1-2. Kara 8:27-31, 35-38 ena hereva bamona, dahaka ese dagi bada Etiopia tauna ia durua bapatiso ia abia totona?

OI URA bapatiso oi abia bona Keriso ena hahediba tauna ta ai oi lao, a? Iehova lalokau henia bona laloa bada karana ese momo ia durua unai abia hidi idia karaia totona. Mani Etiopia ena kwini ia hesiai henia tauna ena haheitalai ita laloa.

² Etiopia tauna be Toretore Helagadia amo ia dibaia gaudia dainai maoromaoro kara ta ia karaia. (Kara 8:27-31, 35-38 duahia.) Dahaka dainai unai bamona ia karaia? Badina ia ese Dirava ena Hereva ia laloa bada; kariota amo ia lao noho lalonai, Isaia ena revareva kahana haida ia duahia. Bona Filipo ese ia hereva henia neganai, unai tauna be Iesu ese ia dainai ia karaia gauna ia laloa bada. To dahaka dainai unai dagi bada Etiopia tauna be Ierusalema dekenai ia lao? Badina ia ese Iehova ia lalokau henia. Edena dala ai unai ita diba? Ia be Ierusalema dekenai Iehova ia tomadiho henia bona ia giroa mai noho. Unai tauna be ena tomadiho gunana ia rakatania bona Dirava momokani idia tomadiho henia besena ia badinaia. Momokani, unai tauna be Iehova lalokau henia karana ia hahedinaraia dainai, unai ese ia durua bapatiso ia abia bona Keriso ena hahediba tauna ai ia lao totona.​—Mat. 28:19.

3. Dahaka ese ta ia koua diba bapatiso ia abia totona? (Maua ladana “ Emu Kudouna be Edena Bamona?” itaia.)

³ Iehova lalokau henia karana ese oi do ia durua bapatiso oi abia totona. To danu, lalokau karana ese oi ia koua diba?  Edena dala ai? Mani inai haheitalai haida oi laloa. Reana emu witnes lasi famili bona turadia oi lalokau henia bada, bona oi lalohekwarahi bema bapatiso oi abia, oi do idia inai henia. (Mat. 10:37) Eiava reana oi be Dirava ese ia inai henia karadia oi ura henia bada, bona ia auka unai oi dadaraia totona. (Sal. 97:10) Eiava reana oi maragi negana amo tomadiho koikoi amo idia hamatamaia moale karadia oi ura henia bada. Eiava guna unai moale karadia oi moalelaia negadia oi laloa lou. Unai dainai, do ia auka Iehova ese ia inai henia moale karadia oi dadaraia totona. (1 Kor. 10:20, 21) Henanadai be inai, “Dahaka eiava daika lau lalokau henia bada?”

4. Dahaka ese oi ia durua bapatiso oi abia totona?

⁴ Gau momo dainai lalokau bona tanikiu karana oi hahedinaraia diba. Hegeregere, Iehova ena Witnes taudia ida Baibel oi do stadilaia lasi neganai, reana Baibel oi laloa bada. Bona Iesu oi lalokau henia danu. Hari, oi be Iehova ena Witnes taudia oi dibaia dainai, do oi ura idia oi bamoa noho. To, unai gau namodia oi ura henia karana ese oi do ia durua lasi, Iehova oi gwauhamata henia bona bapatiso oi abia totona. Namona be Iehova Dirava oi lalokau henia dainai bapatiso oi abia. Bema Iehova oi lalokau henia bada, gau ta eiava tau ta ese oi do ia koua lasi Ia oi hesiai henia totona. Iehova lalokau henia karana ese dala ia kehoa bapatiso oi abia bona oi ia durua Dirava oi hesiai henia noho totona.

5. Edena henanadai do ita herevalaidia?

⁵ Iesu ia gwau namona be mai iseda kudouna, mauri, darana, bona goada ibounai ida Iehova ita lalokau henia. (Mar. 12:30) Edena dala ai Iehova lalokau henia bona matauraia bada karana oi dibaia? Iehova ese ita dekenai ia hahedinaraia lalokauna ita laloa karana ese ita ia durua Ia ita lalokau henia totona. (1 Ioa. 4:19) Mai anina bada lalokau karana ita hahedinaraia neganai, edena kara ma haida ita hahedinaraia diba? *

6. Roma 1:20 ena hereva bamona, edena dala ma ta amo Iehova do oi dibaia?

⁶ Iehova ese ia havaraia gaudia amo ia oi dibaia. (Roma 1:20 duahia; Apok. 4:11) Iehova ese ena aonega amo animal bona tubutubu gaudia ia karaia dalana oi laloa dobu. Bona ia ese oi ia karaia dalana oi dibaia. (Sal. 139:14) Danu, Iehova ese iseda dina dekenai ia atoa siahu mani oi laloa, dina be hisiu ta, hisiu bilioni momo huanai. * (Isa. 40:26) Iehova ia karaia gaudia oi laloa neganai, Ia do oi matauraia bada. To, Iehova ena aonega bona siahu oi dibaia karana be emu hetura karana Ia ida ia hamatamaia kahana sibona. To, emu lalokau Iehova dekenai ia goada totona, namona be ia oi dibaia noho.

7. Iehova oi lalokau henia bada totona, dahaka oi abia dae be namo?

⁷ Namona be oi abia dae Iehova ese oi ia laloa bada. Nega haida ia auka oi abia dae guba bona tanobada ia Havaraia Tauna ia diba oi noho bona oi ia laloa bada, a? Bema oibe, namona be oi laloatao Iehova be “ita ta ta amo ia noho daudau lasi.” (Kara 17:26-28) Iehova ese “iseda laloa ibounai . . . ia diba,” bona ia gwauhamata, Davida ese Solomona ia hamaoroa hegeregerena, “bema oi ese [Ia] oi  tahua, ia ese oi do ia abia dae.” (1 Siv. 28:9) Momokani, hari Baibel oi stadilaia ena badina be Iehova ia gwau, lau ese oi lau “veria mai.” (Ioa. 6:44) Iehova ese oi totona ia karaia gaudia oi laloa neganai, ia do oi lalokau henia bada.

8. Edena dala ai oi hahedinaraia Iehova ena lalokau karana oi laloa bada?

⁸ Iehova ena lalokau karana oi laloa bada dalana ta be guriguri amo ia oi hereva henia. Emu lalokau Dirava dekenai do ia goada bema ia dekenai emu lalohekwarahi gaudia oi gwauraia bona oi totona ia karaia gaudia dainai ia oi tanikiu henia. Bona Iehova ese emu guriguri ia haerelaia dalana oi itaia neganai, unai ese emui hetura karana do ia hagoadaia. (Sal. 116:1) Do oi abia dae ia ese emu mauri dalana ia lalopararalaia. To, Iehova kahirakahira oi lao totona, iena laloa dalana oi lalopararalaia be namo. Bona ia ura do oi karaia gauna oi diba be namo. Unai diba oi abia dalana tamona be iena Hereva, Baibel, oi stadilaia.

9. Edena dala ai oi hahedinaraia Baibel oi laloa bada?

⁹ Dirava ena Hereva, Baibel, laloa bada karana oi dibaia. Baibel sibona ese Iehova bona iena ura oi totona ia hahedinaraia. Dina ta ta ai Baibel oi duahia, emu Baibel stadi totona oi hegaegae, bona oi duahia gaudia oi badinaia neganai oi hahedinaraia Baibel oi laloa bada. (Sal. 119:97, 99; Ioa. 17:17) Oi be mai emu Baibel duahiduahi ena sediual, a? Unai sediual be dina ta ta ai oi badinaia, a?

10. Baibel ai edena kahana ta oi moalelaia diba?

¹⁰ Baibel ai, Iesu idia itaia taudia edia sivarai oi moalelaia diba. Unai buka sibona ai Iesu ese oi totona ia karaia gauna ia herevalaia maoromaoro. Iesu ese ia gwauraia bona ia karaia gaudia oi dibaia neganai, do oi ura iena turana ai oi lao.

11. Edena dala ai Iehova lalokau henia karana oi dibaia?

¹¹ Iesu lalokau henia karana oi dibaia bona emu lalokau Iehova dekenai do ia goada. Dahaka dainai? Badina Iesu be ena Tamana ena kara ia tohotohoa goevagoeva. (Ioa. 14:9)  Unai dainai Iesu oi dibaia noho neganai, Iehova do oi dibaia namonamo bona laloa bada. Iesu ese ogogami taudia, gorere taudia bona manoka taudia dekenai ia hahedinaraia hebogahisi karana mani oi laloa. Danu, oi dekenai sisiba namodia ia henia bona unai sisiba oi badinaia neganai emu mauri ia hanamoa dalana mani oi laloa.​—Mat. 5:1-11; 7:24-27.

12. Iesu oi dibaia neganai, unai ese oi ia durua dahaka oi karaia totona?

¹² Emu lalokau Iesu dekenai do ia goada diba bema ia henia mauri davana ese iseda dika ia gwauatao karana oi laloa dobu. (Mat. 20:28) Iesu be mai ena ura ida oi totona ena mauri ia henia karana oi lalopararalaia neganai, unai ese oi do ia durua oi helalo-kerehai bona Iehova ena hebogahisi karana oi abia dae totona. (Kara 3:19, 20; 1 Ioa. 1:9) Iesu bona Iehova oi lalokau henidia neganai, do oi ura idia ruaosi idia lalokau henia taudia oi bamoa.

13. Iehova be oi dekenai dahaka ia henia?

¹³ Iehova ena ruma bese lalokau henia karana oi dibaia. Reana emu witnes lasi varavara bona tura gunadia do idia laloparara lasi dahaka dainai oi ura Iehova dekenai oi gwauhamata. Reana oi do idia inai henia danu. Iehova ese tadikaka taihu ia gaukaralaia diba oi idia durua totona. Bema idia oi bamoa, oi do idia lalokau henia bona hagoadaia diba. (Mar. 10:29, 30; Heb. 10:24, 25) Gabeai, emu ruma bese taudia be reana oi ida Iehova do idia hesiai henia bona iena taravatu do idia badinaia.​—1 Pet. 2:12.

14. Ioane Ginigunana 5:3 ena hereva bamona, Iehova ena taravatu amo dahaka oi dibaia?

¹⁴ Iehova ena taravatu laloa bada bona badinaia karana oi dibaia. Iehova oi do dibaia lasi neganai, reana oi sibona emu ura oi badinaia, to hari oi diba Iehova ena hakaua dalana be mai ena namo. (Sal. 1:1-3; 1 Ioane 5:3 duahia.) Baibel ese tatau, hahine, tama sina, bona natudia dekenai ia henia sisiba namodia oi laloa. (Efe. 5:22–6:4) Unai sisiba namodia oi badinaia dainai emu ruma bese maurina ia namo, a? Iehova ena sisiba turadia abia hidi karana dekenai oi badinaia dainai, emu kara ia hanamoa, a? Hari oi moale, a? (Aon. 13:20; 1 Kor. 15:33) Ita gwau diba unai henanadai edia haere be oibe.

15. Dahaka oi karaia diba Baibel ena hakaua herevadia oi badinaia totona?

¹⁵ Nega haida, reana do ia auka oi dibaia Baibel ena hakaua herevadia oi badinaia totona. Unai dainai Iehova ese iena orea amo Baibel pablikeisen ia gaukaralaia oi ia durua maoro bona kerere edia idau oi lalopararalaia totona. (Heb. 5:13, 14) Bema unai pablikeisen oi duahia bona stadilaia, oi karaia gaudia edia namo do oi itaia, bona do oi ura Iehova ena orea oi badinaia.

16. Edena dala ai Iehova ese ena taunimanima ia durua?

¹⁶ Iehova ena orea laloa bada bona durua dalana oi dibaia. Iehova ese ena taunimanima be kongrigeisen ta ta ai ia atodia; iena Natuna, Iesu, be unai kongrigeisen ibounai edia kwarana. (Efe. 1:22; 5:23) Iesu ese horoa taudia edia orea maragina ia abia hidi, ia ura karaia gaukarana idia gunalaia totona. Iesu ese unai orea taudia ia gwauraia “igui hesiai tauna mai ena kamonai bona mai ena kara maoromaoro,” bona edia gaukara be Dirava ena hereva amo oi do idia durua bona gimaia. (Mat. 24:45-47) Igui hesiai taudia ese oi idia durua dalana ta be elda taudia idia abia hidi oi idia naria totona. (Isa. 32:1, 2; Heb. 13:17; 1 Pet. 5:2, 3) Unai elda taudia be  mai lalona ibounai ida idia ura, oi idia hagoadaia, bona oi idia durua Iehova kahirakahira oi noho totona. To idia karaia diba mai anina bada gauna ta be oi do idia durua ma haida dekenai Iehova oi herevalaia totona.​—Efe. 4:11-13.

17. Roma 10:10, 13, 14 ena hereva bamona, dahaka dainai ma haida dekenai Iehova ita herevalaia?

¹⁷ Ma haida oi durua Iehova idia lalokau henia totona. Iesu ese ena murinai idia raka taudia ia hamaoroa ma haida dekenai Iehova do idia herevalaia. (Mat. 28:19, 20) Unai hahegani herevana ita badinaia be namo. To emu lalokau karana Iehova dekenai ia goada neganai, oi danu be aposetolo Petero bona Ioane bamona do oi gwau: “Ai be ai itaia bona kamonai gaudia do ai herevalaia noho.” (Kara 4:20) Ta ita durua Iehova ia lalokau henia neganai do ita moale bada. Evanelia tauna Filipo ese Etiopia tauna ia durua Baibel ena hereva momokani ia dibaia bona bapatiso ia abia neganai, ia abia moalena mani oi laloa! Bema Filipo bamona Iesu ese ia henia haroro gaukara ena hahegani oi badinaia, oi hahedinaraia oi ura Iehova ena Witnes ta ai oi lao. (Roma 10:10, 13, 14 duahia.) Unai negai, oi danu be Etiopia tauna bamona sibona do oi nanadaia: “Dahaka ese lau ia koua lau bapatiso totona?”​—Kara 8:36.

18. Stadi atikol 11 ai dahaka do ita herevalaia?

¹⁸ Bema oi ura bapatiso oi abia, emu mauri ai unai be mai anina bada abia hidi ta. Unai be abia hidi badana dainai, namona be bapatiso ena anina oi lalopararalaia namonamo. Bapatiso karana dekenai dahaka oi dibaia be namo? Oi do bapatiso lasi bona bapatiso oi abia murinai, dahaka oi karaia be namo? Unai henanadai be stadi atikol 11 ese do ia haerelaidia.