Namona be inai ita laloatao. Keristani taudia be do idia koikoi lasi. Bona namona be gavamani edia taravatu idia badinaia bema unai ese Iehova ena taravatu idia utua lasi. (Mat. 22:21; Roma 13:1, 2; Heb. 13:18) Ma danu, idia hekwarahi unai tano taudia edia kastom bona hemami idia matauraia bona edia ‘dekena taudia idia lalokau henia, idia sibona idia lalokau henia hegeregerena.’ (Mat. 22:39; Roma 12:17, 18; 1 Tes. 4:11, 12) Unai bamona hakaua herevadia badinaia karana ese tano idauidau ai idia noho Keristani taudia idia durua, harihari gaudia o moni henia karana idia lalohadailaia namonamo totona.

Tano momo ai, ta be gavamani ena gaukara taudia dekenai gau ta ia henia lasi gavamani ena sevis ia abia totona. Badina unai gaukara taudia be gavamani ese edia gaukara davana o pei ia henia, unai dainai edia pei habadaia totona moni ma haida idia noia be maoro lasi. Tano momo ai, gavamani ena gaukara taudia ese edia maduna idia huaia neganai, taunimanima amo gaukara davana idia noia be taravatu. Unai bamona idia karaia neganai, ia hahedinaraia idia be lalona veria dalanai moni idia abia (o bribery). Unai bamona tanodia ai, Keristani taudia ese gavamani ena gaukara taudia dekenai harihari gaudia o moni idia henia be maoro lasi.

Tano ma haida ai, ena be unai bamona taravatu idia noho lasi o idia noho, to momo ese idia badinaia lasi. Unai tanodia ai gavamani ena gaukara taudia idia laloa harihari gaudia o moni abia dae karana be kerere lasi. Tano ma haida ai, gavamani ena gaukara taudia be edia dagi idia gaukaralaia ma haida idia doria moni idia henia totona o idia ura lasi edia maduna idia hagugurua ela bona harihari gaudia idia abia. Idia haida be inai: headava idia hamomokania taudia, takisi gogoa taudia, ruma haginia ena gwaumaoro pepadia idia henia taudia, bona ma haida. Bema taunimanima ese moni idia henidia lasi, edia maduna do idia huaia lasi, hegeregere gwaumaoro do idia henia lasi. Tano ta ena ripoti ese ia hahedinaraia lahi ese  ruma ta ia araia neganai, lahi habodoa taudia o firemen be edia gaukara do idia karaia lasi ela bona taunimanima ese moni bada idia henia.

Unai bamona kara be tanobada hegegemadai ai idia vara noho dainai, haida idia laloa harihari gaudia o moni idia henia be namo. Unai bamona negadiai, reana Keristani tauna do ia laloa gavamani ena sevis ia abia totona, moni ma haida ia henia be namo. To, korapsen karana idia vara momo tanodia ai namona be Keristani taudia idia naria namonamo, namo lasi Dirava ese ia abia dae bona abia dae lasi gaudia idia itaia namonamo lasi. Tau ta amo gau ta abia totona lalona veria dalana ai moni henia karana be maoro lasi. Korapsen idia vara momo tanodia ai, haida be gavamani ena gaukara taudia dekenai lalona veria moni idia henia, unai amo ia maoro lasi dalanai gavamani ena sevis idia abia, eiava pulisi o loea dekenai moni idia henia unai amo kota dala maorona idia badinaia lasi bona edia kerere idia hunia. Oibe, gau ta abia totona lalona veria dalanai ma ta dekenai “harihari gauna” henia o abia karana be maoro lasi. Unai ese hahemaoro goeva karana ia hagagevaia.​—Eso. 23:8; Deu. 16:19; Aon. 17:23.

Baibel ese edia lalomamina ia hadibaia dainai, lo Keristani taudia momo idia laloa ia maoro lasi dalana ai gavamani ena gaukara taudia dekenai moni henia karana be kerere. Idia laloa unai bamona karadia lalonai idia vareai neganai, idia be korapsen karana idia durua bamona. Danu, idia ese lalona veria dalanai harihari gaudia henia karana idia dadaraia momokani.

Lo Keristani taudia idia diba, gau haida abia totona harihari gaudia henia karana ese lalona veria dalanai moni abia karana ena dika ia hereaia. To haida be edia noho dalana bona hemami hegeregerena harihari gaudia idia henia, unai amo edia tanikiu karana idia hahedinaraia badina heduru be nega maorona ai idia abia. Hegeregere, Keristani taudia haida be hospital ai davana lasi medikol heduru idia abia murinai, doketa bona nesi dekenai edia tanikiu karana idia hahedinaraia totona harihari gaudia idia henia. Unai Keristani taudia be medikol heduru idia abia murinai harihari gaudia idia henia dainai, unai be lalona veria dalanai moni o harihari gaudia henia karana lasi.

Tano ta ta ai idia vara gaudia ibounai ita herevalaia be anina lasi. Keristani taudia be edia noho dalana bona edia lalomamina hegeregerena abia hidi idia karaia diba. (Roma 14:1-6) Namona be taravatu utua karadia idia dadaraia. (Roma 13:1-7) Namona be Iehova ena ladana idia hadikaia bona ma haida idia hahekwakwanaia karadia idia dadaraia. (Mat. 6:9; 1 Kor. 10:32) Bona namona be idia karaia abia hidi ese idia hahedinaraia idia be edia dekena taudia idia lalokau henia.​—Mar. 12:31.

Luka karoa 15 ai, Iesu ese tau ta mai ena mamoe ibounai 100 ena haheitalai ia herevalaia. Ena mamoe ta be ia boio neganai, unai tau ese 99 ia rakatania bona unai boio mamoe ia tahua ‘ela bona ia davaria.’ Iesu ma ia gwau: “Ia davaria neganai, ena pagana dekenai ia atoa bona ia moale. Bona ruma dekenai ia lao neganai ena turadia bona dekena taudia ia boiria, bona idia dekenai ia gwau, ‘Lau ida umui moale, badina egu boio mamoena lau davaria vadaeni.’” Dokonai, Iesu ia gwau: “Kara dika tauna ta ia helalo-kerehai neganai, guba ai moale bada ia vara, unai moale ese kara maoromaoro taudia 99 totona idia abia moalena ia hereaia, badina idia helalo-kerehai be anina lasi.”​—Luka 15:4-7.

Unai haheitalai ese ia hahedinaraia Iesu be ese ia gwauraia herevana amo taravatu hadibaia taudia bona Farisea taudia edia lalohadai kererena ia hamaoromaoroa, badina idia gwau ia be takisi gogoa taudia bona kara dika taudia ida ia hebamo. (Luka 15:1-3) Iesu ese ia hahedinaraia, kara dika tauna ta be ia helalo–kerehai neganai, guba dekenai moale bada ia vara. To henanadai be inai, ‘Bema guba dekenai moale bada ia vara, vadaeni kara dika tauna ta ia helalo–kerehai, ia giroa lou bona ena raka daladia ia hamaoromaoroa neganai tanobada ai moale ia vara diba, a?’​—Heb. 12:13.

Bema ta be kongrigeisen dekenai ia giroa lou, badina namona dainai ita moale, ani? Ia ese Dirava ia badinaia noho, bona ia hahedinaraia ia helalo–kerehai momokani, unai dainai kongrigeisen dekenai ia giroa lou, bona unai be moale gauna. Elda taudia ese kongrigeisen idia hadibaia neganai, ibounai ese edia moale idia hahedinaraia totona, edia imana idia patapataia bema idia ura.