1. Dahaka dainai iseda laloa dalana ita biagua be namo?

 ENA BE vanegai sibona eiava lagani momo ita bapatiso vadaeni, to ita ura Iehova ese ia ura henia karadia ita hahedinaraia. Unai ita karaia totona, iseda laloa dalana ita biagua be namo. Dahaka dainai? Badina ita laloa gaudia be kara amo ita hahedinaraia. Bema hanaihanai tauanina ena ura dikadia sibona ita laloa, do ita herevalaia bona karaia gaudia be dika sibona. (Efe. 4:17-19) To bema gau namodia sibona ita laloa, iseda hereva bona kara amo iseda guba Tamana, Iehova, do ita hamoalea.​—Gal. 5:16.

2. Inai atikol ai dahaka henanadai do ita herevalaia?

² Atikol 10 ai ita herevalaia bamona, iseda kudouna ai lalohadai dikadia idia vareai diba. To ita gaukara goada iseda kara amo ita hahedinaraia lasi totona. Ita do bapatiso lasi neganai, Iehova ese ia inai henia gaudia ita herevalaia lasi bona karaia lasi be namo. Unai be dala ginigunana iseda mauri gunana ita kokia totona. To, Iehova ita hamoalea momokani totona, namona be inai oda herevana ita badinaia danu, ia gwau: “Mauri matamata be dabua bamona do umui atoa.” (Kol. 3:10) Inai atikol ai, inai henanadai do ita haerelaia: “Mauri matamata” be dahaka? Edena dala ai mauri matamata ita badinaia noho diba?

3. Galatia 5:22, 23 ese ia hahedinaraia “mauri matamata” be dahaka, bona edena dala ai ta be mauri matamata ia badinaia diba?

³ “Mauri matamata” ia badinaia tauna be Iehova ia tohotohoa. Iena laloa dalana, hemami, bona kara amo lauma helaga  ena huahua ia hahedinaraia. (Galatia 5:22, 23 duahia.) Hegeregere, ia ese Iehova bona Iena taunimanima ia lalokau henia. (Mat. 22:36-39) Unai bamona tauna be hekwakwanai idauidau ia davaria, to ia haheauka bona ia moale noho. (Iam. 1:2-4) Ia be maino karaia tauna. (Mat. 5:9) Ia be ma haida dekenai hebogahisi ia hahedinaraia bona edia kara ia haheaukalaia. (Kol. 3:13) Ia be kara namodia ia ura henia bona ma haida dekenai ia hahedinaraia. (Luka 6:35) Iena kara amo ia hahedinaraia ena guba Tamana ia abidadama henia momokani. (Iam. 2:18) Haida ese idia ura heatu henia eiava habadua neganai ia manau, bona hahetoho ia davaria neganai, sibona ena ura ia biagua.​—1 Kor. 9:25, 27; Tito 3:2.

4. Mauri matamata ita badinaia totona, Galatia 5:22, 23 ese ia herevalaia karadia be nega tamona ita hahedinaraia, a? Herevalaia.

⁴ Mauri matamata ita badinaia totona, Galatia 5:22, 23 bona Baibel siri ma haida ese ia gwauraia kara namodia ita hahedinaraia. * Unai kara namodia be dabua ta ta hegeregerena lasi, bema dabua ita hahedokilaia, nega tamona ibounai ita atoa lasi to ta ta ita hahedokilaia. To, kara namodia ta ta be kara namodia ma haida ida idia gaukara hebou. Hegeregere, bema emu dekena tauna oi lalokau henia bada, ena kara do oi haheaukalaia bona oi kara namo henia noho. Bona kara namodia oi hahedinaraia totona, oi manau bona sibona oi biagua be namo.

5. “Keriso ena lalohadai ita abia” ena anina be dahaka, bona dahaka dainai ena mauri dalana ita stadilaia be namo? (1 Korinto 2:16)

⁵ Korinto Ginigunana 2:16 duahia. Mauri matamata ita badinaia totona, Keriso ena “lalohadai ita abia” be namo. Anina be, Iesu ena laloa dalana ita dibaia bona tohotohoa. Ia ese lauma helaga ena huahua ia hahedinaraia goevagoeva. Bona hevarivari namona bamona, Iesu ese Iehova ena kara ia hahedinaraia namonamo. (Heb. 1:3) Iesu ena laloa dalana ita abia neganai, ena kara do ita tohotohoa namonamo.​—Fili. 2:5.

6. Mauri matamata ita ura badinaia neganai, dahaka ita laloatao be namo?

⁶ Iesu ena haheitalai ita tohotohoa diba, a? Reana do ita laloa: ‘Iesu be goevadae tauna. Ia do lau tohotohoa namonamo lasi!’ Bema unai bamona ita laloa, namona be inai gaudia  ita laloatao. Ginigunana, ita be Iehova bona Iesu hegeregerena idia karaia. Unai dainai, idia ita tohotohoa bona edia kara haida ita hahedinaraia diba. (Gen. 1:26) Iharuana, iunives lalonai Dirava ena lauma helaga ena siahu be bada herea. Bona lauma helaga ena heduru amo, oi karaia diba lasi gaudia oi hagugurua diba. Ihatoina, Iehova ia diba lauma helaga ena huahua do oi hahedinaraia goevagoeva lasi. Momokani, iseda guba Tamana ese tanobada helarona idia abia taudia totona lagani 1,000 ia hegaegaelaia, do idia goevadae totona. (Apok. 20:1-3) Iehova ia ura hari ita gaukara goada bona heduru totona ia dekenai ita tabekau.

7. Dahaka do ita herevalaia?

⁷ Edena dala ai Iesu ita tohotohoa diba? Mani lauma helaga ena huahua 4 do ita herevalaia. Bona Iesu ese unai kara ta ta ia hahedinaraia dalana amo gau haida do ita dibaia. Danu henanadai haida do ita herevalaia, unai ese ita do ia durua mauri matamata ita hanamoa noho totona.

8. Iesu be edena dala ai lalokau ia hahedinaraia?

⁸ Iesu be Iehova ia lalokau henia bada dainai, ena Tamana bona ita totona ena ura ia dadaraia. (Ioa. 14:31; 15:13) Iesu be tanobada ai ena mauri dalana amo ia hahedinaraia taunimanima ia lalokau henia bada. Ena be haida ese idia dagedage henia, to dina ta ta ai lalokau bona hebogahisi karana ia hahedinaraia. Taunimanima ia lalokau henia dala badana be, idia dekenai Dirava ena Basileia ia harorolaia. (Luka 4:43, 44) Danu Iesu be mai ura ida sibona ia henia kara dika taudia ese idia hahisia bona hamasea totona, unai amo ia hahedinaraia ia be Dirava bona taunimanima ia lalokau henia. Unai dainai, dala ia kehoa ita ibounai be mauri hanaihanai ita abia totona.

9. Edena dala ai Iesu hegeregerena lalokau ita hahedinaraia diba?

⁹ Iseda guba Tamana, Iehova, dekenai eda mauri ita gwauhamatalaia bona bapatiso ita abia, badina Ia ita lalokau henia. Unai dainai Iesu hegeregerena, namona be taunimanima ita kara henia dalana amo ita hahedinaraia Iehova ita lalokau henia. Aposetolo Ioane ia gwau: “Bema ta ese ena tadikaka, ia itaia diba tauna unai, ia lalokau henia lasi, vadaeni ia itaia lasi Diravana ia lalokau henia diba lasi.” (1 Ioa. 4:20) Namona be sibona ita nanadaia: ‘Taunimanima lau lalokau henia bada, a? Ena be ma haida ese lau idia kara namo henia lasi, to mai ura ida idia lau hebogahisi henia, a? Lalokau dainai egu nega bona kohu lau gaukaralaia ma haida lau durua Iehova idia dibaia totona, a? Ena be momo ese egu hekwarahi idia laloa bada lasi eiava lau idia dagedage henia, to mai ura ida idia lau durua noho, a? Hahediba taudia halaoa gaukarana dekenai nega bada lau haorea diba, a?’​—Efe. 5:15, 16.

10. Edena dala ai Iesu be maino karaia tauna?

¹⁰ Iesu be maino karaia tauna. Ia idia kara dika henia neganai, edia dika davana ia haloua lasi. To unai sibona lasi. Ia ese dala ia tahua maino ia karaia bona ma haida ia hagoadaia edia hepapahuahu idia hamaoromaoroa totona. Hegeregere, idia ia hadibaia bema idia ura Iehova ese edia tomadiho karadia ia abia dae, namona be edia tadikaka ida maino idia karaia. (Mat. 5:9, 23, 24) Bona Iesu ese ena aposetolo taudia ia durua loulou idia huanai ia vara hepapahuahu, daika be bada bona daika be maragi, idia hamaoromaoroa totona.​—Luka 9:46-48; 22:24-27.

11. Edena dala ai maino karaia tauna ai ita lao diba?

¹¹ Maino ita karaia totona, hepapahuahu dadaraia sibona be hegeregere lasi. Namona be dala ita tahua ma haida ida maino ita karaia,  bona eda tadikaka taihu ita hagoadaia edia hepapahuahu idia hamaoromaoroa totona. (Fili. 4:2, 3; Iam. 3:17, 18) Sibona dekenai inai henanadai ita henia diba: ‘Ma haida ida maino lau karaia totona, edena dala ai sibona egu ura lau dadaraia? Tadikaka o taihu ta be egu lalona ia hahisia neganai, ia lau badu henia noho, a? Bema ta be kerere ia karaia, lau ura ia sibona do ia mai bona maino ai karaia, eiava dala lau tahua ia ida maino lau karaia totona, a? Ma haida lau hagoadaia ta ta huanai maino idia karaia totona, a?’

12. Edena dala ai Iesu be hebogahisi ia hahedinaraia?

¹² Iesu be hebogahisi tauna. (Mat. 11:28-30) Iesu be hebogahisi ia hahedinaraia, badina hekwakwanai negadiai ia lalomanada bona ia laloa maoromaoro. Hegeregere, Poinikia hahinena ese ia noia ena natuna do ia hanamoa neganai, Iesu ese ena noinoi ia abia dae lasi, to hahine ena abidadama be bada dainai ena natuna ia hanamoa. (Mat. 15:22-28) Ena be Iesu be hebogahisi tauna, to sisiba ia henia danu. Hebogahisi karana ia hahedinaraia dalana ta be, ia lalokau henia taudia ia hereva auka henia. Hegeregere, Iesu be Iehova ena ura hagugurua totona Petero ese ia koua neganai, Iesu ese hahediba taudia ma haida edia vairanai ena lalohadai ia hamaoromaoroa. (Mar. 8:32, 33) Iesu be Petero hahemaraia totona unai ia karaia lasi, to Petero bona hahediba taudia ma haida ia hadibaia idia hekokoroku lasi totona. Oibe, ena be Petero ia hemarai, to ia abia sisiba amo namo ia davaria.

13. Edena dala ai kara namo ita hahedinaraia diba?

¹³ Ita lalokau henia taudia dekenai hebogahisi ita hahedinaraia totona, nega haida idia ita sisiba henia be namo. Unai ita karaia totona, Dirava ena Hereva amo sisiba ita henia Iesu hegeregerena. Ita manau be namo. Namona be ita abia dae idia ura kara maorona idia karaia, bona Iehova bona oi idia lalokau henia taudia ese emu sisiba namodia do idia badinaia. Sibona oi nanadaia: ‘Egu lalokau tauna ta be kerere ia karaia neganai, mai gari lasi ida ia lau hereva henia, a? Bema sisiba lau henia, mai manau ida lau hereva eiava lau hereva auka, a? Sisiba lau henia ena badina be dahaka? Sisiba lau henia badina lau ia habadua, eiava lau ura ia lau durua, a?’

14. Edena dala ai Iesu be kara namodia ia hahedinaraia?

¹⁴ Iesu be kara namodia ia diba bona kara amo ia hahedinaraia danu. Iesu be ena Tamana ia lalokau henia dainai, hanaihanai badina maorodia dekenai kara namodia ia hahedinaraia. Kara namo tauna be nega ibounai dala ia tahua ma haida ia durua bona idia totona gau namodia ia karaia. Kara maorona ita diba bona badina maorona dainai ita hahedinaraia be namo. Reana do ita laloa, ‘Badina kererena dekenai kara maorona ita karaia diba, a?’ Oibe. Hegeregere, Iesu ia gwau ogogami taudia dekenai harihari gaudia idia henia taudia idia ura ma haida ese idia itaia bona idia hanamoa. Bona ena be kara namodia idia karaia, to Iehova be idia dekenai ia moale lasi.​—Mat. 6:1-4.

15. Edena dala ai kara namodia ita hahedinaraia diba?

¹⁵ Bema badina maorodia dainai kara maorona ita karaia, unai be namo. Sibona ita nanadaia: ‘Kara maorona lau diba sibona lasi, to lau badinaia danu, a? Dahaka badina dainai kara namodia lau karaia?’

16. Dina ta ta ai dahaka ita karaia be namo, bona dahaka dainai?

¹⁶ Ita bapatiso murinai, namo lasi ita laloa mauri matamata badinaia noho karana ia ore. “Mauri matamata” be dabua  matamata bamona ita hagoevaia noho. Unai ita karaia dalana ta be, dina ta ta ai dala ita tahua Dirava ena lauma huahua ita hahedinaraia totona. Dahaka dainai? Badina ita gaukara goada unai kara namodia ita hahedinaraia neganai, Iehova ena lauma ese ita do ia durua. Unai ita diba badina Dirava be gaukara karaia tauna, bona ena lauma helaga be gaukara siahuna. (Gen. 1:2) Unai dainai lauma helaga ena huahua ese ita do ia hakaua kara ta ita karaia totona. Hegeregere, hahediba tauna Iamesi ia gwau: “Abidadama mai ena kara lasi be mase gauna.” (Iam. 2:26) Dirava ena lauma ena huahua haida danu be unai bamona.

17. Bema lauma helaga ena huahua ita hahedinaraia lasi, dahaka ita karaia be namo?

¹⁷ Ena be Keristani taudia be lagani momo idia bapatiso vadaeni, to nega haida ia auka lauma helaga ena huahua idia hahedinaraia totona. To, ita gaukara goada unai kara ita hahedinaraia noho be mai anina bada. Mani inai haheitalai oi laloa. Bema oi ura henia dabua be ia darea, maoromaoro do oi negea, a? Lasi. Reana ia darea gabuna oi hanamoa diba. Unai murinai do oi naria namonamo. Unai hegeregerena, bema ta dekenai kara namo, haheauka, eiava lalokau karana oi hahedinaraia lasi, oi lalomanoka lasi. Mai momokani ida unai tauna dekenai sori herevana oi gwauraia, unai amo emui hetura karana umui hanamoa lou diba. Bona emu lalona oi hadaia emu kara oi hanamoa totona.

18. Dahaka ita diba be namo?

¹⁸ Iesu ena haheitalai namodia dainai ita moale! Iena laloa dalana ita abia neganai, do ia auka lasi iena kara ita tohotohoa totona. Unai bamona ita karaia neganai, iseda kara be dabua bamona do ita hagoevaia noho. Inai atikol ai, Dirava ena lauma helaga ena huahua 4 sibona ita herevalaia. Namona be nega oi atoa lauma helaga ena huahua ma haida oi stadilaia, bona unai kara ta ta oi hahedinaraia dalana oi laloa. Tahua gaukara oi karaia totona, Iehova Ena Witnes Taudia Edia Stadi Indeks dekenai hereva kwarana, “Keristani Mauri Dalana” dekenai oi lao bona “Lauma Helaga Ena Huahua” henunai idia noho atikol haida oi itaia. Namona be oi diba, bema oi hekwarahi mauri matamata oi badinaia noho, Iehova ese oi do ia durua.