Dahaka dainai “hoia lou tauna” ia gwau, bema Ruta ia adavaia iena ahuna do ia “haboioa”? (Ruta 4:1, 6)

Baibel negadiai, bema headava tauna ta be natuna ta ia havaraia lasi bona ia mase, iena tano dekenai dahaka do ia vara, bona iena bese ena ladana do ia boio momokani, a? Mose ena Taravatu lalonai unai henanadai edia haere do ita davaria.

Bema mai ena tano tauna ta ia mase, ena tadikaka eiava varavara korikorina ta ese unai tano ia abia diba. Eiava bema tau ta be ia ogogami dainai iena tano ia hoihoilaia, ena tadikaka eiava varavara korikorina ta ese unai tano ia abia lou o ia hoia lou diba. Unai amo unai tano be ena bese lalonai do ia noho.​—Lev. 25:23-28; Num. 27:8-11.

Edena dala ai mase tauna ena ladana do ia boio lasi? Tau ta ese ena nakimi ia adavaia karana amo, Ruta dekenai ia vara bamona. Tau ta ese ena tadikaka ena vabu do ia adavaia, unai amo iena tadikaka totona natuna ta do ia havaraia, bona unai natuna ese mase tauna ena ladana bona ena ahuna do ia abia. Ma danu, unai be lalokau dalana badina ia ese vabu do ia naria.​—Deu. 25:5-7; Mat. 22:23-28.

Mani Naomi ena sivarai ita laloa. Ia be tau ta ladana Elimeleka ia adavaia. Elimeleka bona ena natudia memero rua idia mase murinai, tau ta ia noho lasi Naomi ia naria totona. (Ruta 1:1-5) Iuda dekenai ia giroa lou neganai, Naomi ese ena ravana hahinena Ruta ia hamaoroa, Boasi do ia noia edia tano ia hoia lou totona. Boasi be Elimeleka ena varavara ta. (Ruta 2:1, 19, 20; 3:1-4) To Boasi ia diba varavara korikorina ma ta ia noho, Baibel ese ia gwauraia “hoia lou tauna ma ta.” Ia be Elimeleka ena tano do ia hoia lou tauna ginigunana.​—Ruta 3:9, 12, 13.

Matamanai, “hoia lou tauna” ia ura Naomi do ia durua. (Ruta 4:1-4) Ena be ena moni haida do ia halusia, to ia laloparara Naomi be natuna ta do ia havaraia lasi Elimeleka ena tano ia abia totona. Oibe, unai tano be iena tano ai ia lao diba, unai dainai toana be bisinesi dalanai unai be abia hidi namona.

To, gabeai hoia lou tauna ia laloparara Ruta ia noho bona do ia adavaia neganai, ena lalona ia haidaua. Ia gwau: “Lau be hegeregere lasi unai tano lau hoia lou totona, dika lau sibona egu ahuna lau haboioa.” (Ruta 4:5, 6) Dahaka dainai ena lalona ia haidaua?

Bema hoia lou tauna eiava tau ta ese Ruta ia adavaia, bona Ruta be natuna mero ta ia havaraia, unai natuna merona ese Elimeleka ena tano do ia abia. Bema unai ia vara, edena dala ai hoia lou tauna ena “ahuna” do ia “haboioa”? Baibel be ena badina ia gwauraia lasi, to reana badina haida be inai.

• 1. Unai tano ia hoia lou monina be ia negea kava bamona, badina Elimeleka ena tano be iena tano ai do ia lao lasi. Ruta ena natuna merona ese do ia abia.

• 2. Ia ese Naomi bona Ruta do ia naria bona aniani do ia henidia.

• 3. Bema Ruta be unai hoia lou tauna ena natudia ma haida ia havaraia, iena hahine ma ta ena natudia edia ahuna be Ruta ena natudia ida do ia haria.

• 4. Bema hoia lou tauna be natudia lasi, Ruta ese ia havaraia natuna mero ese Elimeleka ena tano bona iena tano do ia abia danu. Unai amo, bema ia mase, ena natuna ese Elimeleka ena ladana ai tano do ia abia, to hoia lou tauna ena ladana dekenai lasi. Unai hoia lou tauna ia ura lasi Naomi ia durua, badina iena ahuna ia haboioa garina. Ia ura ia murinai do ia mai hoia lou tauna, Boasi, ese unai maduna do ia huaia. Boasi be unai ia karaia, badina ia ura “mase tauna ena tano be ena bese taudia dekenai do ia noho.”​—Ruta 4:10.

Hoia lou tauna be sibona ena ladana bona ahuna ia laloa bada. Oibe, sibona ena namo ia laloa bada. Ena be ia ura lasi iena ladana ia boio, to hari ita be iena ladana ita diba lasi. Danu, ia be Boasi ese ia abia hahenamo ia reaia. Boasi ena ladana be Mesia, Iesu Keriso, ena bese ena lista dekenai ia hedinarai, ia be Iesu ena tubuna ta. Oibe, hoia lou tauna ese unai hahenamo ia reaia, badina sibona ia laloa bada bona ia dabu vabuna ia durua lasi!​—Mat. 1:5; Luka 3:23, 32.