1. Iesu ese ena hahediba taudia dekenai dahaka hahegani ia henia? (Rau 1 ena laulau itaia.)

IESU ena hanuaboi ginigabena ai, ena hahediba taudia dekenai hahegani ta ia henia. Idia ia hamaoroa: “Lau ese umui lau lalokau henia hegeregerena, umui danu do umui lalokau heheni.” Bena ma ia gwau: “Unai amo taunimanima ibounai do idia diba umui be egu hahediba taudia, bema umui huanai lalokau ia noho.”​—⁠Ioa. 13:34, 35.

2. Dahaka dainai ta ta dekenai lalokau ita hahedinaraia be mai anina bada?

² Iesu ia gwau bema ena hahediba taudia ese ia hahedinaraia lalokau karana idia hahedinaraia, taunimanima do idia diba idia be ena hahediba taudia momokanidia. Aposetolo edia negai unai hereva be ia momokani, bona hari ita badinaia danu. Unai dainai hekwakwanai idauidau ita hanaia bona ta ta dekenai lalokau ita hahedinaraia be mai anina bada!

3. Inai atikol ai dahaka do ita herevalaia?

³ Ita be goevadae lasi taudia dainai, nega haida ia auka mai kudouna ibounai ida ta ta dekenai lalokau ita hahedinaraia totona. To, Keriso ita tohotohoa be namo. Inai atikol lalonai edena dala ai lalokau ese ita do ia durua maino ita karaia, haida edia toana ita laloa lasi, bona heabidae karana ita hahedinaraia daladia do ita herevalaia. Inai atikol oi stadilaia neganai, sibona oi nanadaia: ‘Hekwakwanai idia davaria to hanaihanai lalokau idia hahedinaraia tadikaka bona taihu edia kara amo dahaka lau dibaia?’

4. Mataio 5:23, 24 ena hereva bamona, dahaka dainai ita ia hahisia tadikaka ida maino ita karaia be namo?

⁴ Iesu ese ita ia hadibaia bema iseda tadikaka ta ese ita ia hahisia ia ida maino ita karaia be mai anina bada. (Mataio 5:23,  24 duahia.) Iesu ia gwau bema ita ura Dirava ita hamoalea ma haida ida iseda hetura karana ita hanamoa be namo. Iehova ia moale bema iseda tadikaka taihu ida maino ita karaia. Ia ese iseda tomadiho karadia do ia abia dae lasi, bema ta ita do badu henia noho bona ita ura lasi maino ita karaia.​—⁠1 Ioa. 4:20.

5. Dahaka dainai Mark dekenai ia auka maino ia karaia totona?

⁵ Reana nega haida do ia auka maino ita karaia totona. Dahaka dainai? Mani Mark dekenai ia vara gauna ita laloa. * Tadikaka ta ese kongrigeisen lalonai Mark ia hahemaraia bona gwauraia dika neganai ia lalohisihisi. Mark be dahaka ia karaia? Ia gwau: “Egu hemami lau biagua lasi bona lau badu.” Gabeai, Mark be sibona ena kara dainai ia lalohisihisi, bona ia ura unai tadikaka dekenai ia sori bona maino ia karaia. To, unai tadikaka ese Mark ena sori herevana ia abia dae lasi. Matamanai, Mark ia laloa, ‘Dahaka dainai ia ida maino do lau karaia bema ia ura lasi.’ To, sekit naria tauna ese ia hagoadaia ia hesiku lasi totona. Mark be dahaka ia karaia?

6. (a) Edena dala ai Mark be maino ia karaia? (b) Edena dala ai Mark be Kolose 3:13, 14 ena hereva ia badinaia?

⁶ Mark be sibona ena kara ia laloa lou neganai, ia laloparara manau karana ia hahedinaraia lasi bona sibona ia laloa bada. Ia diba, ena kara ia haidaua be namo. (Kol. 3:8, 9, 12) Unai dainai mai manau ida unai tadikaka dekenai ia giroa lou bona ena kara dainai sori herevana ia gwauraia. Danu, Mark be unai tadikaka dekenai revareva haida ia torea, bona ia hahedinaraia ia sori bada bona ia ura tura namodia ai do idia lao. Mark be unai tadikaka dekenai harihari gaudia haida ia henia danu. To madi, unai tadikaka be ia do badu noho. To, Mark be Iesu ena hahegani ia badinaia noho, ena tadikaka ia lalokau henia bona gwauatao karana ia hahedinaraia. (Kolose 3:13, 14 duahia.) Ena be haida idia ura lasi idia ida maino ita karaia, to Keristani  lalokauna ese ita do ia durua edia dika ita gwauatao noho bona ita guriguri maino ita karaia totona.​—⁠Mat. 18:21, 22; Gal. 6:9.

7. (a) Iesu ese ita ia hagoadaia dahaka ita karaia totona? (b) Taihu ta dekenai dahaka ia vara?

⁷ Iesu ese ita ia hagoadaia ita ura ma haida ese ita idia kara henia hegeregerena idia ita kara henia. Ma ia gwau, ita idia lalokau henia taudia sibona do ita lalokau henia lasi. (Luka 6:31-33) Reana oi dekenai unai ia vara lasi, to dahaka do oi karaia bema kongrigeisen lalonai ta be ia ura lasi oi ia hereva henia? Lara dekenai unai ia vara. Ia gwau: “Taihu ta be ia ura lasi lau ia hereva henia, bona ena badina lau diba lasi. Unai lau lalohekwarahilaia bona hebou lao henia karana lau moalelaia lasi.” Matamanai, Lara ia laloa: ‘Lau be kerere ta lau karaia lasi. To, kongrigeisen lalonai ma haida danu idia itaia unai taihu ena kara be unai bamona.’

8. Lara be dahaka gau haida ia karaia maino ia karaia totona, bona iena haheitalai amo dahaka ita dibaia?

⁸ Lara be gau haida ia karaia maino ia karaia totona. Ia be Iehova dekenai ia guriguri bona ena lalona ia hadaia unai taihu ia hereva henia totona. Idia ruaosi ese unai hekwakwanai idia herevalaia, idia hug, bona maino idia karaia. Gau ibounai idia namo lou. Lara ia gwau: “To gabeai, unai taihu be guna lau dekenai ia karaia karana ma ia karaia lou. Lau lalohekwarahi bada.” Matamanai, Lara ia mamia do ia moale bema unai taihu ese ena kara ia haidaua. To gabeai, Lara ia laloparara gau badana be mai lalokau ida unai taihu ia kara henia noho bona ‘mai kudouna ibounai ida do ia gwauatao.’ (Efe. 4:32–5:2) Lara ia laloatao Keristani lalokau momokanina be “ta ena kerere ia laloatao noho lasi . . . gau ibounai dekenai ia gini goada, gau ibounai ia abidadama henia, gau ibounai lalonai ia be mai ena helaro, bona gau ibounai ia haheaukalaia.” (1 Kor. 13:5, 7) Lara be ia lalohekwarahi lou lasi. Gabeai, unai taihu be iena turana ai ia lao. Bema emu tadikaka taihu ida maino oi karaia bona idia oi lalokau henia, “lalokau bona maino Diravana be umui ida do ia noho.”​—⁠2 Kor. 13:11.

9. Kara 10:34, 35 ena hereva bamona, dahaka dainai ma haida edia toana ita laloa lasi be namo?

⁹ Iehova be ta ena toana ia laloa lasi. (Kara 10:34, 35 duahia.) Bema ma haida edia toana ita laloa lasi, ita hahedinaraia ita be Dirava ena natudia. Bona inai hahegani herevana ita badinaia, emu dekena tauna oi lalokau henia oi sibona oi lalokau henia hegeregerena, bona iseda tadikaka taihu ida maino ai ita noho.​—⁠Roma 12:9, 10; Iam. 2:8, 9.

10-11. Edena dala ai taihu ta be ma haida lalodika henia karana ia hanaia?

¹⁰ Reana haida ese ta ena toana ita laloa lasi karana idia hahedinaraia be auka. Taihu ta ladana, Ruth dekenai ia vara gauna mani oi laloa. Ia be kekeni maragina neganai, tano ma ta amo ia mai tauna ese ia dekenai ia karaia karana ta ia moalelaia lasi. Ia vara gauna dainai ena hemami be edena bamona? Ruth ia gwau: “Unai tano taudia lau ura henidia lasi. Lau laloa unai tano taudia ibounai edia kara be hegeregere, bona tadikaka taihu danu.” Edena dala ai Ruth ese ma haida lalodika henia karana ia hanaia?

¹¹ Ruth ia laloparara ma haida lalodika henia karana ia dadaraia be namo. Ia be Yearbook amo unai tano taudia edia ekspiriens bona ripoti idauidau ia duahia. Ia gwau: “Lau hekwarahi unai tano taudia dekenai lalohadai maorona lau abia totona. Lau itaia tadikaka taihu be Iehova idia lalokau henia bada. Bona lau diba idia danu be iseda tanobada hegegemadai tadikaka oreana lalonai idia noho.” Gabeai, Ruth ia laloparara lalokau karana ia hahedinaraia be namo. Ia gwau: “Unai tano amo idia mai tadikaka taihu lau hedavari henia neganai, lau hekwarahi idia ida tura namona ai lau lao totona. Idia lau hereva henia bona idia lau dibaia namonamo.” Dahaka ia vara? Ruth ia gwau: “Daudau lasi, ma haida lalodika henia karana lau hanaia.”

12. Taihu ta ladana Sarah be dahaka hekwakwanai ia davaria?

¹² Reana haida idia laloparara lasi idia be ta ena toana laloa karana idia hahedinaraia noho. Hegeregere, Sarah ia laloa ia be haida edia toana ia laloa lasi, badina taunimanima be edia tano, moni, eiava orea lalonai maduna momo idia huaia dainai ia hahemaoro henidia lasi. To, ia gwau: “Gabeai lau laloparara lau be ta ena toana laloa karana lau hahedinaraia noho.” Edena dala ai? Sarah ena ruma bese taudia be sikuli badadia idia lao taudia bona ia ura unai bamona taudia ia bamoa. Dina ta ena turana ta ia hamaoroa: “Lau be sikuli badadia idia lao tadikaka taihu sibona lau bamoa. To sikuli badadia idia lao lasi taudia lau bamoa lasi.” Momokani, Sarah ese ena kara ia haidaua be namo. Edena dala ai?

13. Sarah ena kara ia haidaua dalana amo dahaka ita dibaia?

¹³ Sekit naria tauna ta ese Sarah ia durua ena kara ia haidaua totona. Sarah ia gwau: “Ia ese egu hesiai gaukara namona, haere namodia bona Baibel lau diba namonamo dainai lau ia hanamoa. Bena ia hahedinaraia iseda diba ia bada ia lao noho neganai, Keristani kara namodia hegeregere maino, manau, bona hebogahisi karana ita hahedinaraia be namo.” Sarah be sekit naria tauna ena hereva ia badinaia. Ia gwau: “Lau laloparara gau badana be hebogahisi bona lalokau ita hahedinaraia.” Unai dainai, ena tadikaka bona taihu ia laloa dalana ia haidaua. Sarah ma ia gwau: “Lau ura diba edena kara namodia idia hahedinaraia dainai Iehova be idia dekenai ia moale.” Ita be edena bamona? Namo lasi edukeisen badana ita abia dainai ita laloa ma haida ita hereaia! Bema ‘tadikaka oreana ibounai ita lalokau henia,’ ta ena toana do ita laloa lasi.​—⁠1 Pet. 2:17.

14. Heberu 13:16 ena hereva bamona, haida dekenai heabidae karana ita hahedinaraia neganai Iehova ena hemami be edena bamona?

¹⁴ Iehova ese heabidae karana ia laloa bada. (Heberu 13:16 duahia.) Dabu taudia ita durua neganai, Iehova dekenai unai be iseda tomadiho ena kahana ta. (Iam. 1:27; 2:14-17) Unai dainai, Baibel ese ita ia hagoadaia ‘heabidae karana ena dala ita badinaia’ totona. (Roma 12:13) Heabidae karana ita hahedinaraia neganai, haida do ita laloa bada, lalokau henidia, bona edia turana ai ita lao. Iehova ia moale bema haida dekenai aniani ita henia, idia ida ita aniani hebou, eiava idia ita bamoa bona lalokau henidia. (1 Pet. 4:8-10) To, nega haida koua gaudia dainai ia auka heabidae karana ita hahedinaraia totona.

15-16. (a) Dahaka dainai haida idia ura lasi heabidae karana idia hahedinaraia? (b) Dahaka ese Edit ia durua heabidae karana ia hahedinaraia totona?

¹⁵ Reana iseda noho dalana dainai do ita ura lasi heabidae karana ita hahedinaraia. Mani vabu ta ladana Edit ena haheitalai ita laloa. Ia be witnes ta ai ia do lao lasi neganai, ma haida ia bamoa momo lasi. Edit ia laloa ia hegeregere lasi ma haida bamona heabidae karana ia hahedinaraia totona.

¹⁶ Edit be Witnes ta ai ia lao murinai, ena laloa dalana ia haidaua. Gau haida ia karaia heabidae karana ia hahedinaraia totona. Ia gwau: “Emai Kingdom Hall matamata idia haginia neganai, elda ta be lau ia hadibaia headava tau bona hahine ta do idia mai unai gaukara durua totona, bona lau ia noia bema idia be wiki rua egu ruma ai idia noho totona. Unai negai Iehova ese Sarepata ai ia noho vabu ia durua dalana lau laloatao.” (1 Kin. 17:12-16) Edit ia lalotamona unai headava tau bona hahine be ena ruma ai do idia noho totona. Dahaka hahenamo ia abia? Edit ma ia gwau: “Idia be lau ida wiki rua sibona lasi to hua rua idia noho. Unai nega amo ai be tura namodia ai ai lao.” Danu Edit be kongrigeisen ai tura namodia ma haida ia davaria. Hari ia be painia ta bona ia moale haroro gaukara ai  ia ida idia gaukara hebou taudia ia boiria ena ruma ai do idia aniani hebou totona. Edit ia gwau: “Henia karana ese egu lalona ia hamoalea! Bona unai lau karaia dainai hahenamo momo lau abia.”​—⁠Heb. 13:1, 2.

17. Luke bona ena adavana be dahaka ia lalopararalaia?

¹⁷ Reana heabidae karana ita hahedinaraia noho, to unai kara ita hanamoa diba, a? Hegeregere, Luke bona ena adavana be heabidae taudia. Idia be hanaihanai edia ruma ai edia tama sina, varavara, tura namodia bona sekit naria tauna bona ena adavana idia invait. To, Luke ia gwau: “Ai laloparara ai be ai lalokau henia taudia sibona ai invait.” Edena dala ai Luke bona ena adavana be edia heabidae karana idia hanamoa?

18. Edena dala ai Luke bona ena adavana be heabidae karana dekenai edia kara idia haidaua?

¹⁸ Luke bona ena adavana be edia kara idia haidaua badina Iesu ena hereva idia laloa, ia gwau: “Bema umui idia lalokau henia taudia sibona umui lalokau henia, ena namo be dahaka?” (Mat. 5:45-47) Idia laloparara Iehova ena kara idia tohotohoa be namo, badina ia be taunimanima ibounai dekenai hariharibada karana ia hahedinaraia. Unai dainai edia lalona idia hadaia guna idia boiria lasi tadikaka bona taihu ma haida do idia invait totona. Luke ma ia gwau: “Ai ibounai be hari emai hebamo karana ai moalelaia bada. Bona ai mamia unai kara ese ai ibounai ia hagoadaia bada.”

19. Edena dala ai ita hahedinaraia ita be Iesu ena hahediba taudia, bona emu lalona oi hadaia dahaka oi karaia totona?

¹⁹ Ita herevalaia vadaeni bamona, ta ta dekenai lalokau ita hahedinaraia karana ese ita ia durua diba maino ita karaia, haida edia toana ita laloa lasi, bona heabidae karana ita hahedinaraia. Namona be haida lalodika henia karana ita dadaraia bona mai kudouna ibounai ida iseda tadikaka bona taihu ita lalokau henia. Bema unai bamona ita karaia, do ita moale bona ita hahedinaraia ita be Iesu ena hahediba taudia.​—Ioa. 13:17, 35.