1. Dahaka dainai haida be edia stadi idia karaia lasi?

HARI inai negai, taunimanima momo be moni abia totona idia hekwarahi bada. Iseda tadikaka momo be hora momo lalonai moni gaukara idia karaia unai amo edia ruma bese dekenai mauri durua gaudia idia henia. Bona ma haida be edia ruma amo edia moni gaukara gabuna idia lao totona, hora momo lalonai motuka amo idia heau. Momo be edia ruma bese durua bona moni abia totona gaukara metau momo idia karaia. Moni gaukara idia karaia tadikaka bona taihu be edia gaukara ia ore murinai, idia hesiku bada! Unai dainai, ia auka sibona edia stadi idia karaia totona.

2. Edena nega ai sibona emu stadi oi karaia?

² To, namona be nega ita atoa Dirava ena Hereva bona iseda Keristani pablikeisen ita stadilaia namonamo. Bema ita ura iseda hetura karana Iehova ida ia goada bona mauri hanaihanai ita abia, sibona iseda stadi ita karaia be gau badana. (1 Tim. 4:15) Haida be daba momokani idia toreisi bona regerege be lasi dainai idia laloa namonamo diba, unai bamona nega ai sibona edia stadi idia karaia. To, haida be idia ura lasi gau ta ese idia ia koua unai dainai adorahi ai miniti haida lalonai sibona edia stadi idia karaia.

3-4. Ita itaia vidio bona ita duahia buka bona magasin dekenai, dahaka senisi haida idia karaia, bona dahaka dainai?

³ Momokani do oi gwau diba, nega ita atoa be namo unai amo sibona eda stadi ita karaia totona. To, dahaka gaudia ita stadilaia be namo? Reana do oi gwau: ‘Duahia gaudia be momo herea. To, nega be lasi ibounai lau duahia totona.’ Haida be mai edia nega pablikeisen ibounai idia duahia bona Baibel idia herevalaia vidio idia itaia, to ma haida dekenai nega be lasi unai idia karaia totona. Hakaua Oreana be unai ia diba. Unai dainai, lagani gunadiai ia ese hadibaia hereva ia henia, idia printaia pablikeisen eiava intanet ai idia halasia gaudia totona senisi haida ia karaia.

 ⁴ Hegeregere, hari ita be Yearbook of Jehovah’s Witnesses ita halasia lasi, badina iseda websait jw.org^® bona hua ta ta ena JW Broadcasting^® program ai ita idia hagoadaia ekspiriens momo ita itaia. Gima Kohorona pablik gauna bona Noga! magasin be lagani tamona lalonai nega toi sibona idia halasia. Unai senisi ese ia hahedinaraia lasi iseda nega bada be iseda ura gaudia sibona ita karaia. To, unai idia karaia ena badina be iseda nega bada do ita atoa “mai anina bada gaudia” ita karaia totona. (Fili. 1:10) Unai dainai, mai anina bada gaudia bona sibona emu Baibel stadilaia karana amo namo oi abia daladia be hari do ita herevalaia.

5-6. Edena pablikeisen ma haida ita stadilaia namonamo be namo?

⁵ Dahaka gaudia ita stadilaia guna be namo? Namona be dina ta ta ai nega ita atoa Dirava ena Hereva ita stadilaia totona. Hari kongrigeisen ena hebou ai, Baibel duahiduahi ena sediual ai siri haida sibona ita duahia, unai amo nega bada ia noho ita duahia gaudia do ita laloa dobu bona pablikeisen ma haida amo tahua gaukara ita karaia. Iseda tahua gauna be, sediual ai idia noho siri sibona ita duahia lasi, to namona be ita duahia gauna ese ita ia durua unai amo Iehova kahirakahira ita lao diba.​—⁠Sal. 19:14.

⁶ Dahaka gaudia ma haida ita stadilaia namonamo be namo? Ita ura Gima Kohorona Stadi, Kongrigeisen Baibel Stadi bona wiki ena hebou totona gau ma haida ita hegaegaelaia namonamo. Danu Gima Kohorona pablik gauna bona Noga! magasin ita abia neganai ita duahia be namo.

7. Bema ita be nega lasi websait bona JW Broadcasting ai idia noho gaudia ita itaia bona duahia, ita lalomanoka be namo, a?

⁷ Reana inai bamona do oi gwau: ‘To iseda websait jw.org ai idia noho atikol, vidio bona JW Broadcasting ai idia noho gaudia be edena bamona? Unai gaudia ibounai be nega tamona ita stadilaia diba lasi!’ Mani inai haheitalai oi laloa: Restaurant ta ai aniani idauidau idia noho. Kastoma be aniani ibounai do idia ania lasi, to haida sibona do idia hoia bona ania. Unai hegeregerena, bema oi be nega lasi iseda websait jw.org ai idia noho gaudia oi itaia bona duahia totona, namo lasi oi lalomanoka. Bema ia hegeregere, oi duahia bona oi itaia diba gaudia sibona oi stadilaia. Hari, stadi ena anina bona ita karaia gaudia ese ita do idia durua sibona eda stadi ita karaia ena namo do ita herevalaia.

8. Gima Kohorona Stadi totona oi hegaegae neganai dahaka gaudia oi karaia, bona unai oi badinaia neganai edena dala ai oi ia durua?

⁸ Stadi ena anina be oi duahia gauna oi laloa bada unai amo mai anina bada gauna ta oi dibaia. To, ia be oi itaia gauna oi duahia haragaharaga lasi eiava haere oi makaia karana sibona lasi. Hegeregere, Gima Kohorona Stadi totona oi hegaegae neganai, namona be inai atikol ena point badana oi duahia guna. Bena stadi ena hereva kwarana, hereva kwara maragidia bona riviu henanadai oi duahia bona laloa. Unai murinai, stadi atikol ibounai oi duahia namonamo. Paragraf ia matamaia sentens ginigunana oi duahia bona lalohadailaia namonamo. Unai ese oi do ia durua paragraf ese ia herevalaia gauna oi lalopararalaia totona. Atikol ta oi duahia neganai, paragraf ta ta ese hereva kwara maragidia, bona stadi atikol ena hereva kwara badana ena anina ia hahedinaraia dalana oi laloa namonamo. Emu stadi lalonai oi lalopararalaia namonamo lasi herevadia bona point ma haida oi dibaia totona tahua gaukara oi karaia.

9. (a) Gima Kohorona Stadi ita abia neganai, edena dala ai atikol ai idia noho siri ita laloa bada, bona dahaka dainai? (b) Iosua 1:8 ena hereva bamona, siri ita duahia sibona lasi to dahaka ita karaia danu be namo?

⁹ Kongrigeisen ai ita abia Gima Kohorona Stadi ese ita ia durua Baibel ita lalopararalaia  totona. Unai dainai namona be kongrigeisen ai tadikaka bona taihu ese stadi lalonai do idia duahia siri oi laloa bada. Namona be oi itaia edena bamona siri ena hereva ese paragraf ena point badana ia hahedinaraia. Bona, nega oi atoa oi duahia siri oi laloa dobu totona, bona emu mauri lalonai oi badinaia dalana oi laloa bada.​—⁠Iosua 1:8 duahia.

10. Heberu 5:14 ena hereva bamona, dahaka dainai tama sina ese nega bada idia atoa edia natudia dekenai stadi bona tahua gaukara karaia dalana idia hadibaia totona?

¹⁰ Momokani, tama sina idia ura edia natudia ese wiki ta ta ai idia karaia Ruma Bese Ena Tomadiho idia moalelaia. Bema tama sina be edia ruma bese tomadiho totona gau haida idia hegaegaelaia vadaeni, namo lasi ruma bese idia hamoalea totona gau ma haida idia lalohekwarahilaia. To, wiki ma ta ai unai gaudia idia karaia diba, hegeregere Ruma Bese Ena Tomadiho ai hua ta ta ai idia halasia JW Broadcasting ena program idia itaia diba eiava spesel projek hegeregere Noa ena lagatoi idia karaia. To mai anina bada gauna be, tama sina ese edia natudia idia durua unai amo sibona edia stadi karaia dalana idia diba namonamo totona. Namona be idia diba edena dala ai kongrigeisen hebou totona do idia hegaegae, eiava sikuli gabuna dekenai ia vara henanadai ta o hekwakwanai ta hanaia dalana idia diba totona tahua gaukara idia karaia. (Heberu 5:14 duahia.) Bema ruma dekenai natudia ese nega bada idia gaukaralaia Baibel idia stadilaia, unai ese idia do ia durua kongrigeisen hebou, sekit bona rijinol hebouhebou dekenai idia kamonai herevadia do idia lalopararalaia namonamo totona. Momokani, natudia edia kara bona mauri lagani hegeregerena tama sina ese edia stadi do idia karaia be namo.

11. Dahaka dainai iseda Baibel stiuden taudia ita hadibaia namonamo sibona edia stadi idia karaia totona be mai anina bada?

¹¹ Iseda Baibel stiuden taudia ese sibona edia stadi karaia dalana idia diba be namo. Baibel idia stadilaia matamaia neganai ita moale bema ita itaia idia be edia stadi buka eiava kongrigeisen hebou totona haere idia makaia sibona. To, namona be iseda Baibel stiuden taudia ita hadibaia, sibona edia tahua gaukara idia karaia bona edia stadi idia karaia namonamo totona. Unai dala amo bema idia be hekwakwanai idia davaria, maoromaoro tadikaka bona taihu dekenai do idia lao lasi, to idia sibona ese iseda pablikeisen amo tahua gaukara do idia karaia.

12. Sibona iseda stadi ita karaia neganai, edena tahua gaudia ita atoa diba?

¹² Bema oi be stadi karana oi moalelaia lasi, reana oi laloa stadi karana do oi manadalaia diba lasi, to unai be momokani lasi. Matamanai  oi stadi neganai stadi ena nega oi hakwadogia bena metairametaira emu stadi negana oi halataia. Tahua gauna ta oi atoa. Momokani, iseda tahua gauna badana be ita ura Iehova kahirakahira ita lao. To, hari ita hagugurua gaudia haida be, ta ese ia henia henanadai ita haerelaia eiava hekwakwanai ta hanaia dalana dibaia totona tahua gaukara ita karaia.

13. (a) Matamata tauna ta be dahaka do ia karaia unai amo ia abia dae gaudia be ma haida dekenai ia gwauraia hedinarai totona? (b) Edena dala ai Kolose 4:6 ena sisiba herevana oi badinaia diba?

¹³ Hegeregere, oi be matamata tauna ta bona oi do sikuli noho, a? Emu klas turadia be evolution ena hahediba herevana idia abia dae. Oi ura Baibel ena hadibaia herevadia edia badina haida be idia dekenai do oi gwauraia, to oi laloa oi hegeregere lasi. Vadaeni, sibona emu stadi ai tahua gaukara oi karaia! Reana badina rua dainai: (1) Oi ura Dirava ese gau ibounai ia havaraia ena badina oi hamomokania totona bona (2) Dirava ena Hereva momokani amo oi abia dae gaudia gwauraia hedinarai dalana oi hanamoa totona. (Roma 1:20; 1 Pet. 3:15) Reana oi sibona do oi nanadaia: ‘Dahaka dainai egu klas turadia be evolution ena hahediba herevana idia abia dae?’ Bena iseda pablikeisen amo tahua gaukara oi karaia namonamo. Do oi mamia ia auka lasi oi abia dae gaudia oi gwauraia hedinarai totona. Momo be evolution ena hahediba herevana idia abia dae, badina idia matauraia bada tauna ta ese idia ia hamaoroa unai be momokani. Bema oi ese Baibel amo badina ta o rua be unai bamona idia laloa taudia dekenai oi gwauraia, reana mai ena ura bada ida hereva momokani ia ura diba tauna ta oi durua diba.​—⁠Kolose 4:6 duahia.

14-16. (a) Dahaka oi karaia unai amo oi diba namonamo lasi Baibel buka ta oi stadilaia totona? (b) Edena dala ai idia noho Baibel siri ese oi do ia durua Amosa ese ia torea buka oi lalopararalaia totona? (Maua ladana “Baibel ese Ia Sivarailaia Taudia Edia Sivarai Oi Dibaia Namonamo!” oi itaia.)

¹⁴ Bema kongrigeisen ena hebou ta ai​—⁠Baibel ena buka ta ia torea peroveta tauna ta ena sivarai do umui duahia bona herevalaia​—⁠reana unai tauna ena sivarai oi do diba namonamo lasi. Reana do oi karaia gauna ginigunana be, peroveta tauna ese ia torea sivarai ma haida oi dibaia namonamo. Edena dala ai unai oi karaia diba?

¹⁵ Gau ginigunana be, sibona oi nanadaia: ‘Buka ia torea tauna be edena bamona tauna? Ia be daika, edeseniai ia noho, bona dahaka gaukara ia karaia?’ Buka ia torea tauna ena sivarai ma haida ita dibaia neganai, ia torea herevadia bona ia gaukaralaia haheitalai do ita lalopararalaia namonamo. Baibel oi duahia neganai, buka ia torea tauna ena kara ia hahedinaraia herevadia oi laloa danu.

¹⁶ Gau iharuana be, oi ura diba torea tauna ese edena nega ai buka ia torea. Unai oi karaia totona, New World Translation of the Holy Scriptures ena rau 1662 ia lao 1663 ena kahana ai ia noho “Table of the Books of the Bible” oi itaia. Bona Appendix A6 ai, “Prophets and Kings of Judah and of Israel” ena chart oi itaia. Bema oi stadilaia bukana be peroveta herevadia ia herevalaia, vadaeni namona be unai buka idia torea negana ai idia noho taudia edia mauri dalana oi tahua namonamo. Sibona oi nanadaia: Peroveta tauna be ia ura idia ia durua edena bamona kara dikadia idia dadaraia totona? Unai nega ai daidia danu be peroveta gaukara idia karaia? Unai oi lalopararalaia namonamo totona, Baibel bukadia ma haida dekenai tahua gaukara oi karaia. Hegeregere, peroveta tauna Amosa ia noho negana ai idia vara gaudia oi lalopararalaia totona, Amosa 1:1 ena marginal references ai 2 King Taudia bona 2 Sivarai bukana edia siri oi duahia. Bona Hosea, Amosa ena nega ai ia noho peroveta tauna, ese ia torea herevadia oi stadilaia. Bema inai Baibel buka ma haida edia siri oi duahia, peroveta taudia idia noho negana ai taunimanima edia mauri do  oi lalopararalaia namonamo.​—⁠2 Kin. 14:25-28; 2 Siv. 26:1-15; Hos. 1:1-11; Amo. 1:1.

SIVARAI MA HAIDA OI LALOA BADA DANU

17-18. Paragraf ai ia noho haheitalai eiava oi sibona emu haheitalai ta amo oi hahedinaraia, edena dala ai sivarai ma haida tahua namonamo karana amo sibona emu Baibel stadi oi moalelaia?

¹⁷ Baibel ita duahia neganai, namona be mai iseda ura bada ida unai ita karaia. Hegeregere bema oi be Sekaraia bukana ena karoa 12 oi duahia, unai karoa ese Mesia ena mase ia perovetalaia. (Sek. 12:10) Siri 12 oi duahia neganai unai peroveta herevana ese ia hahedinaraia “Natana ena bese” (NWT) taudia be Mesia ia mase dainai idia tai dikadika. Namona be unai oi duahia neganai oi lalohadailaia namonamo, bona sibona oi nanadaia: ‘Dahaka dainai unai siri ese Natana ena bese taudia bona Mesia ia herevalaia? Unai lau lalopararalaia totona, edeseniai diba ma haida lau abia?’ Namona be tahua gaukara oi karaia. Hegeregere, New World Translation of the Holy Scriptures ena marginal references oi sekea diba. Unuseniai Sekaraia 12:12 ena marginal reference be rua, ginigunana be Samuela Iharuana 5:13, 14 oi davaria diba. Unai siri ai do oi itaia Natana be King Davida ena natuna ta. Marginal reference iharuana be Luka 3:23, 31, unai siri ese ia hahedinaraia Natana be Maria ena bese tauna ta. (Luka 3:23 Iosepa be “Heli ena natuna” stadi nouti Luka 3:23 itaia.) Unai tahua gaukara do oi moalelaia! Oi diba vadaeni Iesu be Davida ena bese tauna ta. (Mat. 22:42) To, Davida ena natuna memero be 20 mai kahana. Unai dainai hari ita laloparara Iesu ia mase neganai, Natana  ena bese taudia be idia taitai ena badina be Sekaraia bukana ese ia hahedinaraia.

¹⁸ Mani haheitalai ma ta ita laloa. Luka ena karoa ginigunana ai, aneru ta ladana Gabriela be Maria ia vadivadi henia bona ia hadibaia ia be natuna mero ta do ia havaraia, ia gwau: “Ia be do ia hereadae bona ia do idia gwauraia Atai Momokani Diravana ena Natuna, bona Iehova Dirava ese ia dekenai ena tamana Davida ena terona do ia henia. Ia be Iakobo ena bese do ia lohiaia ela bona hanaihanai.” (Luka 1:32, 33) Reana ita be Gabriela ese ia gwauraia hereva ginigunana, Iesu be “Atai Momokani Diravana ena Natuna” ai do ia lao herevana ita laloa bada. To, Gabriela be ma ia gwau, Iesu be King ai do ia lao. Unai dainai, sibona do ita nanadaia, Maria dekenai Gabriela ena hereva ena anina be dahaka? Maria be ia laloa Gabriela ena hereva ena anina be Iesu be King Heroda ena gabu eiava King ena bese tauna ma ta ena gabu do ia abia? Bema Iesu be king ai ia lao, Maria be kwini ai do ia lao bona iena bese taudia be king ena ruma ai do idia noho, a? Baibel ese ia hahedinaraia lasi Maria be Gabriela dekenai unai gaudia bona Dirava ena Basileia dekenai dagi abia totona ia noinoi. To, Iesu ena hahediba taudia rua be unai bamona idia karaia. (Mat. 20:20-23) Unai gaudia ibounai ese idia hahedinaraia Maria be ia manau momokani!

19-20. Iamesi 1:22-25 bona 4:8 ena hereva bamona, sibona iseda stadi ita karaia neganai iseda tahua gaudia be dahaka?

¹⁹ Laloatao, Dirava ena Hereva bona iseda Keristani pablikeisen ita stadilaia ena badina badana be ita ura Iehova kahirakahira ita lao. Bona ita ura diba ita be ‘edena bamona taudia’ bona Dirava hanamoa totona edena kara do ita haidaua be namo. (Iamesi 1:22-25; 4:8 duahia.) Sibona iseda stadi ita do hamatamaia lasi neganai, Iehova ena lauma helaga ena heduru totona ita guriguri be namo. Unai ese ita do ia durua unai amo do ita diba edena kara ita haidaua be namo.

²⁰ Namona be ita ibounai be Dirava ese ia herevalaia salamo torea tauna bamona, ia gwau: “Ia be Iehova ena taravatu dekenai ia moale, dina bona hanuaboi ai Dirava ena taravatu be gado maragina ai ia duahia. . . . Bona unai tauna be ia karaia gaudia ibounai lalonai do ia kwalimu.”​—⁠Sal. 1:2, 3, NWT.