1-2. Witnes taudia momo be dahaka hekwakwanai idia davaria?

APOSETOLO Paulo ese Timoteo bona ita Keristani taudia ibounai ia hagoadaia iseda hesiai gaukara ita hagugurua totona. (2 Tim. 4:5) Ita ese Paulo ena sisiba ita badinaia bona Dirava ena hesiai gaukara ita karaia goadagoada. To, nega haida unai be mai ena hekwarahi. Iseda tadikaka taihu momo be idia haroro totona idia gari. (2 Tim. 4:2) Hegeregere, iseda haroro gaukara idia taravatua tanodia mani ita laloa. Iseda tadikaka taihu be haroro gaukara idia karaia, ena be idia diba dibura ruma ai do idia atodia!

² Iehova ena taunimanima ese hekwakwanai momo idia davaria dainai idia lalomanoka diba. Hegeregere, haida be hora momo lalonai idia gaukara edia famili naria totona. Idia ura edia haroro gaukara idia habadaia, to wiki dokonai edia goada be hegeregere lasi. Haida be idia haroro diba lasi badina mai edia gorere badana, idia buruka eiava ruma sibona ai idia noho. Haida idia mamia Iehova ese idia ia laloa bada lasi. Taihu ta ladana Mary * ia gwau: “Lau hekwarahi bada egu lalohadai kereredia lau koua totona bona egu goada ia ore. Unai dainai, lau lalohisihisi badina egu nega bona goada be lasi lau haroro totona.”

3. Inai stadi ai dahaka do ita herevalaia?

³ Herevana dahaka hekwakwanai ita davaria, Iehova ese ita dekenai goada ia henia diba ita haheauka bona ita hesiai henia noho. Inai atikol lalonai Iehova ese ita ia durua daladia do ita herevalaia. To, Paulo bona Timoteo edia sivarai mani ita itaia guna, ena be idia be mai edia hekwakwanai, Iehova ese idia ia durua edia hesiai gaukara idia karaia noho totona.

4. Paulo be dahaka hekwakwanai ia davaria?

⁴ Paulo be hekwakwanai momo ia davaria. Iehova ena heduru ia abia be namo badina ena inai taudia ese idia kwadia, nadi amo idia hodoa bona dibura ruma ai idia atoa. (2 Kor. 11:23-25) Paulo ia gwau nega haida ia hekwarahi ena lalohadai kereredia ia koua totona. (Roma 7:18, 19, 24) Danu ena tauanina ai “ginigini ta” ia haheaukalaia, bona ia ura Dirava ese unai do ia kokia.​—2 Kor. 12:7, 8.

5. Paulo be hekwakwanai momo ia davaria, to dahaka gaudia ia karaia?

⁵ Iehova ese Paulo dekenai goada ia henia ena hesiai gaukara ia karaia totona, herevana hekwakwanai momo ia davaria. Mani Paulo ese ia hagugurua gaudia ita herevalaia. Hegeregere, Roma ai idia hadiburaia neganai, Iuda gunalaia taudia bona gavamani taudia vairanai sivarai namona ia harorolaia goadagoada. (Kara 28:17; Fili. 4:21, 22) Danu King ena tuari taudia bona ia idia vadivadi henia taudia ia haroro henia. (Kara 28:30, 31; Fili. 1:13) Unai nega ai lauma helaga ena heduru amo Paulo ese revareva momo ia torea. Unai revareva idauidau ese unai nega ai bona hari inai nega ai Keristani taudia ia durua bada. Unai sibona lasi, to Paulo ena haheitalai ese Roma Keristani taudia ia hagoadaia, unai dainai tadikaka be “boga-auka idia hahedinaraia noho bona mai gari lasi ida Dirava ena hereva idia harorolaia.” (Fili. 1:14) Oibe, ena be Paulo be dibura ruma ai idia atoa, to ia karaia diba gaudia ese “sivarai namona harorolaia gaukarana idia durua.”​—Fili. 1:12.

6. Korinto Iharuana 12:9, 10 hegeregerena, dahaka ese Paulo ia hagoadaia ena haroro gaukara ia hagugurua totona?

⁶ Paulo ia diba ia karaia gaudia ibounai be sibona ena goada amo lasi, to Iehova ese goada ia henia. Ia gwau ia manoka neganai Dirava ena siahu be ia amo ia hedinarai goevagoeva. (2 Korinto 12:9, 10 duahia.) Paulo idia dagedage henia, dibura ruma ai idia atoa, bona hekwakwanai ma haida ia davaria, to Iehova ese ena lauma helaga amo Paulo ia hagoadaia ena haroro gaukara ia hagugurua totona.

7. Timoteo be ena hesiai gaukara ia hagugurua totona, dahaka hekwakwanai ia haheaukalaia?

⁷ Paulo ia bamoa mero matamatana Timoteo be ena hesiai gaukara ia karaia  totona Dirava ena siahu dekenai ia tabekau danu. Paulo ena misinari gaukara lalonai Timoteo ese ia bamoa. Danu, Paulo ese Timoteo ia siaia kongrigeisen ma haida hagoadaia totona. (1 Kor. 4:17) Reana Timoteo ia laloa ia hegeregere lasi unai ia karaia totona. Unai dainai Paulo ese ia hamaoroa: “Namo lasi ta ese oi ia laloa maragi badina oi be mero matamata sibona.” (1 Tim. 4:12) Danu unai nega ai, Timoteo be ‘nega momo ia gorere.’ (1 Tim. 5:23) To Timoteo ia diba lauma helaga ena heduru amo, haroro gaukara ia karaia bona ena tadikaka ia durudia diba.​—2 Tim. 1:7.

8. Hari Iehova ese edena dala ai iena taunimanima ia hagoadaia?

⁸ Hari Iehova ese iena hesiai taudia dekenai “taunimanima edia siahu ia hereaia” gauna ia henia, unai amo iena hesiai gaukara idia karaia noho diba. (2 Kor. 4:7) Iehova ese ita ia hagoadaia ia ita hesiai henia noho daladia 4 mani ita herevalaia: Guriguri, Baibel, tadikaka taihu bamoa karana bona iseda haroro gaukara.

9. Edena dala ai guriguri ese ita ia durua diba?

⁹ Guriguri amo goada ita abia. Paulo ese Efeso 6:18 ai ita ia hagoadaia “nega ibounai” Dirava do ita guriguri henia. Unai amo Dirava ese ita do ia hagoadaia. Bolivia ai ia noho tadikaka ta ladana Jonnie be hekwakwanai idauidau ia davaria neganai, Iehova ena heduru ia mamia. Iena adavana bona tama sina be nega tamona idia gorere bada herea. Jonnie ia hekwarahi idia toi ia naria totona. Iena sinana ia mase bona iena adavana bona tamana be nega daudau murinai idia namo. Jonnie be unai ia laloa lou neganai, ia gwau: “Lau lalohekwarahi bada neganai, hanaihanai lau ia durua gauna be Iehova dekenai egu hemami lau gwauraia hedinarai.” Iehova ese Jonnie dekenai goada ia henia ia haheauka totona. Bolivia ai elda ta ladana Ronald ia kamonai ena sinana be kensa gorere ia abia bona hua ta murinai ia mase. Dahaka ese ia durua ia haheauka totona? Ia gwau: “Iehova lau guriguri henia neganai egu hemami ibounai lau gwauraia hedinarai. Lau laloparara ia sibona be egu hemami ia diba namonamo.” Nega haida ita lalohekwarahi bada eiava ita diba lasi dahaka do ita gurigurilaia. To Iehova ese ita ia noia ia do ita guriguri henia, ena be ita diba lasi edena bamona iseda hemami do ita gwauraia.​—Roma 8:26, 27.

10. Heberu 4:12 hegeregerena, dahaka dainai Baibel ita duahia bona laloa dobu be gau badana?

¹⁰ Baibel amo goada ita abia. Paulo be Toretore Helagadia ia duahia amo goada bona heduru ia abia hegeregerena, ita danu be unai bamona ita karaia diba. (Roma 15:4) Baibel ita duahia bona laloa dobu neganai, Iehova ese ena lauma helaga amo ita do ia durua, ita duahia sirina ita badinaia totona. (Heberu 4:12 duahia.) Matamanai ita herevalaia tadikaka Ronald, ia gwau: “Lau moale badina hanuaboi ta ta ai Baibel duahia karana lau manadalaia. Iehova ena kara badadia bona mai lalokau ida iena hesiai taudia ia kara henia dalana lau laloa dobu. Unai ese lau ia hagoadaia lou.”

11. Edena dala ai Baibel ese taihu ta ia durua?

¹¹ Baibel ita laloa dobu neganai, ita ia durua iseda hekwakwanai ita lalohadailaia namonamo totona. Ena adavana ia mase dainai ia lalohisihisi taihu ta be Baibel amo heduru ia abia dalana mani ita itaia. Elda ta ese ia hamaoroa heduru ia abia totona,  Iobu bukana ia duahia be namo. Ia duahia matamaia neganai, Iobu ena kara dekenai ia moale lasi, bona ia gwau: “Iobu! Emu hekwakwanai oi laloa momo lasi!” To gabeai ia laloparara ia danu be Iobu bamona. Unai ese ia durua ena lalohadai ia hamaoromaoroa bona iena adavana ia mase lalohisihisina ia haheaukalaia diba.

12. Edena dala ai Iehova ese tadikaka taihu amo ita ia hagoadaia?

¹² Tadikaka taihu bamoa karana ese ita ia hagoadaia. Iehova ese tadikaka taihu amo ena hesiai taudia ia hagoadaia. Paulo ia ura bada iena tadikaka taihu ia itaia, ‘ta ta do idia hagoadaia’ totona. (Roma 1:11, 12) Matamanai ita herevalaia taihu, Mary be tadikaka taihu bamoa karana ia laloa bada. Ia gwau: “Ena be tadikaka taihu be egu hekwakwanai idia diba lasi, to Iehova ese idia ia gaukaralaia lau idia durua totona. Idia be hagoadaia herevana ta idia gwauraia o revareva ta idia torea bona unai ese lau ia hagoadaia bada. Unai ese lau ia durua taihu ma haida lau hereva henia bona edia ekspiriens amo diba lau abia. Bona elda taudia ese lau idia durua unai amo lau mamia kongrigeisen tadikaka taihu be lau idia lalokau henia.”

13. Edena dala ai kongrigeisen heboudia ai ta ta ita hagoadaia diba?

¹³ Kongrigeisen heboudia be gabu namona ta ta ita hagoadaia totona. Hebou oi lao neganai ma haida oi hagoadaia bona oi hahedinaraia idia oi laloa bada. Hegeregere hebou ta dekenai elda ta ladana Peter ese taihu ta ia hagoadaia, iena adavana be Witnes lasi tauna. Peter ia gwau: “Oi bona emu natudia 6 be hebou dekenai lau itaia neganai, unai ese lau ia hagoadaia. Nega ibounai emu natudia be dabua namodia idia karaia bona haere idia henia.” Taihu be unai ia kamonai neganai, mai moale ida ia gwau, “Emu hereva ese lau ia hagoadaia bada.”

14. Edena dala ai haroro gaukara ese ita ia durua diba?

¹⁴ Haroro gaukara amo goada ita abia. Sivarai namona ita harorolaia neganai, goada matamata ita abia, ena be taunimanima idia kamonai eiava lasi. (Aon. 11:25) Taihu ta ladana Stacy ia mamia haroro gaukara ese ia hagoadaia. Iena ruma bese tauna ta be orea amo idia atoa siri neganai, ia lalohisihisi bona sibona ia nanadaia loulou: ‘Dahaka dainai guna ia lau durua lasi?’ Hanaihanai unai hekwakwanai sibona ia laloa. Dahaka ese ia durua? Haroro gaukara! Ia haroro neganai, teritori ai do ia davaria taudia durua daladia ia laloa. Stacy ia gwau: “Unai nega ai Iehova ese lau dekenai Baibel stiuden namona ia henia. Unai ese lau ia hagoadaia. Oibe, egu mauri lalonai lau ia durua bada gauna be haroro gaukara.”

15. Mary ena hereva amo dahaka oi dibaia?

¹⁵ Ma haida be edia noho dalana dainai, reana haroro gaukara idia karaia momo lasi. Bema emu hemami be unai bamona, laloatao emu goada hegeregerena oi karaia gauna be Iehova ese ia laloa bada. Mani Mary ena haheitalai ita laloa lou. Idau gado teritori dekenai ia lao neganai, ia mamia iena gaukara ese anina namona ia havaraia lasi. Ia gwau: “Nega daudau lalonai, haroro gaukara ai hereva kwadogina ta lau gwauraia, eiava Baibel siri ta lau duahia eiava pepapepa ta sibona lau henia.” Ia mamia ia be unai gado idia herevalaia namonamo taudia bamona lasi. To ena lalohadai ia haidaua. Ia laloparara ena be unai gado ia diba namonamo lasi, to Iehova ese ia gaukaralaia diba. Ia gwau,  “Baibel ena hereva momokani be auka lasi bona ta ena mauri ia haidaua diba.”

16. Dahaka ese gorere dainai ruma sibona dekenai idia noho taudia ia hagoadaia diba?

¹⁶ Iehova ia diba ita haida ita ura haroro, to gorere dainai ruma ita rakatania diba lasi. Ia ese dala ia kehoa diba ita idia naria taudia, doketa eiava nesi ita haroro henidia totona. Bema guna ita karaia diba gaudia ita laloa momo, do ita lalomanoka diba. To bema ita laloparara Iehova be hari ita ia durua noho, do ita goada bona eda hekwakwanai be mai moale ida ita haheaukalaia diba.

17. Hadibaia Tauna 11:6 hegeregerena, dahaka dainai ita haroro noho be namo?

¹⁷ Ita diba lasi edena hereva momokani ena uhe ita hadoa be do ia tubu. (Hadibaia Tauna 11:6 duahia.) Hegeregere, mauri lagani 80 taihu ta ladana, Barbara, be hanaihanai telefon bona revareva amo ia haroro. Iena revareva ta lalonai, April 1, 2014, ena Gima Kohorona ladana “Dirava ese Oi Ia Durua Dalana” ia udaia. Ia diba lasi unai revareva be Iehova ena orea amo idia atoa siri tau bona hahine dekenai ia siaia. Idia be lagani 27 mai kahana orea murimurinai idia noho. Idia ese unai magasin idia duahia loulou. Tau ia mamia Iehova be ia ia hereva henia noho bamona. Unai headava tau bona hahine be hebou idia lao matamaia bona daudau lasi murinai orea dekenai idia vareai lou. Barbara ia moale bada badina ia torea revareva tamona ese anina namona ia havaraia!

18. Dahaka ita karaia diba Dirava ese ita ia hagoadaia totona?

¹⁸ Iehova ese dala idauidau hegeregere guriguri, Baibel, tadikaka taihu bamoa karana, bona haroro gaukara amo ita ia hagoadaia. Bema unai dala idauidau ita badinaia, ita hahedinaraia Iehova ena heduru ita abidadama henia. Unai dainai namona be hanaihanai iseda guba Tamana ita abidadama henia, badina ia be mai moale ida “ia idia badinaia momokani taudia dekenai ena goada ia hahedinaraia.”​—2 Siv. 16:9.