1. Kamonai taudia be iseda hebou dekenai idia mai neganai, dahaka kara idia moalelaia? (Laulau itaia danu.)

 MANI oi laloa headava tau bona hahine be nega ginigunana Iehova ena Witnes taudia edia Kingdom Hall dekenai idia lao. Unai headava taudia idia moale bada, badina tadikaka taihu ese idia welkam henidia bona idia huanai ia noho lalokauna idia itaia. Hebou murinai, ruma dekenai idia lao lalonai, hahine be ena tau ia hamaoroa: ‘Unai taudia be idau momokani bona edia hebamo karana lau moalelaia.’

2. Dahaka ese haida ia hahekwakwanaia?

² Iehova ena Witnes taudia huanai ia noho lalokauna be idau momokani, to idia be goevadae taudia lasi. (1 Ioa. 1:8) Unai dainai, kongrigeisen lalonai tadikaka taihu ita diba namonamo neganai, edia kerere haida do ita itaia. (Roma 3:23) Madi, tadikaka taihu haida be ma haida edia kerere dainai Iehova hesiai henia karana idia rakatania.

3. Keristani taudia korikoridia edia kara badana be dahaka? (Ioane 13:34, 35)

³ Mani inai atikol ena siri badana ita itaia lou. (Ioane 13:34, 35 duahia.) Keristani taudia korikoridia edia kara badana be dahaka? Ta ta dekenai lalokau do idia hahedinaraia. Baibel ia gwau lasi idia be do idia goevadae. Danu, Iesu be  inai bamona ia hereva lasi: ‘Unai amo do oi diba umui be egu hahediba taudia.’ To, ia gwau: “Unai amo taunimanima ibounai do idia diba umui be egu hahediba taudia.” Iesu ia hahedinaraia ia murinai idia raka taudia sibona lasi, to murimuri taudia do idia itaia Keristani taudia korikoridia be ta ta dekenai sibona dadaraia lalokauna do idia hahedinaraia.

4. Witnes lasi taudia idia ura Keristani taudia korikori dekenai dahaka idia dibaia?

⁴ Witnes lasi taudia haida be reana do idia laloa: ‘Edena dala ai lalokau ese ita ia durua Keristani taudia korikoridia edia toana ita diba totona? Edena dala ai Iesu ese ena aposetolo taudia dekenai lalokau ia hahedinaraia? Bona hari, edena dala ai Iesu ena haheitalai ita tohotohoa diba?’ Ita Witnes taudia danu be unai henanadai edia haere ita laloa dobu be namo. Unai amo ena be haida ese kerere idia karaia, to iseda lalokau karana do ita habadaia noho.​—Efe. 5:2.

5. Ioane 15:12, 13 ai Iesu ena hereva ena anina mani oi gwauraia.

⁵ Iesu ia gwau iena murinai idia raka taudia ese ta ta dekenai lalokau karana idauna do idia hahedinaraia. (Ioane 5:12, 13 duahia.) Iesu ia oda henidia: “Do umui lalokau heheni, umui lau lalokau henia hegeregerena.” Unai ena anina be dahaka? Iesu ia hahedinaraia unai be sibona dadaraia lalokauna—unai lalokau dainai Keristani tauna ta ese ena mauri do ia henia ena tadikaka eiava taihu ia durua totona. b

6. Edena dala ai Dirava ena Hereva ese ia hahedinaraia lalokau be mai anina bada?

⁶ Dirava ena Hereva ese ia hahedinaraia lalokau be mai anina bada. Hegeregere, taunimanima momo be inai Baibel siri idia ura henidia: “Dirava be lalokau.” (1 Ioa. 4:8)  “Namona be emu dekena tauna oi lalokau henia, oi sibona oi lalokau henia hegeregerena.” (Mat. 22:39) “Lalokau ese kara dika momo ia gwauatao.” (1 Pet. 4:8) “Lalokau be ia ore diba lasi.” (1 Kor. 13:8) Inai siri bona siri ma haida ese idia hahedinaraia, inai kara ita hahedinaraia bona habadaia be mai anina bada.

7. Dahaka dainai Satani be lalokau amo taunimanima ia hatamonaia diba lasi?

⁷ Momo idia henanadai: ‘Tomadiho momokani ena toana be edena bamona do lau diba? Tomadiho momo idia gwau hereva momokani idia hadibaia, to edia hahediba herevadia Dirava dekenai be idauidau.’ Satani ese tomadiho koikoi momo ia havaraia, unai dainai taunimanima idia daradara edena be tomadiho momokanina. To, Satani ese tanobada hegegemadai ai ta ta lalokau henia Keristani oreana ta ia havaraia diba lasi. Iehova sibona ese unai ia karaia diba. Unai be momokani badina lalokau korikorina be Iehova amo, bona iena lauma helaga bona hahenamo idia abia taudia sibona ese lalokau korikorina idia hahedinaraia diba. (1 Ioa. 4:7) Unai dainai Iesu ia gwau, ia murinai idia raka taudia ese sibona dadaraia lalokauna idia hahedinaraia diba.

8-9. Edena dala ai Iehova ena taunimanima huanai ia noho lalokauna ese Witnes lasi taudia ia hagoadaia?

⁸ Iesu ena hereva bamona, momo be Iesu murinai idia raka taudia edia toana idia diba badina idia ta ta huanai lalokau korikorina idia hahedinaraia. Hegeregere, tadikaka ta ladana Ian, be steidiam dekenai nega ginigunana hebouhebou ta dekenai ia lao. Hua haida gunanai, ia be unai steidiam dekenai gadara ta itaia totona ia lao. Ia gwau: “Hebouhebou ai idia noho taudia edia kara be unai gadara idia itaia taudia amo ia idau. Witnes taudia be hemataurai dabua idia hahedokilaia bona kara namo idia hahedinaraia, bona edia natudia danu be hereva idia kamonai.” Ma ia gwau: “Unai taudia be idia moale bona maino ai idia noho—unai bamona mauri lau ura henia. Unai dina ai idia henia tok ta lau laloatao lasi, to Witnes taudia edia kara namo lau laloatao noho.” c Unai ita karaia badina ta ta ita lalokau henia. Iseda tadikaka taihu ita lalokau henidia dainai mai hemataurai bona hebogahisi ida ita kara henidia.

⁹ Tadikaka ta ladana John, be nega ginigunana kongrigeisen heboudia ia lao neganai, unai bamona hemami ia abia danu. Ia gwau: “Edia kara be namo herea dainai lau laloa idia be goevadae taudia. Edia lalokau karana ese ia hamomokanina tomadiho momokanina lau davaria.” d Unai bamona ekspiriens momo ese idia hahedinaraia Iehova ena taunimanima be Keristani taudia korikoridia.

10. Edena nega ai Keristani lalokauna ita hahedinaraia be namo? (Futnout itaia danu.)

¹⁰ Matamanai ita herevalaia bamona, iseda tadikaka taihu be goevadae lasi taudia. Nega haida edia hereva ese ita ia habadua eiava edia kara ese ita ia hahisia. e (Iam. 3:2) Unai be nega namona iseda tadikaka bona taihu dekenai lalokau korikorina ita hahedinaraia totona. Unai bamona ita karaia totona, Iesu ena haheitalai amo dahaka ita dibaia?​—Ioa. 13:15.

11. Iamesi bona Ioane be dahaka kerere idia karaia? (Laulau itaia danu.)

¹¹ Iesu ia diba ena aposetolo taudia be goevadae lasi taudia. Unai dainai, mai lalokau  ida ia durudia edia manoka gaudia idia hanamoa, bona senisi haida do idia karaia, unai amo Iehova do idia hamoalea. Nega ta ai, Iamesi bona Ioane edia sinana ese Iesu ia noia iena Basileia lalonai, ena natudia rua dekenai dagi bada do ia henia. (Mat. 20:20, 21) Iamesi bona Ioane be idia hekokoroku bona idia laloa ma haida idia hereaia.​—Aon. 16:18.   

12. Iamesi bona Ioane sibodia idia kerere, a? Herevalaia.

¹² Unai nega ai, Iamesi bona Ioane sibona idia kerere lasi. Mani Aposetolo taudia ma haida edia kara ita laloa: “Hahediba taudia 10 be unai idia kamonai neganai, unai tadikaka rua dekenai idia moale lasi.” (Mat. 20:24) Mani oi laloa, Iamesi, Ioane bona aposetolo taudia be idia hepapahuahu. Reana haida be inai bamona idia gwau: ‘Umui laloa umui be daika bona Basileia lalonai dagi bada totona umui henanadai? Umui sibona be Iesu ida umui gaukara lasi. Ai danu be ai hegeregere unai dagi ai abia totona!’ Herevana dahaka ia vara, to unai nega ai ta ta dekenai lalokau bona hemataurai idia hahedinaraia lasi.   

13. Aposetolo taudia idia kerere neganai, Iesu be dahaka ia karaia? (Mataio 20:25-28)

¹³ Unai hekwakwanai ia vara neganai, Iesu be dahaka ia karaia? Ia badu lasi. Ia gwau lasi, manau bona ta ta idia lalokau henia aposetolo matamatadia do ia tahua. To, Iesu be mai haheauka ida idia ia hereva henia badina ia  diba idia ura kara maoromaoro do idia badinaia. (Mataio 20:25-28 duahia.) Ena be ena aposetolo taudia huanai daika be bada idia hepapahuahulaia loulou, to hanaihanai Iesu be mai lalokau ida ia kara henidia.​—Mar. 9:34; Luka 22:24.

14. Aposetolo taudia be edena bamona mauri lalonai idia tubu daekau?

¹⁴ Iesu be ena aposetolo taudia edia mauri dalana ia laloa. (Ioa. 2:24, 25) Edia bese lalonai tomadiho gunalaia taudia be ladana bada bona dagi bada idia laloa momo. (Mat. 23:6.) Iuda tomadiho ena gunalaia taudia idia laloa idia ese ma haida idia hereaia danu. f (Luka 18:9-12) Iesu ia laloparara ena aposetolo taudia be unai bamona mauri lalonai idia tubu daekau dainai, idia sibona idia laloa bada bona ma haida idia laloa maragi. (Aon. 19:11) Ia diba ena aposetolo taudia be kerere do idia karaia bona unai ia vara neganai, Iesu ia haheauka. Ia diba idia ura kara maoromaoro idia karaia. Unai dainai mai haheauka ida ia durudia sibodia do idia abia isi lasi, to do idia manau bona haida do idia lalokau henia.

15. Iamesi, Ioane bona aposetolo taudia ma haida huanai ia vara gauna amo dahaka ita dibaia?

¹⁵ Iamesi bona Ioane ese idia karaia karana amo gau momo ita dibaia. Idia ruaosi be Iesu ena Basileia lalonai dagi bada totona idia noinoi be maoro lasi. To, aposetolo taudia ma haida be idia kerere danu, badina lalotamona idia havaraia lasi. To, Iesu ese aposetolo taudia 12 be lalokau bona hemataurai dalanai ia kara henidia. Unai amo dahaka ita dibaia? Herevana taunimanima be kerere idia karaia, to ita kara henidia dalana be mai anina bada. Dahaka ese ita do ia durua? Bema tadikaka o taihu ta dekenai ita moale lasi, sibona ita nanadaia: ‘Dahaka dainai ena kara dekenai lau badu? Unai be egu manoka karana ia hahedinaraia bona lau hanamoa be namo, a? Lau ia habadua tauna be reana hekwakwanai ta ia davaria noho, a? Ena be badina maorona dainai lau badu, to lalokau lau hahedinaraia bona ena dika lau gwauatao diba, a?’ Bema ta ta dekenai lalokau ita hahedinaraia, ita be Keristani taudia korikoridia.   

16. Iesu ena haheitalai amo dahaka gau ma haida ita dibaia?

¹⁶ Iesu ena haheitalai ese ita ia hadibaia iseda tadikaka taihu edia kara ita lalopararalaia be namo. (Aon. 20:5) Iesu be ta ia laloa gaudia ia diba. To, ita be unai ita karaia diba lasi. To iseda tadikaka taihu edia kerere ita haheaukalaia be namo. (Efe. 4:1, 2; 1 Pet. 3:8) Edia mauri gunana ita diba neganai, unai ita karaia be auka lasi. Mani haheitalai ta ita laloa.

17. Sekit naria tauna be tadikaka ta ia diba namonamo neganai, dahaka hahenamo ia davaria?

¹⁷ East Africa ai sekit naria tauna be tadikaka ta ia laloatao. Matamanai, ia laloa unai tadikaka be kara auka tauna. To, dahaka ia karaia? Ia gwau: “Tadikaka lau dadaraia lasi, to egu lalona lau hadaia ia lau diba namonamo totona.” Unai ia karaia neganai, unai tadikaka ena mauri gunana ia diba namonamo, bena ia laloparara dahaka dainai ma haida ia kara auka henidia. Sekit naria tauna ma ia gwau: “Tadikaka be ia hekwarahi ena mauri gunana  ia haidaua totona lau lalopararalaia neganai, unai ese lau ia hagoadaia bona tura namodia ai ai lao.” Oibe, iseda tadikaka taihu edia mauri gunana ita lalopararalaia neganai, do ia auka lasi idia dekenai lalokau ita hahedinaraia totona.

18. Tadikaka eiava taihu ta ese ita idia habadua neganai, dahaka henanadai ita laloa be namo? (Aonega Herevadia 26:20)

¹⁸ Nega haida ita ura ita ia habadua tadikaka eiava taihu ta ita hereva henia. To, gau ginigunana be sibona do ita nanadaia: ‘Ia vara gauna lau diba namonamo, a?’ (Aon. 18:13) ‘Reana unai gauna ia karaia lasi lau ia habadua totona, ani?’ (Had. 7:20) ‘Nega ta lau danu be unai bamona kerere lau karaia, a? (Had. 7:21, 22) Bema lau hereva henia, inai hekwakwanai do ai hamaoromaoroa eiava habadaia?’ (Aonega Herevadia 26:20 duahia.) Nega ita atoa unai henanadai ita lalodia neganai, reana do ita laloparara lalokau dainai, iseda tadikaka ena dika do ita gwauatao.

19. Iseda lalona ita hadaia dahaka ita karaia be namo?

¹⁹ Iehova ena Witnes taudia be ta ta idia lalokau henia karana amo idia hamomokanina, idia be Iesu ena hahediba taudia korikoridia. Ena be iseda tadikaka taihu be goevadae lasi, to lalokau korikorina ita hahedinaraia neganai, ita hamomokania ita be Iesu ita badinaia noho. Unai ita karaia neganai, ma haida dekenai do ita hahedinaraia ita be tomadiho momokanina, bona ita do idia bamoa Iehova, lalokau Diravana ita tomadiho henia totona. Namona be iseda lalona ita hadaia, Keristani taudia korikoridia edia lalokau karana ita hahedinaraia noho.