1. Dirava ena Hereva ese ita dekenai dahaka ia hadibaia?

ITA ABIA hekwakwanai idauidau ita hanaia diba badina Iehova be iseda Hadibaia Tauna Badana. (Isa. 30:20, 21) Iena Hereva ese ita ia durua diba unai amo ‘ita noho hegaegae gaukara namodia ibounai ita karaia totona.’ (2 Tim. 3:17) Bema iseda mauri lalonai Baibel ena hadibaia herevadia ita badinaia, ita abia aonega ese “inai tanobada ena aonega” idia badinaia taudia edia aonega ia hereaia.​—⁠1 Kor. 3:19; Sal. 119:97-100.

2. Inai stadi atikol ai dahaka do ita herevalaia?

² Do ita itaia, tanobada ena aonega be tauanina ena ura sibona badinaia karana ia hahedinaraia. Unai dainai, do ia auka inai tanobada ai idia noho taudia edia lalohadai bona kara ita dadaraia totona. To badina namona dainai, Baibel ia gwau: “Umui naria namonamo, dika tau ta ese inai tanobada ena aonega bona anina lasi hereva koikoidia amo umui ia tarapua.” (Kol. 2:8) Inai stadi atikol ai do ita itaia, edena dala ai histori lalonai taunimanima be koikoi herevadia idia abia dae matamaia. Bona do ita itaia dahaka dainai tanobada ena aonega be kavakava o anina lasi bona dahaka dainai Dirava ena Hereva ese tanobada ena aonega idia badinaia taudia edia aonega ia hereaia momokani.

3-4. Lagani 1900 lalonai, United States ai taunimanima ese sex be edena bamona idia laloa?

³ Lagani 1900 gunanai, United States ai taunimanima edia lalohadai sex karana dekenai be ia idau. Guna, momo idia laloa headava taudia sibona ese sex karana idia karaia bona taunimanima vairanai unai kara idia herevalaia lasi. To, hari taunimanima ese dala kererena ai unai kara idia herevalaia.

 ⁴ Lagani 1920 ia lao 1929 ai, Tanobada Tuarina Ginigunana ai idia davaria hekwakwanai idauidau dainai taunimanima be kohu bona moni idia laloa bada. Tahua gaukarana ia karaia hahine ta ia gwau: “Idia hoihoilaia muvi, ane, buka idauidau bona unai gaudia ibounai ese sex idia herevalaia bona hahedinaraia.” Unai lagani lalodiai, taunimanima haida edia mavaru dalana ese sex karana ia hahedinaraia bona idia hahedokilaia dabua be hemataurai lasi dabua. Baibel ese ia hahedinaraia nega dokona ai taunimanima be “moale karadia do idia ura henia bada.”​—⁠2 Tim. 3:4.

5. Lagani 1960 amo ema bona hari, taunimanima edia lalohadai sex karana dekenai be edena bamona?

⁵ Lagani 1960 lalonai, idia headava lasi taudia idia noho hebou, tau be tau ida eiava hahine be hahine ida idia mahuta hebou karana, bona divos karana be ia bada ia lao. Moale karadia idauidau lalonai unai bamona kara idia hahedinaraia momo. Unai gaudia ibounai dainai, dahaka ia vara? Buka ta ia torea hahine ia gwau, Baibel ena hereva idia badinaia lasi dainai, ruma bese momo idia parara, tama eiava sina sibona ese natudia ia naria, lalohekwarahi bada ia havaraia, ponografi laulaudia itaia loulou karana bona unai bamona gaudia ma haida idia vara momo. Taunimanima be dala kererena ai sex karana idia karaia neganai gorere dikadia, hegeregere AIDS idia abia bona unai ese ia hahedinaraia momokani inai tanobada ena aonega be kavakava.​—⁠2 Pet. 2:19.

6. Edena dala ai taunimanima edia lalohadai sex karadia dekenai ese Satani ena ura ia hahedinaraia?

⁶ Taunimanima edia lalohadai sex karadia dekenai ese Satani ena ura ia hahedinaraia. Unai dainai Satani ia moale bema taunimanima ese dala kererena ai sex karadia idia karaia unai amo Dirava ena harihari gauna, headava lalonai idia matauraia lasi. (Efe. 2:2) Bema taunimanima be kara bodagadia idia karaia, idia hahedinaraia Dirava ese taunimanima dekenai ia henia harihari gauna, natuna havaraia karana idia matauraia lasi. Bona unai bamona kara idia karaia taudia be mauri hanaihanai do idia abia lasi.​—⁠1 Kor. 6:9, 10.

7-8. Dahaka dainai sex karana dekenai Baibel ena lalohadai be maoro bona ia be tanobada ena aonega idia badinaia taudia edia lalohadai amo ia idau?

⁷ Inai tanobada ena aonega idia badinaia taudia be Baibel ena kara maoromaoro taravatudia idia abia dae lasi. Reana unai bamona taudia be inai henanadai do idia gwauraia: ‘Dirava ese taunimanima ia havaraia neganai idia dekenai sex urana ia atoa to dahaka dainai ita ia hamaoroa unai ita karaia lasi?’ Taunimanima be unai henanadai idia henia badina idia laloa bema idia ura gau ta idia karaia vadaeni unai kara idia karaia  sibona. To Baibel ena hereva be unai bamona lasi. Baibel ese ita ia hadibaia tauanina ena ura ita biagua totona kara dikadia ita karaia lasi. (Kol. 3:5) Danu, headava be Iehova ena harihari gauna, bona unai dala tamona sibona amo tau bona hahine be mai hemataurai ida sex karana idia moalelaia diba. (1 Kor. 7:8, 9) Bona danu unai dala amo kara bodagadia ese idia havaraia dika idauidau ena metau idia huaia lasi.

⁸ Sex karana dekenai Baibel ena lalohadai be maoro bona ia be tanobada ena aonega idia badinaia taudia edia lalohadai amo ia idau. Baibel ia gwau headava tau bona hahine sibona ese sex karana idia moalelaia diba. (Aon. 5:18, 19) To danu Baibel ia gwau: “Umui ta ta ese helaga bona hemataurai dalanai, sibona emui tauanina biagua dalana umui diba be namo, to mai mataganigani ida matabodaga karadia umui ura henia lasi, Dirava idia diba lasi besedia idia karaia bamona.”​—⁠1 Tes. 4:4, 5.

9. (a) Edena dala ai lagani 1900 gunanai, Iehova ena taunimanima be Dirava ena Hereva amo ia mai aonega idia badinaia? (b) Ioane Ginigunana 2:15, 16 amo edena aonega sisiba herevana ita abia? (c) Roma 1:24-27 ese ia herevalaia bamona, edena kara bodagadia ita dadaraia be namo?

⁹ Lagani 1900 gunanai, “kara mirodia idauidau ibounai idia karaia” taudia edia kara ese Iehova ena taunimanima idia koia lasi. (Efe. 4:19) Idia gaukara goada Iehova ena kara maoromaoro taravatudia idia badinaia totona. May 15, 1926, ena Watch Tower ia gwau: “Tau eiava hahine ta ese tau ta o hahine ma ta ia kara henia neganai, ena kara bona lalohadai idia goeva be namo.” Ena be hari inai negai taunimanima be unai kara idia hahedinaraia lasi, to Iehova ena taunimanima be Dirava ena Hereva amo ia mai aonega idia badinaia. (1 Ioane 2:15, 16 duahia.) Ita moale badina Dirava ese ita dekenai iena Hereva ia henia! Danu Iehova be ena orea amo nega korikori ai ita ia durua gaudia ia henia, unai amo tanobada ena aonega ese ia hahedinaraia kara bodagadia ita dadaraia diba. *​—⁠Roma 1:24-27 duahia.

10-11. Baibel ese ita ia hadibaia hari inai nega dokona ai taunimanima dekenai dahaka do ia vara?

¹⁰ Baibel ese ita ia hadibaia hari inai nega dokona ai taunimanima be “sibodia do idia laloa bada.” (2 Tim. 3:1, 2) Unai hereva dainai ita diba momokani taunimanima be sibona laloa bada karana idia hahedinaraia. Encyclopedia ta ia gwau: Lagani 1970 lalonai, “nega momo buka haida lalonai mauri namona moalelaia karana idia herevalaia.” Buka ma haida ese “duahia taudia ia hagoadaia edia kara idia haidaua lasi bona sibodia idia laloa bada totona.” Hegeregere, unai bamona buka ta ia gwau: “Oi sibona oi lalokau henia badina oi be hairai momokani bona moale tauna.” Bona unai buka ese ia hahedinaraia, “ta be ena kara hegeregerena sibona ena abia hidi do ia karaia, bona ena hemami hegeregerena ena ura gaudia do ia karaia.”

¹¹ Guna unai bamona hereva ta oi kamonai, a? Satani be Heva ia hagoadaia sibona ena ura ia badinaia totona. Heva ia hamaoroa, ia gwau: “Dirava hegeregere do umui noho, kara namona bona kara dikana do umui diba.” (Gen. 3:5) Hari inai negai, taunimanima momo be sibona laloa bada karana idia hahedinaraia bona idia laloa ta o Dirava ese idia do ia hamaoroa lasi dahaka be maoro bona dahaka be kerere idia karaia totona. Hegeregere, unai bamona kara be hari taunimanima ese headava idia laloa karana dekenai ita itaia.

12. Tanobada ena lalohadai headava dekenai be dahaka?

¹² Baibel ese tau bona hahine ia hadibaia, idia headava neganai idia karaia gwauhamatana​—⁠unai be mai hemataurai ida ta ta do idia kara henia​—⁠idia badinaia totona. Unai ese tau  bona hahine ia hagoadaia unai gwauhamata idia badinaia noho totona. Baibel ia gwau: “Tau ese tamana sinana do ia rakatania, iena adavana dekenai do ia noho, ruaosi be tauanina tamona do idia lao.” (Gen. 2:24) To, tanobada ena aonega idia badinaia taudia edia lalohadai be idau, idia gwau tau eiava hahine be sibona ena ura do ia laloa bada. Divos ia herevalaia buka ta ia gwau: “Tano haida ai tau bona hahine idia headava neganai, taunimanima haida vairanai idia karaia gwauhamata do idia badinaia ela bona idia mase. To, hari momo ese headava gwauhamatana idia haidaua bona idia gwau do idia headava bona noho hebou bema idia ta ta idia lalokau henia.” Unai dainai, taunimanima idia laloa headava be do ia noho hanaihanai gauna lasi bona unai kara ese ruma bese momo ia hapararaia bona idia momo dekenai lalohisihisi bada ia havaraia. Unai ese ia hahedinaraia goevagoeva, headava dekenai tanobada ena lalohadai be kavakava.

13. Dahaka dainai Iehova ese hekokoroku taudia ia inai henia?

¹³ Baibel ia gwau: “Edia kudouna ai idia hekokoroku taudia ibounai be Iehova ese ia inai henia.” (Aon. 16:5, NWT) Dahaka dainai Iehova ese hekokoroku taudia ia inai henia? Ena badina ta be, sibona idia laloa bada taudia be Satani ena hekokoroku karana idia hahedinaraia. Mani inai oi laloa, Satani ia laloa Iesu​—⁠Dirava ese ia amo gau ibounai ia karaia tauna​—⁠be ia do ia tomadiho henia! (Mat. 4:8, 9; Kol. 1:15, 16) Dirava vairanai sibona idia laloa bada taudia edia kara ese ia hahedinaraia inai tanobada ena aonega be kavakava.

14. Edena dala ai Roma 12:3 ese ita ia hadibaia sibona laloa bada karana dekenai lalohadai maorona ita abia totona?

¹⁴ Baibel ese ita ia hadibaia sibona laloa bada karana dekenai lalohadai maorona ita abia totona. To, ia gwau dala maorona ai sibona laloa bada karana ita hahedinaraia diba. Iesu ia gwau: “Emu dekena tauna oi lalokau henia oi sibona oi lalokau henia hegeregerena.” Unai siri ese ia hahedinaraia, nega haida sibona iseda ura gaudia laloa karana be kerere lasi. (Mat. 19:19) Baibel ese ita ia hadibaia lasi ita  sibona do ita laloa bada bona namo lasi ita laloa ma haida ita hereaia. To, Baibel ese ita ia hadibaia, ia gwau: “Namo lasi umui badu eiava sibona umui abia isi, to mai manau ida do umui laloa ma haida ese umui idia hereaia.”​—⁠Fili. 2:3; Roma 12:3 duahia.

15. Dahaka dainai oi laloa sibona laloa bada karana dekenai Baibel ena sisiba oi badinaia be mai anina bada?

¹⁵ Hari inai negai, sibona idia gwauraia aonega taudia be Baibel ena sisiba, sibona laloa bada karana dekenai idia dadaraia. Idia gwau bema ma haida ese oi idia hereaia anina be idia ese oi idia biagua diba. Momokani, Satani ena tanobada ese sibona laloa bada karana ia hahedinaraia dainai dahaka ia vara? Sibona idia laloa bada taudia be idia moale, a? Edia ruma bese idia moale, a? Idia be mai edia tura korikoridia, a? Dirava ida edia hetura karana ia goada, a? Idia vara gaudia amo dahaka oi gwau diba, edena hakaua dalana ese namo ia havaraia? Inai tanobada ena aonega eiava Dirava ena Hereva amo ia mai aonega do oi badinaia?

16-17. Dahaka dainai ita moale?

¹⁶ Hari taunimanima be inai tanobada ena aonega idia badinaia noho. Unai be hegeregere, loaloa tauna ta be gabu ta dekenai ia lao to unai gabu ia diba namonamo lasi, bona ia ese ma loaloa tauna ta ia davaria bona unai gabu totona ia nanadaia to unai tauna danu be unai gabu ia diba namonamo lasi. Hari inai negai sibona idia gwauraia “aonega” taudia be Iesu ese inai bamona ia herevalaia, ia gwau: “Bema matakepulu tauna ese matakepulu tauna ia hakaua, idia ruaosi be guri lalonai do idia moru.” (Mat. 15:14) Momokani, Dirava vairanai inai tanobada ena aonega be kavakava.

¹⁷ Baibel amo ita abia aonega be hanaihanai “mai ena namo hadibaia totona, sisiba henia totona, gau idauidau hamaoromaoroa totona, bona kara maoromaoro ai matahakani henia totona.” (2 Tim. 3:16) Ita moale badina Iehova ena orea ese inai tanobada ena aonega amo ita ia gimaia! (Efe. 4:14) Iehova ena orea ese ia halasia gaudia be ita ia durua iena Hereva ita badinaia totona. Iehova be ita ia durua totona ita dekenai Baibel ia henia, unai be hahenamo badana!