1. Apokalupo bukana ese Dirava ena taunimanima be edena bamona ia herevalaia?

 APOKALUPO bukana ese ia hahedinaraia Dirava ena Basileia be guba ai ia lohia noho bona Satani be guba amo idia negea diho. (Apok. 12:1-9) Anina be guba ai idia noho taudia dekenai maino ia vara, to ita dekenai hekwakwanai momo ia havaraia. Dahaka dainai? Badina Satani ia badu bona tanobada ai Iehova idia hesiai henia taudia ia dagedage henia.​—Apok. 12:12, 15, 17.

2. Dahaka ese ita ia durua Iehova ita badinaia noho totona?

² Ena be Satani ese ita ia dagedage henia, to edena dala ai Iehova ita badinaia noho diba? (Apok. 13:10) Ita do ia durua gauna ta be, vaira nega ai do idia vara gaudia ita diba be namo. Hegeregere, Apokalupo bukana ai, aposetolo Ioane ese kahirakahira do ita moalelaia hahenamo haida ia herevalaia. Unai hahenamo ta be, Dirava ese ena inai taudia do ia haorea. Apokalupo bukana ese Dirava ena inai taudia bona idia dekenai do ia vara gauna ia herevalaia dalana mani ita itaia.

3. Apokalupo bukana ese ia herevalaia toa o laulau herevadia haida be dahaka?

³ Apokalupo bukana ena siri ginigunana ese ia hahedinaraia, do ita duahia sivaraidia be “toa” eiava laulau herevadia. (Apok. 1:1) Bena dagedage animal haida ia herevalaia, idia be Dirava ena inai taudia idia laulaulaia. Hegeregere, “dagedage  animal ta be davara amo ia daekau.” Iena “doana be 10, [bona] iena kwarana be 7.” (Apok. 13:1) Unai dagedage animal murinai, “dagedage animal ma ta . . . be tano amo ia daekau.” Unai dagedage animal be huala bamona ia hereva bona “lahi be guba amo tanobada dekenai ia hadihoa.” (Apok. 13:11-13) Bena dagedage animal idauna ma ta ia hedinarai, ia be “dagedage animal kakakakana,” bona ia latanai ariara hahinena ia helai. Unai dagedage animal toi be lagani momo lalonai Iehova Dirava bona ena Basileia idia tuari henia. Unai dainai, unai animal ta ta ita diba be mai anina bada.​—Apok. 17:1, 3.

4-5. Daniela 7:15-17 ese edena dala ai ita ia durua laulau herevadia edia anina ita lalopararalaia totona?

⁴ Dirava ena inai taudia ita diba totona, namona be dagedage animal ta ta bona ariara hahine ese ia laulaulaia gaudia ita lalopararalaia. Baibel sibona ese unai do ia hahedinaraia namonamo. Apokalupo ena laulau herevadia momo be Baibel buka ma haida ese ia herevalaia vadaeni. Hegeregere, peroveta tauna Daniela ese nihi ta lalonai “davara amo dagedage animal badadia 4 idia daekau” ia itaia. (Dan. 7:1-3) Unai animal ese idia laulaulaia gaudia be Daniela ese ia herevalaia. Unai dagedage animal badadia be “king” o gavamani 4 ia laulaulaia. (Daniela 7:15-17 duahia.) Unai amo ita laloparara Apokalupo ese ia gwauraia dagedage animal ta ta be politikol oreadia ia herevalaia danu.

⁵ Apokalupo ese ia herevalaia toa o laulau herevadia haida mani ita laloa. Bona Baibel ese ita do ia durua unai toa ita lalopararalaia totona. Ita ese dagedage animal ta ta do ita herevalaia: Ginigunana be, animal ese idia laulaulaia gaudia. Iharuana be, unai animal dekenai idia vara gaudia. Ihatoina be, ita dekenai do idia vara gaudia edia anina.

6. Apokalupo 13:1-4 ese ia herevalaia dagedage animal mai ena kwarana 7 be dahaka ia laulaulaia?

⁶ Dagedage animal mai ena kwarana 7 be dahaka ia laulaulaia? (Apokalupo 13:1-4 duahia.) Unai dagedage animal ena toana be lepadi bamona, ena aena be bea ena aena bamona, ena uduna be laiona ena uduna bamona, bona ena doana be 10. Unai dagedage animal ena toana be Daniela karoa 7 ese ia herevalaia dagedage animal 4 edia toana ta ta ida idia hegeregere. To Apokalupo bukana ai, unai dagedage animal 4 edia toana be dagedage animal tamona dekenai idia hedinarai. Unai dagedage animal ese gavamani eiava basileia tamona ia laulaulaia lasi. Unai animal be “iduhu ibounai, kopi idauidau, gado ibounai, bona bese ibounai ia biagua.” Unai ese ia hahedinaraia ena siahu be bada. (Apok. 13:7) Oibe, unai dagedage animal be politikol oreadia ibounai ia laulaulaia, bona idaunega amo ema bona hari idia ese taunimanima idia lohiaia noho. *​—Had. 8:9.

7. Dagedage animal ena kwarana ta ta ese dahaka idia laulaulaia?

⁷ Dagedage animal ena kwarana ta ta ese dahaka idia laulaulaia? Apokalupo karoa 17 ese ita ia durua unai henanadai ena haere ita davaria totona, badina unai karoa be karoa 13 ese ia herevalaia animal ena laulau ia hahedinaraia. Apokalupo 17:10 ia gwau: “King 7 idia noho, idia 5 be idia moru vadaeni, bona idia ta be hari ia do noho, to ma ta be ia do ginidae lasi, to ia ginidae neganai, nega sisina do ia noho.” Satani ese ia gaukaralaia gavamani ibounai amo, gavamani 7 be “kwarana” ta ta  bamona badina edia siahu be bada. Unai basileia badadia ese Dirava ena taunimanima idia lohiaia o biagua auka. Aposetolo Ioane ena negai, idia 5 be idia lohia: Aigupito, Asuria, Babulonia, Mede Parasa, bona Gris. Ioane ese matahanai ia itaia neganai, basileia namba 6 be ia do lohia, unai be Roma. Edena gavamani be kwarana namba 7 o ginigabena?

8. Dagedage animal ena kwarana namba 7 be daika ia laulaulaia?

⁸ Daniela bukana ese ia perovetalaia herevana amo dagedage animal ena kwarana namba 7 do ita dibaia. “Lohiabada ena dina” eiava dokona negana lalonai, edena basileia badana ia lohia noho? (Apok. 1:10) Ia be Anglo-America Basileia Badana. Unai basileia be United Kingdom bona United States of America idia hatamonaia. Unai dainai ita gwau diba unai basileia be Apokalupo 13:1-4 ese ia herevalaia dagedage animal ena kwarana namba 7.

9. Dagedage animal ena “doana be rua, mamoe natuna ena doana bamona” ese daika ia laulaulaia?

⁹ Apokalupo karoa 13 ma ia gwau, unai kwarana namba 7, Anglo-America Basileia Badana, be dagedage animal bamona ia kara danu. Unai animal ena “doana be rua, mamoe natuna ena doana bamona, to huala ta bamona ia hereva matamaia.” Ia ese “hoa kara badadia ia karaia, bona taunimanima vairanai lahi be guba amo tanobada dekenai ia hadihoa.” (Apok. 13:11-15) Apokalupo karoa 16 bona 19 ese unai dagedage animal ia gwauraia “peroveta koikoi tauna.” (Apok. 16:13; 19:20) Danu, Daniela ia gwau, Anglo-America Basileia Badana be “dika bada herea do ia mailaia.” (Dan. 8:19, 23, 24.) Oibe, Tanobada Tuarina Iharuana ai unai ia vara. Unai tuari ai idia gaukaralaia bomu goadadia rua be Britain bona America ena saiens taudia ese idia karaia. Unai dala amo Anglo-America Basileia Badana ese “lahi be guba amo tanobada dekenai ia hadihoa” bamona.

10. “Dagedage animal ginigunana ena laulau” be daika ia laulaulaia? (Apokalupo 13:14, 15; 17:3, 8, 11)

¹⁰ Dagedage animal ma ta do ita herevalaia. Iena toana be dagedage animal mai ena kwarana 7 bamona, to ena kala be kakakaka. Ia idia gwauraia “dagedage animal ginigunana ena laulau” bona ia be “king namba 8.” * (Apokalupo 13:14, 15; 17:3, 8, 11 duahia.) Ioane ia gwau unai “king” be ia hedinarai, bena ia boio, bona gabeai ia hedinarai lou. Unai ese United Nations oreana ia herevalaia goevagoeva, ia ese tanobada ena politikol oreadia edia ura ia habadaia! Matamanai ia be League of Nations. Bena Tanobada Tuarina Iharuana ai ena gaukara ia doko. Gabeai ia hedinarai lou bona idia gwauraia United Nations.

11. Dagedage animal o gavamani idauidau be dahaka idia karaia, bona dahaka dainai ita gari lasi?

¹¹ Unai dagedage animal o gavamani idauidau ese taunimanima idia hagoadaia, Iehova bona ena taunimanima idia hahisia totona. Laulau dalanai, idia ese “tanobada ibounai edia king taudia” idia haboua Aramagedono tuarina eiava “Siahu Ibounai Diravana ena dina badana ena tuari totona.” (Apok. 16:13, 14, 16) To do ita gari lasi. Iseda Dirava badana Iehova, be kara ta do ia karaia haraga iena lohia siahuna idia durua taudia ia hamauria totona.​—Ese. 38:21-23.

12. Dagedage animal ibounai dekenai dahaka do ia vara?

¹² Dagedage animal ibounai dekenai dahaka do ia vara? Apokalupo 19:20 ia gwau: “Idia ese dagedage animal bona peroveta  koikoi tauna idia dogoatao, unai peroveta koikoi tauna be dagedage animal vairanai toa idauidau ia karaia, unai amo dagedage animal ena maka idia abia bona ena laulau idia tomadiho henia taudia ia hakaua kerere. Vadaeni dagedage animal bona peroveta koikoi tauna idia do mauri noho lalonai, idia ruaosi be lahi gohuna lalonai idia negea diho, unai lahi be salipa amo ia araia noho.” Unai dainai, Dirava idia inai henia gavamani be idia do lohia noho lalonai, Dirava ese do ia hadikadia ore.

13. Gavamani haida ese Keristani taudia dekenai dahaka idia karaia?

¹³ Unai ena anina ita dekenai be dahaka? Ita be Keristani taudia dainai, Dirava bona ena Basileia ita badinaia noho be namo. (Ioa. 18:36) Unai ita karaia totona, politikol oreadia ita durua lasi o ita gini siri be namo. To unai be auka, badina gavamani oreadia be ita idia doria iseda hereva bona kara amo idia ita durua totona. Bona unai gavamani oreadia idia durua taudia ese dagedage animal ena maka idia abia. (Apok. 13:16, 17) To, unai maka idia abia taudia be Iehova ese do ia lalonamo henidia lasi bona mauri hanaihanai do idia abia lasi. (Apok. 14:9, 10; 20:4) Unai dainai, ena be gavamani ese ita idia doria idia ita durua totona, to ita gini siri momokani be gau badana!

14. Apokalupo 17:3-5 hegeregerena, aposetolo Ioane ese dahaka ia itaia?

¹⁴ Aposetolo Ioane be ia itaia gauna dainai ia “hoa bada.” Dahaka ia itaia? Hahine ta be unai dagedage animal ta latanai ia helai. (Apok. 17:1, 2, 6) Unai hahine be “ladana bada ariara hahine” bona idia gwauraia “Babulonia Badana.” Ia be “tanobada ena king taudia” ida “matabodaga karadia” ia karaia.​—Apokalupo 17:3-5 duahia.

15-16. “Babulonia Badana” be daika, bona edena bamona unai ita diba?

¹⁵ “Babulonia Badana” be daika? Unai hahine be politikol oreadia ia laulaulaia lasi, badina Apokalupo bukana ia gwau ia be tanobada ena politikol oreadia ida matabodaga karadia ia karaia. (Apok. 18:9) Bona ia be unai dagedage animal edia latanai ia helai karana ese ia hahedinaraia, ia ura politikol oreadia ia biagua. Danu, ia be Satani ena tanobada ena bisinesi oreadia ia laulaulaia lasi. Badina Apokalupo bukana ese unai bisinesi oreadia ia gwauraia, “tanobada ena hoihoi taudia.”​—Apok. 18:11, 15, 16.

¹⁶ Haida idia gwau idia be Dirava idia hesiai henia, to kaivakuku idia tomadiho henia eiava dala ma haida ai tanobada idia tura henia. Unai bamona taudia be Baibel ese ia herevalaia neganai, inai hereva “heudahanai” ia gaukaralaia. (1 Siv. 5:25; Iam. 4:4) To, mai abidadama ida Dirava idia hesiai henia taudia be Baibel ese ia herevalaia neganai, inai hereva “kara goeva” eiava “rami-hebou taudia” ia gaukaralaia. (2 Kor. 11:2; Apok. 14:4, ftn.) Idaunegai Babulonia be tomadiho koikoi karadia amo ia honu. Unai dainai, Babulonia Badana be tomadiho koikoi karadia ibounai ia laulaulaia. Momokani, unai hahine be tomadiho koikoi oreadia ibounai ia laulaulaia.​—Apok. 17:5, 18; Iseda websait jw.org ai atikol ladana, “What Is Babylon the Great?” itaia.

17. Babulonia Badana dekenai dahaka do ia vara?

¹⁷ Babulonia Badana dekenai dahaka do ia vara? Apokalupo 17:16, 17 ese unai henanadai ia haerelaia, ia gwau: “Oi itaia vadaeni doana 10 bona dagedage animal ese ariara hahine do idia inai henia bona ena gau ibounai do idia kokia bona kopina kavakava do idia rakatania. Vadaeni iena tauanina do idia ania, bona lahi dekenai do idia  gabua ore. Badina Dirava ese iena palani be edia kudouna dekenai ia atoa.” Oibe, Iehova ese bese ibounai do ia doria unai amo dagedage animal kakakakana, eiava United Nations oreana, do idia gaukaralaia tomadiho koikoi oreadia ibounai idia dagedage henia bona hadikaia ore totona.​—Apok. 18:21-24.

18. Edena dala ai Babulonia Badana ita dadaraia diba?

¹⁸ Unai ena anina ita dekenai be dahaka? “Iseda Dirava . . . ena matanai ia goeva bona miro lasi tomadiho dalana” ita badinaia noho be gau badana. (Iam. 1:27) Babulonia Badana ena hahediba hereva koikoidia, dina badadia moalelaia karana, kara maoromaoro lasi taravatudia, bona babalau karadia ita dadaraia be gau badana! Bona ma haida ita hadibaia ‘ia amo idia raka-lasi’ totona, unai amo iena kara dika dainai Dirava ese idia do ia hadikaia lasi.​—Apok. 18:4.

19. “Huala badana ta, ia be kakakaka” be daika?

¹⁹ Apokalupo bukana ese “huala badana ta, ia be kakakaka” ia herevalaia. (Apok. 12:3) Unai huala ese Iesu bona ena aneru ia tuari henidia. (Apok. 12:7-9) Ia ese Dirava ena taunimanima ia hahisia, bona dagedage animal eiava gavamani dekenai siahu ia henia. (Apok. 12:17; 13:4) Unai huala be daika? Ia be “idaunegai gaigaina, iena ladana be Diabolo bona Satani.” (Apok. 12:9; 20:2) Ia ese Iehova idia inai henia taudia ibounai ia biagua.

20. Huala dekenai dahaka do ia vara?

²⁰ Huala dekenai dahaka do ia vara? Apokalupo 20:1-3 ia gwau aneru ta ese Satani be guri dobu masemase lalonai do ia negea diho, unai be hegeregere dibura ruma ai do ia noho. Unuseniai ia noho lalonai, ia ese “tanobada besedia do ia hakaua kerere lou lasi ela bona lagani 1,000 idia ore.” Dokonai, Satani bona ena demoni be “lahi bona salipa gohuna lalonai idia negea diho,” anina be do idia hadikaia ore momokani. (Apok. 20:10) Mani oi laloa, tanobada dekenai Satani bona ena demoni do idia noho lasi. Unai be nega namo hereana, ani?

21. Dahaka dainai Apokalupo bukana dekenai ita duahia gaudia dainai ita moale?

²¹ Apokalupo bukana ese ia herevalaia gaudia edia anina ita lalopararalaia dainai goada ita abia! Ita ese Iehova ena inai taudia ita dibaia bona idia dekenai do ia vara gauna ita dibaia danu. Oibe, “inai peroveta hereva ia duahia badabada tauna be do ia moale, bona inai hereva idia kamonai . . . taudia be do idia moale”! (Apok. 1:3) To, Dirava ena inai taudia idia hadikaia neganai, abidadama taudia be dahaka hahenamo idauidau do idia moalelaia? Atikol 21 ai unai do ita herevalaia.