1. Natudia idia do bapatiso lasi neganai, tama sina be dahaka idia karaia guna be namo?

“HUA momo lalonai egu tamana bona sinana lau hamaoroa lau ura bapatiso, bona lau ida unai idia herevalaia momo. Idia ura diba bema lau laloparara do lau karaia abia hidi be mai anina bada. Bena December 31, 1934 ai, lau bapatiso.” Blossom Brandt ia ura bapatiso neganai, unai ia vara. Hari danu, Keristani tama sina idia ura edia natudia idia durua, unai amo abia hidi maorodia idia karaia diba. Idia diba bema badina namona lasi dainai natuna idia koua ia bapatiso totona, unai ese natuna ena hetura karana Iehova ida idia hadikaia diba. (Iam. 4:17) To, idia do bapatiso lasi neganai, tama sina idia ura diba bema edia natudia be idia hegeregere hahediba taudia halaoa gaukarana do idia karaia.

2. (a) Sekit naria taudia haida be dahaka idia itaia? (b) Inai stadi ai dahaka do ita herevalaia?

² Sekit naria taudia haida idia itaia matamata taudia momo, mauri lagani 19 ia lao 21 bamona, be idia do bapatiso lasi, herevana  Keristani ruma besena lalonai idia tubu daekau. Unai matamata taudia be nega momo kongrigeisen heboudia dekenai idia lao, idia haroro, bona idia gwau idia be Iehova ena Witnes taudia. To, badina haida dainai Iehova dekenai edia mauri idia gwauhamatalaia lasi bona idia bapatiso lasi. Dahaka dainai? Reana edia tama sina ese idia hagoadaia idia bapatiso haraga lasi totona. Inai stadi ai, ita ese Keristani tama sina haida ese edia natudia idia koua bapatiso abia totona ena badina 4 do ita herevalaia.

3. Blossom ena tama sina be dahaka idia lalohekwarahilaia?

³ Blossom ena tama sina be idia lalohekwarahi, badina idia ura diba bema edia natuna kekeni be bapatiso ena anina ia lalopararalaia. Tama sina be edena bamona do idia diba bema edia natuna be ia hegeregere ena mauri ia gwauhamatalaia totona?

4. Iesu ena hahegani Mataio 28:19, 20 ese edena dala ai tama sina ia durua diba?

⁴ Mataio 28:19, 20 duahia. Vanegai stadi bamona, ta do ia bapatiso laganina be Baibel ia gwauraia lasi. To, tama sina ese ta be hahediba tauna ai halaoa karana ena anina idia laloa neganai, unai ese idia do ia durua. Mataio 28:19, 20 ai, inai hereva idia hahanaia “hahediba taudia ai umui halaoa” ena anina be ma haida oi hadibaia, badina oi ura idia be Keriso murinai idia raka. Hahediba tauna be Iesu ena hadibaia herevadia ia dibaia, lalopararalaia, bona ia ura badinaia. Unai dainai edia natudia idia do beibi neganai, namona be tama sina ese idia hadibadia, unai amo idia bada neganai, edia mauri idia gwauhamatalaia diba bona Keriso ena hahediba taudia ai do idia lao. Momokani, beibi maragina be ia hegeregere lasi ia bapatiso totona. To Baibel ese ia hahedinaraia, natudia maragidia be hereva momokani idia lalopararalaia bona idia ura henia diba.

5, 6. (a) Baibel ese Timoteo ia herevalaia dalana amo dahaka ita dibaia ena bapatiso amo? (b) Tama sina ese edena dala ai edia natudia idia durua diba?

⁵ Timoteo be ia matamata neganai, Iehova ia hesiai henia matamaia. Aposetolo Paulo ia gwau Timoteo be ia beibi negana amo Toretore Helagadia ia diba. Ena be ena tamana be Iehova ia tomadiho henia lasi, to iena sinana bona tubuna hahine ese ia idia durua Toretore Helagadia ia ura henia totona. Unai dainai iena abidadama ia goada. (2 Tim. 1:5; 3:14, 15) Iena mauri lagani be 20 bamona neganai, ia be Keristani hahediba tauna ai ia lao bona kongrigeisen lalonai hahenamo haida ia abia.​—⁠Kara 16:1-3.

⁶ Momokani, natudia ibounai be idau; idia be nega tamona lo taudia ai idia lao diba lasi. Natudia haida be idia matamata neganai, hereva momokani idia lalopararalaia, abia hidi maorodia idia karaia, bona idia ura bapatiso. To haida be reana do idia hegeregere lasi ela bona idia bada sisina. Unai dainai, namo lasi tama sina ese edia natudia idia doria idia bapatiso totona. To natudia ta ta edia goada hegeregerena idia durudia idia goada idia lao totona. Tama sina be idia moale bema natu ta be Aonega Herevadia 27:11. (Duahia.) ena hereva ia badinaia. To, namona be idia laloatao edia tahua gauna be edia natudia do idia durua Keristani hahediba taudia ai idia lao totona. Unai dainai, tama sina be sibona do idia nanadaia, ‘Egu natuna be Baibel ena hereva ia lalopararalaia namonamo, unai amo Dirava dekenai ena mauri ia gwauhamatalaia bona ia bapatiso diba, a?’

7. Bema ta ia ura bapatiso, Baibel ena hereva ibounai ia dibaia namonamo guna gabeai ia bapatiso diba, a? Herevalaia.

⁷ Tama sina be edia natudia idia hadibaia, badina idia ura idia be hereva momokani idia diba namonamo, unai amo Dirava dekenai edia mauri idia gwauhamatalaia diba. To, namo lasi ita laloa natu ta be Dirava ena hereva ibounai ia dibaia guna be namo, gabeai Dirava dekenai ena mauri do ia gwauhamatalaia bona ia bapatiso. Bapatiso murinai, hahediba taudia ibounai be diba maoromaoro idia abia noho be namo. (Kolose 1:9, 10 duahia.) Ta ia bapatiso totona, dahaka ia diba be gau badana?

8, 9. Paulo bona dibura naria tauna edia sivarai amo dahaka ita dibaia?

⁸ Idaunegai ia noho ruma bese ta ena sivarai ese tama sina momo ia durua diba. (Kara 16:25-33) Lagani 50 C.E. bamona ai, Paulo be ena misinari loaloa iharuana ia karaia neganai, Filipi ia vadivadi henia. Unuseniai, ia bona ena bamona Sila idia samania koikoi bona dibura ruma ai idia atodia. Hanuaboi ai, tano mareremarere bada ia vara bona dibura ruma ena badina idia marere bona ena iduara ibounai idia kehoa. Dibura naria tauna ia gari badina ia laloa dibura taudia ibounai idia heau boio vadaeni, unai dainai ia ura sibona ia alaia mase neganai, Paulo be ia dekenai ia boiboi. Bena Paulo bona Sila ese unai tauna bona ena ruma bese dekenai Iesu ena sivarai momokanina idia gwauraia. Idia kamonai herevadia idia abia dae dainai dahaka idia karaia? Maoromaoro bapatiso idia abia. Unai sivarai amo dahaka ita dibaia?

⁹ Reana guna unai dibura naria tauna be Roma tuari tauna. Bona Dirava ena Hereva ia diba namonamo lasi. Unai dainai Keristani tauna ai ia lao totona, namona be Baibel ena hereva momokani ia diba, Dirava hesiai henia ena anina ia lalopararalaia, bona mai ura ida Iesu ena hahediba herevadia ia badinaia. Unai nega kwadogina lalonai ia dibaia gaudia ese ia idia hagoadaia bapatiso ia abia totona. To, ia bapatiso murinai, iena diba Baibel dekenai ia habadaia. Unai dainai bema emu natuna be oi ia hamaoroa ia ura bapatiso, badina Iehova ia lalokau henia bona ia ura Ia ia badinaia, dahaka do oi karaia? Namona be oi hadibaia elda taudia do ia itaia, bena abia hidi do idia karaia bema ia hegeregere bapatiso ia abia totona. * Idia bapatiso Keristani taudia ma haida bamona, iena mauri ibounai lalonai ia ese Iehova do ia dibaia noho ela bona hanaihanai.​—⁠Roma 11:33, 34.

10, 11. (a) Tama sina haida be dahaka idia laloa? (b) Tama o sina ta ese idia laloa guna gauna be dahaka?

¹⁰ Tama sina haida idia laloa edia natuna be sikuli badana ta ia lao bona moni gaukara namona ia abia murinai, ia bapatiso be namo. Edia lalohadai be kerere lasi, to unai ese edia natuna do ia durua, a? Unai be Baibel ena lalohadai hegeregerena, a? Iehova ia ura iseda mauri be edena bamona do ita gaukaralaia?​—⁠Hadibaia Tauna 12:1 duahia.

¹¹ Namona be ita laloatao inai tanobada bona ia lalonai idia noho gaudia ibounai be Iehova ese ia moalelaia lasi bona iena laloa dalana hegeregerena lasi. (Iam. 4:7, 8; 1 Ioa. 2:15-17; 5:19) Iehova tura  henia karana ese natudia be Satani, iena tanobada, bona ena lalohadai dikadia amo do ia gimadia. Bema tama o sina ta ese ena natuna ia hagoadaia mauri namona abia urana ia atoa guna, ena natuna be do ia daradara bona ena hetura karana Iehova ida do ia hadikaia diba. Lalokau Keristani tama o sina do idia ura edia natuna be inai tanobada ena lalohadai ese ia idia biagua, a? Momokani, iseda mauri lalonai Iehova ita atoa guna neganai moale korikorina do ita davaria.​—⁠Salamo 1:2, 3 duahia.

12. Dahaka dainai tama sina haida ese edia natuna idia koua idia bapatiso totona?

¹² Keristani sina ta be ena natuna ia koua bapatiso do ia abia lasi ena badina ia gwauraia neganai, ia gwau, “Lau hemarai inai lau gwauraia totona, ia lau koua ena badina badana be lau gari dika ia be orea murimuri ai idia atoa.” Unai taihu bamona, tama sina haida idia laloa edia natuna ia bapatiso lasi be namo ela bona ena laloa dalana be taunimanima badadia edia lalohadai hegeregerena. (Gen. 8:21; Aon. 22:15) Reana idia laloa, ‘Egu natuna ia do bapatiso lasi dainai, orea murimuri ai do idia atoa lasi.’ Dahaka dainai inai be lalohadai kererena?​—⁠Iam. 1:22.

13. Bema ta be bapatiso ia abia lasi Iehova ese do ia hahemaoro henia lasi, a? Gwauraia hedinarai.

¹³ Keristani tama sina be do idia ura lasi edia natuna be bapatiso ia abia, bema Iehova dekenai iena mauri ia gwauhamatalaia lasi. To, tama sina do idia laloa edia natuna ia bapatiso lasi dainai Iehova ese do ia hahemaoro henia lasi. Unai be momokani, a? Iehova dekenai iseda kara ena badina be bapatiso ese do ia hahedinaraia lasi. To, bema natuna ta be dika bona namo ena idau ia diba Iehova ena matanai ia kara dika unai. (Iamesi 4:17 duahia) Namo lasi tama sina ese edia natuna idia doria bapatiso ia abia totona, to aonega tama sina be idia gaukara goada edia natuna dekenai haheitalai namona idia hahedinaraia totona. Edia ura badana be natuna ia beibi neganai idia durua mai kudouna ibounai ida Iehova ena taravatu namodia ia laloa bada. (Luka 6:40) Unai bamona oi karaia neganai, emu natuna do ia durua Iehova ena dala ai ia raka totona.​—⁠Isa. 35:8.

14. Edia natudia idia durua do idia bapatiso tama sina be edena dala ai elda taudia ese idia durua diba?

¹⁴ Kongrigeisen elda taudia be mamoe naria taudia dainai, tama sina edia hekwarahi idia hanamoa bona idia dekenai tahua gaudia namodia idia herevalaia. Lagani 70 mai kahana lalonai painia gaukara ia karaia taihu ta ena mauri lagani be 6 neganai, Tadikaka Charles T. Russell ida ia herevahereva negana ia laloatao. Ia gwau: “Tadikaka be lau ida miniti 15 lalonai egu tahua gaudia ai herevalaia hebou.” Oibe, hagoadaia hereva namodia amo ta ia haheauka diba. (Aon. 25:11) Elda taudia ese Kingdom Hall gaukaradia lalonai tama sina bona natudia idia gaukaralaia diba, bona matamata taudia edia lagani bona diba hegeregerena gaukara idia henia.

15. Edena dala ma haida ai kongrigeisen taudia ese matamata taudia idia durua diba?

¹⁵ Namona be kongrigeisen taudia ese matamata taudia laloa bada karana maorona idia hahedinaraia. Hegeregere, namona be idia itaia mero o kekeni be orea lalonai ia goada noho eiava. Matamata tauna ta be haere namona ta ia henia o  wiki ena hebou lalonai kahana namona ta ia henia, a? Eiava matamata tauna ta be mai abidadama ida hahetoho ia hanaia o sikuli gabunai ia haroro, a? Karaharaga ita hanamodia be namo. Hebou dekenai oi do lao lasi neganai, palani oi karaia matamata taudia ida oi herevahereva totona, a? Matamata taudia dekenai inai bamona dala idauidau ai oi kara heniadia, do idia mamia ‘hebou lalonai’ idia be mai anina bada.​—⁠Sal. 35:18.

16, 17. (a) Ta ena mauri lalonai dahaka dainai bapatiso karana be mai anina bada? (b) Keristani tama sina be dahaka do idia moalelaia bada? (Laulau ginigunana herevalaia.)

¹⁶ Keristani tama sina ese edia natuna be “Iehova ena matahakani bona sisiba” amo idia hadibaia be hahenamo ta. (Efe. 6:4; Sal. 127:3) Israela natudia be idia idau, Keristani tama sina edia natudia be Iehova ese ia abia hidi Israela besena amo idia vara lasi. Danu, idia vara neganai Dirava ena lalokau bona hereva momokani be edia tama sina amo idia abia hanai lasi. Natuna ia vara dinana amo, tama sina ese ia idia hadibaia be namo, bona ia idia durua noho iena mauri ia gwauhamatalaia bona Iehova ena bapatiso hesiai tauna ai do ia lao. Dahaka be mai anina bada? Gau badana be ta ta ese sibona iena mauri do ia gwauhamatalaia, bapatiso ia abia, bona mai abidadama ida Dirava do ia hesiai henia unai amo hisihisi badana do ia hanaia diba.​—⁠Mat. 24:13.

¹⁷ Taihu Blossom Brandt be bapatiso totona iena lalona ia hadaia neganai, iena tama sina idia ura diba bema ia hegeregere iena mauri lalonai ia karaia abia hidi badana ia badinaia totona. Ena tama sina idia abia dae ia hegeregere neganai, iena abia hidi dekenai ia idia durua. Ena bapatiso do lasi hanuaboina ai ena tamana be kara namona ta ia karaia. Blossom ia gwau: “Ai toiosi . . . ai tui diho, bena [tamana] ia guriguri. Iehova ia hamaoroa, ia moale bada badina be ena natuna maragina ese ena mauri ia gwauhamatalaia.” Lagani 60 mai kahana murinai, Blossom ma ia gwau: “Unai hanuaboi do lau laloaboio diba lasi!” Tama sina bema umui itaia emui natudia be Iehova dekenai edia mauri idia gwauhamatalaia bona ena hesiai taudia ai idia lao neganai, do umui moale bada.