1-2. Toretore tauna ta be dahaka ia gwau, bona hari dahaka do ita herevalaia?

HARI taunimanima milioni momo idia gwau Iesu idia abidadama henia, to iena hahediba herevadia idia badinaia lasi. (2 Tim. 4:3, 4) Toretore tauna ta ia gwau: “Bema Iesu bamona tauna ta be hari ia noho, bona Iesu ese ia gwauraia gaudia ia herevalaia, . . . unai tauna do ita dadaraia Iesu idia dadaraia bamona, a? . . . Haere be: Oibe, unai tauna do ita dadaraia.”

² Idaunegai momo be Iesu ena hahediba herevadia idia kamonai bona iena hoa karadia idia itaia, to idia abidadama henia lasi. Dahaka dainai? Stadi atikol 18 ai, taunimanima be Iesu ena hereva bona kara dainai idia dadaraia ena badina 4 ita herevalaia. Hari badina idaudia 4 do ita herevalaia. Bona taunimanima be Iesu ena murinai idia raka taudia idia dadaraia ena badina, bona gau ta ese ita do ia hamorua lasi dalana do ita herevalaia.

3. Iesu be dahaka ia karaia dainai haida ese idia dadaraia?

³ Iesu be tanobada ai ia noho neganai taunimanima idauidau ia bamoa. Ia be taga bona dagi bada taudia ida ia aniani hebou, to ogogami bona lalohisihisi taudia ia bamoa danu. Bona momo ese idia gwauraia “kara dika taudia” ia hebogahisi henia. Iesu be unai bamona ia karaia dainai hekokoroku taudia haida ese idia dadaraia bona ena hahediba taudia idia nanadaia: “Dahaka dainai takisi gogoa taudia bona kara dika taudia ida umui aniani?” Bena Iesu ia haere: “Gorere lasi taudia be doketa idia tahua lasi, to gorere taudia sibona ese doketa idia tahua. Kara maoromaoro taudia boiria totona  lau mai lasi, to lau mai kara dika taudia lau boiria idia helalo-kerehai totona.”​—Luka 5:29-32.

4. Isaia ena peroveta herevana bamona, Iuda taudia be dahaka idia diba?

⁴ Baibel be dahaka ia gwau? Mesia ia do mai lasi neganai, peroveta tauna Isaia ia gwau taunimanima ese do idia dadaraia. Unai peroveta herevana ia gwau: “Taunimanima ese ia idia inai henia bona idia ura henia lasi, . . . ia be hegeregere ena vairana toana be ita amo ia hunia. Ia idia inai henia, bona ita ese ia ita dadaraia.” (Isa. 53:3) Mesia be “taunimanima” ese do idia ura henia lasi, unai dainai Iesu ena negai Iuda taudia ese unai idia abia dae be namo.

5. Hari momo ese Iesu ena murinai idia raka taudia be edena bamona idia laloa?

⁵ Hari unai ia vara danu, a? Oibe. Dubu gunalaia taudia momo idia moale bema ladana bada taudia, taga taudia, eiava diba bada taudia be edia dubu dekenai idia lao. Bona herevana unai taudia be nega momo Dirava ena taravatu idia badinaia lasi, to idia abidia dae. Unai dubu gunalaia taudia ese Iehova ena abidadama hesiai taudia idia ura henia lasi, badina tanobada taudia edia matanai idia be anina lasi. Paulo ena hereva bamona, Dirava be taunimanima ese idia “laloa maragi” taudia ia abia hidi. (1 Kor. 1:26-29) Oibe, Iehova ese ena abidadama hesiai taudia ibounai ia laloa bada.

6. Mataio 11:25, 26 hegeregerena, edena dala ai Iesu ita tohotohoa diba?

⁶ Edena dala ai iseda abidadama ita hagoadaia noho diba? (Mataio 11:25, 26 duahia.) Namo lasi tanobada taudia ese Dirava ena taunimanima idia laloa dalana ese oi ia hamorua. To namona be oi abia dae, Iehova be manau taudia sibona ia gaukaralaia iena ura idia karaia totona. (Sal. 138:6) Mani oi laloa, Iehova be unai aonega bona diba bada lasi taudia amo gau momo ia hagugurua.

7. Dahaka dainai Iesu ese Farisea taudia ia gwauraia koikoi taudia, bona dahaka idia karaia?

⁷ Iesu ese iena negai idia noho tomadiho gunalaia taudia ia gwau henia, badina taunimanima dekenai Iehova tomadiho henia dalana maorona idia hadibaia lasi. Hegeregere, ia ese Farisea taudia edia koikoi karana ia hahedinaraia. Idia ese imana huria karana idia laloa bada, to tama sina naria ena maduna idia laloa bada lasi. (Mat. 15:1-11) Iesu ena hahediba taudia be reana iena hereva dainai idia hoa bona idia nanadaia: “Oi laloparara Farisea taudia be emu hereva dainai idia badu, a?” Iesu ia haere: “Egu guba Tamana ese ia hadoa lasi au ibounai be do ia kokia. Rakatanidia, idia be matakepulu hakaua taudia. Bema matakepulu tauna ta ese matakepulu tauna ma ta ia hakaua, idia ruaosi be guri lalonai do idia moru.” (Mat. 15:12-14) Ena be tomadiho gunalaia taudia be Iesu ena hereva dainai idia badu, to unai ese ia koua lasi hereva momokani ia gwauraia totona.

8. Edena dala ai Iesu ese ia hahedinaraia Dirava be tomadiho ibounai ia abia dae lasi?

⁸ Iesu ia gwau tomadiho haida edia hahediba herevadia be koikoi. Ia gwau lasi Dirava ese tomadiho ibounai ia abia dae. To, ia gwau momo be mase ia lao henia dalana dekenai do idia raka, bona haida sibona be mauri ia lao henia dalana dekenai do idia raka. (Mat. 7:13, 14) Ia hahedinaraia haida do idia gwau Dirava idia hesiai henia, to kara amo unai idia hahedinaraia lasi. Ia gwau: “Peroveta koikoi taudia dainai do umui naria namonamo, edia toana be mamoe bamona, to edia lalona be idia hitolo  bada uda sisia bamona. Edia huahua amo idia do umui diba.”​—Mat. 7:15-20.

9. Iesu ese edena hahediba hereva koikoidia ia gwauraia hedinarai?

⁹ Baibel be dahaka ia gwau? Baibel ia peroveta Mesia be Iehova ena ruma do ia ura henia bada, ena lalona ai unai ura be lahi bamona. (Sal. 69:9; Ioa. 2:14-17) Unai dainai, Iesu ese tomadiho koikoi edia hahediba herevadia bona kara kereredia ia gwauraia hedinarai. Hegeregere, Farisea taudia idia abia dae souli ia mase diba lasi, to Iesu ia gwau mase taudia idia mahuta. (Ioa. 11:11) Sadukea taudia idia gwau toreisi lou be lasi, to Iesu be iena turana Lasaro ia hatorea isi lou. (Ioa. 11:43, 44; Kara 23:8) Farisea taudia idia gwau ita dekenai idia vara gaudia ibounai be siahu ta eiava Dirava ese ia biagua, to Iesu ia gwau taunimanima be abia hidi idia karaia diba Dirava do idia hesiai henia eiava lasi.​—Mat. 11:28.

10. Dahaka dainai momo be iseda hahediba herevadia idia ura henia lasi?

¹⁰ Hari unai ia vara danu, a? Oibe. Ita ese Baibel amo taunimanima dekenai ita hahedinaraia tomadiho haida edia hahediba herevadia be koikoi, unai dainai ita idia ura henia lasi. Dubu gunalaia taudia ese taunimanima idia hadibadia Dirava ese kara dika taudia be hel lahina dekenai ia panisidia, unai amo idia gari bona edia hereva sibona idia badinaia. To ita be Iehova, lalokau Diravana, ita tomadiho henia dainai, ita hahedinaraia unai hahediba herevana be koikoi. Ma danu dubu gunalaia taudia ese taunimanima idia hadibaia souli be ia mase diba lasi. Bema unai be momokani, anina be mase taudia do idia toreisi lou lasi. Ita hahedinaraia unai be Baibel ena hahediba herevana lasi. Unai sibona lasi, to tomadiho momo idia gwau, taunimanima dekenai do idia vara gaudia be Dirava eiava siahu gauna ma ta ese ia abia hidi vadaeni. To ita ese taunimanima ita hadibaia, idia be mai edia ura kwalimu dainai, abia hidi idia karaia diba Dirava idia tomadiho henia totona. Ita hahedinaraia dubu gunalaia taudia be hahediba koikoi taudia neganai, dahaka idia karaia? Idia badu dikadika!

11. Ioane 8:45-47 hegeregerena, Dirava ia ura iena taunimanima be dahaka do idia karaia?

 ¹¹ Edena dala ai iseda abidadama ita hagoadaia noho diba? Bema hereva momokani ita ura henia, namona be Dirava ena hereva ita kamonai. (Ioane 8:45-47 duahia.) Satani be unai ia karaia lasi. To, ita be hereva momokani do ita dadaraia lasi. (Ioa. 8:44) Dirava ia ura iena taunimanima be Iesu do idia tohotohoa, ‘kara dika do idia inai henia bona kara namo do idia dogoatao auka.’​—Roma 12:9; Heb. 1:9.

12. Dahaka dainai Iuda taudia momo ese Iesu idia dadaraia?

¹² Dahaka badina ma ta dainai Iuda taudia ese Iesu idia dadaraia? Paulo ia gwau: “Ita ese Keriso be au dekenai idia kokoa kau ena sivarai ita harorolaia. Iuda taudia dekenai unai idia abia dae be auka.” (1 Kor. 1:23) Iesu be au ta dekenai idia hamasea dainai, Iuda taudia dekenai ia be Mesia lasi, to taravatu utua tauna bona kara dika tauna.​—Deut. 21:22, 23.

13. Iesu idia dadaraia Iuda taudia be dahaka idia lalopararalaia lasi?

¹³ Iesu idia abia dae lasi Iuda taudia be idia laloparara lasi Iesu be kerere ta ia karaia lasi, to haida ese idia samania koikoi bona idia kara auka henia. Sanhedrin be kota karaia maoromaoro dalana idia badinaia lasi, to Iesu hahemaoro henia totona idia haboua haraga bona koikoi dalanai idia hahemaoro henia. (Luka 22:54; Ioa. 18:24) Iesu idia samania herevadia bona hamomokania gaudia idia kamonai lasi, to diadi taudia ese “Iesu hamasea totona ia idia samania koikoi taudia idia tahua.” Unai ia vara lasi neganai, hahelaga tauna ese Iesu ia doria hereva kererena ia gwauraia totona, bena unai amo do idia samania. Unai ibounai be taravatu hegeregerena idia karaia lasi. (Mat. 26:59; Mar. 14:55-64) Iesu be mase amo ia toreisi lou murinai, unai diadi taudia be kerere badana ma ta idia karaia. Idia ese guria gabuna idia gimaia Roma soldia taudia dekenai “siliva moni momo herea idia henia,” bona  idia hamaorodia do idia koikoi idia gwau Iesu ena hahediba taudia ese ena tauanina idia henaoa.​—Mat. 28:11-15.

14. Baibel siri be edena bamona Mesia ena mase ia perovetalaia?

¹⁴ Baibel be dahaka ia gwau? Ena be Iuda taudia momo idia laloa Mesia do ia mase lasi, to Baibel ena peroveta herevana ia gwau: “Ena mauri ia atoa diho bona ia mase, bona kara dika taudia ida ia mase. Taunimanima momo edia kara dika ia huaia, bona kara dika taudia durua totona ia hereva.” (Isa. 53:12) Unai dainai, Iesu be kara dika tauna bamona idia hamasea neganai, idia dadaraia be maoro lasi.

15. Dahaka dainai haida ese Iehova ena Witnes taudia idia dadaraia?

¹⁵ Hari unai ia vara danu, a? Oibe! Iesu idia samania koikoi bona idia gwau ia be kerere ia karaia. Bona hari Iehova ena Witnes taudia dekenai unai idia karaia danu. Mani inai haheitalai haida ita itaia. Lagani 1930 bona 1940 lalodiai, United States dekenai iseda Dirava tomadiho henia karana dainai idia kota henidia loulou. Diadi haida be ita idia inai henia. Quebec, Canada ai, Katolik dubu bona gavamani be idia gaukara hebou iseda gaukara idia koua totona. Pablisa momo be edia neiba taudia dekenai Dirava ena Basileia idia herevalaia dainai dibura ruma ai idia atoa. Germany dekenai, Nazi gavamani ese abidadama tadikaka matamatadia momo ia hamasea. Bona vanegai lagani lalodiai, iseda tadikaka momo be Baibel idia herevalaia dainai dibura ruma ai idia atodia, badina idia gwau unai be “gavamani gwau-edeede henia karana.” Russia gado ena New World Translation of the Holy Scriptures idia taravatua danu. Idia gwau ia be gavamani gwau-edeede henia bukana, badina Iehova ena ladana ia noho.

16. Ioane Ginigunana 4:1 hegeregerena, dahaka dainai sivarai koikoidia ita dadaraia be namo?

¹⁶ Edena dala ai iseda abidadama ita hagoadaia noho diba? Idia vara gaudia edia badina oi tahua. Ororo Harorona ai, Iesu be ena hereva idia kamonai taudia ia hamaoroa haida ese “hereva koikoi idauidau” amo idia do idia gwauraia dika. (Mat. 5:11) Unai hereva koikoidia ia gwauraia tauna badana be Satani. Ia ese ita idia inai henia taudia ia gaukaralaia, sivarai koikoidia idia gwauraia totona. (Apok. 12:9, 10) Namona be ita idia inai henia taudia edia hereva koikoidia ita dadaraia. Namo lasi unai bamona hereva koikoidia dainai iseda abidadama ia manoka.​—1 Ioane 4:1 duahia.

17. Dahaka dainai haida be Iesu idia dadaraia?

¹⁷ Iesu ena mase negana ia kahirakahira lalonai, ena aposetolo tauna ta ese ena mase dalana ia karaia. Aposetolo tauna ma ta be nega toi ia gwau Iesu ia diba lasi. Bona Iesu idia dogoatao hanuaboina ai, ena aposetolo taudia ibounai ese ia idia rakatania. (Mat. 26:14-16, 47, 56, 75) Iesu be unai gaudia dekenai ia hoa lasi. Ia peroveta danu unai gaudia do idia vara. (Ioa. 6:64; 13:21, 26, 38; 16:32) Unai idia itaia taudia haida be reana idia laloa, ‘Bema Iesu ena aposetolo taudia be unai bamona idia karaia, lau ura lasi idia lau bamoa!’

18. Iesu ia do mase lasi neganai, dahaka peroveta herevadia idia guguru?

¹⁸ Baibel be dahaka ia gwau? Lagani handred momo gunanai, Iehova be Baibel amo ia hahedinaraia Mesia ena mase dalana be siliva moni 30 amo do idia karaia. (Sek. 11:12, 13) Bona Iesu ena turana namona ta ese unai do ia karaia. (Sal. 41:9) Danu, peroveta tauna Sekaraia ia gwau:  “Mamoe naria tauna oi alaia bona mamoe serina be gabu idauidau dekenai do idia heau lao.” (Sek. 13:7) Kudou-maoro taudia be idia vara gaudia dainai Iesu idia dadaraia lasi. Idia itaia ia dekenai peroveta herevadia idia guguru neganai, unai ese edia abidadama ia hagoadaia.

19. Kudou-maoro taudia be dahaka idia diba?

¹⁹ Hari unai ia vara danu, a? Oibe. Hari inai negai, Witnes taudia haida be hereva momokani idia rakatania, haida be aposteit taudia ai idia lao, bona idia ura ma haida idia hakaua siri. Iehova ena Witnes taudia idia gwauraia dika totona, idia ese niuspepa, reidio, TV bona intanet amo sivarai koikoidia idia halasia. To, unai ese kudou-maoro taudia ia hakaua kerere lasi, badina idia diba Baibel ese unai ia perovetalaia.​—Mat. 24:24; 2 Pet. 2:18-22.

20. Ena be haida ese hereva momokani idia rakatania, to dahaka ese ita do ia hagoadaia? (2 Timoteo 4:4, 5)

²⁰ Edena dala ai iseda abidadama ita hagoadaia noho diba? Namona be hanaihanai Baibel ita stadilaia, ita guriguri, bona Iehova ese ita ia henia gaukara dekenai ita bisi. (2 Timoteo 4:4, 5 duahia.) Bema ita abidadama, sivarai koikoidia ita kamonai neganai, do ita gari lasi. (Isa. 28:16) Ena be haida ese hereva momokani idia rakatania, to Iehova, iena Hereva bona tadikaka taihu lalokau henia karana ese ita do ia durua ita moru lasi totona.

21. Ena be momo ese ita harorolaia sivaraina idia dadaraia, to dahaka ita abia dae momokani?

²¹ Iesu ena negai, momo be ia idia dadaraia. To, momo be ia idia abia dae, hegeregere Sanhedrin ena memba ta bona “hahelaga taudia momo.” (Kara 6:7; Mat. 27:57-60; Mar. 15:43) Hari inai negai danu, taunimanima milioni momo ese Iesu idia abia dae. Dahaka dainai? Badina Baibel ena hereva momokani idia diba bona idia ura henia. Dirava ena Hereva ia gwau: “Emu taravatu idia ura henia bada taudia dekenai maino be bada, gau ta ese idia ia hamorua diba lasi.”​—Sal. 119:165.