1. Iuda taudia dekenai dahaka moale gauna ta do ia vara?

 UNAI be moale bada negana. Israela taudia be lagani momo lalonai Babulonia dekenai idia noho bona Iehova Dirava ese “Parasa ena king, Kurese ena lalona ia veria” idia ia ruhaia totona. King ese maoro ia henia Iuda taudia be edia tano dekenai do idia giroa lou bona edia Dirava Iehova ena ruma “idia haginia lou.” (Esr. 1:1, 3) Unai be moale gauna! Badina Dirava ese idia dekenai ia henia tanona ai Dirava momokanina do idia tomadiho henia lou.

2. Iuda taudia be Ierusalema dekenai idia giroa lou neganai, dahaka idia karaia matamaia?

² Lagani 537 B.C.E ai, Iuda taudia haida be Ierusalema ai idia ginidae, ia be saut kahana ena Iuda basileiana ena siti badana. Idia giroa lou Iuda taudia be karaharaga gaukara idia karaia matamaia, bona lagani 536 B.C.E ai dubu helaga ena badina idia haginia vadaeni!

3. Iuda taudia be dahaka dagedage karana idia davaria?

³ Iuda taudia be dubu haginia lou gaukarana idia hamatamaia murinai, taunimanima ese idia dagedage henia matamaia. Iuda taudia be edia badinai idia noho besedia ese “edia lalona idia hamanokaia noho bona idia koua dubu idia haginia lasi totona.” (Esr. 4:4) Iuda taudia dekenai unai be nega aukana, bona unai dika be ia bada ia lao. * Lagani 522 B.C.E ai, Aratasaseta be Parasa ena king ai ia lao. Dagedage taudia idia laloa king matamata ia gini dainai, “idia be taravatu ladanai kerere idia havaraia noho,” unai amo dubu haginia gaukarana idia koua diba. (Sal. 94:20) Idia be King Aratasaseta idia hamaoroa Iuda taudia ese palani idia karaia ia idia gwau-edeede henia totona. (Esr. 4:11-16) King ese edia koikoi herevadia ia abia dae bona  dubu haginia gaukarana ia koua. (Esr. 4:17-23) Unai dainai Iuda taudia be dubu haginia gaukarana idia hadokoa.​—Esr. 4:24.

4. Dagedage taudia ese dubu haginia gaukarana idia koua neganai, Iehova be dahaka ia karaia? (Isaia 55:11)

⁴ Iehova idia tomadiho henia lasi taudia bona Parasa gavamani henunai idia gaukara taudia haida ese dubu haginia gaukarana idia koua. To Iehova ia ura Iuda taudia ese dubu haginia gaukarana idia karaia noho, bona iena ura be nega ibounai ia hagugurua. (Isaia 55:11 duahia.) Iehova ese Sekaraia ia abia hidi peroveta gaukara ia karaia bona ia dekenai matahanai ibounai 8 ia henia. Bena Sekaraia ese Iuda taudia ia hagoadaia totona unai matahanai ia herevalaia. Bona unai ese idia ia durua, dagedage taudia idia gari henia lasi bona idia ia hagoadaia Iehova ese ia henia gaukarana idia karaia noho totona. Matahanai namba 5 ai, Sekaraia ese lamepa atoa gauna bona olive audia rua ia itaia.

5. Inai atikol ai dahaka do ita herevalaia?

⁵ Nega haida ita lalomanoka. Unai dainai Iehova ese Israela taudia ia hagoadaia totona Sekaraia dekenai ia henia matahanai namba 5 ese ita do ia durua, bona inai atikol ai unai do ita herevalaia. Danu, unai matahanai ita lalopararalaia karana ese ita do ia durua, taunimanima ese ita idia dagedage henia, iseda noho dalana ia idau, bona hakaua dalana ta ita lalopararalaia lasi neganai, mai abidadama ida Iehova ita hesiai henia noho.

6. Sekaraia 4:1-3 ai ia noho matahanai, lamepa atoa gauna bona olive audia rua, ese edena dala ai Iuda taudia ia hagoadaia? (Rau 1 ena laulau itaia.)

⁶ Sekaraia 4:1-3 duahia. Lamepa atoa gauna bona olive audia edia matahanai rua ese Iuda taudia ia durua dagedage karana idia hanaia totona. Edena dala ai? Lamepa atoa gauna be oela ia abia noho dainai ia bodo lasi. Unai oi itaia, a? Olive audia rua amo oela be disi ta dekenai ia aru lao, bena unai oela be lamepa atoa gauna dekenai idia noho lamepa 7 dekenai ia aru lao. Unai oela dainai lamepa idia ara noho. Sekaraia ia gwau: “Egu lohia e, inai gaudia edia anina be dahaka?” Vadaeni aneru ese Iehova amo ia mai herevana ia gwauraia, ia gwau: “‘Tuari oreana ena goada amo lasi, eiava taunimanima edia siahu amo lasi, to egu siahu amo inai gaudia ibounai do idia vara.’ Unai be tuari oreadia edia Iehova ena hereva.” (Sek. 4:4, 6) Au amo ia mai oela be Iehova ena lauma helaga ia laulaulaia, unai siahu be ia ore diba lasi. Dirava ena lauma helaga ena siahu be bada herea, to Parasa basileiana ena siahu be bada lasi. Iehova ese dubu haginia taudia ia durua dainai, ena be dagedage idia davaria, to edia gaukara idia hagugurua diba. Unai be hagoadaia sivaraina! Iuda taudia be Iehova dekenai idia tabekau bona gaukara idia hamatamaia lou be namo. Oibe, idia be unai bamona idia karaia, ena be haida ese gaukara idia koua.

7. Dahaka senisi ia vara dainai dubu haginia taudia idia moale?

⁷ Senisi ta ia vara dainai dubu haginia taudia idia moale. Dahaka senisi ia vara? Lagani 520 B.C.E ai king matamatana, Dariuse ginigunana, ese Parasa ia lohiaia. Iena lohia lagani iharuana ai, ia davaria dubu haginia gaukarana idia koua be maoro lasi. Bena Dariuse ese maoro ia henia dubu haginia gaukarana idia hagugurua totona. (Esr. 6:1-3) Unai disisen dainai taunimanima momo idia hoa. To king be gau ma ta ia karaia danu, ia ese badina besedia ia oda henia Iuda taudia do idia dagedage henia lasi, bona moni bona gau ma haida do idia henia dubu haginia lou gaukarana idia durua totona! (Esr. 6:7-12) Unai dainai, lagani 515 B.C.E ai, Iuda taudia ese dubu haginia gaukarana idia hagugurua.​—Esr. 6:15.

8. Dagedage oi davaria neganai, dahaka dainai oi lalogoada be namo?

 ⁸ Hari inai negai, Iehova idia tomadiho henia taudia momo be dagedage idia davaria danu. Hegeregere, tano haida ai gavamani ese iseda gaukara idia koua. Unai bamona tanodia ai, tadikaka haida idia dogoatao bona ‘gavana bona king taudia vairanai idia hakaua lao,’ bona unai be haroro dalana ta. (Mat. 10:17, 18) Nega haida, gavamani dekenai senisi ia vara, bona iseda tadikaka taihu be edia tomadiho karadia idia karaia diba. Eiava hebogahisi ia hahedinaraia diadi ta be disisen ia karaia iseda tomadiho karadia ita karaia noho totona. Witnes taudia haida be dala ma haida ai dagedage idia davaria. Idia noho tanodia ai gavamani ese Iehova tomadiho henia karana idia taravatua lasi, to edia Witnes lasi famili ese idia dagedage henia edia tomadiho karana idia koua totona. (Mat. 10:32-36) Nega momo, idia laloparara iseda Dirava hesiai henia karana idia koua diba lasi neganai, dagedage karana idia hadokoa. Bona nega haida, unai bamona dagedage taudia be gabeai Iehova ena Witnes taudia ai idia lao. Dagedage karadia oi davaria neganai Iehova hesiai henia karana oi hadokoa lasi! Oi lalogoada be namo. Iehova ese ena lauma helaga ena siahu amo oi ia durua dainai, gau ta dekena oi gari lasi be namo!

9. Dahaka dainai Iuda taudia haida be dubu helaga matamata idia itaia neganai, idia lalohisihisi?

⁹ Dubu helaga matamatana ena badina idia haginia neganai, Iuda ai buruka taudia idia taitai. (Esr. 3:12) Idia be guna Solomona ese ia haginia dubu hairaina idia itaia, bona idia laloa hari ia gini dubu helaga matamatana “ena hairai be guna bamona lasi.” (Hag. 2:2, 3) Idia ese dubu helaga matamatana be gunana ida idia hahegeregerea dainai idia lalohisihisi. Sekaraia ena matahanai ese idia do ia durua idia moale lou totona. Edena dala ai?

10. Sekaraia 4:8-10 ai, aneru ena hereva ese edena dala ai Iuda taudia ia durua edia lalohisihisi idia hanaia totona?

¹⁰ Sekaraia 4:8-10 duahia. Aneru ia gwau Iuda taudia be do idia moale badina “Serubabele [Iuda ena gavana] ena imana ai hahetohoa varona idia itaia.” Unai hereva ena anina be dahaka? Hahetohoa varona be tulu ta bona idia gaukaralaia idia haginia gauna idia sekea ia gini maoromaoro eiava lasi. Aneru ena hereva ese ia hahedinaraia, ena be Dirava ena taunimanima haida ese dubu helaga  matamatana idia laloa maragi, to Iehova ena ura be dubu haginia gaukarana idia hagugurua be namo. Iehova be unai dubu helaga totona ia moale, unai dainai Iuda taudia idia moale danu be namo, ani? Iehova dekenai mai anina bada gauna be, dubu helaga matamatana lalonai iena ura dalana ai ia do idia tomadiho henia. Bema Iuda taudia be dala maorona ai Iehova idia tomadiho henia bona ena lalonamo abia karana idia laloa bada, moale do idia davaria lou.

11. Iehova idia tomadiho henia taudia haida dekenai senisi ia vara neganai, dahaka dainai idia abia dae be auka?

¹¹ Senisi idia vara neganai, ita abia dae be auka. Haida be lagani momo lalonai ful-taim hesiai gaukara idia karaia. To edia asainmen ia idau. Haida be idia buruka dainai idia ura henia bada asainmen idia karaia diba lasi. Unai bamona senisi ia vara neganai, ita lalohisihisi diba. Matamanai, reana unai senisi ita lalopararalaia lasi eiava ita abia dae lasi. Reana do ita laloa, asainmen gunanai ita karaia gaukaradia be namo herea. Bona do ita laloa, hari Iehova totona gau momo ita karaia diba lasi. (Aon. 24:10) Sekaraia ena matahanai ese edena dala ai ita ia durua, ita gaukara goada Dirava ita hesiai henia totona?

12. Sekaraia ena matahanai ese edena dala ai ita ia durua senisi ia vara neganai, ita moale noho totona?

¹² Iehova ena laloa dalana ita abia neganai, senisi idia vara karana ita abia dae diba. Hari inai negai, Iehova ese gaukara badadia ia hagugurua noho bona ia ida ita gaukara hebou karana be hahenamo badana. (1 Kor. 3:9) Iseda asainmen be do idia idau diba, to Iehova ena lalokau ita dekenai be ia doko diba lasi. Unai dainai, bema orea lalonai senisi ta ia vara, namo lasi oi laloa dahaka dainai unai ia vara, eiava namo lasi “guna negadia” oi laloa loulou. To namona be Iehova ena heduru oi noia, unai amo idia vara senisi dainai do oi karaia gau namodia oi laloa. (Had. 7:10) Bona oi karaia diba lasi gaudia oi laloa lasi, to hari oi karaia diba gaudia oi laloa. Sekaraia ena matahanai amo ita dibaia gauna be lalohadai maorona sibona ita dogoatao noho be gau badana. Unai amo senisi idia vara neganai, do ita moale bona abidadama noho.

13. Dahaka dainai Iuda taudia haida idia laloa, dubu haginia lou gaukarana be disisen kererena?

¹³ Dagedage taudia ese dubu haginia lou gaukarana idia koua. To Hahelaga Tauna  Badana Iesua (Iosua) bona Gavana Serubabele ese taunimanima idia gunalaia bona “Dirava ena ruma idia haginia matamaia.” (Esr. 5:1, 2) Reana Iuda taudia haida idia laloa unai be disisen kererena. Iuda taudia be dubu idia haginia neganai edia inai taudia ese idia itaia diba, bona dala do idia karaia unai gaukara idia koua totona. Namona be gaukara idia gunalaia taudia rua, Iosua bona Serubabele, idia abia dae Iehova ese idia ia durua noho. Oibe, Iehova ese idia ia durua. Edena dala ai?

14. Sekaraia 4:12, 14 hegeregerena, Hahelaga Tauna Badana Iosua bona Gavana Serubabele be dahaka hagoadaia herevana idia abia?

¹⁴ Sekaraia 4:12, 14 duahia. Sekaraia ena matahanai ena kahana ta dekenai, aneru be Dirava ena peroveta tauna ia hamaoroa olive audia rua be horoa taudia rua, Iosua bona Serubabele ia laulaulaia. Aneru ia gwau unai tatau rua be hegeregere “tanobada ibounai ena Lohiabada badinai idia gini,” unai be Iehova. Unai be hahenamo badana! Iehova be idia ia abidadama henia. Unai dainai, Israela taudia be unai tatau rua ese idia karaia disisen idia abia dae be namo, badina Iehova ese idia ia gaukaralaia Israela taudia idia gunalaia totona.

15. Edena dala ai ita hahedinaraia Baibel amo idia mai hakaua daladia ita laloa bada?

¹⁵ Hari inai nega, Iehova be ena hereva Baibel amo ena taunimanima ia hakaua noho. Unai buka helagana lalonai, Iehova ese ita ia hamaoroa ia abia dae dalana ai ia ita tomadiho henia totona. Edena dala ai ita hahedinaraia Baibel amo idia mai hakaua daladia ita laloa bada? Namona be nega ita atoa Baibel ita duahia bona lalopararalaia totona. Sibona oi nanadaia: ‘Baibel eiava pablikeisen ma haida lau duahia neganai, lau stopu bona lau duahia gauna lau laloa dobu, a? Baibel ena hereva momokanidia lau lalopararalaia lasi neganai, tahua gaukara lau karaia, a? Eiava lau duahia haraga sibona, a?’ (2 Pet. 3:16) Bema nega ita atoa Iehova ese ia hadibaia gaudia ita laloa dobu, do ita hegeregere iena hakaua dalana ita badinaia bona iseda haroro gaukara ita hagugurua diba.​—1 Tim. 4:15, 16.

16. “Hesiai tauna mai ena kamonai bona mai ena aonega” amo ita abia hakaua daladia ita lalopararalaia namonamo lasi neganai, dahaka ese ita ia durua ita badinaia totona?

¹⁶ Iehova ese “hesiai tauna mai ena kamonai bona mai ena aonega” ia gaukaralaia ita ia hakaua totona. (Mat. 24:45) Nega haida, hakaua oreana ese ia henia hakaua daladia ita lalopararalaia  namonamo lasi. Hegeregere, disasta ia do vara lasi neganai, ita hegaegae totona reana hakaua herevana ta idia henia, to ita laloa iseda gabu ai unai disasta do ia vara lasi. Eiava reana do ita laloa hakaua oreana be inai COVID-19 negana lalonai ia lalohekwarahi bada. Bema ita laloa ita abia hakaua dalana ese ita ia durua lasi, dahaka ita karaia be namo? Israela taudia be Iosua bona Serubabele edia hereva idia badinaia neganai, namo idia davaria dalana ita laloa be namo. Bona ita duahia Baibel sivarai ma haida ita laloa danu be namo. Nega haida Dirava ena taunimanima ese hakaua daladia idia abia neganai, idia laloa unai be maoro lasi to idia ia hamauria.​—Hah. 7:7; 8:10.

17. Lamepa atoa gauna bona olive audia rua ese edena dala ai Iuda taudia ia hagoadaia?

¹⁷ Sekaraia ese ia itaia matahanai namba 5 be kwadogi, to unai ese Iuda taudia ia durua edia gaukara bona edia tomadiho dekenai lalohadai maorona idia abia totona. Bona Sekaraia ena matahanai amo idia dibaia gaudia idia badinaia neganai, idia mamia Iehova ese idia ia durua bona hakaua. Lauma helaga ena siahu amo Iehova ese idia ia durua, idia gaukara noho bona idia moale noho totona.​—Esr. 6:16.

18. Edena dala ai Sekaraia ena matahanai ese oi ia hagoadaia diba?

¹⁸ Sekaraia ena matahanai, lamepa atoa gauna bona olive audia rua, ese oi do ia hagoadaia bada. Inai atikol ai ita herevalaia bamona, unai matahanai ese oi do ia durua ma haida ese oi idia dagedage henia neganai oi goada noho, senisi idia vara neganai oi moale noho, hakaua daladia oi lalopararalaia lasi neganai mai abidadama ida unai oi badinaia noho. Emu mauri ai hekwakwanai idia vara neganai, dahaka oi karaia be namo? Ginigunana be, Sekaraia ese ia itaia gauna oi itaia, anina be oi hamomokania Iehova ese ena taunimanima ia naria noho. Bena Iehova oi abidadama henia bona mai lalona ibounai ida ia oi tomadiho henia noho. (Mat. 22:37) Bema unai bamona oi karaia, Iehova ese oi do ia durua mai moale ida ia oi hesiai henia hanaihanai totona.​—Kol. 1:10, 11.