1. Keristani taudia ginigunadia be dahaka hekwakwanai idia davaria?

APOSETOLO Petero be lagani 62 bona 64 C.E. huanai, ‘Ponto, Galatia, Kapadokia, Asia, bona Bitunia edia gabu idauidau ai nega sisina idia noho taudia’ ia tore henidia. (1 Pet. 1:1) Asia Minor kongrigeisen ai idia noho mauri dala idauidau taudia be hagoadaia bona hakaua herevadia idia abia be namo. Badina idia be dagedage idia davaria bona idia dekenai hadikaia herevadia idia gwauraia. Idia ese “lahi bamona metau idauidau” idia davaria. Bona nega aukadia lalonai idia noho. Petero ia gwau: “Gau ibounai edia dokona be ia kahirakahira vadaeni.” Oibe, unai dagedage karana be lagani 10 ia do hanaia lasi neganai, Ierusalema idia hadikaia negana ai ia ore. Dahaka ese gabu ibounai dekenai idia noho Keristani taudia do ia durua unai nega aukadia idia haheaukalaia totona?​—⁠1 Pet. 4:4, 7, 12.

2, 3. Dahaka dainai Petero ese ena tadikaka ia hagoadadia heabidae karana idia hahedinaraia totona? (Laulau ginigunana herevalaia.)

² Petero ese ena tadikaka ia hagoadadia, ia gwau: “Namona be ta ta dekenai heabidae karana umui hahedinaraia.” (1 Pet. 4:9) Inai hereva “heabidae karana” Greek gado ai ena anina korikori be “ura henia, eiava idau taudia dekenai hebogahisi karana hahedinaraia.” To, Petero ese ena Keristani tadikaka bona taihu ia hagoadadia “ta ta dekenai” heabidae karana idia hahedinaraia, idia diba vadaeni  taudia bona idia ida idia hebamo taudia. Edena dala ai heabidae karana ese idia ia durua diba?

³ Unai ese idia ia hatamonaia diba. Mani oi dekenai ia vara ekspiriens oi laloa. Ta ese oi ia boiria ena ruma dekenai oi lao negana oi laloatao, a? Unai nega ai umui moale hebou karana oi do laloa noho, ani? Bona emu kongrigeisen taudia haida ida umui moale hebou neganai, emu hetura karana ia goada, ani? Dala idauidau ai eda tadikaka taihu dekenai heabidae karana ita hahedinaraia neganai, idia do ita diba namonamo. Petero ena negai idia noho Keristani taudia be nega aukadia ai idia noho dainai, edia hetura karana ia goada be namo. Hari inai “dina gabedia ai” Keristani taudia korikoridia ese unai idia karaia danu be namo.​—⁠2 Tim. 3:1.

4. Inai stadi ai edena henanadai do ita herevalaidia?

⁴ Edena bamona negadia ai “ta ta dekenai” heabidae karana ita hahedinaraia diba? Edena dala ai heabidae karana idia koua gaudia ita hanaia diba? Dahaka ese ita ia durua diba heabidae tauna namona ai ita lao totona?

5. Edena dala ai iseda Keristani heboudia dekenai heabidae karana ita hahedinaraia diba?

⁵ Hebou ai: Iseda Keristani heboudia dekenai idia mai vadivadi taudia ibounai ita welkam henia, Dirava ena hereva idia kamonai totona. Iehova bona iena orea ese ita ibounai dekenai heabidae karana idia hahedinaraia. (Roma 15:7) Kamonai taudia idia mai neganai, idia dekenai heabidae karana ita hahedinaraia be namo. Herevana edia dabua bona toana be edena bamona, namona be mai moale ida idia ita welkam henia. (Iam. 2:1-4) Bema kamonai tauna ta be sibona ia mai, ia oi boiria emu badinai ia helai totona, a? Do ia moale bema ta ese ia durua hebou ena program ia badinaia bona idia duahia Baibel siridia ia davaria totona. Unai be dala namona “heabidae karana ena dala umui badinaia” totona.​—⁠Roma 12:13.

6. Daidia dekenai heabidae karana ita hahedinaraia be namo?

⁶ Aniani neganai: Baibel negadiai, ruma tauna ese ta ia boiria aniani totona be heabidae karana hahedinaraia dalana ta. (Gen. 18:1-8; Gun. 13:15; Luka 24:28-30) Haida idia boiria aniani totona be hebamo bona maino havaraia karana ta. Daidia dekenai heabidae karana ita hahedinaraia be namo? Eda tadikaka bona taihu kongrigeisen lalonai. Nega aukadia idia ginidae neganai, ta ta do ita durua heheni, ani? Ita ura unai bamona tura namodia bona idia ida maino ai ita noho be namo. Lagani 2011 lalonai Hakaua Oreana ese United States ena Betele famili Gima kohorona stadi ena nega be 6:45pm amo idia haidaua 6:15pm. Dahaka dainai? Unai hadibaia herevana ai idia gwau, hebou ia ore haraga dainai Betele taudia ese heabidae karana be ta ta dekenai idia hahedinaraia diba. Brens ofesi ma haida ese unai dala idia badinaia danu. Unai dala amo Betele famili be ta ta idia dibaia namonamo.

7, 8. Edena dala ai pablik tok idia henia vadivadi tadikaka dekenai heabidae karana ita hahedinaraia diba?

⁷ Pablik tok henia tadikakadia be nega haida kongrigeisen ma haida amo idia mai, danu sekit naria taudia, bona nega haida brens ofesi ese ia siaia tadikaka idia vadivadi. Unai be nega namona heabidae karana ita hahedinaraia totona. (3 Ioane 5-8 duahia.) Dala namona ta be idia ita boiria eda ruma dekenai ita aniani hebou totona. Oi heduru diba, a?

⁸ United States ai taihu ta ia gwau: “Idia hanaia laganidia lalonai, lau bona egu adavana be tok idia henia vadivadi tadikakadia bona edia adavadia ai abia dae emai ruma dekenai. Unai bamona negadia ai moalelaia bada, bona emai abidadama ia hagoadaia. Unai ai lalohisihisilaia lasi.”

9, 10. (a) Daidia be do idia noho daudau vadivadi taudia? (b) Ena be ta ena ruma be ia maragi, heduru ia henia diba, a? Haheitalai gwauraia.

 ⁹ Do idia noho daudau vadivadi taudia: Baibel negadiai, heabidae karana ma ta be laolao taudia idia abia dae edia ruma dekenai idia noho totona. (Iobu 31:32; File. 22) Hari inai negai danu, unai ita karaia diba. Nega momo sekit naria taudia be kongrigeisen idia vadivadi henidia neganai, noho gabudia idia tahua. Tiokratik sikuli idia lao stiuden bona konstraksen volantia taudia danu be noho gabudia do idia tahua. Danu disasta badadia dainai famili haida be edia ruma idia haboioa bona noho gabudia do idia tahua ela bona heduru idia henia taudia ese edia ruma idia haginia lou. Namo lasi ita laloa mai edia ruma namodia taudia sibona ese heduru idia henia diba; reana idia be nega momo unai idia karaia vadaeni. Ena be emu ruma be ia maragi, to heduru oi henia diba, a?

¹⁰ South Korea ai tadikaka ta ese tiokratik sikuli totona idia lao stiuden ia abia dae ena ruma dekenai idia noho totona. Ia gwau: Matamanai lau bona egu adavana be ai daradara badina ai be headava matamata taudia bona ruma maragina dekenai ai noho. To unai stiuden taudia ai abia dae karana be moale bada gauna. Ai be headava matamata dainai, headava taudia ese Iehova idia hesiai henia bona Basileia totona tahua gaudia idia karaia hebou neganai idia abia moalena ai itaia diba.”

11. Dahaka dainai kongrigeisen ma ta amo idia mai tadikaka taihu dekenai heabidae karana ita hahedinaraia?

¹¹ Kongrigeisen ma ta amo idia mai tadikaka taihu: Reana emu gabu ai haida be sibodia o famili ida idia mai. Reana idia mai badina emu gabu ai pablisa be momo lasi. Eiava painia taudia idia siaia emu kongrigeisen idia durua totona. Idia ibounai dekenai gau momo hegeregere gabu, kongrigeisen, gado bona kastom be matamata. Bema idia ita boiria ita aniani eiava loaloa hebou neganai, idia do ia durua ma haida idia dibaia bona edia noho dala matamatana idia manadalaia totona.

12. Edena haheitalai ese ia hahedinaraia heabidae karana be aniani badana hegaegaelaia karana sibona lasi?

¹² Heabidae karana ita hahedinaraia totona aniani badana ita karaia be anina lasi (Luka 10:41, 42 duahia.) Tadikaka ta be guna misinari gaukara ia karaia negana ia laloa lou neganai, ia gwau: “Unai negai ai be matamata, gau momo ai diba lasi, bona emai famili ai reaia bada. Nega ta egu adavana be ena famili ia reaia bada dainai ia lalohekwarahi, bona lau hekwarahi ia lau hamoalea totona. Bena 7:30 p.m. adorahi kahanai, iduara dekenai ta ia pidipidi ai kamonai. Baibel stiuden ta be ai totona orensi toi ia mailaia ai ia welkam henia totona. Ai boiria vareai emai ruma dekenai bona ranu ai henia. Bena ti bona hot chocolate ai karaia. Unai negai Swahili gado ai do diba lasi, ia danu be English gado ia diba lasi. To unai negai ia vara gauna dainai ai moale bada badina unuseniai idia noho tadikaka taihu ida ai hebamo diba.”

13. Heabidae karana ese dahaka namo ia havaraia?

¹³ Nega ta heabidae karana oi dadaraia, a? Bema oibe, reana do oi moalelaia negana ta bona do ia noho hanaihanai hetura karana oi reaia. Heabidae karana be sibona idia noho taudia dekenai be muramura namona ta. To do oi laloa, ‘Dahaka dainai ta be heabidae karana ia dadaraia?’ Reana badina haida dainai.

14. Dahaka ita karaia diba bema iseda nega bona goada be ia hegeregere lasi heabidae karana ita abia dae o hahedinaraia totona?

¹⁴ Nega bona goada: Iehova ena hesiai taudia be idia bisi bada bona nega haida edia gaukara be momo. Haida idia mamia edia nega bona goada be ia hegeregere lasi heabidae karana idia hahedinaraia totona. Bema unai ia vara, reana namona be emu sediual oi sekea.  Oi be gau haida do oi haidaua, unai amo oi be mai emu nega bona goada heabidae karana oi abia dae o hahedinaraia totona, a? Baibel ese Keristani taudia ia hagoadaia heabidae karana idia hahedinaraia totona. (Heb. 13:2) Unai ita karaia be kerere lasi, badina ia be kara maorona. Bona reana anina lasi gaudia haida ita dadaraia diba.

15. Heabidae karana hahedinaraia totona, haida be dahaka idia lalohekwarahilaia?

¹⁵ Oi sibona emu hemami: Nega haida oi ura heabidae karana oi hahedinaraia to oi mamia oi be hegeregere lasi, a? Haida idia hemarai bona idia gari badina idia laloa edia vadivadi taudia be do idia hesiku. Ma haida be moni dalanai idia hegeregere lasi dainai, idia laloa idia henia gauna be kongrigeisen ai haida ese idia henia gaudia ida ia hegeregere lasi. Laloatao, ta ena ruma ai kohu namodia idia noho be gau badana lasi, to mai anina bada gauna be eda ruma ia goeva, toana ia namo, bona ma haida tura henia karana ita hahedinaraia.

16, 17. Dahaka oi karaia diba bema vadivadi taudia oi abia dae totona oi lalohekwarahi?

¹⁶ Bema oi lalohekwarahi vadivadi taudia oi abia dae totona, oi sibona be unai bamona oi mamia lasi. Britain dekenai elda ta ia gwau: “Nega haida do oi gari bema vadivadi taudia totona gau haida oi ura hegaegaelaia. To Iehova ena hesiai gaukara amo oi abia hahenamo bona moale ese oi abia lalohekwarahi ia hereaia. Egu vadivadi taudia ida ai helai, kofi ai inua hebou, bona herevahereva karana lau moalelaia.” Namona be oi laloatao, emu vadivadi taudia oi laloa bada karana ese oi do ia durua. (Fili. 2:4) Momo ese unai kara idia moalelaia. Unai bamona moale karadia ai, momo be do idia ura eda ekspiriens idia kamonai. Elda ma ta ia gwau: “Egu ruma dekenai kongrigeisen turadia lau boiria mai karana ese lau ia durua idia ta ta lau diba namonamo bona edena bamona hereva momokani ai idia vareai dalana lau diba.” Bema ita hahedinaraia ma haida ita laloa bada, iseda heabidae karana do idia moalelaia.

¹⁷ Tiokratik sikuli idauidau idia lao stiuden haida ia abia dae painia taihuna ta ia gwau: “Matamanai lau lalohekwarahi badina egu ruma be maragi bona lau gaukaralaia gaudia be gunadia. To sikuli ena hadibaia tauna ta ena adavana ese lau ia hagoadaia. Ia gwau, iena adavana ida loaloa gaukara idia karaia lalonai, Dirava ena ura ia laloa bada bona reana kohu momo lasi tauna ida idia noho nega namodia idia moalelaia bada badina edia lalohadai be tamona​—⁠Iehova hesiai henia karana bona kohu momo tahua lasi maurina. Unai sivarai amo ai maragi neganai egu sinana ia gwauraia herevana lau laloa, ia gwau: ‘Raisi sibona, oiemu lalokau taudia danu do oi ania be namo.’”(Aon. 15:17) Namona be lalokau ese oi ia durua heabidae karana oi hahedinaraia totona, bona oi lalohekwarahi lasi.

18, 19. Edena dala ai heabidae karana ese ita ia durua ma haida dekenai ita abia hemami dikadia ita hanaia totona?

¹⁸ Emu hemami ma haida dekenai: Kongrigeisen ai ta ese ena hereva o kara amo oi ia habadua, a? Reana unai tauna dekenai emu hemami do ia dika bona unai hemami dikana do ia ore lasi, bema hamaoromaoroa totona kara ta oi karaia lasi. Ta ena kara dainai do oi ura lasi emu ruma dekenai ia oi boiria mai. Eiava ta ese guna oi ia hahisia dainai, ia karaia karana oi laloaboio diba lasi.

¹⁹ Oi idia inai henia taudia dekenai emu hetura karana oi hanamoa totona, Baibel ese ia herevalaia heabidae karana hahedinaraia. (Aonega Herevadia 25:21, 22 duahia.) Ta dekenai heabidae karana oi hahedinaraia neganai unai ese hemami dikadia abia kava karana do ia hamaragia bona do oi badu momo lasi. Bona emu vadivadi taudia be kara namodia idia hahedinaraia diba, Iehova ese hereva momokani dekenai ia veria mai neganai ia itaia kara namodia unai (Ioa. 6:44) Bema lalokau karana oi ura habadaia, oi diba namonamo lasi tauna ta oi boiria, unai ese hetura namonamo karana ena dala do ia kehoa. Edena bamona do oi hamomokania lalokau dainai  unai kara oi karaia? Dala ta be Filipi 2:3 ena hagoadaia herevana oi badinaia, ia gwau: “Mai manau ida do umui laloa ma haida ese umui idia hereaia.” Iseda tadikaka taihu ese ita idia hereaia daladia ita laloa​—⁠reana edia abidadama, haheauka, gari lasi karana o Keristani karadia ma haida​—⁠ese iseda lalokau do ia hagoadaia bona dala do ia kehoa heabidae karana ita hahedinaraia totona.

20. Dahaka dainai bona edena dala ai ita abia invateisen ita laloa bada be namo?

²⁰ Salamo torea tauna Davida ia henanadai: “Lohiabada e, daika be oiemu Dubu Helaga dekenai do ia noho?” (Sal. 15:1) Unai henanadai murinai, ia be vadivadi taudia edia Keristani kara namodia ia herevalaia. Unai kara ta be inai, ita gwauraia gauna ita badinaia: ‘Iseda gwauhamata hereva do ita badinaia, ena be ia auka herea, do ia idau lasi, do ita badinaia noho.’ (Sal. 15:4) Bema ta ese iena ruma dekenai ita ia boiria, iseda palani ita haidaua lasi bema mai ena badina namona ta lasi. Reana ita ia abia dae tauna be ita totona ia hegaegae vadaeni, bona iena hekwarahi ibounai be anina lasi bema ita lao lasi. (Mat. 5:37) Taunimanima haida be invateisen ginigunana idia dadaraia, to idia be invateisen ma ta idia abia dae badina idia laloa unai be namona. Unai be lalokau bona hemataurai karana, a? Namona be ita ia boiria tauna ena heabidae karana be mai moale ida ita abia dae. (Luka 10:7) Bema ita hanaia diba lasi hekwakwanai ta dainai do ita lao lasi, namona be ita ia boiria tauna ita hadibaia haraga badina unai be lalokau bona hebogahisi karana.

21. Edena dala ai ma haida edia kastom matauraia karana ese ita ia durua vadivadi taudia namodia ai ita lao totona?

²¹ Ma haida edia kastom matauraia karana be mai anina bada. Tano haida ai, idia boiria lasi taudia idia abia dae sibona, to haida be idia hadibadia guna taudia sibona idia abia dae. Tano ma haida ai, heabidae taudia ese aniani namodia be vadivadi taudia dekenai idia henia guna, to edia famili be gabeai; to haida dekenai, famili bona vadivadi taudia idia aniani hebou. Gabu ma haida ai, vadivadi taudia be idia heduru totona aniani idia mailaia danu; to ma haida be idia ura lasi edia vadivadi taudia dekenai metau idia henia. Bona gabu ma haida ai, vadivadi taudia ese mai hemataurai ida edia invateisen ginigunana o iharuana idia dadaraia; to ma haida dekenai unai be ta ena invateisen abia dae o laloa bada lasi karana. Ita idia invait taudia ita hamoalea totona mai lalona ibounai ida edia heabidae karana ita abia dae be namo.

22. Dahaka dainai ‘ta ta dekenai heabidae karana ita hahedinaraia’ be mai anina bada?

²² Baibel ese ia hahedinaraia, “Gau ibounai edia dokona be ia mai kahirakahira.” (1 Pet. 4:7) Bona ita be hisihisi badana guna ita itaia lasi gauna ita vaira henia noho. Unai dainai metau badadia idia vara noho lalonai, iseda lalokau ita bona iseda tadikaka taihu huanai ia goada be namo. Guna bamona lasi, Petero ena sisiba herevana Keristani taudia dekenai be: “Namona be ta ta dekenai heabidae karana umui hahedinaraia,” ia be mai anina bada bona do ia doko diba lasi karana.​—⁠1 Pet. 4:9.