SEPTEMBER 2000 ai, Daniel bona Miriam idia headava bona Spain ena siti, Barcelona, dekenai idia noho. Daniel ia gwau: “Emai mauri ai moalelaia. Moni gaukara namona ai karaia dainai, aniani gabudia dekenai ai aniani, tano ma haida dekenai ai loaloa, bona dabua namodia ai hahedokilaia. Danu, nega ibounai haroro gaukara ai durua.” To gabeai gau ta ia vara.

Lagani 2006 ena hebouhebou ai, tok ta ese Daniel ena kudouna ia pidia momokani, unai tok ai tadikaka ia henanadai: “Ita be ita hekwarahi noho, ‘mase dekenai kahirakahira idia moru taudia’ be mauri hanaihanai dalana dekenai ita hakaua totona, a?” (Aon. 24:11) Unai tok ese hahemauri sivaraina harorolaia gaukarana ia herevalaia. (Kara 20:26, 27) Daniel ia gwau: “Lau mamia Iehova be lau ia hereva henia noho.” Danu, unai tok ese ia hahedinaraia, bema iseda hesiai gaukara ita habadaia, do ita moale. Daniel ia diba unai be momokani. Miriam be painia gaukara ia karaia bona hahenamo momo ia moalelaia.

Daniel ia gwau: “Egu lalona lau hadaia egu mauri do lau haidaua momokani.” Bona unai ia karaia. Iena moni gaukara ena hora ia hamaragia, ia painia matamaia, bona ia bona Miriam ese pablisa momo lasi gabudia durua gaukarana amo do idia davaria moalena ia laloa.

May 2007 ai, Daniel bona Miriam be edia moni gaukara idia rakatania, bona guna idia vadivadi henia gabuna, Panama, dekenai idia lao. Edia teritori matamata be Caribbean Davarana ena Bocas del Toro Archipelago motumotudia, unai motumotu ai Guaymi taudia momo idia noho. Daniel bona Miriam idia laloa hua 8 Panama dekenai do idia noho, bona idia haboua monina amo haroro gaukara do idia durua.

Haroro gaukara totona bouti bona basikele idia gaukaralaia, nega ginigunana basikele amo idia lao negana idia laloatao​—kilomita 32 bamona ororo latadia idia hanaia, unai nega ai dina be ia siahu bada. Daniel ena goada ia ore bona kahirakahira ia maserea. To, dala badinai idia noho Guaymi taudia ese idia abidia dae, badina unai taudia edia gado sisia idia diba. Daudau lasi, idia be Baibel stadi 23 idia karaia.

Idia dekenai ia noho moni ia ore neganai, idia lalohekwarahi matamaia. Daniel ia gwau: “Spain dekenai do ai giroa lou lalohadaina ai abia neganai, emai mata ranu idia diho.” Ai lalohisihisi bada, badina emai Baibel stadi taudia do ai rakatania. To, hua ta murinai, sivarai namona ta idia abia. Miriam ia gwau: “Ai idia hamaoroa spesel painia gaukara do ai karaia. Ai moale badina emai asainmen ai rakatania lasi.”

Lagani 2015 ai, orea lalonai senisi idia vara dainai, Daniel bona Miriam idia noia regula painia gaukara do idia karaia. Dahaka do idia karaia? Idia ese Salamo 37:5 ai ia noho gwauhamata idia abidadama henia, ia gwau: “Oiemu mauri be Lohiabada ena imana dekenai do oi atoa. Ia dekenai do oi abidadama, vadaeni ia ese oi do ia durua.” Sibodia durua totona, moni gaukara ta idia davaria, bona hari Panama ena provinsi ta, Veraguas, dekenai ia noho kongrigeisen idia durua.

Daniel ia gwau: “Spain ai do rakatania lasi neganai, ai daradara bema kohu momo lasi maurina do ai moalelaia. Hari unai mauri ai moalelaia, bona gau ta dekenai ai lalohekwarahi lasi.” Dahaka idia moalelaia bada? Idia gwau: “Manau taudia ai durua Iehova idia dibaia totona be moale bada gauna!”