1-2. Daika ese Baibel stiuden ia durua diba ia bapatiso totona?

FIJI ai, Amy ia gwau: “Baibel lau stadilaia neganai, lau diba unai be hereva momokani bona lau moalelaia. To egu mauri lau haidaua lasi ela bona tadikaka taihu ida lau hebamo bena bapatiso lau abia.” Amy ena sivarai amo ita dibaia gauna be inai: Baibel stadi ta ia goada ia lao bona ia bapatiso totona, tadikaka taihu amo heduru ia abia be namo.

² Pablisa ta ta ese Baibel stiuden idia durua diba kongrigeisen ia bamoa totona. (Efe. 4:16) Vanuatu dekenai painia ta ladana Leilani, ia gwau: “Natu maragina ta idia durua ia tubu daekau totona, hanua taudia ibounai idia gaukara hebou be namo. Lau laloa hahediba tauna halaoa gaukarana danu be unai bamona. Kongrigeisen taudia ibounai ese ta idia durua hereva momokani lalonai ia vareai totona.” Varavara, turadia, bona tisa taudia ese natu idia durua diba ia tubu daekau totona. Idia ese natu dekenai mai anina bada gaudia idia hadibaia bona idia hagoadaia. Unai hegeregerena, pablisa taudia ese Baibel stiuden idia sisiba henia, idia hagoadaia, bona danu haheitalai namona do idia hahedinaraia. Unai amo Baibel stiuden ia goada bona ia bapatiso diba.​—Aon. 15:22.

3. Ana, Daniel, bona Leilani edia hereva ese edena bamona oi ia durua?

³ Dahaka dainai Baibel stadi ia naria pablisa ese ma haida edia heduru ia abia dae be namo? Moldova ai, spesel painia taihu Ana ia gwau, “Baibel stiuden ia goada ia lao  neganai, pablisa tamona ese ia durua be hegeregere lasi.” Unuseniai spesel painia tadikaka Daniel, ia gwau, “Nega momo, pablisa ma haida ese Baibel stiuden ia durua herevana ta idia gwauraia, to lau sibona be unai lau laloa lasi.” Leilani danu ia gwau, “Pablisa ma haida ese Baibel stiuden dekenai lalokau bona kara namodia idia hahedinaraia neganai, do ia abia dae ita be Iehova ena taunimanima.”​—Ioa. 13:35.

4. Inai stadi lalonai dahaka do ita herevalaia?

⁴ To reana do oi laloa, ‘Ia be egu Baibel stadi lasi, to edena dala ai lau durua diba ia goada totona? Bema pablisa ta ese ita ia boiria iena Baibel stadi lalonai ita helai vareai, dahaka do ita karaia?’ Bona unai Baibel stiuden be hebou ia mai matamaia neganai, edena dala ai ita durua diba? Danu, elda taudia ese edena dala ai Baibel stiuden idia durua diba ia bapatiso totona? Hari, ita ese unai do ita herevalaia.

5. Pablisa ta ena stadi lalonai oi helai vareai neganai, edena dala ai oi durua diba?

⁵ Pablisa ta ese stiuden ia durua Dirava ena Hereva ia lalopararalaia totona. To bema oi ese ia oi bamoa, oiemu maduna be, ia do oi durua. (Had. 4:9, 10) To, stadi lalonai dahaka heduru oi henia diba?

6. Baibel stadi ta lalonai oi helai vareai neganai, edena dala ai Aonega Herevadia 20:18 oi badinaia diba?

⁶ Oi hegaegae. Gau ginigunana be, pablisa do oi noia ena Baibel stiuden ena sivarai sisina do ia gwauraia. (Aonega Herevadia 20:18 duahia.) Reana oi henanadai: “Baibel stiuden ena ladana be daika? Ena mauri lagani be hida? Bona edena dubu ia lao? Dahaka do umui stadilaia? Oi ura inai stadi amo dahaka do ia dibaia? Stadi lalonai dahaka gaudia do lau karaia bona herevalaia lasi? Edena dala ai stiuden lau durua diba?” Momokani, stadi naria tauna ese gau ibounai do ia gwauraia lasi. Misinari ta ladana Joy be ena Baibel stadi lalonai do ia helai taihu ida unai gaudia ia herevalaia. Ia gwau: “Unai ia karaia neganai, pablisa ese Baibel stiuden ia durua diba.”

7. Ta oi bamoa neganai dahaka dainai oi hegaegae be namo?

⁷ Bema ta ena stadi lalonai do oi helai vareai, idia stadilaia gauna oi hegaegaelaia be namo. (Esr. 7:10) Daniel ia gwau: “Lau moale bema lau ia bamoa tadikaka be stadi totona ia hegaegae. Unai amo heduru hereva haida ia gwauraia diba.”  Danu, stiuden do ia itaia umui ruaosi be umui hegaegae namonamo, bona unai be haheitalai namona ia dekenai. Ena be stadi ibounai oi hegaegaelaia diba lasi, to ena point badadia oi laloa diba.

8. Dahaka oi karaia diba, Baibel stadi lalonai guriguri namona oi gwauraia totona?

⁸ Baibel stadi lalonai, guriguri be mai anina bada. Unai dainai guriguri namona oi gwauraia totona oi hegaegae be namo, dika Baibel stadi naria tauna ese guriguri totona oi ia makaia. (Sal. 141:2) Japan ai, Hanae be ena Baibel stadi ia bamoa taihu ta ese ia gwauraia guriguri ia laloatao. Ia gwau: “Lau mamia ia be Iehova ia tura henia namonamo, bona lau ura ia lau tohotohoa. Guriguri lalonai egu ladana ia gwauraia neganai, lau mamia ia be lau ia laloa bada.”

9. Iamesi 1:19 hegeregerena, Baibel stadi ai pablisa ta oi bamoa neganai, edena dala ai heduru oi henia diba?

⁹ Stadi naria tauna oi durua. Nigeria ai, spesel painia ta ladana Omamu ia gwau, “Bamoa tauna namona be stadi lalonai do ia kamonai namonamo. Bona hagoadaia herevadia ia gwauraia diba, to ia hereva momo lasi, badina do ia laloparara stadi naria tauna ese stadi ia hakaua.” Vadaeni edena negai do oi hereva diba? (Aon. 25:11) Stadi naria tauna bona ena stiuden idia herevahereva lalonai, oi kamonai namonamo. (Iamesi 1:19 duahia.) Unai amo nega maorona ai oi hereva diba. To, namona be oi laloa namonamo guna bena oi hereva. Hegeregere, namona be oi hereva momo lasi eiava stadi naria tauna ena hereva oi utua bona lalohadai idauna oi gwauraia. To stadi tauna ena point durua totona, hereva kwadogina, haheitalai ta, eiava henanadai ta oi gaukaralaia diba. Reana nega haida hereva ta do oi gwauraia lasi. To bema oi hahedinaraia stiuden oi laloa bada bona ia oi hanamoa, oi durua diba ia goada totona.

10. Edena dala ai emu ekspiriens ese Baibel stiuden ia durua diba?

¹⁰ Emu ekspiriens gwauraia. Stiuden dekenai hereva momokani oi abia dalana, hekwakwanai oi hanaia, bona Iehova ese oi ia durua dalana oi herevalaia diba. (Sal. 78:4, 7) Emu ekspiriens ese stiuden ia durua diba. Danu ena abidadama do ia hagoadaia bona bapatiso ia abia. Eiava do ia durua ia davaria hekwakwanai ta ia hanaia totona. (1 Pet. 5:9) Brazil ai, painia ta ladana Gabriel be Baibel stadi amo ia abia heduru ia laloatao. Ia gwau: “Tadikaka edia ekspiriens lau kamonai neganai, lau diba Iehova ese idia vara hekwakwanai  ia itaia. Bona bema idia ese idia hanaia diba, lau danu lau hanaia diba.”

11-12. Dahaka dainai hebou dekenai Baibel stiuden ita welkam henia be namo?

¹¹ Baibel stiuden be bapatiso ia abia totona, namona be hanaihanai hebou ia mai, unai amo do ia goada. (Heb. 10:24, 25) Ena tisa ese do ia hagoadaia hebou ia mai totona. Bema hebou ia mai neganai, namona be ita ibounai ese ita hagoadaia ia mai noho totona. Edena dala ai unai ita karaia diba?

¹² Welkam henia. (Roma 15:7) Bema stiuden ita welkam henia, do ia ura hanaihanai Kingdom Hall dekenai ia mai. Mai moale ida ita welkam henia, bona ma haida dekenai ita hakaua lao. Namona be stiuden oi hereva henia; badina reana ena stadi naria tauna be ia leiti eiava kongrigeisen ena gaukara ma haida ia karaia. Stiuden ia hereva neganai, oi kamonai namonamo bona oi hahedinaraia ia oi laloa bada. Edena dala ai unai ese ia durua diba? Mani David ena ekspiriens ita laloa, ia be vanegai sibona ia bapatiso bona hari ia be hesiai tauna ta. Hebou ia mai nega ginigunana ia laloatao, ia gwau: “Mai hemarai ida Kingdom Hall ena murimuri ai lau gini lalonai, tadikaka ta ese lau ia hakaua vareai. Lau hoa badina momo ese lau idia hedavari henia. Unai lau moalelaia bona lau ura dina ta ta lalonai hebou do ai abia. Dubu ma ta dekenai unai bamona hemami lau abia lasi.”

13. Emu kara ese edena dala ai Baibel stiuden ia durua diba?

¹³ Haheitalai namona oi hahedinaraia. Baibel stiuden ese emu kara ia itaia neganai, do ia hamomokania ia be hereva momokani ia davaria vadaeni. (Mat. 5:16) Moldova ai painia ta ladana Vitali, ia gwau: “Kongrigeisen lalonai tadikaka taihu edia noho dalana, edia laloa dalana, bona kara lau itaia. Unai ese ia hamomokania Iehova ena Witnes taudia be tomadiho momokanina.”

14. Edena dala ai emu haheitalai ese stiuden tauna ia durua diba?

¹⁴ Stiuden ia bapatiso totona, ia dibaia gaudia ia badinaia be namo. Unai be mai ena hekwarahi. To oi ese Baibel ena hereva oi badinaia bona oi davaria moale ia itaia neganai, do ia ura oi ia tohotohoa. (1 Kor. 11:1) Hanae ma ia gwau: “Lau dibaia gaudia be tadikaka taihu ese idia hahedinaraia. Ma haida hagoadaia,  dika gwauatao, bona lalokau hahedinaraia karana be idia amo lau itaia. Ma haida idia gwauraia dika lasi. Unai dainai lau ura idia lau tohotohoa.”

15. Aonega Herevadia 27:17 hegeregerena, edena dala ai hanaihanai hebou ia mai Baibel stiuden ita durua diba?

¹⁵ Baibel stiuden tura henia. Baibel stiuden be hanaihanai hebou ia mai neganai, oi hahedinaraia ia oi laloa bada. (Fili. 2:4) Reana ia ida oi herevahereva. Oi hamaoroa ena mauri ai senisi ia karaia dainai oi moale bona ena Baibel stadi, ena famili, bona ena moni gaukara totona oi henanadai diba. To oi hahemaraia lasi. Unai bamona umui herevahereva neganai, tura namodia ai umui lao, bona stiuden tauna oi durua ia bapatiso totona. (Aonega Herevadia 27:17 duahia.) Hanae be hari regula painia ta. Nega ginigunana hebou ia mai negana ia laloatao, ia gwau: “Tadikaka taihu lau tura henia neganai, hebou lao henia karana lau moalelaia, bona ena be lau hesiku, to hebou lau lao. Egu tura matamatadia edia hebamo karana lau moalelaia, bona unai ese lau ia durua Iehova idia tomadiho henia lasi turadia lau rakatania totona. Lau ura Iehova bona tadikaka taihu kahirakahira lau noho. Unai dainai, egu lalona lau hadaia do lau bapatiso.”

16. Edena dala ai Baibel stiuden do ia mamia kongrigeisen taudia ese ia idia laloa bada?

¹⁶ Stiuden be iena mauri lalonai senisi ia karaia neganai, namona be ita durua bena do ia mamia kongrigeisen taudia ese ia idia laloa bada. Unai oi karaia totona, heabidae karana oi hahedinaraia. (Heb. 13:2) Moldova ai, Denis be guna ia stadi negana ia laloa: “Tadikaka taihu ese nega momo ai idia boiria idia ida ai hebamo totona. Iehova ese idia ia durua sivaraidia ai kamonai neganai, unai ese ai ia hagoadaia. Unai bamona hebamo karana dainai, ai ura Iehova do ai hesiai henia bona ai diba mauri namona do ai moalelaia.” Stiuden be pablisa ai ia lao neganai, oi boiria diba haroro gaukara ai oi ia bamoa totona. Brazil ai ia noho pablisa ta ladana Diego, ia gwau: “Haroro gaukara totona tadikaka momo be lau idia boiria. Unai be dala namona idia lau diba totona. Unai lau karaia neganai, gau momo lau diba, bona lau mamia Iehova bona Iesu kahirakahira lau noho.”

17. Edena dala ai elda taudia be Baibel stiuden idia durua diba?

¹⁷ Baibel stiuden totona nega atoa. Elda taudia e, bema Baibel stadi taudia umui laloa bona umui durua, do idia bapatiso. Hebou gabuna ai, oi be hanaihanai  Baibel stiuden taudia ida oi herevahereva, a? Haere idia henia bona edia ladana oi laloatao neganai, do idia mamia oi be idia oi laloa bada. Nega oi atoa pablisa ta ena stadi umui itaia totona, a? Emu vadivadi ese stiuden tauna ia durua diba. Nigeria ai ia noho painia ta ladana Jackie, ia gwau: “Baibel stiuden momo idia hoa, badina lau ia bamona tadikaka be elda. Baibel stiuden ta ia gwau: ‘Egu pasto be unai do ia karaia diba lasi. Ia be taga taudia sibona ia vadivadi, bona ia lao bema moni idia henia!’” Unai stiuden be hari hebou ia mai noho.

18. Edena dala ai elda taudia ese Kara 20:28 ena sisiba idia badinaia diba?

¹⁸ Baibel stadi naria taudia treinia bona hagoadaia. Elda taudia e, umui be mai emui maduna haroro gaukara bona hadibaia gaukarana lalonai, pablisa umui durua totona. (Kara 20:28 duahia.) Bema pablisa be emu vairana ai ia hemarai stadi ia naria, oi ese oi hakaua diba. Matamanai ita herevalaia taihu Jackie, ia gwau: “Elda taudia be hanaihanai egu Baibel stiuden totona idia henanadai. Baibel stadi naria dalana dekenai lau daradara neganai, heduru idia henia.” Elda taudia ese Baibel stadi naria taudia idia hagoadaia diba, idia hesiku lasi totona. (1 Tes. 5:11) Jackie ma ia gwau: “Elda taudia ese lau idia hagoadaia bona lau idia hamaoroa gaukara namona lau karaia neganai, lau moale. Lau dekenai unai hereva be dina siahu ai ranu paraka lau inua bamona. Edia hereva namodia ese lau ia hagoadaia, bona egu Baibel stadi naria gaukarana lau moalelaia.”​—Aon. 25:25.

19. Edena dala ai ita ibounai ita moale diba?

¹⁹ Ena be hari Baibel stadi ta ita karaia lasi, to ta ita durua diba ia bapatiso totona. Namona be ita hereva momo lasi bona ita hegaegae namonamo, unai amo stadi naria tauna ita durua diba. Baibel stiuden be Kingdom Hall ia mai neganai, ita tura henia be namo, bona haheitalai namona ita hahedinaraia diba. Elda taudia ese stiuden totona nega do idia atoa, bona Baibel stadi naria taudia do idia treinia bona ena gaukara dainai idia hanamoa. Ita moale badina ta ita durua, Iehova, iseda Tamana ia lalokau henia bona ia hesiai henia totona.