1. Ruma ta ia ura haginia tauna be dahaka ia karaia guna be namo?

RUMA ta ia ura haginia tauna mani oi laloa. Ia diba edena bamona ruma do ia haginia. Ia be maoromaoro do ia lao sitoa dekenai bona ruma haginia kohu do ia hoia, a? Lasi. Ena gaukara ia do hamatamaia lasi neganai, mai anina bada gauna ta do ia karaia​—⁠ruma ia haginia ena davana do ia laloa namonamo. Dahaka dainai? Badina unai amo do ia diba ruma haginia totona do ia gaukaralaia moni be hegeregere eiava lasi. Bema ruma haginia totona nega bada lalonai ia diba moni hida do ia gaukaralaia, iena ruma matamatana ia haorea diba.

2. Luka 14:27-30 ena hereva bamona, bapatiso oi do abia lasi neganai, dahaka oi laloa be namo?

² Iehova lalokau henia bona laloa bada karana ese oi ia durua bapatiso lalohadaina oi abia totona, a? Bema oibe, do oi ura karaia abia hidi be ruma ta ia ura haginia tauna ena abia hidi bamona. Dahaka dainai unai bamona ita hereva? Iesu ena hereva Luka 14:27-30 ai, mani oi laloa. (Duahia.) Iesu be ena hahediba taudia ai do idia lao totona idia karaia gaudia ia herevalaia. Iesu ena hahediba taudia ai ita lao totona, hekwakwanai ita haheaukalaia bona gau haida ita dadaraia be namo. (Luka 9:23-26; 12:51-53) So, bapatiso oi do abia lasi neganai, do oi karaia gaudia ibounai oi laloa be namo. Bena do oi hegeregere bapatiso Keristani ta ai oi lao bona mai abidadama ida Dirava do oi hesiai henia.

3. Inai atikol ai dahaka do ita herevalaia?

³ Keriso ena hahediba ta ai oi lao totona, hekwakwanai oi haheaukalaia bona gau haida oi dadaraia be namo, a? Oibe! Bapatiso abia karana ese dala ia kehoa hari bona vaira negai hahenamo momo oi abia totona. Bapatiso totona mai anina bada henanadai haida mani ita herevalaia. Unai ese oi do ia durua inai henanadai oi haerelaia totona, “Lau hegeregere bapatiso lau abia totona, a?”

4. (a) Gwauhamata ena anina be dahaka? (b) Mataio 16:24 ai, sibona emu ‘ura oi dadaraia’ ena anina be dahaka?

⁴ Gwauhamata ena anina be dahaka? Bapatiso oi do abia lasi neganai, namona be gwauhamata ta oi karaia. Bema gwauhamata ta oi karaia, mai kudouna ibounai ida Iehova dekenai oi guriguri bona ia oi hadibaia emu mauri ibounai lalonai ena hesiai gaukara do oi karaia. Dirava dekenai emu mauri oi gwauhamatalaia neganai, sibona emu ‘ura oi dadaraia.’ (Mataio 16:24 duahia.) Hari oi be Iehova ena, bona unai be hahenamo badana. (Roma 14:8) Dirava dekenai emu mauri oi gwauhamatalaia dinana amo oi be ia oi hamaoroa, iena hesiai gaukara do oi laloa bada bona sibona emu ura do oi dadaraia. Iehova be ita ia doria lasi unai bamona ita karaia totona. To, bema ia dekenai ita gwauhamata ia ura unai gwauhamata ita hagugurua.​—Sal. 116:12, 14.

5. Edena dala ai gwauhamata bona bapatiso idia gaukara hebou?

⁵ Edena dala ai gwauhamata bona bapatiso idia gaukara hebou? Emu gwauhamata be oi sibona ese oi karaia bona ta ia diba lasi; unai be oi bona Iehova sibona umui diba. Bapatiso be taunimanima ibounai vairanai do ia vara, nega momo hebouhebou badadia dekenai unai idia karaia. Bapatiso oi abia neganai, ma haida dekenai oi hahedinaraia oi be Iehova dekenai emu mauri oi gwauhamatalaia. * So, emu bapatiso karana amo ma haida idia diba oi be mai emu kudouna, mauri, darana, bona goada ibounai ida Iehova emu Dirava oi lalokau henia, bona emu lalona oi hadaia ia do oi hesiai henia ela bona hanaihanai.​—⁠Mar. 12:30.

6-7. Petero Ginigunana 3:18-22 ena hereva bamona, dahaka badina rua dainai bapatiso be mai ena namo?

⁶ Bapatiso be mai ena namo, a? Petero Ginigunana 3:18-22 ena hereva mani oi laloa. (Duahia.) Lagatoi ese Noa ena abidadama ia hahedinaraia, unai hegeregerena bapatiso ese Iehova dekenai emu mauri oi gwauhamatalaia karana ia hahedinaraia. To, bapatiso be mai ena namo, a? Oibe. Petero ese bapatiso ena badina ia herevalaia. Ginigunana be, oi ia “hamauria noho gauna.” Bapatiso karana ese ita do ia hamauria bema ita hahedinaraia Iesu ita abidadama henia bona ita abia dae ia be ita dainai ia mase, ia toreisi lou bona guba dekenai ia daekau, bona hari “Dirava ena idibana kahanai ia helai.”

⁷ Iharuana be, bapatiso karana ese ita dekenai “lalomamina namona” ia henia. Dirava dekenai iseda mauri ita gwauhamatalaia bona bapatiso ita abia neganai, iena turana ai ita lao. Mai momokani ida ita helalo-kerehai bona mauri davana ita abidadama henia dainai Dirava ese iseda dika ia gwauatao. Unai amo Ia vairanai lalomamina goevana ita abia diba.

8. Dahaka badina dainai bapatiso oi abia?

⁸ Dahaka badina dainai bapatiso oi abia? Baibel oi stadilaia namonamo dainai Iehova oi diba namonamo, hegeregere ia ura henia gaudia bona iena kara. Ia amo oi dibaia gaudia ese oi idia hagoadaia dainai ia oi lalokau henia. Iehova oi lalokau henia dainai bapatiso oi abia.

9. Mataio 28:19, 20 ena hereva bamona, Tamana, Natuna, bona lauma helaga ena ladana ai ta ia bapatiso ena anina be dahaka?

⁹ Bapatiso oi abia ena badina ta be oi ese Baibel ena hereva momokani oi dibaia bona oi abia dae. Iesu ese hahediba taudia halaoa gaukarana ena hahegani ia henia neganai ia gwauraia herevana mani oi laloa. (Mataio 28:19, 20 duahia.) Iesu ia gwau, namona be bapatiso idia ura abia taudia be “Tamana, Natuna, bona lauma helaga ladanai idia do umui bapatisoa.”  Iena hereva ena anina be dahaka? Namona be mai emu kudouna ibounai ida Baibel ese Iehova; iena Natuna, Iesu; bona lauma helaga ia herevalaidia dalana oi abia dae. Unai hereva momokani be mai edia siahu bona oi idia durua diba. (Heb. 4:12) Mani haida ita herevalaia.

10-11. Tamana idia herevalaia hereva momokani amo dahaka oi dibaia bona abia dae?

¹⁰ Tamana ia herevalaia hereva momokanidia amo oi dibaia gaudia mani oi laloa: Iena “ladana be Iehova,” ia be “Ataiai Momokani Diravana,” bona ia sibona be “Dirava korikori.” (Sal. 83:18; Ier. 10:10) Iehova be iseda Havaraia Tauna, bona ita ia “hamauria diba.” (Sal. 3:8; 36:9) Ia ese dala ia kehoa kara dika bona mase amo ita ia hamauria, bona ita dekenai mauri hanaihanai ena helaro ia henia. (Ioa. 17:3) Emu gwauhamata bona bapatiso karana ese do ia hahedinaraia oi be Iehova ena Witnes ta. (Isa. 43:10-12) Unai amo oi be tanobada hegegemadai Dirava ena ladana idia abia bona ma haida dekenai idia gwauraia hedinarai taudia huanai do oi noho.​—⁠Sal. 86:12.

¹¹ Momokani, Baibel ese Tamana ia herevalaia dalana ita dibaia be hahenamo badana! Bema unai mai anina bada hereva momokanidia oi abia dae, do oi ura Iehova dekenai emu mauri oi gwauhamatalaia bona bapatiso oi abia.

12-13. Natuna idia herevalaia hereva momokani amo dahaka oi dibaia bona abia dae?

¹² Natuna idia herevalaia hereva momokanidia oi dibaia neganai emu hemami be edena bamona? Iesu be iunives lalonai ia noho mai anina bada tauna iharuana. Ia be iseda Mauri Davana Karaia Tauna. Ia be mai ena ura ida ena mauri ia henia ita totona. Bema iseda kara amo ita hahedinaraia mauri davana ita abidadama henia, Dirava ese iseda dika do ia gwauatao, iena turana ai ita lao, bona mauri hanaihanai ita abia diba. (Ioa. 3:16) Iesu be iseda Hahelaga Tauna Badana. Ia ura mauri davana amo namo ita abia bona Dirava ida hetura karana namona ita moalelaia. (Heb. 4:15; 7:24, 25) Iesu be Dirava ena Basileia ena King dainai, Iehova be ena ladana hahelagaia totona Iesu do ia gaukaralaia, danu kara dika do ia haorea, bona do ia mai Paradaisona ai hahenamo momo do ia havaraia. (Mat. 6:9, 10; Apok. 11:15) Iesu be haheitalai namona. (1 Pet. 2:21) Ia be ena mauri ibounai lalonai Dirava ena ura ia karaia, unai dainai iena haheitalai ita tohotohoa be namo.​—⁠Ioa. 4:34.

¹³ Baibel ese Iesu ia herevalaia dalana oi abia dae neganai, Dirava ena Natuna do oi lalokau henia bada. Unai lalokau ese oi ia durua Iesu bamona, emu mauri lalonai Dirava ena ura oi karaia totona. Unai ese oi ia hagoadaia Iehova dekenai emu mauri oi gwauhamatalaia bona bapatiso oi abia.

14-15. Lauma helaga idia herevalaia hereva momokani amo dahaka oi dibaia bona abia dae?

¹⁴ Lauma helaga idia herevalaia hereva momokani oi dibaia neganai dahaka oi laloa? Ia be taunimanima lasi, to Dirava ena gaukara siahuna. Iehova ese lauma helaga amo taunimanima haida ia hasiahua Baibel idia torea totona, bona unai lauma helaga ese ita ia durua ita duahia gaudia ita lalopararalaia bona badinaia totona. (Ioa. 14:26; 2 Pet. 1:21) Iehova ese iena lauma helaga amo ita dekenai “taunimanima edia siahu ia hereaia gauna” ia henia. (2 Kor. 4:7) Lauma helaga ese ita ia hagoadaia sivarai namona ita harorolaia, hedibagani amo ita raka siri, lalomanoka karana ita hanaia, bona hahetoho ita haheaukalaia. Ita idia durua “lauma helaga ena huahua” amo idia vara kara namodia idauidau ita hahedinaraia totona. (Gal. 5:22) Dirava ese ia idia abidadama henia bona mai momokani ida idia noinoi taudia dekenai lauma helaga ia henia.​—Luka 11:13.

¹⁵ Ita moale bada badina ita diba Iehova idia tomadiho henia taudia be lauma helaga ena heduru dainai Dirava idia hesiai henia! Lauma helaga idia herevalaia hereva momokani oi dibaia bona abia dae neganai, oi ia durua Dirava dekenai oi gwauhamata bona bapatiso oi abia.

16. Ita herevalaia gaudia amo dahaka ita dibaia?

 ¹⁶ Dirava dekenai emu mauri oi gwauhamatalaia bona bapatiso oi abia be abia hidi badana. Ita herevalaia bamona, metau haida ita haheaukalaia bona gau haida ita dadaraia be namo. To do ita abia hahenamo ese unai idia hereaia. Bapatiso karana ese oi ia hamauria diba bona Dirava vairanai lalomamina goevana do oi abia. Namona be Iehova Dirava oi lalokau henia dainai bapatiso oi abia. Danu, namona be mai emu kudouna ibounai ida Tamana, Natuna, bona lauma helaga idia herevalaia hereva momokani oi abia dae. Ita herevalaia gaudia ibounai oi laloa murinai, edena bamona inai henanadai do oi haerelaia, “Lau hegeregere bapatiso lau abia totona, a?”

17. Bapatiso oi do abia lasi neganai, dahaka gau haida oi karaia be namo?

¹⁷ Bema oi mamia oi hegeregere bapatiso oi abia totona, reana oi be gau momo oi karaia vadaeni Iehova ida emu hetura karana oi hagoadaia totona. * Momokani, Baibel oi stadilaia hanaihanai dainai unai ese oi ia durua Iehova bona Iesu oi dibaia namonamo. Bona, emu abidadama ia hagoadaia. (Heb. 11:6) Danu, Iehova ena gwauhamata Baibel lalonai oi abidadama henia momokani, bona oi abia dae Iesu ena boubou gauna ese kara dika bona mase amo oi ia hamauria diba. Emu kara dika amo oi helalo-kerehai vadaeni; emu kerere dainai oi sori, bona Iehova oi noia emu dika ia gwauatao totona. Emu mauri oi haidaua; emu mauri dala gunana oi dadaraia bona Dirava ia moalelaia mauri dala matamatana oi badinaia noho. (Kara 3:19) Oi ura mai goada ida ma haida dekenai emu abidadama oi herevalaia. Oi hegeregere bapatiso lasi pablisa ai oi lao bona haroro gaukara ai kongrigeisen taudia oi bamoa. (Mat. 24:14) Iehova be oi dekenai ia moale bada badina unai dala idauidau oi badinaia. Oi ese iena kudouna oi hamoalea bada.​—Aon. 27:11.

18. Bapatiso oi do abia lasi neganai, dahaka danu oi karaia be namo?

¹⁸ Bapatiso oi do abia lasi neganai, gau haida oi karaia guna be namo. Matamanai ita herevalaia bamona, Dirava dekenai emu mauri oi gwauhamatalaia be namo. Ia oi guriguri henia bona ia dekenai oi gwauhamata emu mauri lalonai iena ura do oi karaia. (1 Pet. 4:2) Bena elda oreana ena kodineita oi hadibaia oi ura bapatiso oi abia. Ia ese elda haida do ia noia oi ida idia herevahereva totona. Mani emu kara oi lalohekwarahi lasi idia ida oi herevahereva totona. Laloatao, unai tadikaka be oi idia diba bona oi idia lalokau henia. Idia be oi ida Baibel ena hadibaia hereva badadia do idia riviulaia. Idia ura diba bema Baibel ena hadibaia hereva badadia oi lalopararalaia,  bona gwauhamata bona bapatiso edia anina oi diba namonamo. Bema idia itaia oi hegeregere, oi do idia hadibaia hebouhebou badana ai bapatiso oi abia totona.

19-20. Bapatiso oi abia murinai dahaka do oi karaia, bona edena dala ai unai oi karaia diba?

¹⁹ Bapatiso oi abia murinai dahaka do oi karaia? * Laloatao, Iehova dekenai ita gwauhamata neganai, ia ura unai gwauhamata ita hamomokania. Unai dainai bapatiso oi abia murinai, emu gwauhamata oi hamomokania be namo. Edena dala ai unai oi karaia diba?

²⁰ Emu kongrigeisen kahirakahira oi noho. Oi be bapatiso Keristani ta dainai, hari oi be “tadikaka oreana” lalonai oi noho. (1 Pet. 2:17) Kongrigeisen lalonai idia noho tadikaka bona taihu be emu famili bamona. Hebou oi lao henia hanaihanai neganai, emu hetura karana tadikaka taihu ida do oi hagoadaia. Dirava ena Hereva oi duahia bona dina ta ta ai oi laloa dobu. (Sal. 1:1, 2) Baibel ena kahana ta oi duahia murinai, nega oi atoa oi duahia gauna oi lalohadailaia totona. Bena unai hereva ese oi do ia hagoadaia. Unai dainai namona be oi “guriguri noho.” (Mat. 26:41) Mai kudouna ibounai ida oi gwauraia guriguri ese emu hetura karana Iehova ida do ia hagoadaia. “Nega ibounai Dirava ena Basileia . . . tahua guna.” (Mat. 6:33) Unai oi karaia totona, namona be emu mauri lalonai haroro gaukara oi atoa guna. Haroro gaukara oi karaia hanaihanai neganai, emu abidadama do oi hagoadaia, bona ma haida do oi durua mauri hanaihanai ena dala dekenai idia raka totona.​—1 Tim. 4:16.

21. Emu bapatiso ese dala ia kehoa dahaka hahenamo oi abia totona?

²¹ Iehova dekenai emu mauri oi gwauhamatalaia bona bapatiso oi abia be abia hidi badana. Momokani, metau haida do oi haheaukalaia bona gau haida do oi dadaraia. To, ia be mai ena hahenamo, a? Oibe! Inai tanobada gunana ai oi davaria hekwakwanai idauidau be “nega sisina gauna bona ia metau lasi.” (2 Kor. 4:17) To, bapatiso oi abia karana ese dala ia kehoa hari inai negai mauri namona oi moalelaia bona vaira negai “mauri korikorina” do oi abia. (1 Tim. 6:19) Unai dainai namona be oi laloa namonamo bona mai guriguri ida inai henanadai ena haere oi laloa, “Lau hegeregere bapatiso lau abia totona, a?”