1, 2. (a) Iesu ia do mase lasi neganai, ia be dahaka hereva be ena hahediba taudia dekenai ia gwauraia? (Laulau ginigunana herevalaia.) (b) Dahaka dainai iseda haroro gaukara ena badina ita laloatao be namo? (c) Dahaka gaudia do ita herevalaia?

IESU ia do mase lasi neganai, ena hanuaboi ginigabena ai, ia be ena aposetolo taudia ida ia herevahereva, bona idia ia hamaoroa ia be idia ia lalokau henia bada. Danu, ia ese idia dekenai vain parabolena ia gwauraia​—⁠unai be vanegai stadi ai ita herevalaia gauna. Unai parabole amo, Iesu ese ena aposetolo taudia ia hagoadaia, ia gwau: “Huahua momo umui havaraia noho,” anina be mai edia haheauka ida Basileia sivaraina do idia harorolaia.​—⁠Ioa. 15:8.

² To, Iesu be ena aposetolo taudia ia hamaoroa dahaka gaukara do idia karaia sibona lasi to dahaka dainai unai gaukara idia karaia be namo. Ia ese idia dekenai haroro gaukara do idia karaia ena badina idauidau ia gwauraia. Dahaka dainai unai badina idauidau ita laloa bada be namo? Ita haroro noho ena badina ita laloatao neganai, unai ese ita do ia doria mai haheauka ida “bese ibounai” ita haroro henia totona. (Mat. 24:13, 14) Unai dainai, ita haroro ena badina ia gwauraia Baibel siridia foa mani ita herevalaia. Bona Iehova ena harihari gaudia foa do ita herevalaia, badina unai ese ita idia durua huahua momo ita havaraia noho totona.

3. (a) Haroro gaukara ita karaia ena badina be Ioane 15:8 ese edena bamona ia herevalaia? (b) Iesu ese parabole ai ia gwauraia greips namodia be dahaka idia laulaulaia, bona dahaka dainai unai be maoro?

³ Haroro gaukara ita karaia ena badina namba 1 be inai: Taunimanima edia vairanai Iehova ita hanamoa bona ena ladana ita hahelagaia. (Ioane 15:1, 8 duahia.) Laloatao, Iesu ese ena Tamana, Iehova, be biru tauna, o greips ia hadoa tauna, ida ia hahegeregerea. Iesu ia gwau ia be vain, o vain auna, bona ena aposetolo taudia be rigi. (Ioa. 15:5) So, ita gwau diba greips be Basileia ena huahua namodia​—⁠Keriso ena murinai idia raka taudia ese idia havaraia gauna​—⁠ia laulaulaia be maoro. Iesu ese ena aposetolo taudia ia hamaoroa: “Lauegu Tamana ese hanamoa ia abia dalana be inai, umui ese huahua momo umui havaraia noho.” Vain ese greips namodia idia havaraia neganai biru tauna be hanamoa ia abia, unai hegeregerena, Iehova be hanamoa ia abia bema mai eda goada ibounai ida Basileia sivaraina ita harorolaia.​—⁠Mat. 25:20-23.

4. (a) Edena dala haida ai Dirava ena ladana ita hahelagaia? (b) Dirava ena ladana oi hahelagaia karana be edena bamona oi laloa?

⁴ Edena dala ai iseda haroro gaukara ese Dirava ena ladana ia hahelagaia? Dirava ena ladana ita hahelagaia be anina lasi, badina Iena ladana be ia helaga vadaeni. Peroveta tauna Isaia ia gwau: “Tuari oreadia edia Iehova sibona do umui gwauraia helaga Diravana be namo.” (Isa. 8:13, NWT) Dirava ena ladana ita hahelagaia bema ita gwau Iena ladana sibona be hereadae, bona ma haida ita durua, idia laloparara Ia be helaga. (Mat. 6:9.) Hegeregere, Iehova ena kara badadia bona ena ura gauna​—⁠taunimanima be paradaiso ai do idia noho​—⁠ena sivarai ita harorolaia neganai, ita be Dirava ena ladana ita gimaia, badina Satani ese ia hadikaia. (Gen. 3:1-5) Danu, Dirava ena ladana ita hahelagaia, bema iseda teritori ai taunimanima ita durua idia diba Iehova be hegeregere “hairai, hemataurai, bona siahu [ia] abia totona.” (Apok. 4:11) Lagani 16 lalodiai ia painia tadikaka ta, Rune, ia gwau: “Iunives ia Havaraia Tauna ena sivarai lau harorolaia diba dainai lau moale. Unai ese egu ura ia hagoadaia lau haroro noho totona.”

5. (a) Haroro gaukara ita karaia ena badina be Ioane 15:9, 10 ese edena bamona ia herevalaia? (b) Iesu ese haheauka karana be edena bamona ia herevalaia?

⁵ Ioane 15:9, 10 duahia. Basileia sivaraina ita harorolaia ena badina namba 2 be, Iehova bona Iesu ita lalokau henia. (Mar. 12:30; Ioa. 14:15) Iesu ese ena aposetolo taudia ia hamaoroa ‘iena lalokau lalonai idia noho’ be namo. Dahaka dainai? Badina bema ta ia ura Keriso ena hahediba tauna korikorina ai ia lao, ia haheauka be gau badana. Bona Ioane 15:4-10 dekenai, Iesu be inai hereva “noho” bona unai bamona hereva ma haida ia gwauraia momo badina ia ura ena aposetolo taudia ia durua, idia laloparara idia haheauka be gau badana.

6. Edena bamona ita hahedinaraia ita ura Keriso ena lalokau lalonai ita noho?

⁶ Edena bamona ita hahedinaraia ita ura Keriso ena lalokau lalonai ita noho bona iena lalonamo ita abia noho? Gau badana be Iesu ena taravatu ita badinaia. Toana ese Iesu be ita ia hamaoroa, ‘Lau umui badinaia.’ To, Iesu be ita ia noia ia karaia hegeregerena ita karaia totona, ia gwau: “Lau ese egu Tamana ena taravatu lau badinaia bona iena lalokau lalonai lau noho hegeregerena.” Oibe, Iesu ena haheitalai namona ita tohotohoa be namo.​—⁠Ioa. 13:15.

7. Edena dala ai badinaia karana bona lalokau karana idia gaukara hebou?

⁷ Badinaia karana bona lalokau karana be idia gaukara hebou badina be Iesu ese matamanai  ena aposetolo taudia ia hamaoroa: “Lauegu taravatu ia abia dae bona ia badinaia tauna be lau ia lalokau henia.” (Ioa. 14:21) Danu, Iesu ena oda hegeregerena ita lao bona ita haroro neganai, ita danu ita hahedinaraia ita be Dirava ita lalokau henia badina Iesu ia gwauraia oda herevadia be ena Tamana amo ia abia. (Mat. 17:5; Ioa. 8:28) Iehova bona Iesu ita lalokau henidia neganai, idia be ita idia lalokau henia danu.

8, 9. (a) Haroro gaukara ita karaia noho ena badina namba 3 be dahaka? (b) Dahaka dainai Iehova ena hereva, Esekiela 3:18, 19 bona 18:23 dekenai ese ita ia doria ita haroro noho totona?

⁸ Haroro gaukara ita karaia noho ena badina namba 3 be inai: Ita ura taunimanima ita hadibaia. Baibel ia gwau, Noa be ‘haroro tauna.’ (2 Petero 2:5 duahia.) Abata ia do vara lasi neganai, toana be Noa ese taunimanima ia hadibaia abata be do ia vara. Dahaka dainai unai bamona ita hereva? Iesu ena hereva oi laloa, ia gwau: “Badina Abata ia do mai lasi neganai, idia aniani, idia inuinu, idia headava noho ela bona Noa be lagatoi lalonai ia vareai dinana. Bona idia laloa lasi ela bona Abata ia mai bona idia ibounai ia abia lao, taunimanima ena Natuna ena noho negana danu be unai bamona.” (Mat. 24:38, 39) Ena be taunimanima idia kamonai lasi, to Noa be Dirava ese ia henia hadibaia herevana ia harorolaia goadagoada.

⁹ Hari, ita be Basileia sivaraina ita harorolaia, unai amo taunimanima be Dirava ena ura gauna​—⁠taunimanima be paradaiso ai do idia noho​—⁠ena sivarai idia dibaia totona. Iehova bamona, ita ura taunimanima be sivarai namona do idia abia dae bena idia “mauri noho.” (Ese. 18:23, NWT) Danu, ruma-ta-ruma-ta haroro gaukara bona pablik gabudiai ita haroro neganai, ita be taunimanima momo herea ita hadibaia Dirava ena Basileia be do ia mai bona inai tanobada dikana do ia haorea.​—⁠Esek. 3:18, 19; Dan. 2:44; Apo. 14:6, 7.

10. (a) Haroro gaukara ita karaia ena badina be Mataio 22:39 ese edena bamona ia herevalaia? (b) Paulo bona Sila ese Filipi ai dibura naria tauna ta be edena bamona idia durua?

¹⁰ Haroro gaukara ita karaia noho ena badina namba 4 be inai: Iseda dekena taudia ita lalokau henia dainai ita haroro. (Mat. 22:39) Unai lalokau dainai haroro gaukara lalonai ita haheauka, ita diba taunimanima edia noho dalana ia idau neganai, sivarai namona do idia kamonai. Aposetolo Paulo bona ena turana, Sila, edia sivarai ita laloa. Filipi ena siti ai, dagedage taudia ese idia ruaosi be dibura ruma ai idia atodia. Bena hanuaboi momokani ai, karaharaga tano mareremarere ia vara dainai, dibura ruma ena badina idia marere bona dibura ruma ena iduara idia kehoa. Dibura naria tauna be ena tuari kaia ia abia bona ia ura sibona ia alaia mase, badina ia laloa dibura taudia ibounai idia heau boio vadaeni. To Paulo ia boiboi: “Oi sibona oi hadikaia lasi!” Unai dibura naria tauna ia gwau: “Dahaka lau karaia be namo hahemauri lau abia totona?” Ia dekenai idia gwau: “Lohiabada Iesu oi abidadama henia bena . . . hahemauri do [oi] abia.”​—⁠Kara 16:25-34.

11, 12. (a) Edena dala ai dibura naria tauna ena sivarai ese ita ia durua haroro gaukara ita karaia noho totona? (b) Ita ura ita noho hegaegae dahaka ita karaia totona?

¹¹ Edena dala ai dibura naria tauna ena sivarai ese ita ia durua haroro gaukara ita karaia  noho totona? Laloatao: Tano mareremarere ia vara murinai, dibura naria tauna be ena kara ia haidaua bena heduru ia noia. Hari inai negai, matamanai haida be Baibel ena sivarai idia abia dae lasi, to gabeai hekwakwanai badadia idia vara murinai, edia kara idia haidaua bena heduru idia noia. Hegeregere, iseda teritori ai, haida idia daradara badina edia moni gaukara idia haboioa, herevana lagani momo lalonai unai gaukara idia karaia. Ma haida idia lalohisihisi bada badina vanegai sibona edia headava ia dika. To ma haida idia lalometau badina gorere badana ta idia davaria, o reana idia daradoko badina idia lalokau henia tauna ta ia mase. Unai bamona negadiai, idia haida be henanadai badadia do idia henia, to matamanai idia be unai henanadai idia laloa bada lasi. Reana do idia laloa, ‘Dahaka lau karaia be namo hahemauri lau abia totona?’ Unai bamona taudia ita davaria neganai, reana unai be nega ginigunana ita harorolaia sivaraina do idia kamonai.

¹² Unai dainai, haroro gaukara ita karaia noho neganai, ita noho hegaegae kamonai taudia ita durua totona. (Isa. 61:1) Lagani 38 lalodiai ful-taim hesiai gaukara ia karaia taihuna, Charlotte, ia gwau, “Hari, taunimanima be idia daradara. Sivarai namona idia kamonai be namo.” Lagani 34 lalodiai painia gaukara ia karaia taihuna, Ejvor, ia gwau: “Hari, momo be idia lalometau bada. Lau ura idia lau durua. Unai ese lau ia doria haroro totona.” Iseda dekena taudia ita lalokau henia dainai haroro gaukara ita karaia noho be badina hereadaena!

13, 14. (a) Ioane 15:11 be dahaka harihari gauna ia herevalaia? (b) Edena dala ai Iesu ese ia abia moalena be do ita mamia? (c) Edena dala ai moale ese ita ia durua ita haroro noho totona?

¹³ Hanuaboi ginigabena ai, Iesu be ena aposetolo taudia dekenai harihari gaudia haida ia gwauraia danu, badina unai ese idia do ia durua mai haheauka ida ita haroro noho totona. Unai harihari gaudia be dahaka, bona edena dala ai ita do idia durua?

¹⁴ Moale. Iesu ena oda herevana, haroro gaukara karaia, be ia metau, a? Lasi. Iesu ese vain parabolena ia gwauraia murinai, ia gwau Basileia idia harorolaia taudia be do idia moale. (Ioane 15:11 duahia.) Oibe, Iesu ia gwauhamata, ia abia moalena be do ita mamia momokani. Edena dala ai? Paragraf 3 ai ita itaia, Iesu ia gwau ia be vain bona ena aposetolo taudia be rigi. Vain ese rigi ibounai ia sapotia. Oibe, rigi ese ranu bona aniani idia abia diba bema vain dekenai idia noho. Unai hegeregerena, bema Keriso ida ita hakapua bona ena aena gabudia ai ita raka namonamo, do ita moale, Iesu bamona​—⁠ia be ena Tamana ena ura ia karaia dainai ia moale. (Ioa. 4:34; 17:13; 1 Pet. 2:21) Lagani 40 lalodiai painia gaukara ia karaia taihuna, Hanne, ia gwau, “Haroro gaukara lau karaia murinai lau abia moalena ese lau ia doria Iehova lau hesiai henia noho totona.” Oibe, mai moale ida haroro gaukara do ita karaia noho, herevana teritori ai haida idia kamonai lasi.​—⁠Mat. 5:10-12.

15. (a) Ioane 14:27 be dahaka harihari gauna ia herevalaia? (b)  Edena dala ai maino ese ita ia durua ita haroro noho totona?

¹⁵ Maino. (Ioane 14:27 duahia.) Hanuaboi ginigabena ai, Iesu ese ena aposetolo taudia ia hamaoroa: “Umui dekenai egu maino lau henia.” Edena dala ai unai harihari gauna​—⁠iena maino​—⁠ese ita ia durua ita haroro noho totona? Ita haroro noho neganai, maino ita davaria badina ita diba Iehova bona Iesu be idia moale. (Sal. 149:4; Roma 5:3, 4; Kol. 3:15) Lagani 45 lalodiai ful-taim hesiai gaukara ia karaia tadikakana, Ulf, ia gwau: “Haroro gaukara dainai lau moale bona egu mauri be mai ena badina korikori, herevana hesiku mamina lau abia.” Ita moale badina ita abia mainona be ia noho hanaihanai!

16. (a) Ioane 15:15 be dahaka harihari gauna ia herevalaia? (b) Aposetolo taudia be edena dala ai Iesu idia tura henia noho diba?

 ¹⁶ Hetura Karana. Iesu ia gwau ia ura aposetolo taudia be moale do idia “mamia momokani,” bona unai murinai, idia ia hamaoroa, lalokau idia hahedinaraia noho be mai anina bada. (Ioa. 15:11-13) Bena ia gwau: “Umui lau boiria turadia.” Iesu ena turana ai ita lao be harihari gauna hereadaena ta! Aposetolo taudia be dahaka idia karaia Iesu idia tura henia noho totona? Namona be “huahua do [idia] havaraia noho.” (Ioane 15:14-16 duahia.) Lagani rua gunanai, Iesu ese ena aposetolo taudia ia hadibaia idia haroro neganai, idia gwau: “Guba Basileia be ia kahirakahira vadaeni.” (Mat. 10:7) So hanuaboi ginigabena ai, Iesu ese idia ia hagoadaia namona be haroro gaukara lalonai idia haheauka. (Mat. 24:13; Mar. 3:14) Oibe, haroro gaukara dekenai do idia hekwarahi to do idia karaia, bona Iesu idia tura henia noho diba. Edena dala ai? Harihari gauna ma ta amo idia do ia durua.

17, 18. (a) Ioane 15:16 be dahaka harihari gauna ia herevalaia? (b) Edena dala ai unai harihari gauna ese Iesu ena aposetolo taudia do ia durua? (c) Edena harihari gaudia be hari inai negai ita idia hagoadaia?

¹⁷ Guriguri haerelaidia karana. Iesu ia gwau: “Egu ladana ai egu Tamana dekenai herevana dahaka umui noia, umui dekenai do ia henia.” (Ioa. 15:16) Reana unai gwauhamata herevana be aposetolo taudia ia hagoadaia. * Aposetolo taudia idia diba lasi gauna be inai: Ena be tanobada ai edia Lohiabada be do ia mase, to idia do ia durua. Iehova be ia noho hegaegae edia guriguri do ia haerelaidia bona idia do ia durua Basileia sivaraina idia harorolaia totona. Oibe, Iesu ia mase bena daudau lasi murinai, aposetolo taudia be heduru totona idia noinoi negadiai, Iehova be edia guriguri ia haerelaidia.​—⁠Kara 4:29, 31.

¹⁸ Hari inai negai danu, mai eda haheauka ida haroro gaukara ita karaia neganai, Iesu ena hetura karana ita moalelaia. Danu, Basileia ena sivarai namona ita harorolaia bona koua gaudia hanaia totona ita guriguri neganai, ita diba Iehova be ita do ia durua. (Fili. 4:13) Ita moale badina Dirava be eda guriguri ia haerelaia bona Iesu ena turana ai ita lao! Unai harihari gaudia, Iehova amo ita abia gaudia unai, ese ita idia hagoadaia haroro gaukara ita karaia noho totona.​—⁠Iam. 1:17.

19. (a) Dahaka dainai haroro gaukara ita karaia noho? (b) Dahaka ese ita ia durua Dirava ena gaukara ita hagugurua totona?

¹⁹ Inai atikol amo ita dibaia gauna be inai: Haroro gaukara ita karaia noho badina be (1) Iehova ita hanamoa bona ena ladana ita hahelagaia, (2) Iehova bona Iesu ita lalokau henia, (3) ita ura taunimanima ita hadibaia, bona (4) iseda dekena taudia ita lalokau henia. Bona ita dibaia harihari gaudia foa be inai: Moale, maino, hetura karana, bona guriguri haerelaidia karana​—⁠unai ese ita idia hagoadaia Dirava ena gaukara ita hagugurua totona. Oibe, Iehova ia moale bada badina ia itaia ita be mai goada ibounai ida “huahua momo [ita] havaraia noho.”!