Unai sivarai idia duahia taudia haida ese unai henanadai idia henia. To unai siri ai, taunimanima rua edia ladana be Mefiboseta, bona ia vara gauna ita stadilaia karana amo gau ta do ita dibaia.

Israela ena king, Saulo, ena natudia memero be 7 bona kekeni be rua. Ena vara guna natuna be Ionatana. Gabeai, king ena hahine ma ta Risipa ese natuna ma ta ia havaraia, ena ladana be Mefiboseta. To, Ionatana ena natuna ena ladana danu be Mefiboseta. Unai dainai, King Saulo ena natuna mero bona ena tubuna mero edia ladana be tamona, Mefiboseta.

King Saulo be Gibeona taudia ia inai henia matamaia bona ia ura idia ibounai do ia hamasea. Reana, idia momo ia hamasea. Unai be maoro lasi. Dahaka dainai? Badina Iosua ena nega ai, Israela ena iduhu gunalaia taudia bona Gibeona taudia be gwauhamata ta idia karaia, maino ai idia noho totona.​—Ios. 9:3-27.

King Saulo ena nega ai, unai gwauhamata idia do badinaia noho. To, king be unai gwauhamata ia laloa bada lasi, bona ia ura Gibeona taudia ia hamasea ore. Unai dainai “Saulo bona ena bese taudia be rara dekenai idia kerere.” (2 Sam. 21:1) Gabeai, Davida be king ai ia lao. Idia roho mauri Gibeona taudia ese Davida dekenai ia vara dika idia gwauraia. Davida ese ia hamaorodia Saulo ena kara dainai kara dika davana be edena bamona do idia karaia, unai amo Iehova ese Israela tanona do ia hanamoa. Gibeona taudia be moni totona idia noinoi lasi, to “palani ia karaia” tauna ena natuna 7 idia hamasea totona idia noinoi. (Num. 35:30, 31) Davida ese edia noinoi ia abia dae.​—2 Sam. 21:2-6.

Unai negai, Saulo bona Ionatana be tuari ai idia mase vadaeni, to Ionatana ena natuna, Mefiboseta, be ia do noho. Ia maragi neganai ena aena idia dika dainai, ena tubuna tau ese Gibeona taudia ia tuari henia neganai, unai ia durua lasi. Davida bona Ionatana ese idia karaia gwauhamatana dainai, unai ese Ionatana ena bese taudia, Mefiboseta danu, dekenai namo ia havaraia diba. (1 Sam. 18:1; 20:42) Baibel ia gwau: “Davida bona Ionatana ese Iehova ena ladanai idia karaia gwauhamata metauna dainai, king [Davida] ese Ionatana ena natuna Mefiboseta ia hebogahisi henia.”​—2 Sam. 21:7.

To, Davida be Gibeona taudia edia noinoi hegeregerena ia kara. Ia ese Saulo ena natuna rua, idia ta be Mefiboseta, bona Saulo ena tubudia memero 5 be Gibeona taudia dekena ia henia. (2 Sam. 21:8, 9) Oibe, Davida ese ia karaia karana dainai Israela tanona ai dika ia vara lasi.

Inai sivarai be mai anina bada. Dirava ena taravatu be ia hedinarai goevagoeva. Ia gwau: “Namo lasi tamadia edia kara dika dainai natudia idia hamasea.” (Deu. 24:16) Bema Saulo ena natudia rua bona tubuna memero 5 be kerere ta idia karaia lasi, Iehova ese idia dekenai ia vara dika do ia koua diba. Taravatu ia gwau: “Ta be sibona ena kara dika dainai idia hamasea be namo.” Saulo ena bese taudia 7 idia mase, badina reana Saulo ese Gibeona taudia ia tuari henia neganai ia idia durua. Unai dainai, unai tatau 7 be edia kara dika davana idia abia.

Unai sivarai ese ia hahedinaraia, namo lasi ta be ekskius herevana ia gwauraia bona ia gwau ia be ma ta ena hakaua dalana ia badinaia dainai kerere ia karaia. Aonega herevana ia gwau: “Emu aena ena raka daladia oi hamaoromaoroa, bona emu dala ibounai do idia maoro.”​—Aon. 4:24-27; Efe. 5:15.