1. Mataio 24:9 hegeregerena, dahaka dainai haida ese ita idia inai henia neganai ita hoa lasi?

IEHOVA ese ita ia havaraia ita lalokau heheni totona. Unai dainai ta ese ita ia inai henia neganai ita lalohisihisi, bona reana ita gari danu. Hegeregere, Europe ai taihu ta ladana Georgina, ia gwau: “Egu mauri lagani be 14 neganai egu sinana ese lau ia inai henia, badina Iehova lau hesiai henia. Lau mamia, lau be sibona lau noho bona lau be taunimanima namona lasi.” * Tadikaka ta ladana Danilo, ia gwau: “Lau be Iehova ena Witnes ta dainai soldia taudia ese lau idia botaia, idia gwauraia dika, bona idia ura hamasea neganai, lau gari bada.” Unai bamona kara ese ita idia hahisia, to ita hoa lasi badina Iesu ia peroveta ita do idia inai henia.​—Mataio 24:9 duahia.

2-3. Dahaka dainai taunimanima ese Iesu idia badinaia taudia idia inai henia?

² Tanobada taudia ese Iesu idia badinaia taudia idia inai henia. Dahaka dainai? Badina Iesu bamona, ita be “tanobada ena lasi.” (Ioa. 15:17-19) Unai dainai, ena be tanobada gavamanidia ita matauraia, to politikol pati ta ai ita vareai lasi, pepe ita saluti lasi eiava bese ena ane ita abia lasi. Ita be Iehova sibona ita tomadiho henia. Ita abia dae Dirava be mai ena maoro taunimanima ia lohiaia totona. To Satani bona ena “natuna” taudia be mai dagedage ida unai idia dadaraia. (Gen. 3:1-5, 15, NWT.) Ita harorolaia sivaraina be Dirava ena Basileia sibona ese taunimanima edia hekwakwanai  do ia hamaoromaoroa, bona kahirakahira unai Basileia ese idia inai henia taudia do ia haorea. (Dan. 2:44; Apok. 19:19-21) Manau taudia dekenai unai be sivarai namona to kara dika taudia dekenai unai be sivarai dikana.​—Sal. 37:10, 11.

³ Ita idia inai henia danu badina ita be Dirava ena taravatu ita badinaia. Iena taravatu be tanobada taudia edia kara amo ia idau. Hegeregerena hari inai negai, taunimanima ese matabodaga kara dika rohorohodia idia abia dae. Guna Sodoma bona Gomora taudia ese unai bamona kara idia karaia dainai, Dirava ese ia hamasedia! (Iuda 7) Ita be Baibel ena taravatu unai gaudia dekenai ita badinaia dainai, taunimanima ese ita idia gwauraia dika bona idia kirikirilaia.​—1 Pet. 4:3, 4.

4. Taunimanima ese ita idia inai henia neganai, edena kara rua ese ita do ia durua?

⁴ Taunimanima ese ita idia inai henia bona gwauraia dika neganai, dahaka ese ita ia durua diba ita haheauka totona? Iehova ese ita ia durua totona, ita abidadama henia be namo. Iseda abidadama be kesi bamona, ‘Satani ena diba, lahi gaudia do ia koua.’ (Efe. 6:16) To abidadama sibona be hegeregere lasi. Lalokau be mai anina bada. Dahaka dainai? Badina ‘lalokau be ia badu haraga lasi, ia gini goada bona hisihisi ibounai ia haheaukalaia.’ (1 Kor. 13:4-7, 13) Mani ita itaia edena dala ai Iehova, tadikaka taihu bona iseda inai taudia lalokau henia karana ese ita do ia durua.

5. Iesu be ena Tamana ia lalokau henia dainai dahaka ia karaia?

⁵ Iesu be ena hanuaboi ginigabena ai ena hahediba taudia ia hamaoroa: “Lau ese egu Tamana lau lalokau henia, [unai dainai] Tamana ese lau dekenai ia henia hahegani lau badinaia noho.” (Ioa. 14:31) Iesu ese Iehova ia lalokau henia dainai, ia davaria hahetoho ia haheaukalaia. Iehova ita lalokau henia neganai, ita danu unai bamona ita karaia diba.

6. Roma 5:3-5 hegeregerena, dahaka ese Iehova ena hesiai taudia ia durua dagedage idia haheaukalaia totona?

⁶ Dirava lalokau henia karana ese Iehova ena hesiai taudia ia durua, dagedage idia haheaukalaia totona. Hegeregere, Iuda taudia edia kota badana ese aposetolo taudia idia oda henia do idia haroro lasi. To Dirava idia lalokau henia bona ia be edia lohia dainai, ia idia kamonai henia, to taunimanima lasi. (Kara 5:29; 1 Ioa. 5:3) Hari unai bamona lalokau ese iseda tadikaka ia durudia, gavamani edia dagedage karana dekenai idia gini goada totona. Tanobada taudia ese ita idia dagedage henia neganai, ita lalomanoka lasi, to ita moale.​—Kara 5:41; Roma 5:3-5 duahia.

7. Famili ese ita idia dagedage henia neganai dahaka do ita karaia?

⁷ Iseda famili ese ita idia dagedage henia neganai, unai ita haheaukalaia be auka. Baibel ita ura stadilaia neganai, do idia laloa ma haida ese ita idia hakaua kerere bona ita be kavakava. (Mareko 3:21 hahegeregerea.) Edia kara dekenai do ita hoa lasi, badina Iesu ia gwau: “Tau ta ena inai taudia be iena ruma bese taudia.” (Mat. 10:36) Ena be iseda famili taudia ese ita idia kara dika henia, to idia do ita inai henia lasi. To iseda lalokau Iehova dekenai ia goada ia lao neganai, eda lalokau taunimanima totona do ia bada ia lao danu. (Mat. 22:37-39) To namo lasi idia ita hamoalea totona, Baibel ena hakaua herevadia bona taravatu do ita utua.

8-9. Dahaka ese taihu ta ia durua ia gini goada totona?

⁸ Matamanai ita herevalaia kekenina, Georgina be ena sinana ena dagedage karana ia haheaukalaia. Ia gwau: “Lau bona egu  sinana be Iehova ena Witnes taudia ida Baibel ai stadilaia. To hua 6 murinai lau ura hebou lau lao neganai, egu sinana ena kara ia idau. Ia be aposteit taudia ia bamoa bona edia koikoi herevadia be lau dekenai ia gwauraia. Lau ia gwauraia dika, egu huina ia veria, egu aiona ia gigia bona egu buka ia negedia. Egu mauri lagani be 15 neganai, lau bapatiso. Egu sinana ia ura lasi Iehova lau hesiai henia. Unai dainai gwau-edeede natudia edia ruma dekenai lau ia atoa. Bema oi idia lalokau henia bona naria taudia ese oi idia dagedage henia, unai oi haheaukalaia be auka.”

⁹ Dahaka ese Georgina ia durua? Ia gwau: “Egu sinana ese lau ia dagedage henia dinana ai, Baibel ibounai lau duahia haorea. Lau diba hereva momokani lau davaria vadaeni, bona Iehova turana ai lau lao. Nega momo ia lau guriguri henia bona ia be lau ia kamonai. Gwau-edeede natudia edia ruma ai lau noho neganai, taihu ta ese ena ruma dekenai lau ia boiria bona Baibel ai stadilaia. Unai nega ai tadikaka taihu ese lau idia hagoadaia. Lau be edia natuna bamona idia kara henia. Ia hedinarai goevagoeva, Iehova ena goada ese iseda inai taudia edia goada ia hereaia, herevana idia be daika.”

10. Ita abia dae momokani Iehova be dahaka do ia karaia?

¹⁰ Aposetolo Paulo ia gwau, gau ta ese “Dirava ena lalokau, Keriso Iesu iseda lohiabada lalonai ia noho gauna amo, ita ia hapararaia diba lasi.” (Roma 8:38, 39) Ena be hisihisi ita davaria, to nega ibounai Iehova be ita do ia durua bona hagoadaia. Bona Georgina ena sivarai bamona, Iehova ese iseda tadikaka taihu amo ita do ia durua.

11. Edena dala ai Ioane 15:12, 13 ena hereva ese Iesu ena hahediba taudia ia durua?

¹¹ Iesu ena hanuaboi ginigabena ai, ena hahediba taudia ia hamaoroa ta ta do idia lalokau henia. (Ioane 15:12, 13 duahia.) Ia diba ma haida lalokau henia guna karana ese idia do ia durua idia lalotamona bona tanobada ena inai henia karana idia haheaukalaia totona. Mani Tesalonika kongrigeisen ena haheitalaia ita itaia. Idia haginia negana amo dagedage idia davaria. To tadikaka taihu be mai abidadama ida idia haheauka bona lalokau idia hahedinaraia. (1 Tes. 1:3, 6, 7) Paulo ese idia ia hagoadaia, lalokau do idia hahedinaraia bona unai kara ‘do idia habadaia’  noho. (1 Tes. 4:9, 10) Lalokau dainai idia ese lalometau taudia do idia hagoadaia bona manoka taudia do idia durua. (1 Tes. 5:14) Idia ese Paulo ena sisiba idia badinaia, badina iena revareva iharuana ai, ia gwau: “Umui ta ta ibounai emui lalokau heheni karana danu ia bada ia lao.” (2 Tes. 1:3-5) Unai lalokau ese idia ia durua hahetoho bona dagedage idia haheaukalaia totona.

12. Tuari negana ai tadikaka taihu be edena dala ai lalokau idia hahedinaraia?

¹² Matamanai ita herevalaia tadikaka Danilo bona ena adavana edia sivarai mani ita laloa. Ena be edia taoni ai tuari ia vara, to hebou idia lao henia noho, haroro gaukara idia karaia, bona edia aniani be tadikaka taihu ida idia haria. Bena dina ta, tuari tauna mai ena ipidi be Danilo ena ruma dekenai ia lao. Danilo ia gwau: “Lau idia oda henia Iehova ena Witnes oreana lau rakatania totona. Lau ura lasi neganai, lau idia botaia bona idia ura lau idia pidia. Bona idia gwau do idia giroa mai egu adavana idia reipia totona. To, karaharaga tadikaka ese trein ta dekenai ai idia atoa bona taoni ma ta dekenai ai lao. Unai tadikaka edia lalokau karana do lau laloa boio lasi. Unai taoni ai ai ginidae neganai, tadikaka ese ai dekenai aniani idia henia bona lau idia durua ruma ta bona moni gaukara ta lau davaria totona! Unai amo tuari amo idia heau tadikaka taihu be emai ruma dekenai ai abia dae.” Unai ekspiriens ese ia hahedinaraia, Keristani lalokauna ese ita ia durua dagedage karana ita haheaukalaia totona.

13. Edena dala ai lauma helaga ese ita ia durua diba, ena be taunimanima ese ita idia inai henia?

¹³ Iesu ese ena hahediba taudia ia hamaoroa edia inai taudia do idia lalokau henia. (Mat. 5:44, 45) Unai be auka, to Dirava ena lauma helaga ena heduru amo ita karaia diba. Dirava ena lauma ena huahua be lalokau, boga-auka, hebogahisi, manau, bona sibona biagua karana. (Gal. 5:22, 23) Unai kara namodia ese ita idia durua dagedage karana ita haheaukalaia totona. Ita idia inai henia taudia momo be edia kara idia haidaua, badina edia Witnes adavana, natuna o dekena tauna ese unai kara namodia ia hahedinaraia. Danu idia momo be Witnes taudia ai idia lao. Bema ia auka oi idia inai henia taudia oi lalokau henia,  namona be lauma helaga totona oi guriguri. (Luka 11:13) Namona be oi abia dae, Dirava ena dala be hanaihanai hereadae.​—Aon. 3:5-7.

14-15. Edena dala ai Roma 12:17-21 ese Yasmin ia durua ena adavana ia lalokau henia totona?

¹⁴ Mani Middle East ai ia noho taihu Yasmin ena sivarai ita laloa. Ia be Iehova ena Witnes ta ai ia lao neganai, ena adavana ia laloa ia idia koia, bona ena tomadiho ia koua toho. Yasmin ia gwau henia, ena varavara, haroro tauna, bona babalau tauna ia hadibaia ia do idia hagaria, badina ena ruma bese ia hapararaia noho. Danu, kongrigeisen hebouna ta lalonai ena tau ese tadikaka ia gwauraidia dika! Yasmin be nega momo ia taitai badina ena adavana ese ia kara auka henia.

¹⁵ Kingdom Hall ai, Yasmin be tadikaka taihu ese idia hagoadaia. Bona elda taudia ese idia hagoadaia Roma 12:17-21 ena hereva ia badinaia totona. (Duahia.) Yasmin ia gwau: “Ia auka, to Iehova lau noia lau do ia durua, bona lau hekwarahi Baibel ena sisiba lau badinaia totona. Unai dainai ena be egu adavana be lau ia habadua totona kisini dekenai kopukopu ia negea to lau hagoevaia. Lau ia gwau henia neganai mai manau ida lau haere. Bona ia gorere neganai ia lau naria.”

16-17. Yasmin ena haheitalai amo dahaka oi dibaia?

¹⁶ Yasmin be adavana ia lalokau henia dainai hahenamo ia davaria. Ia gwau: “Egu adavana ese lau ia abidadama henia matamaia, badina ia diba lau be hanaihanai hereva momokani lau gwauraia. Tomadiho gaudia ai herevalaia neganai, mai hemataurai ida ia kamonai namonamo, bona ia gwau ruma dekenai maino do ia noho. Hari lau ia hagoadaia kongrigeisen heboudia do lau lao totona. Hari egu adavana ida emai headava ai moalelaia bona emai ruma dekenai maino ia noho. Egu ura badana be egu adavana ese hereva momokani do ia abia dae bona lau ida Iehova do ai tomadiho henia.

¹⁷ Yasmin ena sivarai amo ita diba, “lalokau be gau ibounai dekenai ia gini goada, . . . mai ena helaro bona gau ibounai ia haheaukalaia.” (1 Kor. 13:4, 7) Bema lalokau ita hahedinaraia, iseda inai taudia ese edia dagedage karadia do idia hadokoa. Bona lalokau ita hahedinaraia noho neganai Iehova ia moale. To bema ita idia dagedage henia noho, edena dala ai ita moale noho diba?

18. Dahaka dainai ita moale diba ena be ita idia inai henia?

¹⁸ Iesu ia gwau: ‘Umui idia inai henia neganai, do umui moale.’ (Luka 6:22) Iseda abidadama dainai ita idia dagedage henia karana ita ura henia lasi. To dahaka dainai ita moale noho diba? Mani inai badina toi ita laloa. Ginigunana, ita haheauka neganai, Dirava ena lalonamo ita abia. (1 Pet. 4:13, 14) Iharuana, iseda abidadama ia goada. (1 Pet. 1:7) Bona ihatoina, ahuna namona mauri hanaihanai do ita abia.​—Roma 2:6, 7.

19. Dahaka dainai aposetolo taudia idia dadabadia to idia moale noho?

¹⁹ Iesu ia toreisi lou murinai, iena aposetolo taudia ese ia gwauraia moalena idia mamia. Ena be idia dadabadia bona idia oda henidia do idia haroro lasi, to idia moale. Dahaka dainai? “Badina Dirava ia laloa idia hegeregere Iesu ena ladana dainai hemarai idia abia totona.” (Kara 5:40-42) Idia be edia Biaguna idia lalokau henia dainai, edia inai taudia dekenai idia gari lasi. Bona sivarai namona harorolaia gaukarana idia “hadokoa lasi” karana amo edia lalokau idia hahedinaraia. Hari, iseda tadikaka taihu momo be hekwakwanai idia davaria, to hesiai gaukara idia goadalaia noho. Idia diba Iehova be edia lalokau iena ladana totona, bona edia gaukara do ia laloa boio lasi.​—Heb. 6:10.

20. Stadi atikol 13 ai dahaka do ita herevalaia?

²⁰ Inai nega oromana ai ita noho dainai tanobada ese ita do ia inai henia noho. (Ioa. 15:19) To, ita gari lasi be namo. Stadi atikol 13 ai do ita itaia, Iehova ese ia idia badinaia taudia ia ‘hagoadaia bona ia gimaia.’ (2 Tes. 3:3) Unai dainai namona be Iehova, iseda tadikaka taihu, bona ita idia inai henia taudia danu ita lalokau henia noho. Unai sisiba ita badinaia neganai, do ita lalotamona bona iseda abidadama do ia goada, Iehova ena ladana do ita hanamoa bona do ita hamomokania lalokau ese ta inai henia karana ia hereaia.