LAGANI 1910 lalodiai, egu tama sina be Tbilisi, Georgia, idia rakatania bona Canada dekenai idia lao, bona Canada ena west kahanai ia noho hanuana, Pelly, Saskatchewan, kahirakahira ia noho biru gabuna dekenai idia noho.Lau be lagani 1928 ai lau vara, natudia 6 amo lau be dokona. Hua 6 idia noho bena do lau vara neganai, egu tamana ia mase, bona lau be do beibi neganai, egu sinana ia mase. Bona daudau lasi murinai, egu kakana Lucy ia mase, ena mauri lagani be 17. Unai murinai, egu vavana Nick ese lau bona egu kakadia ia naria.

Dina ta lau be do maragi neganai, egu famili idia itaia lau be biru gabunai ia noho hosi ta ena iuna lau veria. Idia gari, dika hosi ese lau do ia kikia dainai, lau dekenai idia boiboi badabada​—to gau ta lau karaia lasi. Egu doruna be idia dekenai bona edia boiboi regena lau kamonai lasi. Lau moale badina unai dina ai dika ta lau davaria lasi, bona unai nega ai egu famili idia laloparara lau be taia kudima.

Emai turana ta ia laloa taia kudima taudia edia sikuli dekenai lau lao be namo, unai dainai egu vavana Nick ese Saskatoon, Saskatchewan, dekenai ia noho taia kudima taudia edia sikuli dekenai lau ia atoa.Unai sikuli be egu famili edia noho gabuna amo ia daudau, bona egu mauri lagani be 5 sibona dainai, lau gari bada. Holidei negadia sibona ai egu famili lau vadivadi henia. Daudau lasi, saini gado lau dibaia bona natudia ma haida ida lau gadara diba.

Lagani 1939 ai, egu kakana, Marion, be Bill Danylchuck ia adavaia, bona idia ese lau bona egu taihuna Frances idia naria. Emai famili ai, idia ese Iehova ena Witnes taudia idia hedavari henia guna. Egu holidei negadiai, idia ese edia diba hegeregerena, Baibel amo idia dibaia gaudia be lau dekenai idia gwauraia. To momokani,  idia ida lau herevahereva be auka, badina idia be saini gado idia diba lasi. To idia itaia lau ura dikadika Baibel amo idia gwauraia herevadia lau dibaia. Bona lau itaia idia karaia gaudia bona Baibel ena hereva be hegeregere, unai dainai idia haroro neganai, idia ida lau lao. Daudau lasi murinai, lau ura bapatiso dainai, September 5, 1941 ai, Bill ese guri ranuna amo ia honu daramu lalonai lau ia bapatisoa. Unai ranu be ia keru momokani!

Lagani 1946 ai, holidei totona lau giroa neganai, Cleveland, Ohio, U.S.A. dekenai idia karaia hebouhebouna dekenai ai lao.Hebouhebou ena dina ginigunana ai, egu taihudia ese tok ta ta edia hereva badadia idia torea, unai amo program lau badinaia diba. To dina iharuana ai, lau moale bada badina unai hebouhebou ai, taia kudima taudia ma haida danu idia noho bona ta ese saini gado amo tok ibounai ia hahanaia. Hari hebouhebou lau moalelaia diba, badina Baibel ena hereva momokani lau lalopararalaia!

Unai nega ai, Tanobada Tuarina Iharuana ia ore bona bese abia isi karana be bada. Hebouhebou amo lau giroa neganai, egu lalona lau hadaia sikuli ai egu abidadama lau dogoatao auka totona. Unai dainai pepe saluti karana bona bese abia isi ane abia karana lau hadokoa. Danu, dina badadia moalelaia karana bona sikuli ai idia karaia tomadiho karadia lau dadaraia. Tisa taudia be idia moale lasi, unai dainai lau idia hagaria bona koikoi herevadia idia gwauraia, egu lalona idia haidaua totona. Unai ia vara dainai, egu sikuli turadia idia daradara bada, to unai ese dala ia kehoa idia lau haroro henia totona. Gabeai egu sikuli turadia hegeregere, Larry Androsoff, Norman Dittrick, bona Emil Schneider be hereva momokani idia abia dae, bona mai abidadama ida Iehova idia hesiai henia ema bona hari.

Siti ma haida lau vadivadi henia neganai, taia kudima taudia ma haida lau tahua bona haroro henidia. Hegeregere, Montreal ai ia noho taia kudima taudia edia klab ta dekenai, dagedage orea ia bamoa tauna ladana Eddie Taeger lau haroro henia. Ia be Laval, Quebec ai ia noho saini gado kongrigeisen ia bamoa ela bona vanegai laganina ai ia mase.Danu, Juan Ardanez lau hedavari henia, Berea taudia bamona, ia be mai ura bada ida Baibel ena hereva ia tahua namonamo bona ia davaria unai hereva ibounai be momokani. (Kara 17:10, 11) Ia danu be hereva momokani ia abia dae bona Ottawa, Ontario ai, elda maduna ia huaia ela bona ia mase.

Lagani 1950 ai, Vancouver dekenai lau lao. Ena be lau ura bada taia kudima taudia lau haroro henia, to nega ta ia herevahereva diba hahine ta lau haroro henia, iena ladana be Chris Spicer, bona unai nega lau laloaboio diba lasi. Ia ese magasin sabskripsen ia abia dae bona ia ura iena adavana, Gary, do lau hedavari henia. Unai dainai edia ruma dekenai lau lao bona nega daudau ai herevahereva, to emai herevahereva ibounai be  pepa dekenai ai torea. Unai nega sibona ai idia lau hedavari henia, bena lagani haida murinai, Toronto, Ontario dekenai idia karaia hebouhebouna ai idia lau hedavari henia lou. Unai dina ai Gary be do ia bapatiso. Unai ekspiriens ese lau ia hagoadaia haroro gaukara lau laloa bada totona, badina ita diba lasi edeseniai o edena nega ai ta be hereva momokani do ia abia dae.

Gabeai Saskatoon dekenai lau giroa lou. Unuseniai sina ta lau hedavari henia, ia ese lau ia noia iena hekapa natuna kekeni rua, Jean bona Joan Rothenberger, ida Baibel do lau stadilaia, idia ruaosi be taia kudima bona guna lau lao henia taia kudima taudia edia sikuli dekenai idia lao. Daudau lasi, unai kekeni rua ese idia dibaia gaudia be edia sikuli turadia dekenai idia gwauraia. Gabeai, edia klas amo kekeni 5 be Iehova ena Witnes taudia ai idia lao. Idia ta be Eunice Colin. Unai sikuli dekenai lau lao noho neganai, Eunice lau hedavari henia. Unai nega ai, ia ese lau dekenai loli ta ia henia bona lau ia noia ia lau tura henia totona. Gabeai ia be egu adavana ai ia lao!

Eunice ena sinana ia kamonai ia be Baibel ia stadilaia neganai, sikuli ena hedmasta ia hamaoroa Eunice do ia koua. Hedmasta ese Eunice ena stadi buka ia abidia danu. To, Eunice ese ena lalona ia hadaia Iehova do ia badinaia noho. Ia ura bapatiso neganai, iena tama sina ese ia idia hamaoroa, “Bema Iehova ena Witnes tauna ai oi lao, emai ruma do oi rakatania!” Eunice ena mauri lagani be 17 neganai, iena ruma ia rakatania, bona Witnes famili ta ese ia idia naria. Iena Baibel stadilaia karana ia goadalaia bona gabeai bapatiso ia abia. Lagani 1960 dekenai ai headava neganai, iena tama sina be emai headava dekenai idia mai lasi. To lagani haida idia hanaia murinai, idia ese ai abia dae gaudia bona emai natudia ai naria dalana idia matauraia matamaia.

Ena be ai ruaosi be taia kudima, to emai natuna memero 7 be idia herevahereva diba. Ena be ia auka, to idia dekenai saini gado ai hadibaia, unai amo idia ida ai herevahereva diba bona idia dekenai hereva momokani do ai hadibaia. Emai kongrigeisen tadikaka taihu be ai idia durua bada. Hegeregere, tama ta ese ai ia tore henia, ia gwau emai natuna mero ta be Kingdom Hall ai hereva dikadia ia gwauraia. Unai nega ai unai hekwakwanai ai hamaoromaoroa haraga. Egu natuna memero 4​—James, Jerry, Nicholas, bona Steven—​be edia adavadia bona famili ida Iehova idia hesiai henia. Unai natudia 4 be elda taudia. Ma danu, Nicholas bona ena adavana, Deborah, be Britain brens ai saini gado hahanaia gaukarana idia durua, to Steven bona ena adavana, Shannan, be United States ena brens ai ia noho saini gado trensleisen tim lalonai.

Emai headava laganidia 40 ai do moalelaia lasi neganai, Eunice be kensa gorere amo ia mase. Unai nega aukana lalonai, iena lalona be ia goada momokani. Iena abidadama toreisi lou dekenai be ia goada. Lau ura dikadika gabeai ia do lau itaia lou.

February 2012 ai, lau moru bona egu koekoena lau hamakohia, bona heduru lau noia. Unai dainai egu natuna ta bona ena adavana ida lau noho. Hari ai be Calgary Saini-Gado Kongrigeisen ai durua, unuseniai lau be elda tauna ta.Bona inai be egu nega ginigunana saini gado kongrigeisen lau durua. Mani oi laloa! Lagani 1946 amo, lau be English gado kongrigeisen dekenai lau lao. Edena dala ai goada lau abia? Iehova ese iena gwauhamata ia badinaia, ia ese tamana lasi natudia ia naria. (Sal. 10:14, BHḡ) Lau moale badina momo be lau idia hereva henia totona, nouti idia torea, saini gado idia dibaia, bona saini gado ai hereva idia hahanaia.

Momokani, nega haida lau lalohisihisi bona lau ura hebou lao henia karana lau rakatania, badina haida ese idia gwauraia herevadia lau lalopararalaia lasi eiava badina lau mamia tadikaka ese taia kudima taudia edia namo idia laloa bada lasi. To unai negadiai, Petero ese Iesu dekenai ia gwauraia herevana lau laloatao, ia gwau: “Lohiabada e, daika dekenai do ai lao? Mauri hanaihanai herevadia be oi dekenai idia noho.” (Ioa. 6:66-68) Taia kudima tadikaka taihu momo bamona, lau ese haheauka karana lau dibaia. Oibe, Iehova bona ena orea ese idia henia heduru lau naria dainai, hahenamo momo lau davaria! Hari egu gado ai idia hahanaia gaudia be momo herea, bona kongrigeisen heboudia bona hebouhebou badadia ai ASL amo ma haida lau hereva henia diba. Oibe, Iehova, iseda Dirava, lau hesiai henia dainai, egu mauri lau moalelaia.