Sara * ia gwau, “Lau be lau hemarai momo, bona lau mamia lau hegeregere lasi gau haida lau karaia totona. Unai dainai mai goada ida idia hereva eiava dagedage taudia huanai lau noho neganai egu hemami ia namo lasi. To manau taudia ida lau noho neganai egu hemami ia namo. Unai bamona taudia be egu turana ai idia lao, badina idia dekenai egu hemami bona lau davaria hekwakwanai lau herevalaia diba.”

Sara ena hereva ese ia hahedinaraia bema ita manau, ma haida do idia ura iseda turana ai idia lao. Manau karana ese Iehova ia hamoalea danu. Iena hereva ese ita ia hagoadaia: “Inai bamona kara be dabua bamona umui hahedokilaia . . . manau.” (Kol. 3:12) Manau karana be dahaka? Edena dala ai Iesu ese manau karana ia hahedinaraia? Bona edena dala ai unai kara ese iseda mauri ia hanamoa diba?

Manau karana be maino ai ia noho tauna ena kara. Manau tauna be mai hemataurai ida ma haida ia kara henia, bona haida ese ena lalona idia hahisia eiava habadua neganai ia haheauka diba bona sibona ia biagua.

Manau karana ese ta ena goada ia hahedinaraia. Grik gado herevana “manau” idia gaukaralaia dagedage hosi ta idia hamanaua karana idia herevalaia totona. Hosi ena goada be do ia noho, to idia treinia dainai ena goada ia biagua diba. Unai hegeregerena, manau karana ita hahedinaraia neganai, iseda kara do ita biagua diba bona ma haida ida maino ai ita noho.

Reana do oi laloa ‘lau be manau tauna lasi.’ Inai tanobada ai, momo be badu bona haheauka lasi karana idia hahedinaraia dainai, ia auka manau karana ita hahedinaraia totona. (Roma 7:19) Oibe, manau karana ita hahedinaraia totona ita hekwarahi be namo, to Iehova ena lauma helaga ese ita do ia durua manau karana ita hahedinaraia totona. (Gal. 5:22, 23) Dahaka dainai ita hekwarahi manau karana ita hahedinaraia totona?

Manau karana ese taunimanima ia veria diba. Matamanai ita herevalaia Sara ena hereva bamona, manau tauna ida ita noho neganai ita gari lasi. Iesu be haheitalai namona badina ia manau bona kara namo ia hahedinaraia. (2 Kor. 10:1) Unai dainai ena be natu maragidia be Iesu idia diba lasi to ia dekenai idia lao.​—Mar. 10:13-16.

Manau karana ese ita bona ma haida ia durua. Bema ita manau, do ita lalohisihisi eiava badu  haraga lasi. (Aon. 16:32) Danu ma haida bona ita lalokau henia taudia ita hahisia lasi dainai do ita lalohekwarahi lasi. Bona manau karana ese ita bona ma haida ia durua badina iseda hemami ita biagua bona idia ita hahisia lasi.

Herevana Iesu ena maduna be momo bona ia bisi bada, to mai manau ida taunimanima ia kara henia. Iena negai idia noho taudia be gau momo dainai idia lalohekwarahi, bona idia ura heduru idia abia. Iesu ena hereva ese idia ia hagoadaia, ia gwau: “Lau dekenai umui mai, . . . badina lau be manau bona lalomanada tauna”!​—Mat. 11:28, 29.

Edena dala ai Iesu ena manau karana ita tohotohoa diba? Baibel ita stadilaia karana amo Iesu ese taunimanima ia kara henia bona hekwakwanai ia hamaoromaoroa dalana ita dibaia. Bena, iseda manau karana ia tohoa hekwakwanai ta ia vara neganai, Iesu ena kara ita tohotohoa diba. (1 Pet. 2:21) Iesu ese manau karana ia hahedinaraia totona, ia idia durua gaudia toi mani ita herevalaia.

Iesu be manau tauna. Iesu ia gwau, ia be “manau bona lalomanada tauna.” (Mat. 11:29) Baibel ese unai kara rua ia gwauraia hebou, badina manau karana be lalomanada ida ia hegeregere. (Efe. 4:1-3) Dahaka dainai?

Manau karana ese ita do ia durua ita badu haraga lasi totona. Iesu idia gwauraia “aniani bona wain inua momo tauna” neganai, ia be edena bamona ia kara? Iena kara amo unai hereva ia hakoikoia, bona mai manau ida ia gwau, “ta ese ia karaia kara namodia ese idia hamomokania, ia be aonega tauna.”​—Mat. 11:19.

Bema ta be emu bese, toana, bona noho dalana dainai oi ia gwauraia dika, mai manau ida do oi haere, a? South Africa ai Keristani elda ta ladana Peter, ia gwau: “Ta ena hereva ese egu lalona ia hahisia neganai sibona lau nanadaia, ‘Iesu be edena bamona do ia kara?’” Danu, ma ia gwau: “Lau dibaia gauna be, namo lasi ma haida edia kerere lau laloa momo.”

Iesu ia laloparara taunimanima be goevadae lasi. Iesu ena hahediba taudia idia ura kara maorona idia karaia, to idia be goevadae lasi taudia dainai nega haida idia kerere. Hegeregere, Iesu ia do mase lasi hanuaboina ai, Petero, Iamesi, bona Ioane ia hamaoroa do idia noga noho, to idia mahuta. Iesu ia laloparara edia “lalona be ia ura, to tauanina ia manoka.” (Mat. 26:40, 41) Iesu ia diba idia be goevadae lasi taudia dainai idia dekenai ia badu lasi.

Taihu ta ladana Mandy, be guna haida edia kara ia maumauraia momo, to hari ia gaukara goada Iesu ena manau karana ia tohotohoa totona. Mandy ia gwau, “Lau laloparara ita ibounai be goevadae lasi taudia, unai dainai lau hekwarahi Iehova ese taunimanima ia laloa hegeregerena, ma haida edia kara namodia sibona lau laloa.” Iesu ese taunimanima edia manoka gaudia dainai idia ia hebogahisi henia karana ese oi ia durua mai manau ida ma haida oi kara henia totona, a?

Iesu be Dirava ia abidadama henia. Iesu be tanobada ai ia noho neganai dagedage karana ia haheaukalaia. Ia idia laloa kerere, idia gwauraia dika, bona idia hahisia. To, herevana unai ia vara, ia lalomanau badina “hahemaoro maoromaoro tauna ena imana dekenai ia sibona ia atoa.” (1 Pet. 2:23) Iesu ia diba ena guba Tamana ese ia do ia durua bona nega maorona ai, idia vara kara gageva do ia hamaoromaoroa.

Bema ta ese ita ia habadua bona mai dagedage ida ita kara, hekwakwanai do ita habadaia diba. Unai dainai Baibel ia gwau: “Taunimanima ta ena badu ese Dirava ena kara maoromaoro ia havaraia diba lasi.” (Iam. 1:20) Herevana ita laloa ita badu be maoro, to ita be goevadae lasi taudia dainai dala kererena ita badinaia diba.

Germany dekenai ia noho taihu ta ladana Cathy be inai bamona ia laloa, ‘Bema kara ta oi karaia lasi, ta ese oi do ia durua lasi.’ To, Cathy be Iehova abidadama henia karana ia dibaia neganai, ena kara ia haidaua. Ia gwau, “Hari, lau diba nega ibounai sibona gimaia totona kara ta lau karaia be anina lasi. Lau manau sibona badina lau diba Iehova ese gau ibounai do ia hamaoromaoroa.” Bema ta ese oi ia kara namo henia lasi, Iesu ese Dirava ia abidadama henia karana oi tohotohoa, unai ese oi do ia durua manau karana oi hahedinaraia noho totona.

Iesu ia gwau manau karana ita hahedinaraia neganai do ita moale. Ia gwau: “Manau taudia be idia moale.” (Mat. 5:5) Manau karana ese ita ia durua daladia haida mani ita itaia.

Manau karana ese headava lalonai idia vara hekwakwanai ia hamaoromaoroa diba. Australia ai ia noho tadikaka ta ladana Robert ia gwau: “Lau laloa namonamo lasi bona egu adavana dekenai hahisia herevadia momo lau gwauraia. To, oi badu neganai oi gwauraia hahisia herevadia oi abia giroa diba lasi. Lau lalohisihisi bada badina lau itaia lau gwauraia herevadia ese egu adavana ena lalona ia hahisia bada.”

Nega momo iseda hereva dekenai “ita kerere,” bona ita laloa namonamo lasi dainai ita gwauraia herevadia ese headava lalonai hekwakwanai momo ia havaraia diba. (Iam. 3:2) Unai bamona negadia ai, manau karana ese ita do ia durua ita lalomanau bona ita gwauraia herevadia ita biagua totona.​—Aon. 17:27.

Robert ia gaukara goada manau bona sibona biagua karana ia hahedinaraia totona. Unai ia karaia dainai dahaka ia vara? Ia gwau, “Hari inai negai, lau bona egu adavana huanai hekwakwanai ta ia vara neganai, lau gaukara goada lau kamonai namonamo, mai manau ida lau hereva, bona lau badu haraga lasi. Hari lau bona egu adavana emai hetura karana be ia goada.”

Manau karana ese ita ia durua ma haida ida tura namodia ai ita lao totona. Idia badu haraga taudia edia turadia be momo lasi. To, manau karana ese ita ia durua nega ibounai “maino” ai ita noho bona unai ese ita ia hatamonaia. (Efe. 4:2, 3) Ita herevalaia vadaeni taihu Cathy ia gwau, “Manau karana ese lau ia durua ma haida lau tura henia totona, herevana nega haida ia auka ma haida oi tura henia totona.”

Manau karana ese lalomaino ia havaraia. Baibel ese “atai amo ia mai aonegana” be manau karana bona maino ida ia hahegeregerea. (Iam. 3:13, 17) Manau tauna ena “kudouna be mai ena maino.” (Aon. 14:30) Martin, be ia gaukara goada manau karana ia hahedinaraia totona, ia gwau, “Hari, ma haida edia lalohadai lau kamonai henia, bona lau badu momo lasi, bona lau moale.”

Momokani, manau karana ita hahedinaraia totona be mai ena hekwarahi. Tadikaka ta ia gwau, “Idaunega amo ema bona hari, nega haida lau badu dikadika.” To unai bamona negadia ai, Iehova ese ita do ia hagoadaia manau karana ita hahedinaraia totona. (Isa. 41:10; 1 Tim. 6:11) Ia ese ‘iseda treinini do ia hagugurua’ bona ‘ita do ia hagoadaia.’ (1 Pet. 5:10) Bona aposetolo Paulo bamona, ita ese “Keriso ena manau karana bona ena hebogahisi” ita hahedinaraia diba.​—2 Kor. 10:1.