1. Tama sina edia ura natudia totona be dahaka?

 TAMA sina e, ai diba umui ura emui natudia umui durua Iehova idia diba bona lalokau henia totona. To Dirava ita itaia diba lasi. Vadaeni edena dala ai emui natudia umui durua unai amo do idia abia dae, Dirava ia noho momokani bona idia tura henia diba?​—Iam. 4:8.

2. Edena dala ai tama sina ese natudia dekenai Iehova ena kara namodia idia hadibaia diba?

² Natudia umui durua Iehova idia tura henia dalana namona ta be idia ida Baibel umui stadilaia. (2 Tim. 3:14-17) To, Baibel ese dala ma ta ia hahedinaraia danu. Aonega herevadia bukana lalonai, tama ta ese ena natuna ia hamaoroa Iehova ena kara namodia do ia laloaboio lasi, unai be ena havaraia gaudia amo idia hedinarai. (Aon. 3:19-21) Tama sina ese havaraia gaudia amo edia natudia dekenai, Iehova ena kara namodia do idia hadibaia daladia haida do ita herevalaia.

3. Tama sina ese edena dala ai edia natudia idia durua diba?

³ Baibel ia gwau, Dirava be “gau ibounai ia havaraia negana amo taunimanima ese Dirava ena siahu bona ena kara idauidau idia dibaia diba. Bona unai be ia karaia gaudia amo idia lalopararalaia.” (Roma 1:20) Tama sina e, reana emui natudia ida murimuri ai umui loaloa negana umui moalelaia. Unai  nega umui gaukaralaia diba Iehova ese ia “karaia gaudia” amo iena kara namodia be idia dekenai umui hadibaia totona. Mani ita itaia edena dala ai Iesu ena hahediba dalana umui tohotohoa diba.

4. Edena dala ai Iesu ese havaraia gaudia amo iena hahediba taudia ia hadibaia? (Luka 12:24, 27-30)

⁴ Iesu ese taunimanima ia hadibaia neganai, havaraia gaudia ia gaukaralaia. Nega ta ena hahediba taudia ia hamaoroa galo manudia bona lili flaoaflaoa do idia laloa. (Luka 12:24, 27-30 duahia.) Iesu ese ena hahediba taudia idia diba momo manu bona flaoaflaoa ia herevalaia. Mani oi laloa, reana Iesu be ia hereva neganai, unai gaudia ia poinia. Hahediba taudia be reana galo manudia idia roho hanai bona lili flaoaflaoa idia itaia. Iesu be unai ia herevalaia murinai, dahaka ia karaia? Iena hahediba taudia ia hadibaia edia guba Tama be hariharibada bona hebogahisi Diravana: Iehova ese galo manudia bona lili flaoaflaoa ia naria hegeregerena, edia aniani bona dabua do ia henia.

5. Tama sina ese edena havaraia gaudia idia gaukaralaia diba edia natudia idia hadibaia totona?

⁵ Tama sina e, edena dala ai Iesu umui tohotohoa diba? Reana emu natudia dekenai oi ura henia flaoaflaoa eiava animal ta oi herevalaia diba. Unai gaudia ese Iehova ena kara idia hahedinaraia dalana oi herevalaia. Bena emu natuna oi nanadaia edena flaoaflaoa o animal ia ura henia. Bema ia ura henia gauna ta oi gaukaralaia, Iehova ena kara namodia oi herevalaia neganai, do ia ura kamonai.

6. Christopher ena sinana ena haheitalai amo dahaka ita dibaia?

⁶ Oi laloa tama sina be nega bada lalonai animal eiava flaoaflaoa ta idia stadilaia, bena edia natudia dekenai Iehova ena kara do idia herevalaia, a? Lasi. Iesu be galo manu edia aniani dalana eiava lili flaoaflaoa edia tubu dalana ia herevalaia momo lasi. Reana, nega haida emu natuna ia ura nega bada lalonai Iehova ese ia karaia gaudia umui herevalaia, to hereva kwadogina o henanadai tamona amo oi durua diba Iehova ia diba totona. Tadikaka Christopher be mero maragi neganai, ena sinana ena kara ia laloatao. Ia gwau: “Havaraia gaudia ai laloa bada totona emai sinana be hereva kwadogina sibona ia gwauraia. Hegeregere, bema ororo gabudiai ai loaloa, do ia gwau: ‘Unai ororo badadia bona hairaidia umui itaia, Iehova be idau momokani, ani?’ Eiava bema davara badinai ai loaloa neganai, do ia gwau: ‘Inai hurehure goadadia oi itaia, Dirava be goada momokani, ani?’” Christopher ma ia gwau: “Unai hereva kwadogidia ese ai ia durua bada.”

7. Edena dala ai emu natudia oi hadibaia diba havaraia gaudia idia laloa totona?

⁷ Natudia idia bada neganai, namona be oi hadibadia havaraia gaudia idia itaia bona Iehova ena kara namodia do idia laloa. Iehova ese ia havaraia gauna ta oi abia hidi bona emu natudia oi nanadaia: “Unai gauna amo Iehova dekenai dahaka oi dibaia?” Reana edia lalohadai oi kamonai neganai, do oi hoa bona moale.​—Mat. 21:16.

8. Israela tama sina be natudia ida “dala dekenai” idia raka neganai, dahaka idia herevalaia diba?

⁸ Iehova ese Israela tama sina ia hamaoroa edia natudia ida “dala dekenai” idia raka neganai iena taravatu do idia hadibaia. (Deu. 11:19) Israela ena gunika gabudia dekenai dala momo idia noho bona animal, manu bona flaoaflaoa idauidau do idia itaia. Unai dainai edia famili be dala ai idia raka neganai, tama sina be edia natudia dekenai Iehova ese ia havaraia gaudia idia herevalaia diba. Reana  umui tama sina haida be unai bamona umui karaia diba. Tama sina haida edia haheitalai mani ita itaia.

9. Punitha bona Katya amo dahaka ita dibaia?

⁹ India ena siti badana ta ai ia noho sina ta ladana Punitha ia gwau: “Hanua dekenai emai famili ai vadivadi henia neganai, unai be nega namona emai natudia dekenai Iehova ena havaraia gaudia ai herevalaia totona. Badina unuseniai Iehova ena havaraia gaudia idia lalopararalaia namonamo, to siti dekenai be ia auka. Tama sina e, emui natudia be gabu hairaina dekenai umui noho hebou negana do idia laloaboio lasi. Moldova ai taihu ta ladana Katya, ia gwau: “Lau laloatao lau maragi neganai, egu tama sina ida gunika gabudia dekenai ai loaloa negana lau moalelaia. Egu tama sina dekenai lau moale badina lau maragi negana amo lau idia hadibaia, Iehova ese ia havaraia gaudia do lau itaia bona Ia do lau dibaia.”

10. Tama sina be dahaka do idia karaia bema hanua dekenai idia lao diba lasi? (Maua itaia “ Tama Sina Durua Daladia.”)

¹⁰ To dahaka do umui karaia bema hanua dekenai umui lao diba lasi? Amol be India ai ia noho danu bona ia gwau: “Lau noho gabuna ai, tama sina be hora momo idia gaukara bona hanua lao totona moni bada do idia halusia. To, uma gabu maragina eiava ruma ena guhi ena varenda be gabu namodia, Iehova ese ia havaraia gaudia idia itaia bona ena kara namodia idia herevalaia totona.” Emu ruma kahirakahira ai havaraia gaudia do oi itaia danu bona emu natudia dekenai do oi havaraia diba. (Sal. 104:24) Reana manu idauidau, manumanu maragidia, tubutubu gaudia bona ma gau haida do oi itaia diba. Germany ai taihu ta ladana Karina, ia gwau: “Egu sinana be flaoaflaoa ia ura henidia. Unai dainai lau maragi bona ia ida lau loaloa neganai, lau dekenai flaoaflaoa hairaidia  do ia hahedinaraia.” Tama sina e, iseda orea ese havaraia gaudia totona idia halasia vidio bona pablikeisen momo umui gaukaralaia diba. Oibe, herevana edeseniai umui noho, to emui natudia umui durua diba Dirava ese ia havaraia gaudia idia itaia totona. Hari, Iehova ena kara namodia haida do ita herevalaia bona emui natudia dekenai umui hadibaia diba.

11. Edena dala ai tama sina ese natudia idia durua diba Iehova ena lalokau idia dibaia totona?

¹¹ Emu natudia oi durua Iehova ena lalokau idia dibaia totona, animal momo ese mai lalokau ida edia natudia idia naria dalana oi herevalaia diba. (Mat. 23:37) Danu Iehova ese ia havaraia gau idauidau ita moalelaia karana oi herevalaia diba. Taihu Karina ma ia gwau: “Ai raka loaloa neganai, egu sinana ese lau ia hamaoroa do lau gini bona flaoaflaoa idauidau edia toana lau itaia bona Iehova ena lalokau idia hahedinaraia dalana do lau laloa. Ena be lagani momo idia ore vadaeni, to flaoaflaoa idauidau edia toana bona kala lau moalelaidia noho. Hanaihanai lau idia hadibaia Iehova be lau ia lalokau henia bada.”

12. Edena dala ai tama sina ese natudia idia durua diba Dirava ena aonega idia lalopararalaia totona? (Salamo 139:14) (Laulau itaia danu.)

¹² Emui natudia umui durua Dirava ena aonega idia itaia totona. Iehova ena aonega ese iseda ia hereaia. (Roma 11:33) Hegeregere, ranu be varahu bamona ia daekau bona ori ia havaraia, bona ori be gabu ta ta ai idia lao dalana oi herevalaia diba. (Iobu 38:36, 37) Bona hoa dalanai taunimanima ia karaia dalana oi herevalaia danu. (Salamo 139:14 duahia.) Mani tama ta ladana Vladimir ena haheitalai ita laloa. Ia gwau: “Dina ta emai natuna be basikele amo ia moru bona sibona ia haberoa. Dina haida murinai ena bero ia namo. Lau bona egu hahine be ia ai hamaoroa Iehova ese iseda tauanina ia karaia sibona ia hanamoa totona, bona ai gwau taunimanima ese idia karaia gauna ta dekenai unai bamona ita itaia lasi. Hegeregere, motuka ta be aksiden ta murinai sibona do ia hanamoa lasi. Emai natuna dekenai ia vara gauna ese ia durua Iehova ena aonega ia lalopararalaia totona.”

13. Edena dala ai tama sina ese natudia idia durua diba Dirava ena siahu idia lalopararalaia totona? (Isaia 40:26)

¹³ Iehova ese ita ia noia iseda matana ita abia isi, guba ita itaia bona ena siahu amo hisiu be edia gabu ta ta ai ia atoa dalana do ita laloa. (Isaia 40:26 duahia.) Emu natudia oi hamaoroa guba dekenai idia itaia gaudia idia laloa dobu totona. Taiwan ai taihu ta ladana Tingting be ia maragi negana ia laloatao, ia gwau: “Nega ta egu sinana ida hanua ta dekenai ai kamepa bona siti ena diari be lasi dainai, guba dekenai hisiu momo ai itaia diba. Unai nega ai egu klas turadia edia laloani karana dainai lau lalohekwarahi, badina lau laloa Iehova do lau badinaia lasi. Egu sinana ese lau ia hadibaia Iehova be ena siahu amo hisiu ibounai ia karaia dalana do lau laloa, bona do lau laloatao Iehova ese unai siahu ia gaukaralaia diba lau ia durua hahetoho lau hanaia totona. Hisiu lau itaia murinai unai ese lau ia durua Iehova lau diba namonamo bona egu lalona lau hadaia Ia do lau hesiai henia noho.”

14. Edena dala ai tama sina ese havaraia gaudia amo natudia idia hadibaia Iehova be moale Diravana?

¹⁴ Iehova ese ia havaraia gaudia amo ia hahedinaraia Iehova be moale Diravana. Saiens taudia idia itaia animal momo, hegeregere manu bona gwarume danu, be idia gadara. (Iobu 40:20) Emu natudia be animal idia gadara idia itaia neganai, idia kiri, a? Reana idia itaia pusikasi be bolo ida ia gadara eiava sisia maragidia idia gadara hebou. Gabeai, emui natudia be animal idia gadara idia itaia bona idia kiri neganai, namona be idia oi hadibaia ita be moale Diravana ita hesiai henia.​—1 Tim. 1:11.

15. Dahaka ese tama sina ia durua diba edia natudia edia lalohadai idia tahua totona? (Aonega Herevadia 20:5) (Laulau itaia danu.)

¹⁵ Nega haida tama sina ese natudia edia hekwakwanai idia diba be auka. Bema oi dekenai unai ia vara, namona be emu natudia edia lalohadai oi tahua. (Aonega Herevadia 20:5 duahia.) Tama sina haida idia davaria edia natudia ida Iehova ese ia havaraia gaudia idia moalelaia hebou neganai, ia auka lasi idia ida idia herevahereva totona. Dahaka dainai?  Badina ta be gau idauidau ese natudia bona tama sina edia lalona ia veria lasi. Taiwan ai tama ta ladana Masahiko be badina ma ta ia gwauraia: “Emai natudia ida ororo dekenai ai loaloa o kone dekenai ai raka neganai, edia lalona ia namo. Unai amo ia auka lasi edia lalohadai ai diba totona.” Guna ita herevalaia taihu Katya, ia gwau: “Sikuli murinai, egu sinana be uma gabu mai hairaina ta dekenai lau ia abia lao. Unai bamona nega namona ai, ia auka lasi egu sinana dekenai sikuli ai idia vara gaudia eiava lau lalohekwarahilaia gaudia lau herevalaia totona.”

16. Edena dala ai famili ese havaraia gaudia idia moalelaia diba?

¹⁶ Famili ese havaraia gaudia idia moalelaia hebou neganai, edia lalona ia namo bona unai ese ta ta lalokau henia karana ia hagoadaia. Baibel ia gwau “kiri be mai ena nega” bona “roho isi be mai ena nega.” (Had. 3:1, 4, ftn.) Iehova ese gabu hairaidia ia karaia bona unuseniai moale karadia ita karaia diba. Famili momo idia ura animal bona flaoaflaoa idia noho gabudia, hanua, ororo eiava kone ai idia moale hebou. Natudia haida idia ura uma gabu ai idia heau bona gadara, animal idauidau idia itaia eiava sinavai o davara dekenai idia paudobi. Dala idauidau ai Dirava ese ia havaraia gaudia ita moalelaia diba!

17. Dahaka dainai tama sina ese natudia idia durua havaraia gaudia idia moalelaia be namo?

¹⁷ Tanobada matamatana ai tama sina bona natudia be Iehova ese ia havaraia gaudia do idia moalelaia momokani, hari bamona lasi. Unai nega ai animal idauidau dekenai do ita gari lasi bona ita dekenai do idia gari lasi. (Isa. 11:6-9) Oibe, havaraia gaudia do ita moalelaia ela bona hanaihanai. (Sal. 22:26) To tama sina e, unai nega umui naria lasi, hari emui natudia umui durua havaraia gaudia idia moalelaia totona. Havaraia gaudia amo emui natudia dekenai Iehova umui hahedibalaia neganai, King Davida bamona do idia gwau: “Iehova e, dirava idauidau . . . idia karaia karadia be oi karaia karadia hegeregerena lasi.”​—Sal. 86:8.