1. Iehova ena hesiai taudia be dahaka hekwakwanai idia davaria?

OI BE hekwakwanai badana ta oi haheaukalaia noho, a? Reana, kongrigeisen lalonai ta ese oi ia hahisia. (Iam. 3:2) Eiava Iehova oi hesiai henia dainai, emu gaukara turadia o sikuli turadia ese oi idia kirikirilaia. (1 Pet. 4:3, 4) Eiava emu famili ese oi idia koua hebou oi lao lasi bona ma haida dekenai emu abidadama oi gwauraia lasi totona. (Mat. 10:35, 36) Bema oi mamia unai hekwakwanai ta oi haheaukalaia diba lasi, reana do oi laloa oi hegeregere lasi Iehova oi hesiai henia totona. To namona be oi diba, ena be dahaka hahetoho oi davaria, Iehova be oi dekenai goada bona aonega do ia henia oi haheauka totona.

2. Roma 15:4 hegeregerena, Baibel duahia karana ese edena dala ai ita ia durua diba?

² Baibel lalonai, Iehova ese hekwakwanai idia davaria bona idia haheaukalaia taudia edia sivarai ia atoa. Dahaka dainai? Badina unai sivarai amo heduru do ita abia. Iehova ese aposetolo Paulo ia durua unai ia torea totona. (Roma 15:4 duahia.) Unai sivarai idauidau ita duahia neganai ita dekenai goada bona helaro ia henia. To namo ita davaria totona, Baibel ita duahia sibona be hegeregere lasi. Namona be Baibel ese iseda lalohadai bona hemami ia haidaua. Dahaka ita karaia diba hekwakwanai ta ita haheaukalaia totona? Inai dala foa ita badinaia diba: (1) Guriguri, (2) Piksaia, (3) Laloa dobu, bona (4) Badinaia. Mani unai dala ta ta ita herevalaia. * Bena unai dala foa do ita gaukaralaia,  King Davida bona aposetolo Paulo edia sivarai ita stadilaia totona.

3. Baibel oi do duahia lasi neganai, dahaka oi karaia bona dahaka dainai?

³ (1) Guriguri. Baibel oi do duahia lasi neganai, Iehova oi noia oi ia durua oi duahia gauna amo namo oi davaria totona. Hegeregere, bema hekwakwanai ta oi ura hanaia, namona be Iehova oi noia oi ia durua Baibel ai hakaua herevadia do oi davaria.​—Fili. 4:6, 7; Iam. 1:5.

4. Dahaka oi karaia diba Baibel sivarai ta oi lalopararalaia totona?

⁴ (2) Piksaia. Iehova be ita dekenai gaudia laloa dalana ia henia be hoa gauna. Baibel sivarai ta oi lalopararalaia totona, idia vara gaudia oi laloa bona unai sivarai lalonai sibona oi piksaia. Bena unai hekwakwanai ia davaria tauna ena hemami oi laloa.

5. Laloa dobu ena anina be dahaka, bona edena dala ai unai oi karaia diba?

⁵ (3) Laloa dobu. Laloa dobu ena anina be oi duahia gauna ese oi do ia durua dalana oi laloa. Unai amo sivarai ena anina do oi lalopararalaia. Oi laloa dobu totona sibona oi nanadaia: ‘Inai sivarai lalonai hekwakwanai ia davaria tauna be sibona ia durua totona, dahaka ia karaia?’ Iehova ese edena dala ai ia durua? Edena dala ai unai sivarai amo lau dibaia gaudia ese lau ia durua diba hahetoho lau haheaukalaia totona?

6. Dahaka dainai ita dibaia gaudia ita badinaia be namo?

⁶ (4) Badinaia. Iesu ia gwau bema ita dibaia gauna ita badinaia lasi, ita be miri latanai ena ruma ia haginia tauna hegeregerena. Ia gaukara goada to iena hekwarahi be anina lasi. Dahaka dainai? Badina lai gubana bona abata ese iena ruma ia botaia neganai, do ia moru. (Mat. 7:24-27) Unai hegeregerena, bema ita guriguri, ita piksaia bona ita laloa dobu, to ita dibaia gauna ita badinaia lasi, iseda hekwarahi be anina lasi. Danu, hahetoho bona dagedage ita davaria neganai, iseda abidadama be do ia goada lasi. To bema Baibel ita stadilaia, ita dibaia gauna ita badinaia, disisen namodia do ita karaia, maino ai do ita noho bona iseda abidadama do ia goada. (Isa. 48:17, 18) Mani King Davida ena mauri ai ia vara hekwakwanai ta ita herevalaia. Bena ita herevalaia dala foa amo ita ura dibaia gaudia do ita tahua.

7. Daika ena sivarai do ita herevalaia?

⁷ Emu turana o varavara ta ese oi ia hahisia, a? Bema oibe, King Davida ena mauri lalonai ia vara hekwakwanai ta oi stadilaia karana ese oi do ia durua. Iena natuna Abesaloma ese ia hahisia bona ia ura king dagina ia dadia neganai, mani King Davida ena kara oi laloa.​—2 Sam. 15:5-14, 31; 18:6-14.

8. Dahaka oi karaia diba Iehova ena heduru oi abia totona?

⁸ (1) Guriguri. Unai sivarai oi laloa, bena oi idia kara dika henia dainai oi mamia hisihisi be Iehova dekenai oi gwauraia. (Sal. 6:6-9) Bena Iehova oi noia oi do ia durua unai hekwakwanai hanaia totona hakaua hereva namodia do oi davaria.

9. Abesaloma bona Davida huanai dahaka ia vara?

⁹ (2) Piksaia. King Davida ese ia davaria hekwakwanai bona ena hemami mani oi laloa. King Davida ena natuna mero Abesaloma be lagani momo lalonai ia gaukara goada taunimanima edia lalona ia veria totona. (2 Sam. 15:7) Abesaloma ia itaia taunimanima edia lalonamo  ia abia neganai, Israela ibounai dekenai spai taudia ia siaia, taunimanima do idia hahegaegaea ia be edia king ai idia halaoa totona. Ia ese Davida ena turana bona sisiba henia tauna Ahitopela ena lalona ia veria, unai gwau-edeede karana lalonai ia vareai totona. Abesaloma be sibona ia gwauraia king, bona dala ia tahua Davida ia dogoatao bona ia alaia totona. Reana unai nega ai Davida be ia gorere dikadika. (Sal. 41:1-9) Davida be unai palani ia kamonai neganai Ierusalema ia rakatania. Gabeai, Abesaloma ena tatau bona Davida ena tatau idia tuari. Unai gwau-edeede tuari taudia idia kwalimu lasi bona Davida ena natuna mero Abesaloma idia hamasea.

10. King Davida be hekwakwanai ia davaria, to dahaka ia karaia lasi?

¹⁰ Davida dekenai unai gaudia ibounai idia vara neganai, mani ena hemami oi laloa? Davida ese Abesaloma ia lalokau henia bona Ahitopela ia abidadama henia, to unai taudia ruaosi ese Davida idia hahisia, bona idia ura ia idia alaia. Reana Davida be iena turadia ma haida do ia abidadama henia lasi. Badina do ia laloa idia danu be Abesaloma idia durua. Eiava ena mauri ia laloa dainai, do ia ura ia heau mauri, o ia lalomanoka diba. Davida be unai bamona ia karaia lasi. To unai hekwakwanai aukana ia hanaia. Dahaka ese ia durua?

11. Davida be ena hekwakwanai lalonai dahaka ia karaia?

¹¹ (3) Laloa dobu. Davida ena sivarai amo dahaka hakaua herevadia oi dibaia? Inai henanadai oi laloa: Davida be sibona durua totona dahaka ia karaia? Davida be ia gari lasi bona disisen kererena ia karaia haraga lasi. Eiava gari dainai ia diba lasi dahaka do ia karaia. Lasi, to Iehova ena heduru totona ia noinoi. Danu ena turadia dekenai heduru ia noia. Bona maoromaoro ia karaia disisen ia badinaia. Ena be Davida ia lalohisihisi bada to ena turadia ia abidadama henia noho. Iehova bona ena turadia ia abidadama henia noho.

12. Iehova be dahaka ia karaia Davida ia durua totona?

¹² Iehova ese edena dala ai Davida ia durua? Tahua gaukara amo do oi davaria Iehova ese Davida ia durua ena hekwakwanai ia haheaukalaia totona. (Sal. 3:1-8) Iehova ese Davida ena disisen ia hanamoa. Davida ena tura namodia be ia gimaia totona idia tuari neganai, Iehova ese idia ia durua.

13. Ta ese oi ia hahisia neganai, edena dala ai Davida ena haheitalai oi tohotohoa diba? (Mataio 18:15-17)

¹³ (4) Badinaia. Sibona oi nanadaia: ‘Edena dala ai Davida lau tohotohoa diba?’ Namona be karaharaga hekwakwanai oi hamaoromaoroa. Emu hekwakwanai hegeregerena, Mataio karoa 18 lalonai Iesu ena hakaua herevana oi badinaia diba. (Mataio 18:15-17 duahia.) To namo lasi oi badu o oi lalohisihisi dainai, karaharaga disisen oi karaia. Namona be Iehova oi guriguri henia oi dekenai lalomaino bona aonega ia henia hekwakwanai oi hamaoromaoroa totona. Emu turadia oi abidadama henia noho bona edia heduru oi abia dae. (Aon. 17:17) Mai anina bada gauna be Iehova ena sisiba Baibel lalonai oi badinaia noho.​—Aon. 3:5, 6.

14. Dahaka hekwakwanai idia vara neganai, 2 Timoteo 1:12-16 bona 4:6-11, 17-22 oi laloa dobu diba?

¹⁴ Iehova oi tomadiho henia dainai emu famili ese oi idia dagedage henia, a? Eiava oi noho tanona ai Iehova ena gaukara  haida idia koua o taravatua, a? Bema oibe, goada oi abia totona 2 Timoteo 1:12-16 bona 4:6-11, 17-22 oi duahia. * Paulo be dibura rumana ai ia noho neganai, unai siri ia toredia.

15. Iehova amo dahaka heduru oi noia diba?

¹⁵ (1) Guriguri. Unai Baibel siridia oi do duahia lasi neganai, Iehova dekenai emu hekwakwanai bona hemami oi gwauraia hedinarai. Bena Iehova oi noia, Paulo ena sivarai amo oi idia durua gaudia oi davaria totona. Unai amo emu hekwakwanai oi hanaia diba.

16. Paulo dekenai dahaka ia vara?

¹⁶ (2) Piksaia. Mani oi piksaia oi be Paulo. Guna Paulo be dibura ruma ai idia atoa, to hari Roma ena dibura ruma ai seini amo idia guia neganai, ia diba do idia hamasea. Iena turana haida ese ia idia rakatania bona ena goada ia ore.​—2 Tim. 1:15.

17. Paulo be dahaka ia karaia lasi?

¹⁷ Reana Paulo be ena mauri gunana do ia laloa, bema ia be Keristani tauna ai ia lao lasi, dibura ruma ai do idia atoa lasi. Paulo be Asia ena provinsi ai ia idia rakatania turadia dekenai ia badu diba, bona ena turadia ma haida ia lalodika henia diba. To Paulo be unai bamona ia karaia lasi. Dahaka dainai Paulo ese ena turadia ia abidadama henia noho bona ia abia dae Iehova ese ia do ia hanamoa?

18. Paulo be ena hekwakwanai lalonai dahaka ia karaia?

¹⁸ (3) Laloa dobu. Inai henanadai oi laloa, “Edena dala ai Paulo be sibona ia durua?” Ena be Paulo ia diba kahirakahira do ia mase, to Iehova hanamoa karana ia laloa bada. Bona nega ibounai ma haida hagoadaia daladia ia laloa. Hanaihanai guriguri amo Iehova dekenai ia tabekau. (2 Tim. 1:3) Paulo be ia idia rakatania tadikaka ia laloa momo lasi, to iena tura namodia ese ia idia hagoadaia bona durua karadia ia laloa bada. Danu Paulo be hanaihanai Dirava ena Hereva ia stadilaia. (2 Tim. 3:16, 17; 4:13) Mai anina bada gauna be, Paulo ia abia dae Iehova bona Iesu ese ia idia lalokau henia. Idia ese ia idia rakatania lasi, bona iena hesiai gaukara dainai do idia hanamoa.

19. Edena dala ai Iehova ese Paulo ia durua?

¹⁹ Iehova ese Paulo ia hadibaia ia be Keristani tauna dainai dagedage do ia davaria. (Kara 21:11-13) Edena dala ai Iehova ese Paulo ia durua? Ia ese Paulo ena guriguri ia haerelaidia bona ia dekenai goada ia henia. (2 Tim. 4:17) Danu Paulo ia hamaoroa iena hekwarahi ibounai dainai ahuna do ia abia. Unai sibona lasi to Iehova ese Paulo ena tura namodia ia gaukaralaia ia idia durua totona.

20. Roma 8:38, 39 hegeregerena, edena dala ai Paulo oi tohotohoa diba?

²⁰ (4) Badinaia. Sibona oi nanadaia, ‘Edena dala ai Paulo lau tohotohoa diba?’ Paulo hegeregerena, ita danu be Iehova ita hesiai henia dainai dagedage do ita davaria. (Mar. 10:29, 30) Hahetoho lalonai oi gini goada totona, namona be hanaihanai Iehova oi guriguri henia bona hanaihanai Baibel oi stadilaia. Bona namona be ita laloatao mai anina bada gauna be Iehova do ita hanamoa. Bona ita diba momokani Iehova be ita do ia rakatania lasi, bona iena lalokau ita totona be tau ta ese do ia hadikaia diba lasi.​—Roma 8:38, 39 duahia; Heb. 13:5, 6.

21. Dahaka ese Aya bona Hekta ia durua edia hekwakwanai idia hanaia totona?

²¹ Herevana iseda hekwakwanai be dahaka  to Baibel ese ia sivarailaia taudia amo goada ita abia diba. Hegeregere Japan ai painia ta ladana, Aya ia gwau pablik gabudia ai haroro totona ia gari to Iona ena sivarai ese ia durua. Indonesia ai tadikaka matamata ta ladana Hekta ena tama sina be Iehova ena Witnes taudia lasi, to Ruta ena sivarai ese ia durua Iehova ia dibaia bona ia hesiai henia totona.

22. Edena dala ai Baibel drama idauidau eiava “Imitate Their Faith” bukana amo heduru oi abia diba?

²² Edeseniai oi do idia durua Baibel sivaraidia oi davaria diba? Iseda vidio, odio drama bona “Imitate Their Faith” bukana ese Baibel sivarai idia hahedinaraia namonamo. * Unai Baibel sivaraidia oi do itaia, kamonai, o duahia lasi neganai, Iehova oi noia oi ia durua do oi badinaia point namodia oi davaria totona. Sibona oi piksaia oi be oi duahia noho sivarai lalonai ia noho tauna. Iehova ena abidadama hesiai taudia ese idia karaia gaudia bona idia ia durua edia hekwakwanai idia hanaia dalana oi laloa dobu. Vadaeni emu hekwakwanai hanaia totona oi dibaia gaudia oi badinaia. Iehova ese oi ia durua dainai ma haida oi hagoadaia bona durua karana amo ia oi tanikiu henia.

23. Isaia 41:10, 13 hegeregerena, Iehova be ita dekenai dahaka gwauhamata ia karaia?

²³ Satani ese ia biagua tanobadana ai nega haida mauri be ia auka. (2 Tim. 3:1) To namo lasi ita lalohekwarahi o ita gari. Badina Iehova be iseda hekwakwanai ia itaia. Hekwakwanai ita davaria neganai, Iehova ia gwauhamata iena imana idibana goadana amo ita do ia durua. (Isaia 41:10, 13 duahia.) Ita abia dae Iehova ese ita do ia durua, bona Baibel amo goada ita abia diba iseda hekwakwanai ita haheaukalaia totona.