oromana lalonai do ita noho mai laloa maoromaoro bona kara maoromaoro ida bona Dirava do ita badinaia noho.”​—⁠Tito 2:12.

⁵ Momokani, ita ibounai be kara dika do ita karaia diba. (Had. 7:20) Ta ia moru neganai, ita gwau lasi do ia goada lou lasi o sibona ia biagua diba lasi. Badina Aonega Herevadia 24:16 [NWT] ia gwau: “kara maoromaoro tauna be nega 7 do ia moru, to do ia gini lou.” Dahaka ese ia do ia durua ia goada lou totona? Sibona ena goada amo lasi, to Dirava ena lauma helaga ena heduru amo. (Filipi. 4:13 duahia.) Lauma helaga ena huahua ta be sibona biagua karana, ia be sibona hamaoromaoroa karana ida ia hegeregere.

6. Edena dala ai Dirava ena hereva ita stadilaia namonamo diba? (Laulau ginigunana herevalaia.)

⁶ Danu sibona biagua karana ita hahedinaraia totona gau badana be mai kudouna ibounai ida ita guriguri, Baibel ita stadilaia bona ita laloa dobu. To bema ia auka Dirava ena hereva oi stadilaia totona be edena bamona? Sedira oi laloa oi be stadi momo tauna lasi. Laloatao, bema Iehova dekenai oi tabekau ia ese oi do ia durua iena Hereva oi “ura henia dikadika” totona. (1 Pet. 2:2) Gau ginigunana be, Iehova oi guriguri henia oi ia durua sibona oi biagua Baibel oi stadilaia totona. Bena emu guriguri hegeregerena oi kara, reana emu Baibel stadilaia negana oi hakwadogia. Nega ia hanaia lalonai, Baibel stadilaia karana be do ia auka lasi bona do oi moalelaia! Momokani, regerege lasi negana ai Iehova ena lalohadai namodia oi laloa dobu karana do oi moalelaia.​—⁠1 Tim. 4:15.

7. Edena dala ai sibona biagua karana ese ita ia durua ita atoa tahua gauna ta ita hagugurua totona?

⁷ Sibona biagua karana ese ita ia durua Dirava hesiai henia karana dekenai iseda tahua gaudia ita hagugurua totona. Mai ena ruma bese tauna ta ita laloa, ia mamia Dirava hesiai henia urana ia boio ia lao noho. Unai dainai, ia atoa tahua gauna be regula painia gaukara do ia karaia bona iseda magasin ai painia gaukara  ia herevalaia atikol idauidau ia duahidia. Bona guriguri karana, ese ena Dirava hesiai henia karana ia hagoadaia bona ena ura ia habadaia. Danu dala ia tahua heduru painia do ia karaia totona bema ia hegeregere. Dahaka namo ia vara? Herevana koua gaudia be momo, to ia atoa tahua gauna ia laloa bada bona gabeai regula painia gaukara ia karaia.

8-10. Dahaka ese Keristani tama sina ia durua diba edia natudia idia hadibaia namonamo Iehova idia hesiai henia totona? Haheitalaia gwauraia.

⁸ Keristani tama sina dekenai hahenamo badana be “Iehova ena matahakani bona sisiba amo” edia natudia idia hadibaia karana. (Efe. 6:4) Unai gaukara be mai ena hekwarahi hari iseda negai. (2 Tim. 3:1-5) Momokani, natudia idia vara negana amo maoro bona kerere idia dibaia lasi. Mai edia lalomamina ida idia vara, to idia hadibaia bona biagua noho be namo. (Roma 2:14, 15) Baibel ia herevalaia bukana ta ia gwau, idia hahanaia Greek herevana “matahakani” be reana “natuna ena tubu dalana” ia herevalaia.

⁹ Lalokau dalanai matahakani idia abia natudia be namo idia davaria. Idia laloparara ura kwalimu be mai ena hetoana bona idia karaia disisen bona edia kara ese namo o dika ia havaraia diba. Unai dainai Keristani tama sina be Iehova ena heduru dekenai idia tabekau be mai anina bada. Laloaboio lasi mauri be ia idau ia lao noho dainai natuna naria dalana danu be ia idau noho. Tama sina ese Dirava idia kamonai henia neganai, natuna naria namonamo karana do idia dibaia; bona sibona edia aonega dekenai do idia tabekau lasi.

¹⁰ Noa ena haheitalaia mani ita laloa. Iehova ese Noa ia hamaoroa lagatoi do ia karaia neganai, sibona ena diba dekenai ia tabekau lasi. Badina ia ese guna lagatoi ta ia karaia lasi. Unai dainai Iehova dekenai ia tabekau, bona Iehova ese ia hagania “hereva ibounai hegeregere,” ia kara. (Gen. 6:22) Dahaka ia vara? Noa ese ena gaukara ia karaia namonamo dainai, ia bona ena ruma bese be idia mauri! Danu Noa be ruma bese naria tauna namona ai ia lao badina Dirava ena aonega dekenai ia abidadama. Ena natudia ia hadibadia namonamo bona idia totona haheitalai namona ia hahedinaraia, unai be mai ena hekwarahi badina Abata ia do vara lasi neganai kara dika be bada herea.​—⁠Gen. 6:5.

11. Edena dala ai tama sina edia haheitalai be mai anina bada natuna hadibaia karana dekenai?

¹¹ Bema oi be tama sina, edena dala ai Dirava vairanai, “ena hereva ibounai hegeregere” do oi kara? Iehova oi kamonai henia. Bona ia dekenai oi tabekau natuna naria namonamo dalana ia hadibaia totona, iena Hereva bona ena orea amo ita abia hakaua herevadia amo. Bema unai bamona oi karaia, gabeai emu natudia be oi do idia tanikiu henia! Mauri lagani 21 tadikaka ta, ia gwau: “Egu tama sina edia hadibaia dalana dainai lau moale bada. Idia hekwarahi bada lau idia durua Iehova lau hesiai henia totona. Hari lo Keristani tauna ai  lau lao dainai lau ura idia lau hanamoa.” Momokani, ena be tama sina idia hekwarahi, to natudia haida be Iehova idia rakatania. Herevana dahaka ia vara, to mai hekwarahi ida edia natuna ena kudouna ai hereva momokani idia atoa tama sina, be lalomamina goevana idia abia. Namona be idia abia dae edia gwau-edeede natuna be nega ta Iehova dekenai do ia giroa lou.

12, 13. (a) Bema natuna ta be orea murimuri ai idia atoa, edena dala ai Keristani tama sina do idia hahedinaraia Dirava idia kamonai henia? (b) Edena dala ai tama bona sina ta be Iehova idia kamonai henia dainai, ruma bese be namo ia davaria?

¹² Tama sina haida edia kamonai karana ia tohoa gauna badana ta be orea murimuri ai idia atoa natuna ida hebamo karana. Sina ta ena natuna kekeni be orea murimuri ai idia atoa dainai ruma ia rakatania ena sivarai mani ita laloa. Ena sinana ia gwau: “Iseda pablikeisen ai, ekskius daladia haida lau tahua unai amo egu natuna bona tubuna kekeni ida lau hebamo diba.” Ma ia gwau: To ena tau ese ia durua unai amo ia laloparara hari edia natuna be Iehova ena imana dekenai. Unai dainai, idia naria namonamo Dirava ena matahakani edia natuna dekenai idia koua lasi totona.

¹³ Lagani haida murinai, edia natuna ia vareai lou. Ena sinana ia gwau: “Hari lau ia rini eiava teks henia noho kahirakahira dina ibounai! Danu lau bona egu tau ia matauraia badina ia diba Dirava ai kamonai henia. Emai hetura karana ai moalelaia bada.” Bema emu natuna ta be orea amo idia atoa siri, oi be “[Iehova] do oi abidadama henia, mai emu kudouna ibounai [bona] sibona oiemu diba do oi abidadama henia lasi,” a? (Aon. 3:5, 6) Laloatao, Iehova ena matahakani ese iena aonega bona lalokau hereadaena ia hahedinaraia. Laloaboio lasi ena Natuna ia siaia ita ibounai totona, bona emu natuna danu. Badina Dirava ia ura lasi ta ia mase. (2 Petero. 3:9 duahia.) Unai dainai tama sina ese Iehova ena matahakani bona hakaua herevadia idia badinaia, ena be ia auka unai idia karaia totona. Oibe, Iehova ena matahakani ita abia dae, dadaraia lasi.

14. Edena dala ai “kohu naria tauna mai ena kamonai” ese Iehova ena hereva idia halasia amo namo ita abia?

¹⁴ Iehova ia gwauhamata ena Keristani kongrigeisen do ia naria, gimaia bona hakaua. Dala idauidau ai unai ia karaia. Hegeregere, ia ese kongrigeisen be iena Natuna ena siahu henunai ia atoa, bona Iesu ese “Kohu naria tauna mai ena kamonai” ia abia hidi nega korikori ai Dirava ena hereva idia halasia totona. (Luka 12:42) Dala idauidau ai mai anina bada hakaua herevadia, o sisiba idia henia. Sibona oi nanadaia, ‘Nega hida pablik tok o iseda magasin ta ai ia noho atikol ese lau ia durua egu lalohadai bona kara lau hanamoa totona?’ Bema oi dekenai unai ia vara, namona be oi moale! Badina oi ura Iehova ese oi ia hamaoromaoroa o sisiba henia, emu namo totona.​—⁠Aon. 2:1-5.

15, 16. (a) Edena dala ai elda taudia edia gaukara amo heduru ita abia diba? (b) Dahaka ita karaia diba elda ese edia gaukara idia moalelaia totona?

¹⁵ Danu Keriso ese kongrigeisen dekenai elda taudia be “harihari gaudia bamona” ia henia, Dirava ena mamoe oreana idia naria totona. (Efe. 4:8, 11-13) Edena bamona unai harihari gaudia namodia amo namo ita abia diba? Dala ta be elda taudia edia abidadama bona haheitalai namona ita tohotohoa, ma danu Baibel amo idia henia sisiba ita badinaia. (Heberu 13:7, 17 duahia.) Laloatao, elda taudia be ita idia lalokau henia bona idia ura eda hetura karana Iehova ida ia goada. Hegeregere, bema hebou momo ita reaia o iseda Dirava hesiai henia urana ia maragi ia lao, ita idia durua haraga diba. Ita do idia kamonai henia bona mai lalokau ida Baibel ena sisiba namodia amo ita do idia hagoadaia. Oi abia dae unai bamona heduru be Iehova ena lalokau oi totona, a?

 ¹⁶ Namona be oi laloatao nega haida do ia auka elda taudia ese ita idia sisiba henia totona. Mani peroveta tauna Natana ena haheitalai ita laloa, reana ia auka Davida do ia hereva henia totona, king ese ena kara dika rohorohona ia hunia toho murinai! (2 Sam. 12:1-14) Unai hegeregerena, Petero, aposetolo taudia 12 edia memba ta, ese ena Iuda tadikaka sibona ia kara namo henia neganai, aposetolo Paulo ese ia sisiba henia totona ia boga auka be namo. (Gal. 2:11-14) Unai dainai edena dala ai elda taudia edia gaukara do oi durua diba? Namona be oi manau, oi hereva henidia namonamo, bona tanikiu karana oi hahedinaraia. Bona oi abia dae edia heduru oi dekenai be Dirava ena lalokau toana. Unai ese oi sibona do ia durua lasi, to edia gaukara do idia moalelaia danu.

17. Elda taudia ese edena dala ai taihu ta durua?

¹⁷ Taihu ta be ena kara gunadia dainai, ia auka Iehova do ia lalokau henia totona. Unai taihu ia gwau: “Egu kara gunadia bona gau ma haida lau laloa neganai lau lalohisihisi. Bona lau diba elda taudia lau hereva henidia be namo. Idia ese lau idia kara auka henia o gwauraia dika lasi, to lau idia hagoadaia. Kongrigeisen heboudia ibounai murinai, ena be idia bisi bada, to idia ta ese lau do ia nanadaia bema lau namo. To egu kara gunadia dainai, lau laloa Dirava be lau ia lalokau henia lasi. To nega ta ta, Iehova be kongrigeisen bona elda taudia ia gaukaralaia iena lalokau lau dekenai ia hahedinaraia totona. Iehova lau guriguri henia ia do lau rakatania lou lasi.”

18, 19. Dahaka ese matahakani karana ena hisihisi ia hanaia? Haheitalai gwauraia.

¹⁸ Matahakani be mai ena hisihisi, to unai hisihisi ia hereaia gauna ta ia noho​—⁠unai be matahakani dadaraia karana. (Heb. 12:11) Mani Kaino bona King Sedekaia edia haheitalai oi laloa. Kaino ese Abela ia alaia neganai, Dirava be Kaino ia gwau henia, ia gwau: “Badina be dahaka oi badu noho? Badina dahaka oiemu vairana ia metau noho? Bema kara namo oi karaia vadaeni, be oiemu boubou do lau abia dae. To dika oi karaia vadaeni dainai, kara dika be oiemu iduara dekenai ia naria noho, oi do ia hadikaia totona. Kara dika be ia ura biagua oi, to oi ese do oi halusia be namo.” (Gen. 4:6, 7) To Kaino be ia kamonai lasi dainai, kara dika ese ia ia biagua. Bona Kaino ena mauri ibounai lalonai hisihisi ia davaria! (Gen. 4:11, 12) Bema Iehova ena matahakani ia abia dae, unai bamona hisihisi do ia davaria lasi.

¹⁹ Sedekaia be Ierusalema ia lohiaia negana ai ia be King dika rohorohona ta. Peroveta tauna Ieremia be Sedekaia ia hagoadaia loulou ena kara dikadia ia rakatania totona, to king Sedekaia be ia ura lasi Peroveta tauna Ieremia ena sisiba ia abia dae. Unai dainai dika momo ia davaria. (Ier. 52:8-11) Iehova be ia ura unai bamona dika amo ita ia hamauria!​—⁠Isaia 48:17, 18 duahia.

20. Vaira negana ai Dirava ena matahakani idia abia dae taudia, bona idia dadaraia taudia dekenai dahaka do ia vara?

²⁰ Hari taunimanima ese matahakani, bona sibona biagua karana idia laloa bada lasi. To kahirakahira unai bamona lalohadai idia abia taudia ese dika bada do idia davaria. (Aon. 1:24-31) Unai dainai ‘hadibaia hereva do ita kamonai henia, vadaeni aonega do ita davaria.’ Danu, Aonega Herevadia 4:13 ia gwau, “hadibaia hereva do oi dogoatao, do oi rakatania lasi. Inai diba do oi gimaia, badina ia be oiemu mauri ena badina.”