TAUNIMANIMA momo idia diba idaunegai Aigupito dekenai tubutubu gauna ta ladana papyrus amo pepa idia karaia bona toretore totona idia gaukaralaia. Grik bona Roma taudia danu be papyrus dekenai idia toretore. * To momo idia diba lasi papyrus amo bouti idia karaia danu.

Lagani 2,500 ma kahana gunanai, peroveta tauna Isaia ia gwau, “Etiopia ena sinavai kahanai” idia noho taudia ese “rei aukana amo idia karaia bouti amo hesiai taudia idia siaia idia lao.” Gabeai, peroveta tauna Ieremia ia gwau, Mede bona Parasa hanuana ese Babulonia do idia hadikaia bona “siriho amo idia karaia bouti” do idia gabua, unai amo Babulonia taudia do idia heau mauri lasi.​—Isa. 18:1, 2; Ier. 51:32.

Baibel be Dirava ena siahu amo idia torea dainai, Baibel idia stadilaia taudia idia diba akioleji taudia ese idia davaria gaudia amo idia hamomokania, Baibel negadiai papyrus idia gaukaralaia bouti idia karaia totona. (2 Tim. 3:16) Dahaka gaudia idia davaria? Akioleji taudia be gau momo idia davaria, bona unai ese ia hamomokania, guna Aigupito ai papyrus amo bouti idia karaia.

Aigupito taudia edia gara gabudia ai, taunimanima ese papyrus idia haboua bona bouti idia karaia edia laulau idia noho. Tatau ese papyrus idia utua, kahana maragidia ta ta idia kwatua, bena unai ibounai idia kwatua hebou. Papyrus ena gabana be palaka bamona dainai, idia kwatua hebou neganai ia goada momokani. Buka ta ladana A Companion to Ancient Egypt ia gwau, papyrus bouti edia lata be 17 mita bamona, unai amo bara 10 o 12 be kahana kahana dekenai idia atoa diba.

Aigupito ai papyrus momo be Naila Sinavai ia aru lao kourana ai idia tubu. Danu, papyrus bouti karaia dalana be auka lasi. Ena be taunimanima ese au amo bouti badadia idia karaia matamaia, to haoda bona labana taudia be papyrus amo idia karaia bouti maragidia idia do gaukaralaia noho.

Taunimanima be lagani momo papyrus bouti idia gaukaralaia. Aposetolo taudia edia negai ia noho Greek toretore tauna ta ladana, Plutarch ia gwau, unai negai taunimanima be papyrus amo idia karaia bouti idia do gaukaralaia noho.